ស្រីស្រស់បុរសល្អ

- បទពាក្យ៧ -

១-	ស្រស់បញ្ចពិធកល្យាណី	លម្អស្រស់ស្រីមានប្រាំយ៉ាង
	កុសលកំណើតបានកសាង	ល្អវ័យសម្អាងដូចគេច្នៃ ។

២-	លម្អសព្វទាំងកេសាសក់	រលូនមិនតក់គ្រប់សរសៃ
	លម្អធ្មេញសដូចពេជ្រច្នៃ	លម្អរាល់ថ្ងៃបបូរមាត់ ។

៣-	កាយវាចាចិត្តល្អសោភា	ចង់ជួបពុំងាមិនប្រែព្រាត់
	ការងារតូចធំមិនភ្លាំងភ្លាត់	ជំនាញចេះស្ទាត់បញ្ញាខ្ពស់ ។

៤-	បុរសឃើញគិតចិត្តគួចស្នេហ៍	ល្អរាល់ថ្ងៃខែចង់រួមរស់
	ប្រឹងប្រែងរៀនសូត្រឱ្យខ្ពង់ខ្ពស់	ថ្កើងស័ក្តិមានយសខ្ពស់ថ្លាថ្លៃ ។

៥-	ហាត់ពត់លត់ដំកាយវាចា	អប់រំចិន្តារៀនកែខៃ
	ប្រឹងប្រែងធ្វើការទាំងយប់ថ្ងៃ	ទ្រព្យបានចូលដៃគ្រងរក្សា ។

៦-	ញាតិមិត្តកល្យាណបានរាប់រក	ពឹងពាក់ទៅមកគ្រប់ទិសា
	ក្រមច្បាប់គោរពគ្រប់អាត្មា	រស់សោយសុខាបុរសល្អ ។