ព័ត៌មានព័ត៌មានថ្មីៗពានរង្វាន់នៃភាពជាដៃគូឈានមុខគេ ពីសាជីវកម្មហិរញ្ញវត្ថុអន្តរជាតិ

ធនាគារ អេស៊ីលីដា ទទួលពានរង្វាន់នៃភាពជាដៃគូឈានមុខគេ ពីសាជីវកម្មហិរញ្ញវត្ថុអន្តរជាតិ

ថ្ងៃទី២៦ ខែកញ្ញា ឆ្នាំ២០០៥

ពានរង្វាន់នៃភាពជាដៃគូឈានមុខគេ សម្រាប់ឆ្នាំ២០០៥ របស់សាជីវកម្មហិរញ្ញវត្ថុអន្តរជាតិ

នៅវ៉ាស៊ីនតោន ឌីស៊ី ថ្ងៃទី២៦ ខែកញ្ញា ឆ្នាំ២០០៥ IFC (International Finance Corporation / សាជីវកម្មហិរញ្ញវត្ថុអន្តរជាតិ) បានប្រគល់ពានរង្វាន់នៃភាពជាដៃគូឈានមុខគេប្រចាំឆ្នាំរបស់ខ្លួនដល់ធនាគារអេស៊ីលីដា ភីអិលស៊ី ដែលជាស្ថាប័នមីក្រូហិរញ្ញវត្ថុនាំមុខគេនៅក្នុងព្រះរាជាណាចក្រកម្ពុជា ។ ពានរង្វាន់នៃភាពជាដៃគូឈានមុខគេនេះ សម្រាប់អតិថិជនក្រុមហ៊ុនណាមួយ ដែលសម្រេចបានជោគជ័យយ៉ាងល្អប្រសើរជាងគេ និងស្របគ្នានឹងបេសកកម្មរបស់ IFC ដែលបានចូលរួមយ៉ាងគួរឱ្យកត់សម្គាល់ក្នុងការអភិវឌ្ឍដោយនិរន្តរភាព ។

លោក Assaad Jabre អគ្គនាយករងស្តីទីនៃ IFC បានមានប្រសាសន៍ថា "ការវិវឌ្ឍរបស់ធនាគារអេស៊ីលីដា ពីស្ថាប័នមិនរកប្រាក់ចំណេញ ដែលផ្តោតទៅលើការអភិវឌ្ឍតាមជនបទ ក្លាយទៅជាធនាគារពាណិជ្ជជម្រើសទីមួយ កំពុងផ្តល់សេវាជូនសហគ្រិនរាប់ពាន់នាក់ ទាំងនៅជនបទនិងនៅទីក្រុងនានា ដែលនេះគឺជាគំរូដ៏ល្អសម្រាប់អាជីវកម្មគ្រប់ប្រភេទ មិនត្រឹមតែសម្រាប់ស្ថាប័នមីក្រូហិរញ្ញវត្ថុប៉ុណ្ណោះទេ" ។ លោកបានបន្តទៀតថា "អ្នកទទួលបានពានរង្វាន់នៃភាពជាដៃគូឈានមុខគេពី IFC គឺជាក្រុមហ៊ុនដែលបានបង្កើតឱ្យមាននូវកម្រិតមាត្រាដ្ឋាននៃភាពជាអ្នកដឹកនាំនៅក្នុងអភិបាលកិច្ចសាជីវកម្ម ការចូលរួមក្នុងសហគមន៍ និរន្តរភាពនៃបរិស្ថាននិងសង្គម និងភាពជោគជ័យក្នុងមុខជំនួញ ៖ អេស៊ីលីដា ពិតជាសក្តិសមនឹងទទួលពានរង្វាន់នេះ" ។

ដោយមានការគាំទ្រពី IFC អេស៊ីលីដាបានកម្លាយខ្លួនពីអង្គការក្រៅរដ្ឋាភិបាល មានអតិថិជនឥណទានខ្នាតតូចចំនួន ៥៥.០០០នាក់ រហូតដល់ក្លាយជាអ្នកផ្តល់ប្រាក់កម្ចីធំជាងគេទី២ ក្នុងព្រះរាជាណាចក្រកម្ពុជា ។ អេស៊ីលីដា បានពង្រីកបណ្ដាញប្រតិបត្តិការទៅកាន់តំបន់ដែលពុំធ្លាប់បានទទួលសេវាពីស្ថាប័នហិរពា្ញវត្ថុ និងមានអតិថិជនឥណទានសកម្មសរុបជាង ១៣១.០០០នាក់ តាមរយៈការិយាល័យនិងសាខាទាំង១៣៦ ។

ជិត៧០ភាគរយ នៃអតិថិជនឥណទានរបស់ធនាគារអេស៊ីលីដា ជាស្ត្រីភេទ ។ ឥណទានភាគច្រើនរបស់ធនាគារ ត្រូវបានផ្តល់ទៅឱ្យសហគ្រិនដែលលក់ដូរផលិតផលជាមូលដ្ឋានដូចជា ស្រូវ ត្រី ផលិតផលកសិកម្ម និង ផលិតផលហត្ថកម្ម ។

