ព័ត៌មានព័ត៌មានថ្មីៗពិធីសម្ពោធបើកការដ្ឋានសាងសង់ការិយាល័យកណ្ដាល

ពិធីសម្ពោធបើកការដ្ឋានសាងសង់ការិយាល័យកណ្ដាល ធនាគារ អេស៊ីលីដា ភីអិលស៊ី

គំនូរអគារការិយាល័យកណ្តាលថ្មីរបស់ធនាគារអេស៊ីលីដា

ថ្ងៃទី២៧ ខែឧសភា ឆ្នាំ២០០៥

ធនាគារ អេស៊ីលីដា ភីអិលស៊ី ជាធនាគារនាំមុខគេលើវិស័យសេវាកម្មហិរញ្ញវត្ថុ ក្នុងព្រះរាជាណាចក្រកម្ពុជា ។ នៅថ្ងៃទី២៧ ខែឧសភា ឆ្នាំ២០០៥ នេះ ធនាគារ អេស៊ីលីដា បានប្រារព្ឋពិធីសម្ពោធបើកការដ្ឋានសាងសង់អគារការិយាល័យកណ្ដាលដ៏ធំ ជាកម្មសិទ្ធិផ្ទាល់នៅរាជធានីភ្នំពេញ ស្ថិតក្នុងដីឡូត៍លេខ ២៣ សង្កាត់ស្រះចក ខណ្ឌដូនពេញ មហាវិថីព្រះមុនីវង្ស ។ លោក អ៊ិន ចាន់នី អគ្គនាយកធនាគារ អេស៊ីលីដា ភីអិលស៊ី បានធ្វើបដិសណ្ឋារកិច្ចចំពោះភ្ញៀវកិត្តិយសជាមិត្ត លោកប្រធាន អនុប្រធាន ក្រុមប្រឹក្សាភិបាល ថ្នាក់ដឹកនាំ និងបុគ្គលិក ធនាគារ អេស៊ីលីដា គ្រប់ជាន់ថ្នាក់ ។

អគារការិយាល័យកណ្ដាលរបស់ ធនាគារ អេស៊ីលីដា នេះសង់លើផ្ទៃដីទំហំប្រមាណជាង ៤.៥៥០ ម៉ែត្រក្រឡា ។ ការសាងសង់នេះ អនុលោមទៅតាមច្បាប់អនុញ្ញាតសាងសង់លេខ ៣២ DNS/RDN 19th April 2005 ដែលចាប់ផ្តើមនៅខែនេះ (ឧសភា ឆ្នាំ២០០៥) នឹងត្រូវបញ្ចប់ឱ្យរួចរាល់នៅត្រីមាសទី៣ ឆ្នាំ២០០៦ ។

គំនូរអគារពេលយប់

ដើម្បីសង់ឱ្យបាននូវអគារការិយាល័យកណ្ដាលខ្នាតអន្តរជាតិ ធនាគារ អេស៊ីលីដា ភីអិលស៊ី បានជ្រើសរើសយកក្រុមហ៊ុនដែលមានការទទួលស្គាល់ដ៏ខ្ពង់ខ្ពស់ ឈ្មោះ BK Asia Pacific ធ្វើជាប្រធានគម្រោងសាងសង់ ។ កាលពីខែកញ្ញាឆ្នាំមុន មានការដេញថ្លៃ ដោយមានការចូលរួមពីសំណាក់ក្រុមហ៊ុននិម្មាបនកម្មកម្ពុជា អាល្លឺម៉ង់ ហូល្លង់ដ៍ ញូហ្សឺឡែន ថៃ និងអង់គ្លេស ។ បន្ទាប់ពីបានធ្វើការពិចារណាយ៉ាងល្អិតល្អន់ ធនាគារ អេស៊ីលីដា ភីអិលស៊ី បានសម្រេចជ្រើសរើសយកក្រុមហ៊ុនដ៏ល្បីល្បាញ ដែលមានមូលដ្ឋាននៅទីក្រុងបាងកក ឈ្មោះ Chuchawal-de Weger និងក្រុមហ៊ុន Design 103 ជាអ្នកគូរប្លង់គម្រោងសាងសង់ ។ សូមបញ្ជាក់ថាក្រុមហ៊ុនទាំងពីរនេះជាសមាជិកក្រុមហ៊ុន Royal Haskoning Group មកពីប្រទេសហុល្លង់ដ៍ ។ ការរៀបចំការដ្ឋានសម្រាប់សាងសង់ បានចាប់ផ្តើមតាំងពីខែកុម្ភៈ ដើមឆ្នាំ២០០៥ នេះ ។

