USD
THB
EUR
AUD
VND
CAD
LAK
JPY
GBP
CNY
navigate_nextព័ត៌មានnavigate_nextព័ត៌មានថ្មីៗnavigate_nextសន្និសីទកាសែតស្តីអំពីការផ្តល់ចំណាត់ថ្នាក់របស់ Moody's ចំពោះធនាគារអេស៊ីលីដា
សន្និសីទកាសែតស្តីអំពីការផ្តល់ចំណាត់ថ្នាក់របស់ Moody's ចំពោះធនាគារ អេស៊ីលីដា ភីអិលស៊ី
ថ្ងៃទី២០ ខែធ្នូ ឆ្នាំ២០០៤
អតិថិជនមួយចំនួនប្រហែលជានៅចាំបានថា អេស៊ីលីដា បានចាប់ផ្តើមពីចំណុចដ៏តូចមួយ គឺដំបូងឡើងជាអង្គការមីក្រូហិរញ្ញវត្ថុ ពីឆ្នាំ១៩៩៣ ដល់ឆ្នាំ២០០០ ចាប់ពីឆ្នាំ២០០០មក ទទួលបានអាជ្ញាប័ណ្ណជាធនាគារឯកទេស និងបន្តយកអាជ្ញាប័ណ្ណជាធនាគារពាណិជ្ជ នៅដំណាច់ឆ្នាំមុននេះ ។ ប៉ុន្មានឆ្នាំមកនេះ ធនាគារ អេស៊ីលីដា មានការផ្លាស់ប្តូរច្រើនណាស់ក្នុងការប្រកបអាជីវកម្មរបស់ខ្លួន គឺយើងបានផ្តោតការយកចិត្តទុកដាក់យ៉ាងខ្លាំងទៅលើផ្នែកមីក្រូហិរញ្ញវត្ថុ និងបានពង្រីកចូលទៅក្នុងសកម្មភាពផ្សេងៗក្នុងវិស័យធនាគារ ជាក់ស្តែងដូចជា ទទួលប្រាក់បញ្ញើ ដែលយើងទទួលបានលទ្ធផលវិជ្ជមានគួរជាទីពេញចិត្ត ។ ក្នុងពេលជាមួយគ្នានេះដែរ តួនាទីទម្លាប់រហូតដល់ពេលបច្ចុប្បន្នរបស់យើងដែលជាអ្នកផ្តល់មីក្រូឥណទាន ក៏ត្រូវបានពង្រីកកាន់តែធំជាងមុន តាមរយៈការពង្រីកបណ្ដាញប្រតិបត្តិការរហូតដល់ចំនួន ១១៩ការិយាល័យ ស្ថិតក្នុង ២១ខេត្ត-រាជធានីនាពេលបច្ចុប្បន្ន ។
ការរីកលូតលាស់លឿនបែបនេះក៏បាននាំមកនូវផលលំបាកមួយចំនួនផងដែរ ហើយថ្នាក់ដឹកនាំ និងក្រុមប្រឹក្សាភិបាលរបស់ ធនាគារ អេស៊ីលីដា បានយកចិត្តទុកដាក់ប្រុងប្រយ័ត្នយ៉ាងខ្លាំង ដើម្បីឱ្យប្រាកដថា រចនាសម្ព័ន្ធគ្រប់គ្រង និងរបាយការណ៍សមតុល្យរបស់ធនាគារមានលក្ខណៈរឹងមាំគ្រប់គ្រាន់អាចគាំទ្រដល់ការរីកចម្រើនបែបនេះបាន ។