លោក អ៊ិន ចាន់នី អគ្គនាយកធនាគារ អេស៊ីលីដា មានប្រសាសន៍ថា "យើងមានសេចក្តីសោមនស្សរីករាយក្រៃលែង ដែលទទួលបានពានរង្វាន់នេះ ។ IFC គឺជាដៃគូដ៏មានសារៈសំខាន់ក្នុងការជួយឱ្យយើងក្លាយជាធនាគារពាណិជ្ជពេញលេញ ដែលនាំយកសេវាហិរញ្ញវត្ថុដ៏មានសារៈសំខាន់ជូនដល់សហគ្រិនទូទៅ និងក្រុមគ្រួសារនៅតាមជនបទ ក៏ដូចជានៅទីក្រុងនានាផងដែរ" ។ លោកបានបន្តទៀតថា "ខ្ញុំមានការជឿជាក់យ៉ាងមុតមាំថា និរន្តរភាពនៃមីក្រូហិរញ្ញវត្ថុ គឺជាឧបករណ៍មួយដ៏សំខាន់សម្រាប់ការរីកចម្រើនសេដ្ឋកិច្ចដល់ប្រជាជនសាមញ្ញ និងជាឧបករណ៍ដ៏មានឥទ្ឋិពលក្នុងការប្រយុទ្ឋប្រឆាំងភាពក្រីក្រនៅក្នុងប្រទេសកម្ពុជា" ។

សមាគមទីភ្នាក់ងារអភិវឌ្ឍន៍សេដ្ឋកិច្ចកម្ពុជា (ACLEDA / អេស៊ីលីដា) បានបង្កើតឡើងនៅក្នុងឆ្នាំ១៩៩៣ ហើយបានចាប់ផ្តើមកម្លាយខ្លួនទៅជាធនាគារដែលបម្រើសេវាពេញលេញនៅក្នុងឆ្នាំ១៩៩៨ ដោយមានការជួយគាំទ្រពី កម្មវិធីអភិវឌ្ឍន៍វិស័យឯកជនតំបន់ទន្លេមេគង្គ របស់ IFC ដែលបានជួយខាងផ្នែកបច្ចេកទេស ភ្នាក់ងារអភិវឌ្ឍន៍អន្តរជាតិនៃសហរដ្ឋអាមេរិក កម្មវិធីអភិវឌ្ឍន៍អង្គការសហប្រជាជាតិ និង ភ្នាក់ងារផ្តល់ជំនួយអន្តរជាតិជាច្រើនទៀត ។

IFC បានដាក់ទុនវិនិយោគនៅក្នុងអេស៊ីលីដា នៅពីឆ្នាំ២០០០ និង វិនិយោគបន្ថែមនៅឆ្នាំ២០០៣ ដែលបានអូសទាញអ្នកវិនិយោគដ៏ទៃទៀត និងបានធ្វើហិរញ្ញប្បទានដើម្បីពង្រីកលទ្ធភាពផ្តល់ប្រាក់កម្ចីរបស់ធនាគារ ទៅដល់សហគ្រាសខ្នាតតូចបំផុត ។ សព្វថ្ងៃធនាគារមានសមតុល្យឥណទានចំនួន ៨០លានដុល្លារអាមេរិក បើប្រៀបធៀបទៅនឹងឆ្នាំ១៩៩៨ គឺមានត្រឹមតែ ១០លានដុល្លារអាមេរិកប៉ុណ្ណោះ ។ អេស៊ីលីដា ក៏មានផ្តល់ជូនផងដែរនូវសេវាគណនីបញ្ញើ-សំចៃ សេវាផ្ទេរប្រាក់ ដែលផ្តល់លទ្ធភាពឱ្យគ្រួសារអាចជួយគ្នាឆ្លងកាត់ខេត្តនិងតំបន់នានា និង សេវាបើកប្រាក់បៀវត្សដោយផ្ទេរចូលក្នុងគណនីរបស់អតិថិជនដែលទទួលបានចំណូលតិច ។ តាមមធ្យោបាយនេះ ធនាគារកំពុងសម្រេចបានជោគជ័យនូវគោលដៅជំនួញរបស់ខ្លួន ស្របពេលដែលមានការតាំងចិត្តដើម្បីនិរន្តរភាពនៃការអភិវឌ្ឍនាពេលអនាគត ។

