ចំណី និង ចំណង់

- បទកាកគតិ -

១-	បុរាណចែងចារ	សព្វសត្វមនុស្សា	ត្រូវការចំណី
	ប្រសិនជាអត់	ប្រាកដគ្មានឆី	សត្វក្នុងលោកីយ៍
		ស្លាប់បង់អសារ ។

២-	បើអត់ចំណី	ពិតជាឃ្លានឆី	ឃ្លានលុះមរណា
	ស្រេកឃ្លានពន់ពេក	ដើរដេកត្រូវការ	ស្លាប់ស្លុងពិចារណ៍
		ដោយសារចំណង់ ។

៣-	ទាំងកាយទាំងចិត្ត	ត្រូវការជាប់ស្អិត	ត្រអាលឃ្លានចង់
	ត្រូវការបំផុត	ប្រាកដអស់ត្រង់	មោហោតម្រង់
		លេងល្បិចក្របួច ។

៤-	កុំយកពងមាន់	ផ្ញើក្អែកយល់គ្រាន់	ថាឯងមុតស្រួច
	ខ្វះខាតការគិត	គំនិតស្តើងស្តួច	ធ្លោយបើកបង្អួច
		ក្អែកលួចឱ្យហោច ។

៥-	កុំយកជាតិស្ករ	រសផ្អែមគ្រប់ពណ៌	ទៅផ្ញើស្រមោច
	ខ្វះខាតត្រូវការ	ប្រាថ្នាប្រយោជន៍	ក្រគិតដាច់ដោច
		ហោចបាត់អស់ស្ករ ។

៦-	ទំនុកចិត្តផ្ញើ	មើលគ្រប់ដំណើរ	ក្រឹត្យក្រមសីលធម៌
	ជឿជាក់ទុកចិត្ត	យល់ពិតបវរ	ទ្រព្យគង់វង្សល្អ
		ស្ងប់ចិត្តសុខសាន្ត ។

ជំនួយស្មារតី : អប់រំស្តីអំពីតម្រូវការ និងចំណង់ហួសហេតុ