ព័ត៌មានព័ត៌មានថ្មីៗវិញ្ញាបនបត្រឧត្តមភាពពីធនាគារ HSBC

ធនាគារ អេស៊ីលីដា ភីអិលស៊ី ទទួលបានវិញ្ញាបនបត្រឧត្តមភាពពីធនាគារ HSBC

ថ្ងៃទី២១ ខែកញ្ញា ឆ្នាំ២០០៥

វិញ្ញាបនបត្រឧត្តមភាព ឆ្នាំ២០០៥ នៃសេវាទូទាត់សាច់ប្រាក់ជាសកល និងគ្រប់គ្រងសាច់ប្រាក់

នៅថ្ងៃទី២១ ខែកញ្ញា ឆ្នាំ២០០៥ នារាជធានីភ្នំពេញ នៃព្រះរាជាណាចក្រកម្ពុជា ធនាគារ HSBC បានប្រគល់វិញ្ញាបនបត្រឧត្តមភាពរបស់ខ្លួនចំពោះធនាគារអេស៊ីលីដាភីអិលស៊ី ដែលជាធនាគារពាណិជ្ជនាំមុខគេមួយ ក្នុងព្រះរាជាណាចក្រកម្ពុជា ។ វិញ្ញាបនបត្រឧត្តមភាពនេះ ត្រូវបានផ្តល់ជូនសម្រាប់ការអនុវត្តល្អឥតខ្ចោះ និង ការប្តេជ្ញាចិត្តយ៉ាងមុតមាំ ក្នុងដំណើរការបម្រើសេវាទូទាត់ជាសកល និងសេវាគ្រប់គ្រងសាច់ប្រាក់ (ដូចគ្នានឹងបេសកកម្មរបស់ធនាគារ HSBC ដែរ) ដែលបានធ្វើវិភាគទានយ៉ាងសំខាន់ក្នុងការការពារការលាងលុយ និងភេរវកម្ម ។

លោក Hersel Mahani អគ្គនាយករងជាន់ខ្ពស់នៃធនាគារ HSBC បានមានប្រសាសន៍ថា "ការវិវឌ្ឍរបស់ធនាគារអេស៊ីលីដា ពីស្ថាប័នមិនរកប្រាក់ចំណេញមួយ បានផ្តោតការយកចិត្តទុកដាក់លើការបម្រើសេវាធនាគារពាណិជ្ជ ជូនសហគ្រិនក្នុងស្រុក និងអន្តរជាតិដោយទប់ស្កាត់ការលាងលុយ និងសកម្មភាពភេរវកម្មនានា ដែលនេះមិនមែនគ្រាន់តែជាគំរូល្អមួយសម្រាប់ធនាគារក្នុងស្រុកប៉ុណ្ណោះទេ ថែមទាំងសម្រាប់ធនាគារផ្សេងៗទៀតនៅលើពិភពលោកផងដែរ" ។ លោក Hersel Mahani បានបន្ថែមទៀតថា "អ្នកទទួលបានវិញ្ញាបនបត្រឧត្តមភាពរបស់ធនាគារ HSBC ទាល់តែជាក្រុមហ៊ុនដែលមានការអនុវត្តល្អឥតខ្ចោះ និងការប្តេជ្ញាចិត្តយ៉ាងមុតមាំក្នុងការបម្រើជូនអតិថិជន ធនាគារអេស៊ីលីដា ពិតជាស័ក្តិសមនឹងទទួលបាននូវរង្វាន់នេះមែន" ។

លោកអគ្គនាយក អ៊ិន ចាន់នី ទទួលវិញ្ញាបនបត្រឧត្តមភាពពីលោក Hersel Mahani អគ្គនាយករងជាន់ខ្ពស់នៃធនាគារ HSBC

ដោយមានធនាគារ HSBC Bank, N.A. ជាដៃគូ ធនាគារអេស៊ីលីដាបានពង្រីកការបម្រើសេវាទូទាត់ និងគ្រប់គ្រងសាច់ប្រាក់ជូនអតិថិជនទាំងក្នុង និងក្រៅប្រទេស តាមរយៈ ១៣៦ការិយាល័យ និងសាខារបស់ខ្លួន ។