IFC គឺជាអ្នកនាំមុខគេមួយនៅក្នុងវិស័យមីក្រូហិរញ្ញវត្ថុពាណិជ្ជកម្ម ។ នៅថ្ងៃទី៣០ ខែឧសភា ឆ្នាំ២០០៥ IFC បានវិនិយោគចំនួន ៣២៣លានដុល្លារអាមេរិក នៅក្នុងគម្រោងមីក្រូហិរញ្ញវត្ថុ ៦៩ ក្នុង ៤៣ប្រទេស ។ IFC ជួយកសាងស្ថាប័នមីក្រូហិរញ្ញវត្ថុពាណិជ្ជកម្មឱ្យរឹងមាំ តាមរយៈការវិនិយោគ ភាពជាដៃគូ និង ផ្តល់នូវជំនួយបច្ចេកទេស ចាំបាច់ដោយយកចិត្តទុកដាក់បំផុត ។ គោលដៅរបស់ IFC គឺនាំមីក្រូហិរញ្ញវត្ថុឱ្យចូលទៅក្នុងវិស័យធនាគារ ដើម្បីជួយកាត់បន្ថយភាពក្រីក្រ និងបង្កើនជីវភាពរស់នៅរបស់ប្រជាជន ។

លោក Assaad Jabre អគ្គនាយករងស្តីទីនៃ IFC

គុណសម្បត្តិដើម្បីទទួលបានពានរង្វាន់នៃភាពជាដៃគូឈានមុខគេពី IFC និងអត្ថប្រយោជន៍របស់វា

តើស្ថាប័នសាជីវកម្មហិរញ្ញវត្ថុអន្តរជាតិ (IFC) ជាស្ថាប័នអ្វី ? ធ្វើអ្វីខ្លះ ? មានវិសាលភាពដូចម្តេច ?

សាជីវកម្មហិរញ្ញវត្ថុអន្តរជាតិ គឺជាស្ថាប័នអាជីវកម្មអន្តរជាតិ និងជាសមាជិកមួយរបស់ធនាគារពិភពលោក (World Bank Group) ដែលមានការិយាល័យកណ្ដាលនៅទីក្រុងវ៉ាស៊ីនតោន ។ IFC បានចូលរួមក្នុងគោលបំណងសំខាន់ៗរបស់ World Bank Group ដើម្បីធ្វើឱ្យប្រសើរឡើងនូវកម្រិតជីវភាពរស់នៅរបស់ប្រជាជនក្នុងបណ្ដាប្រទេសកំពុងអភិវឌ្ឍន៍ដែលជាសមាជិករបស់ខ្លួន ។

IFC មានសមាជិកចំនួន ១៧៦ប្រទេស មានមូលនិធិទ្រព្យសម្បត្តិសុទ្ឋចំនួន ៧,៨ពាន់លានដុល្លារអាមេរិក ដែលក្នុងនោះដើមទុនជាផ្លូវការមានចំនួន ២,៤៥ពាន់លានដុល្លារអាមេរិក ។ បេសកកម្មរបស់ IFC គឺជំរុញឱ្យមាននិរន្តរភាពការវិនិយោគលើវិស័យឯកជន នៅក្នុងបណ្ដាប្រទេសកំពុងអភិវឌ្ឍន៍ ជួយកាត់បន្ថយភាពក្រីក្រ និងធ្វើឱ្យប្រសើរឡើងនូវកម្រិតជីវភាពរបស់ប្រជាជន លើកកម្ពស់និរន្តរភាពបរិស្ថានសង្គម ផ្តល់ជំនួយបច្ចេកទេស និងការប្រឹក្សាលើការគ្រប់គ្រង និងជំនួញ ។

តើធនាគារអេស៊ីលីដា មានគុណសម្បត្តិអ្វីខ្លះ ទើបទទួលបានរង្វាន់ Client Leadership Award ពី IFC ?

ក្នុងចំណោមស្ថាប័នចំនួន ១៤០០ នៅក្នុងពិភពលោក ដែលបានទទួលហិរញ្ញប្បទានពី IFC ធនាគារ អេស៊ីលីដា ភីអិលស៊ី ជាស្ថាប័នតែមួយគត់ ដែលបានបំពេញនូវលក្ខខណ្ឌប្រសើរជាងគេ ដើម្បីទទួលបានរង្វាន់ Client Leadership Award ពី IFC ។ លក្ខខណ្ឌទាំងនោះរួមមាន ៖

