ព័ត៌មានព័ត៌មានថ្មីៗរង្វាន់នៃឱកាសបុណ្យខួបគម្រប់ ១០ឆ្នាំរបស់ ទ្រីយ៉ូដូស ដូអ៊ែន

ធនាគារ អេស៊ីលីដា ត្រូវបានជ្រើសរើសសម្រាប់ការផ្តល់រង្វាន់ នៃឱកាសបុណ្យខួបគម្រប់ ១០ឆ្នាំរបស់ ទ្រីយ៉ូដូស ដូអ៊ែន

ថ្ងៃទី១៦ ខែមិថុនា ឆ្នាំ២០០៤

លោក អ៊ិន ចាន់នី អគ្គនាយក ធនាគារអេស៊ីលីដា ទទួលពានរង្វាន់ពីលោកស្រី Marilou van Golstein Brouwers នាយិកាមូលនិធិជាន់ខ្ពស់របស់ធនាគារ Triodos

នៅក្នុងឱកាសបុណ្យខួបលើកទី១០ នៃទ្រីយ៉ូដូស ដូអ៊ែន លោក អ៊ិន ចាន់នី អគ្គនាយក ធនាគារ អេស៊ីលីដា លោក ឆាយ សឿន នាយក នាយកដ្ឋានហិរញ្ញវត្ថុ និងលោក ព្រំ វិសុទ្ឋ ប្រធានក្រុមកិច្ចការច្បាប់ ត្រូវបានអញ្ជើញទៅចូលរួម នៅថ្ងៃទី១៦ ខែមិថុនា ឆ្នាំ២០០៤ នៅក្នុងទីក្រុង Zeist ប្រទេសហុល្លង់ដ៍ ។

នៅក្នុងឱកាសនោះ លោក អ៊ិន ចាន់នី ត្រូវបានអញ្ជើញឱ្យថ្លែងសន្ទរកថាខ្លីមួយដល់ភ្ញៀវដែលអញ្ជើញមក ទ្រីយ៉ូដូស ដូអ៊ែន ដែលផ្តល់ឱកាស់ឱ្យដល់លោកបង្ហាញនូវសេចក្តីគោរពរាប់អានដ៍ខ្ពង់ខ្ពស់ទៅកាន់ លោកស្រី Marilou van Golstein Brouwers ជានាយិកាមូលនិធិជាន់ខ្ពស់ លោកស្រី Metchel នាយិកាជាន់ខ្ពស់របស់ ទ្រីយ៉ូដូស ដូអ៊ែន មិត្តរួមការងារ និងភ្ញៀវសំខាន់ៗទាំងអស់ដែលមានវត្តមានក្នុងឱកាសនោះ ។ លោកបានបញ្ជាក់ផងដែរថា លោកមានសេចក្តីសោមន្សរីករាយយ៉ាងខ្លាំង ដែលបានចូលរួមជាមួយអ្នកទាំងអស់គ្នា ក្នុងឱកាសទិវាខួប ១០ឆ្នាំរបស់ ទ្រីយ៉ូដូស ដូអ៊ែន ។ កាលពីឆ្នាំមុន ទ្រីយ៉ូដូស បានធ្វើការបញ្ជាក់សារជាថ្មីម្តងទៀតនូវទំនុកចិត្តរបស់ខ្លួនចំពោះយើងខ្ញុំ តាមរយៈការសុំទិញភាគហ៊ុន ដែលមិនត្រឹមតែធ្វើឱ្យដើមទុនរបស់យើងកើនឡើងលើសពី បីដងប៉ុណ្ណោះទេ គឺថែមទាំងនាំឱ្យទទួលបានអាជ្ញាប័ណ្ណថ្មីជា ធនាគារពាណិជ្ជ ពីធនាគារជាតិនៃកម្ពុជាទៀតផង ។ ដូច្នេះលោកសូមលើកយកឱកាសនេះដើម្បីថ្លែងដោយផ្ទាល់ អំពីអ្វីដែលការវិនិយោគរបស់ពួកគេសម្រេចបាន និងថាតើវាមានសារៈសំខាន់យ៉ាងណាចំពោះប្រទេសកម្ពុជា ។