ធនាគារ អេស៊ីលីដា រំពឹងថាការសាងសង់នឹងចំណាយអស់ទឹកប្រាក់ជាង ប្រាំលានប្រាំសែនដុល្លារសហរដ្ឋអាមេរិក ដើម្បីឱ្យបានទីកន្លែងសម្រាប់បំពេញការងារ រួមទាំងបញ្ជរសម្រាប់បម្រើអតិថិជនប្រមាណ ៥០០ម៉ែត្រក្រឡា ដែលមានទំហំសរុបប្រមាណ ៦.៨០០ ម៉ែត្រក្រឡា ចំណតសម្រាប់យានយន្ត ១៦៨គ្រឿង នៅខាងក្រោយអគារការិយាល័យកណ្ដាល ដែលនឹងផ្តល់ភាពងាយស្រួល និងការពារអតិថិជនគ្រប់ពេល ក្នុងការធ្វើប្រតិបត្តិការ ឬប្រគល់-ទទួលសាច់ប្រាក់ចំនួនច្រើន ។ ការគូរប្លង់ និងការសាងសង់ នឹងត្រូវការអនុលោមទៅតាមបទដ្ឋានអន្តរជាតិកម្រិតខ្ពស់ ដោយយកចិត្តទុកដាក់ជាពិសេសលើផ្នែកការពារសន្តិសុខ បង្ការអគ្គីភ័យ ការសន្សំសំចៃថាមពលប្រើប្រាស់ និងការពារសុវត្ថិភាព និងសុខភាព ។ ការយកចិត្តទុកដាក់ជាពិសេស ក៏បានធ្វើផងដែរសម្រាប់បម្រើដល់អតិថិជនដែលជាជនពិការ និង រៀបចំឱ្យមានទីកន្លែងងាយស្រួលក្នុងការបម្រើសេវាប្តូរប្រាក់ សេវាវ៉េសស្ទឺនយូញៀន ហើយនិងផ្តល់សេវា ២៤ លើ ២៤ ម៉ោង ដោយការប្រើប្រាស់ ATM ។

ការគ្រប់គ្រង សុវត្ថិភាព សុខភាព និងបរិស្ថាន

ធនាគារ អេស៊ីលីដា ភីអិលស៊ី រំពឹងទុកជាមុនថា នៅរាល់អង្គការ និងអង្គភាពជំនួញ អាចនឹងមានគ្រោះថ្នាក់ជាយថាហេតុ ជាពិសេសក្នុងកំឡុងពេលសាងសង់ ។ គ្រោះថ្នាក់អាចកើតមានឡើងបណ្ដាលមកពីមូលហេតុមួយចំនួនដូចជា ការធ្វេសប្រហែស បរិស្ថានគ្មានសុវត្ថិភាព ទោះជាយ៉ាងណាក៏ដោយ ផលប៉ះពាល់បណ្ដាលមកពីគ្រោះថ្នាក់ទាំងនោះ អាចកាត់បន្ថយ ឬទប់ទល់បាន ដោយមានការគ្រប់គ្រងផ្នែកសុវត្ថិភាព សុខភាព និងបរិស្ថាន ឱ្យបានត្រឹមត្រូវ ។ គោលដៅនៃការគ្រប់គ្រងសុវត្ថិភាព និងសុខភាព ក្នុងការបំពេញការងារ គឺត្រូវការទប់ស្កាត់ការបាត់បង់ជីវិត ហើយនិងបន្ថយលទ្ធភាពដែលនាំឱ្យមានការបាត់បង់ជីវិត ពីការគ្រោះថ្នាក់ដល់កម្មករ ទ្រព្យសម្បត្តិក្រុមហ៊ុន និងខូចបរិស្ថាន ។