Corporate Governance មានន័យថា ធនាគារអេស៊ីលីដា បានប្រតិបត្តិការត្រឹមត្រូវ និងមានការទទួលខុសត្រូវ (Responsibility) គណនីភាព (Accountability) និងតម្លាភាព (Transparency) ។
Community Involvement មានន័យថា ធនាគារអេស៊ីលីដា បានចូលរួមចំណែកក្នុងការអភិវឌ្ឍ និងបង្កើនកម្រិតជីវភាពប្រជាពលរដ្ឋដោយផ្ទាល់ ដល់តំបន់ជនបទគ្របដណ្ដប់ ២២ខេត្ត-រាជធានី ក្នុងចំណោម២៤ខេត្ត-រាជធានីទូទាំងប្រទេស ដែលមិនមានស្ថាប័នផ្សេងអាចប្រតិបត្តិបាន ។
Environment and Social Sustainability មានន័យថា ធនាគារអេស៊ីលីដា បានចូលរួមពង្រឹងនិរន្តរភាពសង្គម និងបរិស្ថាន ដោយបានអនុវត្តនូវគោលនយោបាយពិសេស ជៀសវាងនូវការផ្តល់ឥណទានដល់ជំនួញ ឬមុខរបរដែលមានផលប៉ះពាល់ដល់បរិស្ថានសង្គម ស្របតាមបទប្បញ្ញត្តិដែលបានហាមឃាត់ជាអន្តរជាតិ ។
Commercial Success មានន័យថា ធនាគារអេស៊ីលីដា ជាស្ថាប័នដែលបានទទួលជោគជ័យ និងបង្កើនប្រាក់ចំណេញជាបន្តបន្ទាប់ ចាប់តាំងពីប្រតិបត្តិការដំបូងរបស់ខ្លួន ជាពិសេសមានភាគលាភសម្រាប់បែងចែកដល់ភាគហ៊ុនិកជារៀងរាល់ឆ្នាំ ។

តើធនាគារអេស៊ីលីដា ភីអិលស៊ី ទទួលបានអត្ថប្រយោជន៍អ្វីខ្លះពីការទទួលរង្វាន់នេះ ?

ព្រឹត្តិការណ៍ទទួលរង្វាន់ Client Leadership Award ផ្តល់អត្ថប្រយោជន៍យ៉ាងទូលំទូលាយដល់ធនាគារអេស៊ីលីដា ដូចខាងក្រោម ៖

ធនាគារអេស៊ីលីដា ត្រូវបានគេទទួលស្គាល់នៅក្នុងសហគមន៍ជាតិ និងអន្តរជាតិ លើប្រតិបត្តិការ ជាធនាគារពាណិជ្ជរបស់ខ្លួន ដែលមានភាពទទួលខុសត្រូវច្បាស់លាស់ ត្រឹមត្រូវ និងមានតម្លាភាព ។
បង្កើនភាពជឿជាក់នៅក្នុងសហគមន៍ទាំងក្នុង និងក្រៅប្រទេស ពិសេសអតិថិជនទាំងអស់របស់ ធនាគារអេស៊ីលីដា ភីអិលស៊ី ជំរុញឱ្យមានការកើនឡើងនូវការប្រើប្រាស់គ្រប់ផលិតផល និងសេវាបញ្ញើ-សន្សំ ។
បុគ្គលិកកាន់តែមានភាពកក់ក្តៅក្នុងការងារ យល់ច្បាស់ពីទស្សនៈ និង បេសកកម្មរបស់ធនាគារ អេស៊ីលីដា មានន័យថា បានធ្វើការជាមួយស្ថាប័នមួយដែលមានសក្តានុពល និងមានការទទួលស្គាល់ជាអន្តរជាតិ ។
បុគ្គលិកទាំងអស់ ត្រូវបានទទួលស្គាល់នៅក្នុងសហគមន៍ជាតិនិងអន្តរជាតិ ថាជាបុគ្គលិកដែលមានវិជ្ជាជីវៈ និងមានតម្លាភាពក្នុងការអនុវត្តការងារតាមមុខងារតួនាទី ប្រកបដោយឆន្ទៈ និងមនសិការខ្ពស់ ។
ផ្តល់ភាពងាយស្រួល និងទំនុកចិត្ត ក្នុងទំនាក់ទំនង និងស្វែងរកមូលនិធិពីបណ្ដាប្រភពទុននានា សម្រាប់គាំទ្រដល់កិច្ចប្រតិបត្តិការរបស់ខ្លួន ។
អត្ថប្រយោជន៍ផ្សេងៗទៀតពីស្ថាប័នមីក្រូហិរញ្ញវត្ថុ ដូចជាសេវាហ្វឹកហ្វឺន ទស្សនកិច្ច កម្មសិក្សា ជាដើម ។

សុន្ទរកថារបស់លោក អ៊ិន ចាន់នី អគ្គនាយកធនាគារអេស៊ីលីដា ភីអិលស៊ី

ពីឆ្វេងទៅស្តាំ លោក Assaad Jabre អគ្គនាយករងស្តីទីនៃ IFC លោក អ៊ិន ចាន់នី អគ្គនាយក និង លោក ជា សុខ ប្រធានក្រុមប្រឹក្សាភិបាល ធនាគារអេស៊ីលីដា