ពានរង្វាន់ខួបគម្រប់១០ឆ្នាំ របស់ធនាគារ Triodos បានប្រគល់ជូនធនាគារអេស៊ីលីដា ភីអិលស៊ី

ក្នុងឆ្នាំ១៩៩៨ នៅពេលដែល ទ្រីយ៉ូដូស ដូអ៊ែន ចាប់ផ្តើមជួយជ្រោមជ្រែងអេស៊ីលីដា ដំបូងយើងមានទំហំឥណទានសរុបត្រឹមតែ ១០,១លានដុល្លារ នៅលើដៃអតិថិជនតូចៗចំនួន ៥៥.២១៥នាក់ ។ នៅពេលនោះយើងមានបុគ្គលិកចំនួន ៣១៨នាក់ បម្រើការនៅការិយាល័យចំនួន ២៧ ស្ថិតក្នុង ២១ខេត្ត-រាជធានី ក្នុងប្រទេសកម្ពុជា ។ ដោយមានជំនួយពី ទ្រីយ៉ូដូស ដូអ៊ែន បច្ចុប្បន្នអេស៊ីលីដា គឺជាធនាគារធំជាងគេលំដាប់ទីពីរនៅក្នុងប្រទេស ដោយមានអតិថិជនឥណទានសកម្មចំនួន ១០៧.៧០៩នាក់ ក្នុងនោះជិត ៧០% ជាស្ត្រី ដែលមានសមតុល្យលើដៃអតិថិជនចំនួន ៤៨,៤លានដុល្លារអាមេរិក ។ លើសពីនេះទៅទៀត យើងបានបោះផ្សាយសេវាញ្ញើ-សន្សំជូនដល់ប្រជាជនទូទៅ នៅតាមទីប្រជុំជន និងជនបទនានា តាមរយៈបណ្ដាញប្រតិបត្តិការរបស់យើង ដែលឥឡូវមានចំនួន ១១៤ការិយាល័យ ស្ថិតក្នុង ២១ខេត្ត-រាជធានី ក្នុងចំណោមខេត្ត-រាជធានីទាំង ២៤ ។ ក្នុងចំណោមអតិថិជនបញ្ញើ-សន្សំប្រមាណ ៤១.០០០នាក់ មានអតិថិជនខ្លះមិនធ្លាប់ប្រើប្រាស់សេវាធនាគារសោះពីមុនមក ឥឡូវនេះបានផ្តល់ទំនុកចិត្តលើ ធនាគារ អេស៊ីលីដា តាមរយៈការដាក់ប្រាក់ផ្ញើរបស់ពួកគាត់ ធ្វើឱ្យប្រាក់បញ្ញើសរុបកើនឡើងពីចំណុចសូន្យកាលពីបីឆ្នាំមុន មកដល់ជិត ២១លានដុល្លារអាមេរិក នាពេលបច្ចុប្បន្ន ។ យើងខ្ញុំបានបម្រើជូននូវសេវាថ្មីៗ ធ្វើឱ្យពួកគាត់អាចផ្ទេរប្រាក់ដោយសេរី នៅទូទាំងប្រទេស និងទូទាំងពិភពលោក ។ យើងបានបម្រើជូននូវ សេវាបើកប្រាក់បៀវត្ស ជូនដល់រោងចក្រ និងក្រុមហ៊ុននានា ដែលមិនត្រឹមតែជួយសម្រាលបន្ទុក និងការប្រថុយប្រថានរបស់អតិថិជនក្នុងការបើកប្រាក់បៀវត្សប៉ុណ្ណោះទេ គឺថែមទាំងលើកទឹកចិត្តឱ្យកម្មករនិយោជិតទាំងនោះធ្វើការសន្សំទៀតផង ។ បន្ទាប់ពីក្លាយខ្លួនជាធនាគារពាណិជ្ជកម្មពេញលេញមក ធនាគារ អេស៊ីលីដា មានបុគ្គលិកសរុបចំនួន ១.៨៥៤នាក់ ដែលភាគច្រើនជានិស្សិតទទួលបានបរិញ្ញបត្រ កំពុងបម្រើសេវាធនាគារ និងហិរញ្ញវត្ថុជូនដល់សហគ្រិនជំនួញខ្នាតតូចបំផុត ខ្នាតតូច និងខ្នាតមធ្យម ទូទាំងព្រះរាជាណាចក្រកម្ពុជា ។

