រឿងមាណព សត្វលា និងឆ្កែ

- បទពាក្យ៧ -

១-	ថ្លាថ្លែងសម្តែងតួនាទី	មាណពសម្ភីលក់គ្រឿងទេស
	ត្រាច់លក់រាល់ថ្ងៃមិនដែលធ្វេស	លាអូសរទេះជួយកម្លាំង ។

២-	ផ្ទះមួយចុងភូមិជាជម្រក	រសៀលវិលមកវស្សាប្រាំង
	ចោរខ្មួយចូលផ្ទះឆ្កែតទាំង	ព្រុសដេញប្រឆាំងធ្មេញសស្ងាច ។

៣-	យប់មួយអាកាសធាតុត្រជាក់	ក្រោយពេលភ្លៀងធ្លាក់ឆ្កែកំណាច
	លង់លក់តាមម្ចាស់ចោរលែងខ្លាច	មិនមានឆ្កែកាចចោរចូលផ្ទះ ។

៤-	លាឈ្មោលសម្គមមើលឃើញចោរ	ស្រែកផ្អើលឆោឡោលាន់ឮលះ
	ស្រែកជំនួសឆ្កែប្រឹងននះ	សូរសព្ទលាន់ជះម្ចាស់ខានដេក ។

៥-	ខឹងលាស្ទុះស្ទាចាប់ដំបង	សំពងក្បាលខ្នងមួយក្រឡេក
	លាប្រកាច់ដួលដូចប្រាសដេក	ងាប់ក្បែរគុម្ពចេកម្ចាស់ស្តាយក្រោយ ។

៦-	ក្រឡេកឃើញស្នាមជើងចោរក្បែរ	ងាកមើលទៅឆ្កែលក់បណ្តោយ
	គិតថ្ងៃស្អែកបាត់ម៉ូយលក់ឱ្យ	គិតខុសស្តាយក្រោយវាយលាស្លាប់ ។