ថ្ងៃនេះ ខ្ញុំមានសេចក្តីសោមនស្សរីករាយក្រៃលែង ដែលបានមកចូលរួមក្នុងពិធីផ្តល់ពានរង្វាន់នៃភាពជាដៃគូឈានមុខគេនេះ ។ ជំនួសមុខឱ្យធនាគារអេស៊ីលីដា និងខ្លួនខ្ញុំផ្ទាល់ ខ្ញុំសូមថ្លែងអំណរគុណយ៉ាងស្មោះស្ម័គ្រចំពោះ IFC ដែលបានជ្រើសរើសធនាគារអេស៊ីលីដា ដើម្បីផ្តល់ជូនពានរង្វាន់នៃភាពជាដៃគូឈានមុខគេ សម្រាប់ឆ្នាំ២០០៥ ។ ក្នុងនាមជាស្ថាប័នមួយក្នុងចំណោមអ្នកវិនិយោគដំបូងទាំងអស់របស់ធនាគារអេស៊ីលីដា IFC បានជួយបង្កើតឱ្យមានធនាគារអេស៊ីលីដា នេះឡើង ។ ដូចនេះខ្ញុំសូមឆ្លៀតឱកាសនេះធ្វើការថ្លែងអំណរគុណដោយផ្ទាល់សម្រាប់អ្វីដែលការវិនិយោគរបស់លោកអ្នកសម្រេចបាន និងថាតើវាមានអត្ថន័យយ៉ាងណាសម្រាប់ប្រជាជនកម្ពុជា ។

អេស៊ីលីដា បានទទួលការគាំទ្រជាលើកដំបូង ពី IFC នៅក្នុងឆ្នាំ១៩៩៨ ជាជំនួយផ្នែកបច្ចេកទេស តាមរយៈកម្មវិធីអភិវឌ្ឍន៍វិស័យឯកជនទន្លេមេគង្គ (MPDF) ។ កាលពីពេលនោះ យើងខ្ញុំមានសមតុល្យឥណទានត្រឹមតែ ១០លានដុល្លារអាមេរិក និងអតិថិជនខ្ចីប្រាក់តូចៗចំនួន ៥៥.០០០នាក់ មានបុគ្គលិកចំនួន ៣១៨នាក់ បម្រើការនៅការិយាល័យចំនួន ២៧ ក្នុងខេត្ត-រាជធានីចំនួន ១១ ក្នុងព្រះរាជាណាចក្រកម្ពុជា ។ ដោយមានការជួយជ្រុំជ្រែង និងផ្តល់ជាហិរញ្ញប្បទានរបស់ IFC សព្វថ្ងៃនេះធនាគារយើងបានក្លាយខ្លួនជាអ្នកផ្តល់ឥណទានធំជាងគេទីពីរនៅក្នុងប្រទេស ដែលមានអតិថិជនឥណទានសរុបចំនួនជាង ១៣០.០០០នាក់ ក្នុងនោះមានប្រមាណ ៧០%ជាស្ត្រី និងមានសមតុល្យឥណទានសរុបចំនួន ៨១លានដុល្លារអាមេរិក ។

ធនាគារអេស៊ីលីដា បានដាក់ឱ្យប្រើប្រាស់សេវាបញ្ញើ-សន្សំទៅដល់ស្រទាប់ប្រជាជនសាមញ្ញ នៅតាមតំបន់ជនបទ និងទីក្រុង តាមរយៈបណ្ដាញការិយាល័យរបស់យើង ដែលមានចំនួន ១៣៦ការិយាល័យ ស្ថិតក្នុង ២២ខេត្ត-រាជធានី ក្នុងចំណោមខេត្ត-រាជធានីទាំង ២៤ ក្នុងព្រះរាជាណាចក្រកម្ពុជា ។ សព្វថ្ងៃនេះមានអតិថិជនដាក់ប្រាក់សន្សំតូចៗ ដែលគាត់មិនធ្លាប់បានប្រើសេវាធនាគារពីមុនមក ចំនួន ៧៦.៩៧៩នាក់ បានយកប្រាក់របស់គាត់មកដាក់ផ្ញើនៅធនាគារអេស៊ីលីដា ។ ចំនួនទឹកប្រាក់បញ្ញើនៅធនាគារអេស៊ីលីដា បានកើនឡើងពីចំណុចសូន្យ កាលពីបួនឆ្នាំមុន មកដល់ជិត ៦២លានដុល្លារអាមេរិក នាពេលបច្ចុប្បន្ននេះ ។ កាលពីឆ្នាំមុន ធនាគារអេស៊ីលីដា បានទទួលអាជ្ញាប័ណ្ណជាធនាគារពាណិជ្ជយ៉ាងពេញលេញ ។ ចាប់តាំងពីពេលនោះមក ចំនួនបុគ្គលិករបស់យើងបានកើនឡើងដល់ជាង ២.៣០០នាក់ ភាគច្រើនជានិស្សិតទទួលបរិញ្ញាបត្រ ។ ហើយបច្ចុប្បន្ននេះ ធនាគារអេស៊ីលីដា មានបម្រើនូវសេវាធនាគារយ៉ាងទូលំទូលាយ ជូនដល់សហគ្រិនអាជីវកម្មខ្នាតតូចបំផុត និងខ្នាតតូច ក៏ដូចជាអាជីវកម្មខ្នាតធំជាងនេះ នៅទូទាំងប្រទេស ។ ជាឧទាហរណ៍ ឥឡូវនេះអតិថិជនអាចផ្ទេរប្រាក់ដោយសេរី ទូទាំងប្រទេស និងអាចផ្ទេរជាមួយប្រទេសដទៃទៀត ។ យើងក៏បានដាក់ឱ្យប្រើប្រាស់ផងដែរនូវសេវាគណនីបើកប្រាក់បៀវត្ស ដល់រោងចក្រ និងក្រុមហ៊ុននានា ។ សេវាបើកប្រាក់បៀវត្សនេះជួយសម្រួលនូវបន្ទុកចំណាយ និងហានិភ័យទាក់ទងនឹងការចាត់ចែងសាច់ប្រាក់ និងជួយលើកទឹកចិត្តឱ្យបុគ្គលិក ឱ្យចេះដាក់ប្រាក់សន្សំថែមទៀត ។