គួរពិចារណាផងដែរថា ការរីកចម្រើនទាំងនោះក៏បាននាំឱ្យយើងខ្ញុំមានទំនាក់ទំនងជាមួយភាគីថ្មីៗដូចជា មិត្តរួមការងារមកពីសហគមន៍ធនាគារក្នុងស្រុក ស្ថាប័នហិរញ្ញវត្ថុបរទេស និងអង្គការអន្តរជាតិនានា ដែលភាគច្រើនកំពុងប្រើប្រាស់ផលិតផលរបស់យើង ។ លើសពីនេះទៅទៀត ចាប់តាំងពីមានព្រឹត្តិការណ៍ថ្ងៃទី១១ ខែកញ្ញា ឆ្នាំ២០០១ មក អ្នករៀបចំច្បាប់ទូទាំងពិភពលោកបានកំពុងតែរឹតបន្តឹងកម្រិតធម្មនិយាមនៃតម្លាភាព និងការគោរពតាមកិច្ចព្រមព្រៀងជាអន្តរជាតិដើម្បីការពារការលាងលុយកខ្វក់ជាដើម ។ ប្រសិនបើមិនអាចគោរពតាមលក្ខខណ្ឌខាងលើនេះទេ វាអាចជះឥទ្ឋិពលយ៉ាងធ្ងន់ធ្ងរដល់យើងក្នុងការធ្វើអាជីវកម្មជាមួយនឹងដៃគូពាណិជ្ជកម្មក្រៅប្រទេស ។ នេះគឺជាផ្លូវការដែលក្រុមហ៊ុននានានៅលើពិភពលោកកំពុងតែធ្វើដំណើរ ហើយក៏ជាកាតព្វកិច្ចរបស់យើងចំពោះបុគ្គលដែលពាក់ព័ន្ធទាំងឡាយដូចជា អតិថិជន ភាគហ៊ុនិក អ្នករៀបចំច្បាប់ និយាយរួមគឺសហគមន៍ទាំងមូល គឺយើងត្រូវប្រឹងប្រែងអស់ពីសមត្ថភាព ធានាឱ្យបានយ៉ាងហោចណាស់ក៏យើងអាចបំពេញតាមធម្មនិយាមទាំងអស់នេះបានដែរ ។
ដើម្បីជាផ្នែកមួយនៃដំណើរការនេះ ថ្នាក់ដឹកនាំនិងក្រុមប្រឹក្សាភិបាលនៃ ធនាគារ អេស៊ីលីដា បានសម្រេចចិត្តនៅដើមឆ្នាំនេះថានឹងបង្កើនឱ្យមានការវាយតម្លៃខ្លួនឯងមួយនូវរាល់អ្វីដែលយើងអាចធ្វើបាន ប្រៀបធៀបនឹងស្ថាប័នដទៃទៀតដែលប្រតិបត្តិការអាជីវកម្មដូចគ្នា ។ គោលបំណងសំខាន់គឺដើម្បីពង្រឹងគោលជំហររបស់យើងនៅក្នុងទីផ្សារអន្តរជាតិ ព្រោះទំនាក់ទំនងរបស់យើងជាមួយនឹងភាគីអន្តរជាតិកំពុងតែកើនឡើង ក្នុងការស្វែងរកទុនមកផ្គត់ផ្គង់សកម្មភាពផ្តល់ប្រាក់កម្ចីរបស់យើង ជាពិសេសមីក្រូហិរញ្ញវត្ថុ ។ កត្តានេះបានជំរុញឱ្យយើងដាច់ខាតត្រូវស្វែងរកចំណាត់ថ្នាក់ណាមួយពីភ្នាក់ងារធ្វើចំណាត់ថ្នាក់ឥណទានកំពូលក្នុងពិភពលោក ហើយបន្ទាប់ពីបានជួបប្រជុំយ៉ាងល្អិតល្អន់ជាបន្តបន្ទាប់ជាមួយអ្នកទាំងនោះរួចមក យើងក៏សម្រេចជ្រើសរើសយក Moody's Investors Services ដែលគិតថាជាអ្នកសក្តិសមជាងគេក្នុងការធ្វើចំណាត់ថ្នាក់នេះ ។ ពួកគេមិនត្រឹមតែបំពេញបានតាមគ្រប់លក្ខខណ្ឌប៉ុណ្ណោះទេ គឺថែមទាំងបានពន្យល់បង្ហាញយ៉ាងច្បាស់លាស់អំពីប្រវត្តិ និងបរិយាកាសដែលយើងកំពុងប្រតិបត្តិការទៀតផង ។