ដើម្បីទប់ស្កាត់ប្រការទាំងអស់ខាងលើ ធនាគារ អេស៊ីលីដា ភីអិលស៊ី បានជួលមន្ត្រីវិជ្ជាជីវៈផ្នែកសុវត្ថិភាព ពីក្រុមហ៊ុន Royal Haskoning ដើម្បីត្រួតពិនិត្យលើបរិស្ថានសុវត្ថិភាព និងរាល់នីតិវិធីនៅកន្លែងសាងសង់អគារ ហើយធ្វើរបាយការណ៍រៀងរាល់ខែជូន ធនាគារ អេស៊ីលីដា ភីអិលស៊ី ។

ធនាគារ អេស៊ីលីដា ភីអិលស៊ី បានជួលទីប្រឹក្សា និងក្រុមហ៊ុនសាងសង់ដូចខាងក្រោមនេះ

គម្រោងសាងសង់

តំណាងម្ចាស់គម្រោង ៖ BK Asia Pacific
ក្រុមហ៊ុនសិក្សាគម្រោងសាងសង់ ៖ BK Burns (Thailand) Ltd
ក្រុមហ៊ុនប្រឹក្សាផ្នែកវិស្វករ ៖ Chuchawal-de Weger International Ltd
ក្រុមហ៊ុនប្រឹក្សាផ្នែកស្ថាបត្យកម្ម ៖ Design 103 International Ltd
ក្រុមហ៊ុនប្រឹក្សាផ្នែកគម្រោងប្លង់ខាងក្នុង ៖ Interior Architecture 103 Co.,
ក្រុមហ៊ុនប្រឹក្សាផ្នែកសន្តិសុខនិងការបង្ការគ្រោះអគ្គីភ័យ ៖ Functional Engineering
ក្រុមហ៊ុនគ្រប់គ្រងគម្រោងសាងសង់ ៖ Royal Haskoning Cambodia
ក្រុមហ៊ុនបុកគ្រឹះ ៖ KC Gerin Enterprises
ក្រុមហ៊ុនគូរផ្លាក ៖ Inkjet Images (Cambodia)
ក្រុមហ៊ុនប្រឹក្សាផ្នែកប្រព័ន្ធបច្ចេកវិជ្ជា និងគមនាគមន៍ ៖ First Cambodia

កាលបរិច្ឆេទចាប់ផ្តើមសាងសង់ ៖ នៅថ្ងៃទី០៣ ខែឧសភា ឆ្នាំ២០០៥ ។ កាលបរិច្ឆេទបញ្ចប់ការសាងសង់ ៖ ត្រីមាសទី៣ ឆ្នាំ២០០៦

គំនូរអគារមើលពីចំហៀង

ធនាគារ អេស៊ីលីដា ភីអិលស៊ី បានសម្រេចចិត្តវិនិយោគសាងសង់អគារការិយាល័យកណ្ដាល ដែលជាកម្មសិទ្ធិផ្ទាល់របស់ខ្លួន ដើម្បីបំពេញតាមទស្សនៈ ជាធនាគារពាណិជ្ជកម្មនាំមុខក្នុងព្រះរាជាណាចក្រកម្ពុជា ក្នុងការផ្តល់សេវាកម្មហិរញ្ញវត្ថុល្អបំផុត ជូនដល់សាធារណជនគ្រប់មជ្ឈដ្ឋានក្នុងសហគមន៍ ។

បេសកកម្មរបស់ធនាគារ អេស៊ីលីដា ភីអិលស៊ី គឺផ្តល់ជូនសហគ្រិនខ្នាតតូចបំផុត ខ្នាតតូច ខ្នាតមធ្យម និងសាធារណជន នូវមធ្យោបាយក្នុងការគ្រប់គ្រង ចាត់ចែងធនធានហិរញ្ញវត្ថុ ឱ្យមានប្រសិទ្ធភាពខ្ពស់ ដើម្បីលើកស្ទួយជីវភាពរស់នៅឱ្យប្រសើរឡើង ដោយអនុវត្តឱ្យបាននូវនិរន្តរភាព និងបង្កើននូវអត្ថប្រយោជន៍ជូនដល់ភាគហ៊ុនិក កម្មករនិយោជិត ព្រមទាំងសហគមន៍ទាំងអស់ ។

ដោយមានជំនឿលើអនាគតនៃព្រះរាជាណាចក្រកម្ពុជា ធនាគារ អេស៊ីលីដា ភីអិលស៊ី យល់ថាពេលនេះជាឱកាសដ៏ល្អ ដែលត្រូវមានអគារការិយាល័យកណ្ដាលជាកម្មសិទ្ធិខ្នាតអន្តរជាតិដើម្បី ៖