មានបុគ្គលជាច្រើនតែងតែសួរខ្ញុំថា "ឥឡូវលោកទទួលបានអាជ្ញាប័ណ្ណធនាគារពាណិជ្ជហើយ តើលោកនឹងឈប់ផ្តល់សេវាដល់អតិថិជនខ្នាតតូចទៀតហើយមែន ឬទេ ?" ផ្ទុយទៅវិញ សមតុល្យឥណទានផ្នែកមីក្រូហិរញ្ញវត្ថុរបស់យើង គឺជាផ្នែកមួយដែលពង្រីកយ៉ាងលឿនជាងគេ ក្នុងអាជីវកម្មរបស់យើង ។ ម្យ៉ាងទៀត មួយផ្នែកធំនៃការកើនឡើងឥណទានសម្រាប់សហគ្រាសខ្នាតតូច និងខ្នាតមធ្យម បានមកពីអតិថិជនដែលធ្លាប់ ទទួលឥណទានខ្នាតតូចបំផុត និងខ្នាតតូច ដែលការជោគជ័យរបស់គាត់ ជួយឱ្យពួកគាត់បានឈានឡើងកាំសេដ្ឋកិច្ច ។ ចំណូលប្រចាំឆ្នាំនៃប្រជាជនម្នាក់ៗក្នុងប្រទេសកម្ពុជានៅមានកម្រិតទាបនៅឡើយ គឺ ៣២០ដុល្លារអាមេរិកប៉ុណ្ណោះ ។ អេស៊ីលីដា ដែលបានទទួលនូវជោគជ័យយ៉ាងលេចធ្លោ ក្នុងវិស័យមីក្រូហិរញ្ញវត្ថុ និងមិនឆោតល្ងង់បែរខ្នងដាក់ប្រភពនៃជោគជ័យពីអតីត និងទៅថ្ងៃអនាគតរបស់ខ្លួននោះទេ !

ប្រវត្តិអតិថិជនមួយចំនួនរបស់ធនាគារអេស៊ីលីដា នឹងបញ្ជាក់ឱ្យកាន់តែច្បាស់ពីចំណុចនេះ ។ អ្នកស្រី ហ៊ួន គង់ ជាស្ត្រីមេម៉ាយ រស់នៅជាមួយកូនស្រី ៣នាក់ នៅរាជធានីភ្នំពេញ ។ នៅក្នុងឆ្នាំ១៩៩៧ គាត់ប្រកបមុខរបរលក់នំបញ្ចុកនៅផ្សារបឹងទំពុន ។ ដោយទទួលបានឥណទានដំបូងរបស់ធនាគារអេស៊ីលីដា មានទឹកប្រាក់ចំនួន ២០០.០០០រៀល (ប្រហែល ៤៨ដុល្លារអាមេរិក) គាត់បានចាប់ផ្តើមផ្លាស់ប្តូរមុខរបររបស់គាត់ ។ មុខរបរថ្មីរបស់គាត់នាពេលបច្ចុប្បន្ន បានដាក់ឈ្មោះថា "ហាងលក់បាយ និងម្ហូបឆ្អិនស្រាប់" ។ ឥឡូវនេះគាត់កំពុងទទួលឥណទានលើកទី១៨ ពីធនាគារអេស៊ីលីដា ដែលមានទឹកប្រាក់ចំនួន ១,៥លានរៀល (ប្រហែល ៣៥៨ដុល្លារអាមេរិក) ។ ធនាគារអេស៊ីលីដា បានធ្វើឱ្យជីវិតរបស់អ្នកស្រី គង់ មានការផ្លាស់ប្តូរ ។ មុនពេលគាត់បានចាប់ផ្តើមខ្ចីប្រាក់ពីអេស៊ីលីដា គាត់រស់នៅក្នុងផ្ទះដ៏តូចមួយ ដែលមានដំបូលនិងជញ្ជាំងធ្វើពីស្លឹកត្នោត ។ ឥណទានរបស់ធនាគារអេស៊ីលីដា បានជួយឱ្យមុខរបរ និងចំណូលរបស់គាត់មានការរីកចម្រើន ។ ឥឡូវគាត់សង់ផ្ទះមួយធំជាងមុន មានជញ្ជាំងធ្វើអំពីឈើ និងដំបូលប្រក់ស័ង្កសី ។ គាត់ទិញម៉ូតូមួយ ដើម្បីធ្វើឱ្យជីវិតងាយស្រួល ។ កូនស្រីរបស់គាត់ ឥឡូវបានចូលរៀនទាំងអស់គ្នា ។