ក្នុងឱកាសនោះ លោក អ៊ិន ចាន់នី អគ្គនាយក ធនាគារអេស៊ីលីដាភីអិលស៊ី បានមានប្រសាសន៍ថា "យើងខ្ញុំមានសេចក្តីសោមនស្សរីករាយណាស់ ដែលទទួលបានរង្វាន់នេះ ។ ធនាគារ HSBC គឺជាដៃគូមួយដ៏សំខាន់ ដែលជួយឱ្យយើងខ្ញុំបានក្លាយជាធនាគារពាណិជ្ជ ប្រកបដោយការអនុវត្តល្អឥតខ្ចោះ និងការប្តេជ្ញាចិត្តយ៉ាងមុតមាំ ក្នុងការផ្តល់នូវសេវាទូទាត់ជាសកល និងគ្រប់គ្រងសាច់ប្រាក់ជូនដល់សហគ្រិន និងអតិថិជនទាំងនៅក្នុងស្រុក និងនៅបរទេស ។" លោកបានមានប្រសាសន៍បន្ថែមទៀតថា "ខ្ញុំមានការជឿជាក់យ៉ាងរឹងមាំថា វិញ្ញាបនបត្រឧត្តមភាពនេះ គឺជាភស្តុតាងយ៉ាងសំខាន់សម្រាប់អតិថិជនក្នុងការប្រើប្រាស់សេវាកម្មរបស់ ធនាគារអេស៊ីលីដាភីអិលស៊ី" ។

HSBC Bank, N.A. គឺជាធនាគារមួយស្ថិតនៅលំដាប់ថ្នាក់ទីមួយ ក្នុងសេវាទូទាត់និងគ្រប់គ្រងសាច់ប្រាក់ ជារូបិយប័ណ្ណដុល្លារអាមេរិក ដែលមានស្ថាប័នហិរញ្ញវត្ថុចំនួនជាង ១៥០០ មកពីប្រទេស និងតំបន់ផ្សេងៗគ្នាជាង ១១៥ បានបើកគណនីផាត់ទាត់ជាមួយ និងមានទ្រព្យសកម្មកើនឡើងជិតដល់ ៣០០ពាន់លានដុល្លារអាមេរិក ។ វាជួយបង្កើតឱ្យមាននូវភាពរឹងមាំខាងសេវាហិរញ្ញវត្ថុឯកត្តជន សេវាធនាគារឯកជន សេវាធនាគារពាណិជ្ជកម្ម និងសេវាធនាគារវិនិយោគសហគ្រាស ព្រមទាំងការបែងចែកទីផ្សារ ។ គោលដៅរបស់ធនាគារ HSBC គឺនាំធនាគារផ្សេងៗឱ្យចូលរួមក្នុងគោលគំនិតចម្បងនៃវិស័យធនាគារ ក្នុងការជួយកាត់បន្ថយការលាងលុយកខ្វក់ និងភេរវកម្ម និងធ្វើឱ្យកាន់តែប្រសើរឡើងនូវសេវាទូទាត់ និងគ្រប់គ្រងសាច់ប្រាក់ ។

« ព័ត៌មានមុន
ពិធីសម្ពោធបើកធនាគារអេស៊ីលីដាភីអិលស៊ី ការិយាល័យស្រុកស្ទឹងត្រែង ព័ត៌មានបន្ទាប់ »
ធនាគារ អេស៊ីលីដា ទទួលពានរង្វាន់នៃភាពជាដៃគូឈានមុខគេ ពីសាជីវកម្មហិរញ្ញវត្ថុអន្តរជាតិ

ធនាគារ អេស៊ីលីដា ភីអិលស៊ី ទទួល​បាន​វិញ្ញាបនបត្រ​ឧត្តមភាព​ពី​ធនាគារ HSBC

ធនាគារ អេស៊ីលីដា ភីអិលស៊ី ទទួលបានវិញ្ញាបនបត្រឧត្តមភាពពីធនាគារ HSBC