ជាសក្ខីភាពជាក់ស្តែង បង្ហាញជូននូវមូលដ្ឋានស្ថិរភាពអចិន្ត្រៃយ៍ដ៏រឹងមាំដល់អតិថិជន និងសាធារណជនទូទៅ ។
ជាមូលដ្ឋានគ្រឹះដ៏រឹងមាំប្រកបដោយប្រសិទ្ធភាពក្នុងការគ្រប់គ្រង និងបម្រើសេវាកម្មហិរញ្ញវត្ថុ ដល់គ្រប់សាខា ធនាគារ អេស៊ីលីដា ទូទាំងប្រទេសកម្ពុជា និងអន្តរជាតិ ។
ដើម្បីធានាបាននូវការជឿជាក់ និងមានទំនុកចិត្តខ្ពស់ជូនដល់អតិថិជនទូទៅ ក្នុងការបម្រើសេវាកម្មហិរញ្ញវត្ថុក្នុងប្រទេស និងក្រៅប្រទេស ។

បច្ចុប្បន្ននេះ ធនាគារ អេស៊ីលីដា ភីអិលស៊ី បានពង្រីកការិយាល័យប្រតិបត្តិការរបស់ខ្លួនជាបន្តបន្ទាប់ រហូតដល់ ១៣៥ការិយាល័យ នៅក្នុងខេត្ត ២១ខេត្ត-រាជធានី និងកំពុងសិក្សាបើកទីតាំងថ្មីនៅខេត្តស្ទឹងត្រែង ដែលរំពឹងថានឹងអាចដំណើរការជាផ្លូវការនៅពេលឆាប់ៗខាងមុខនេះ ។

បច្ចក្ខភាពនៃការប្រតិស្ឋឡើងនូវអគារផ្ទាល់ខ្លួនដ៏ធំនេះ បង្ហាញឱ្យឃើញថា ធនាគារ អេស៊ីលីដា បានតាំងចិត្តខ្ពស់ក្នុងការបន្តបង្កើនគុណភាពសេវាបម្រើអតិថិជនប្រកបដោយគុណភាពខ្ពស់ថែមទៀត ហើយនឹងផ្តល់ទំនុកចិត្ត ធានាដល់សាធារណជន អតិថិជន រយៈពេលយូរអង្វែង នូវសុវត្ថិភាពហិរញ្ញវត្ថុរបស់សាធារណជន និងអតិថិជន ជាពិសេសយើងចង់ឱ្យអតិថិជនរបស់យើងមានមោទភាពក្នុងការប្រើប្រាស់ ធនាគារ អេស៊ីលីដា ជាធនាគារ និងដៃគូរបស់ពួកគេ ។

« ព័ត៌មានមុន
បទសម្ភាសន៍អនុប្រធានក្រុមប្រឹក្សាភិបាលរបស់ធនាគារ អេស៊ីលីដា ភីអិលស៊ី ព័ត៌មានបន្ទាប់ »
ពិធីសម្ពោធបើកធនាគារអេស៊ីលីដាភីអិលស៊ី ការិយាល័យស្រុកស្ទឹងត្រែង

ពិធី​សម្ពោធ​បើក​ការដ្ឋាន​សាងសង់​ការិយាល័យ​កណ្ដាល ធនាគារ អេស៊ីលីដា ភីអិលស៊ី

ការ​គ្រប់គ្រង សុវត្ថិភាព សុខភាព និង​បរិស្ថាន

ធនាគារ អេស៊ីលីដា ភីអិលស៊ី បាន​ជួល​ទីប្រឹក្សា និង​ក្រុមហ៊ុន​សាង​សង់​ដូច​ខាង​ក្រោម​នេះ

ពិធីសម្ពោធបើកការដ្ឋានសាងសង់ការិយាល័យកណ្ដាល ធនាគារ អេស៊ីលីដា ភីអិលស៊ី

ការគ្រប់គ្រង សុវត្ថិភាព សុខភាព និងបរិស្ថាន

ធនាគារ អេស៊ីលីដា ភីអិលស៊ី បានជួលទីប្រឹក្សា និងក្រុមហ៊ុនសាងសង់ដូចខាងក្រោមនេះ