អ្នកស្រី ខាត់ ចៀន អតិថិជនម្នាក់ទៀត គាត់ជាស្ត្រីមេម៉ាយ រស់នៅជាមួយកូន ៨នាក់ នៅក្នុង ស្រុកកំពង់បាយ ខេត្តកំពត ។ គាត់មានមុខរបរធ្វើកញ្ឆេនិងល្អីអំពីឫស្សី សម្រាប់ដាក់របស់របរ ។ ឥណទានដំបូងរបស់គាត់នៅឆ្នាំ១៩៩៦ ចំនួន ១៥០.០០០រៀល (ប្រហែល ៣៦ដុល្លារអាមេរិក) អាចឱ្យគាត់មានលទ្ធភាពទិញកង់សម្រាប់ដឹកជញ្ជូនឫស្សី ។ ឥណទានក្រោយគេបង្អស់ពីធនាគារអេស៊ីលីដា មានចំនួន ៨០០.០០០រៀល (ប្រហែល ១៩១ដុល្លារអាមេរិក) ត្រូវបានផ្តល់ជូនដើម្បីពង្រីកមុខរបររបស់គាត់ ។ ដោយទទួលបានឥណទានរបស់ធនាគារអេស៊ីលីដា មុខរបររបស់អ្នកស្រី ចៀន មានការរីកចម្រើន និងផ្តល់លទ្ធភាពឱ្យគាត់អាចផ្គត់ផ្គង់ជីវភាពគ្រួសាររបស់គាត់បានយ៉ាងល្អប្រសើរ ។ គាត់បានសង់ផ្ទះដែលធ្វើអំពីឈើ និងមានដំបូលប្រក់ស័ង្កសី ហើយធំជាងផ្ទះពីមុនដែលធ្វើអំពីស្បូវ ។ កូនៗរបស់គាត់ចំនួន ៥នាក់ បានចូលរៀន និងកូនផ្សេងទៀតជួយធ្វើការជាមួយគាត់ ។ គាត់បានទិញដីស្រែចំការ ជាមួយនឹងគោញីមួយ និងឈ្មោលមួយ ។

ស្ថានភាពធនាគារពាណិជ្ជថ្មីរបស់យើងបានបង្ហាញថា យើងនៅតែអាចបន្តផ្តល់ឥណទានជូនសហគ្រិន ដែលទទួលបានជោគជ័យក្នុងជំនួញរបស់ពួកគេ ។ លោក កេង ចេក ជាបុរសម្នាក់រៀបការរួចហើយ រស់នៅក្នុងខេត្តសៀមរាប ដែលជាទឹកដីនៃប្រាសាទអង្គរវត្តដ៏ល្បីល្បាញ ។ គាត់បានចាប់ផ្តើមមុខរបរបោះពុម្ភលើអាវយឺត និងបានទទួលឥណទានដំបូងពីធនាគារអេស៊ីលីដា បន្ទាប់ពីបានសិក្សាជំនាញពីអង្គការពលកម្មអន្តរជាតិ (ILO) នូវកម្មវិធីបណ្ដុះបណ្ដាលវិជ្ជាជីវៈក្នុងឆ្នាំ១៩៩៣ ។ គាត់ខ្ចីលុយដំបូងចំនួន ៤៨៨ដុល្លារអាមេរិក ដើម្បីទិញពុម្ភសម្រាប់ធ្វើរូបចម្លាក់អប្សរានិងអង្គរ និងឧបករណ៍សម្រាប់បោះពុម្ភលើអាវយឺត និងផលិតផលផ្សេងៗទៀត ។ គាត់បានចាប់ផ្តើមមុខរបរនេះជាមួយនឹងគ្រួសាររបស់គាត់ ដោយគ្មានកម្មករផ្សេងទេ ។ នៅពេលនោះគាត់រកចំណូលបានត្រឹមតែ ៩៧ដុល្លារអាមេរិក ក្នុងមួយខែ ។ បន្ទាប់ពីគាត់សងប្រាក់កម្ចីដំបូងរបស់គាត់រួចហើយ គាត់បានសុំខ្ចីឥណទានពីអេស៊ីលីដាបន្តបន្ទាប់ទៀត ពីព្រោះគាត់ចង់បង្កើនមុខរបររបស់គាត់ ។ ដោយហេតុមានតម្រូវការខ្លាំង លោក ចេក បានបន្តធ្វើឱ្យប្រសើរឡើង និងពង្រីកនូវមុខរបររបស់គាត់ ។ ឥណទានទី៦ របស់លោក ចេក ពីធនាគារអេស៊ីលីដា មានចំនួន ១៥.០០០ដុល្លារអាមេរិក ។ ចំណូលសុទ្ឋរបស់គាត់បានកើនឡើង រហូតដល់ច្រើនជាង ១.៦០០ដុល្លារអាមេរិក ក្នុងមួយខែ និងមុខរបររបស់គាត់បានជួលបុគ្គលិក ១០នាក់សម្រាប់ធ្វើការពេញម៉ោង ។ មុខជំនួញរបស់លោក ចេក បានធ្វើឱ្យជីវិតរបស់គាត់ និងគ្រួសារប្រសើរឡើង ។ ឥឡូវនេះគាត់មានឡាន និងម៉ូតូជាច្រើនគ្រឿងសម្រាប់ដឹកជញ្ជូន និងមានដីមួយក្បាល ។

