បណ្តាំនាយក

- បទពាក្យ៧ -

១-	រីអ្នកធ្វើការក្រោមបង្គាប់	កំហុសកើតជាប់ជាធម្មតា
	ចៅហ្វាយឈឺចាប់ជេរផ្តាសា	តិះដៀលឡូឡានាំអាស្រូវ ។

២-	គួរគិតឲ្យជ្រៅកុំរាយមាយ	អនាគតនាយមិនឥឡូវ
	អ្នកនោះប្រឹងរៀនកែតម្រូវ	ការល្អពេកកូវក្លាយជាមេ ។

៣-	ពុំមាននរណាចង់ធ្វើខុស	ចង់តែដាលដុះល្អលើសគេ
	មិនចង់ឮស្ដីបន្ទោសជេរ	ប្រមាថដៀលទ្វេឆ្កួតលេលា ។

៤-	ប្រមុខដឹកនាំសព្វកិច្ចការ	គួរពិចារណាគ្រងឲ្យជា
	ជួយកែតម្រូវទាំងអស់គ្នា	ល្អគ្រប់វេលាកើតប្រយោជន៍ ។

៥-	មេលះបង់សព្វអកុសល	អាក្រក់កង្វល់ស្អុយអសោច
	លះលោភទោសៈលះហិនហោច	លះមោហ៍ផុយខ្លោចចាកចេញចៀស ។

៦-	រៀនអប់រំកាយវាចាចិត្ត	ស្មោះស្ម័គ្រស្នេហ៍ស្និទ្ធល្អពេញពាស
	សុខដុមរមនាថ្លៃជាងមាស	ចាកក្ដីវិនាសភ្លឺឯងអង្គ ។

បុគ្គលិកល្អ គឺជាបុគ្គលិកដែលបម្រើអតិថិជនត្រូវតាមតួនាទីរបស់ខ្លួនប្រកបដោយសមត្ថភាព សីលធម៌ និងមានស្មារតីរឹងប៉ឹងជានិច្ច ។