គេតែងតែសួរលោក អ៊ិន ចាន់នី ថា "ឥឡូវលោកទទួលបានអាជ្ញាប័ណ្ណធនាគារពាណិជ្ជកម្មហើយ តើលោកនឹងឈប់ផ្តល់សេវាដល់អតិថិជនខ្នាតតូចទៀតហើយមែនឬទេ ?" ផ្ទុយទៅវិញ សមតុល្យឥណទានផ្នែកមីក្រូហិរញ្ញវត្ថុរបស់យើង គឺជាផ្នែកមួយដែលពង្រីកយ៉ាងលឿនជាងគេ ក្នុងអាជីវកម្មរបស់យើង និងមួយផ្នែកធំនៃការរីកលូតលាស់ឥណទានផ្នែកមធ្យម គឺជាអតិថិជនដែលធ្លាប់ទទួលឥណទានខ្នាតតូច និងខ្នាតតូចបំផុត ហើយដែលទទួលបានជោគជ័យ និងជួយឱ្យពួកគាត់បានឈានឡើងកាំសេដ្ឋកិច្ច ។ អេស៊ីលីដាដែលបានទទួលនូវជោគជ័យយ៉ាងលើសលុបក្នុងវិស័យមីក្រូហិរញ្ញវត្ថុ មិនឆោតល្ងង់នឹងបែរខ្នងដាក់ប្រភពនៃជោគជ័យពីអតីតៈ និងទៅថ្ងៃអនាគតរបស់ខ្លួននោះទេ ! ។

លោក អ៊ិន ចាន់នី ក៏បានបន្ថែមទៀតថា គាត់មានការជឿជាក់យ៉ាងមោះមុតថា និរន្តភាពមីក្រូហិរញ្ញវត្ថុ គឺជាឧបករណ៍ដ៏សំខាន់មួយក្នុងការរីកលូតលាស់សេដ្ឋកិច្ច ពីកម្រិតទាបបំផុត ។ វាផ្តល់នូវយន្តការជួយពង្រឹង និង ពន្លឿនក្នុងការអភិវឌ្ឍសង្គម ហើយក៏ជាអាវុធដ៏សំខាន់ក្នុងការប្រយុទ្ឋប្រឆាំងនឹងភាពក្រីក្រ ក្នុងប្រទេសកម្ពុជាផងដែរ ។

ក្នុងឱកាសដ៏សំខាន់ និងសប្បាយរីករាយនេះ លោកក៏បានថ្លែងអំណរគុណដ៏ជ្រាលជ្រៅរបស់យើងខ្ញុំ ចំពោះទ្រីយ៉ូដូស ដូអ៊ែន ក៏ដូចជាទ្រីយ៉ូដូស ហ្វ៊ែរស្វ៊ែរហ្វាន់ និង ភាទុនិកទាំងអស់របស់យើង ចំពោះការដាក់ទុនវិនិយោគនៅក្នុង ធនាគារ អេស៊ីលីដា ។ ជោគជ័យទាំងឡាយដែលយើងខ្ញុំទទួលបាន ក៏ជាជោគជ័យរបស់អ្នកទាំងអស់គ្នាផងដែរ !

យើងខ្ញុំទាំងអស់គ្នានៅធនាគារ អេស៊ីលីដា សូមជូនពរឱ្យទ្រីយ៉ូដូស ដូអ៊ែន ទទួលបានជោគជ័យ និង ភាពចម្រើនរុងរឿងជាច្រើនទស្សវត្សបន្ថែមទៀត និងសូមឱ្យទំនាក់ទំនងដ៏ល្អរបស់យើងបន្តមានស្ថិតស្ថេរយូរអង្វែងទៅមុខ !

« ព័ត៌មានមុន
ពិធីចុះហត្ថលេខាលើកិច្ចព្រមព្រៀងផ្តល់ឥណទានរវាង ធនាគារ អេស៊ីលីដា ភីអិលស៊ី និង អាយ អែហ្វ ស៊ី ព័ត៌មានបន្ទាប់ »
លោកអ្នកក៏អាចរកចំណូលបានយ៉ាងពេញចិត្ត ជាមួយនឹងឥណទានតូចៗ