ខ្ញុំអាចបន្តលើកយកប្រវត្តិអតិថិជនជាច្រើនទៀត ដែលធនាគារអេស៊ីលីដា បានបម្រើជូនពួកគាត់ ប៉ុន្តែខ្ញុំគិតថាករណីបីដែលបានលើកឡើងខាងលើនេះ បានបញ្ជាក់ពីមូលហេតុដែលរូបខ្ញុំជឿជាក់យ៉ាងមុតមាំថា ស្ថិរភាពមីក្រូហិរញ្ញវត្ថុគឺជាឧបករណ៍ដ៏សំខាន់ សម្រាប់បង្កើនសេដ្ឋកិច្ចដល់ប្រជាជនដែលមានកម្រិតជីវភាពទាប ។ វាផ្តល់មធ្យោបាយសម្រាប់ជំរុញឱ្យមានការអភិវឌ្ឍសង្គម និងជាអាវុធសម្រាប់ប្រយុទ្ឋប្រឆាំងនឹងភាពក្រីក្រនៅក្នុងប្រទេសកម្ពុជា ។

នៅក្នុងឱកាសដ៏សំខាន់និងរីករាយនេះ ខ្ញុំសូមថ្លែងអំណរគុណយ៉ាងជ្រាលជ្រៅបំផុតចំពោះ IFC និងភាគហ៊ុនិកផ្សេងទៀតរបស់យើងទាំងអស់ សម្រាប់ការវិនិយោគរបស់លោកជាមួយធនាគារអេស៊ីលីដា ។ ជោគជ័យទាំងអស់ដែលយើងខ្ញុំទទួលបាន ក៏ជាជោគជ័យលោកដែរ !

ក្នុងនាមរូបខ្ញុំផ្ទាល់ និងមិត្តរួមការងាររបស់ខ្ញុំទាំងអស់នៅធនាគារអេស៊ីលីដា ខ្ញុំសូមជូនពរឱ្យ IFC ទទួលបាននូវជោគជ័យ និងភាពសំបូររុងរឿងជាច្រើនទសវត្សតទៅមុខទៀត និងសូមឱ្យការសហការយ៉ាងប្រពៃរបស់យើង នៅតែបន្តទៅមុខយូរអង្វែងទៀត !

« ព័ត៌មានមុន
ធនាគារ អេស៊ីលីដា ភីអិលស៊ី ទទួលបានវិញ្ញាបនបត្រឧត្តមភាពពីធនាគារ HSBC ព័ត៌មានបន្ទាប់ »
ពិធីសម្ពោធសៀវភៅ "នៅពេលដែលគ្មានលុយ ៖ ការបង្កើតធនាគារអេស៊ីលីដា នៅក្នុងដំណាក់កាលវិវដ្តនៃវិស័យហិរញ្ញវត្ថុនៅកម្ពុជា" នៅទីក្រុងញូវយ៉ក

ធនាគារ អេស៊ីលីដា ទទួល​ពាន​រង្វាន់​នៃ​ភាព​ជា​ដៃ​គូ​ឈាន​មុខ​គេ ពី​សាជីវកម្ម​ហិរញ្ញវត្ថុ​អន្តរជាតិ

គុណសម្បត្តិ​ដើម្បី​ទទួល​បាន​ពាន​រង្វាន់​នៃ​ភាព​ជា​ដៃ​គូ​ឈាន​មុខ​គេ​ពី IFC និង​អត្ថប្រយោជន៍​របស់​វា

តើ​ស្ថាប័ន​សាជីវកម្ម​ហិរញ្ញវត្ថុ​អន្តរជាតិ (IFC) ជា​ស្ថាប័ន​អ្វី ? ធ្វើ​អ្វី​ខ្លះ ? មាន​វិសាលភាព​ដូចម្តេច ?

តើ​ធនាគារ​អេស៊ីលីដា មាន​គុណ​សម្បត្តិ​អ្វី​ខ្លះ ទើប​ទទួល​បាន​រង្វាន់ Client Leadership Award ពី IFC ?