ព័ត៌មានព័ត៌មានថ្មីៗពិធីសម្ពោធបើកការិយាល័យស្រុកស្ទឹងត្រែង

ពិធីសម្ពោធបើកធនាគារអេស៊ីលីដាភីអិលស៊ី ការិយាល័យស្រុកស្ទឹងត្រែង

ថ្ងៃទី០៩ ខែកញ្ញា ឆ្នាំ២០០៥

លោក អ៊ិន ចាន់នី អគ្គនាយក ធនាគារ អេស៊ីលីដា ភីអិលស៊ី

ធនាគារអេស៊ីលីដាភីអិលស៊ី បានប្រារព្ឋពិធីសម្ពោធបើកការិយាល័យស្រុកស្ទឹងត្រែងជាផ្លូវការ កាលពីថ្ងៃទី០៩ ខែកញ្ញា ឆ្នាំ២០០៥ ក្រោមអធិបតីភាពដ៏ខ្ពង់ខ្ពស់របស់ ឯកឧត្តមអភិបាលរងទី២ ខេត្តស្ទឹងត្រែង ។ លោក អ៊ិន ចាន់នី អគ្គនាយក ធនាគារអេស៊ីលីដាភីអិលស៊ី បានសំដែងគារវកិច្ចចំពោះឯកឧត្តម លោកជំទាវ ប្រធានក្រុមប្រឹក្សាភិបាល ក្រុមប្រឹក្សាភិបាល លោក-លោកស្រី ភ្ញៀវជាតិនិងអន្តរជាតិ និង សហការី ទាំងអស់ ដែលបានចំណាយពេលយ៉ាងមមាញឹក ចូលរួមក្នុងឱកាសដ៏នក្ខត្តឫក្សនេះ ។

លោក អ៊ិន ចាន់នី បានមានប្រសាសន៍ថា "ធនាគារអេស៊ីលីដាភីអិលស៊ី បានទទួលអាជ្ញាប័ណ្ណធ្វើប្រតិបត្តិការបម្រើសេវាធនាគារ តាំងពីឆ្នាំ២០០៣ ដោយមានភាគហ៊ុនិកបរទេស ដែលមានកំលាំងហិរញ្ញវត្ថុរឹងមាំបួន រួមមាន IFC, DEG, FMO និង Triodos និង ភាគហ៊ុនិកក្នុងស្រុកដែលមានកំលាំងហិរញ្ញវត្ថុរឹងមាំពីរ រួមមាន ACLEDA NGO និង ASA ។ បច្ចុប្បន្ននេះ ធនាគារអេស៊ីលីដាភីអិលស៊ី ជាធនាគារដែលមានបណ្ដាញការិយាល័យបម្រើអតិថិជនច្រើនជាងគេបំផុត រហូតដល់ចំនួន ១៣៦ការិយាល័យ និងមានបុគ្គលិកបម្រើការងារសរុបចំនួន ២.៣៦២នាក់ នៅក្នុងខេត្ត-រាជធានីចំនួន២២ នៃខេត្ត-រាជធានីចំនួន២៤ នៃព្រះរាជាណាចក្រកម្ពុជា និងជាធនាគារដែលមានបំពាក់ប្រព័ន្ធធនាគារ Online ទំនើប និងប្រកបដោយសុវត្ថិភាពបំផុតនៅក្នុងព្រះរាជាណាចក្រកម្ពុជា ។ ប្រព័ន្ធនេះ ធានាបាននូវសុវត្ថិភាពហិរញ្ញវត្ថុ និងមានរបាយការណ៍ហិរញ្ញវត្ថុត្រឹមត្រូវ និងជឿជាក់ ។ ធនាគារអេស៊ីលីដាភីអិលស៊ី មានយុទ្ឋសាស្ត្រពង្រីកប្រតិបត្តិការ និង ការបម្រើសេវាដល់អតិថិជន និង សាធារណជន ដល់គ្រប់មជ្ឈដ្ឋាននៅក្នុងខេត្តស្ទឹងត្រែងទាំងមូល ជាពិសេសនឹងធ្វើឱ្យប្រតិបត្តិការធនាគារនៅក្នុងខេត្តស្ទឹងត្រែង ដំណើរការពេញលេញ ដូចបណ្ដាសាខាខេត្ត-រាជធានីដទៃទៀតដែរ" ។

ឯកឧត្តម វ៉ា វុត្ថារ៉ា អភិបាលរងទី២ ខេត្តស្ទឹងត្រែង

ក្នុងឱកាសនោះ ឯកឧត្តម វ៉ា វុត្ថារ៉ា អភិបាលរងទី២ ខេត្តស្ទឹងត្រែង ក៏បានអញ្ជើញឡើងថ្លែងសន្ទរកថាទៅកាន់ភ្ញៀវជាតិ និងអន្តរជាតិទាំងអស់ដែលបានចូលរួមដោយមានខ្លឹមសារថា "ក្នុងនាមរូបខ្ញុំផ្ទាល់ តំណាងឱ្យអាជ្ញាធរខេត្តស្ទឹងត្រែង ក៏ដូចជារាជរដ្ឋាភិបាលកម្ពុជា សូមគាំទ្រយ៉ាងពេញទំហឹង និងស្វាគមន៍នូវវត្តមានរបស់ធនាគារអេស៊ីលីដានៅក្នុងខេត្តស្ទឹងត្រែងនេះ ។ ខ្ញុំគិតថា វត្តមានរបស់ធនាគារអេស៊ីលីដា ផ្តល់អត្ថប្រយោជន៍យ៉ាងច្រើនចំពោះប្រជាពលរដ្ឋ និងអ្នកជំនួញនៅក្នុងខេត្តទាំងមូល ប្រើប្រាស់ផលិតផលនិងសេវាកម្មធនាគារ សម្រាប់ជាមធ្យោបាយក្នុងកិច្ចការជំនួញរបស់ខ្លួន ធ្វើជាទីកន្លែងសម្រាប់រកប្រភពទុនបន្ថែម ផ្ទេរមូលនិធិ និងរក្សាប្រាក់កាស ។ តាំងនាមឱ្យរាជរដ្ឋាភិបាល ខ្ញុំសូមថ្លែងអំណរគុណដល់ ធនាគារអេស៊ីលីដាភីអិលស៊ី ដែលបានពង្រីកនូវតំបន់ប្រតិបត្តិការរបស់ខ្លួនក្នុងខេត្តស្ទឹងត្រែង ដែលនឹងបង្កឱ្យមានលក្ខណៈងាយស្រួលដល់ប្រជាពលរដ្ឋគ្រប់ស្រទាប់ និងគ្រប់តំបន់ ប្រើប្រាស់សេវាកម្មធនាគារ ដែលពុំធ្លាប់មានពីមុនមក" ។

« ព័ត៌មានមុន
ពិធីសម្ពោធបើកការដ្ឋានសាងសង់ការិយាល័យកណ្ដាល ធនាគារ អេស៊ីលីដា ភីអិលស៊ី ព័ត៌មានបន្ទាប់ »
ធនាគារ អេស៊ីលីដា ភីអិលស៊ី ទទួលបានវិញ្ញាបនបត្រឧត្តមភាពពីធនាគារ HSBC

ពិធី​សម្ពោធ​បើក​ធនាគារ​អេស៊ីលីដា​ភីអិលស៊ី ការិយាល័យ​ស្រុក​ស្ទឹងត្រែង

ពិធីសម្ពោធបើកធនាគារអេស៊ីលីដាភីអិលស៊ី ការិយាល័យស្រុកស្ទឹងត្រែង