ព័ត៌មានព័ត៌មានថ្មីៗសម្ពោធសៀវភៅ 'នៅពេលដែលគ្មានលុយ...' នៅទីក្រុងញូវយ៉ក

ពិធីសម្ពោធសៀវភៅ "នៅពេលដែលគ្មានលុយ ៖ ការបង្កើតធនាគារអេស៊ីលីដា នៅក្នុងដំណាក់កាលវិវដ្តនៃវិស័យហិរញ្ញវត្ថុនៅកម្ពុជា" នៅទីក្រុងញូវយ៉ក

ថ្ងៃទី០៧ ខែវិច្ឆិកា ឆ្នាំ២០០៥

បណ្ឌិត Pieter Kooi សមាជិកគណៈកម្មាធិការក្រុមប្រឹក្សាភិបាល ធនាគារអេស៊ីលីដា និងលោក អ៊ិន ចាន់នី ប្រធាននាយកប្រតិបត្តិ ធនាគារអេស៊ីលីដា

សូមគោរពភ្ញៀវកិត្តិយស ព្រះអង្គម្ចាស់ ព្រះអង្គម្ចាស់ក្សត្រី លោក លោកស្រី ប្រិយមិត្ត មិត្តសំលាញ់ និងមិត្តរួមការងារទាំងអស់ ។

ថ្ងៃនេះខ្ញុំមានសេចក្តីរីករាយយ៉ាងក្រៃលែង ដែលបានចូលរួមជាមួយលោក-អ្នកក្នុងពិធីបើកសម្ពោធសៀវភៅ "នៅពេលដែលគ្មានលុយ ៖ ការបង្កើតធនាគារអេស៊ីលីដា នៅក្នុងដំណាក់កាលវិវដ្តនៃវិស័យហិរញ្ញវត្ថុនៅកម្ពុជា" (When There Was No Money: Building ACLEDA Bank in Cambodia’s Evolving Financial Sector) ។

លោក-អ្នកប្រហែលជាគិតថា នេះជាចំណងជើងចម្លែកមួយរបស់សៀវភៅ ដែលសរសេរអំពីមីក្រូហិរញ្ញវត្ថុ និងការបង្កើតធនាគារមួយ ។ ប៉ុន្តែ កាលពីជាងមួយទសវត្សរ៍ មុនពេលអេស៊ីលីដាបានចាប់ផ្តើមនៅក្នុងឆ្នាំ១៩៩២ ប្រទេសកម្ពុជាមិនមានរូបិយវត្ថុជាតិទេ គឺមិនមានលុយ ។ រូបិយវត្ថុត្រូវបានដាក់នៅក្រៅច្បាប់នៅឆ្នាំ១៩៧៥ ហើយយើងបន្តគ្មានលុយរហូតដល់ឆ្នាំ១៩៨០ ។ បទពិសោធន៍របស់យើងនៅក្នុងការកសាងសហគ្រាសខ្នាតតូចនិងខ្នាតតូចបំផុត និង ការបង្កើតធនាគារមួយដែលបម្រើផលប្រយោជន៍ដល់សហគ្រាសទាំងអស់នោះ គឺមាននៅក្នុងប្រធានបទរបស់សៀវភៅនេះ ។

សព្វថ្ងៃធនាគារអេស៊ីលីដា គឺជាធនាគារដែលមានបណ្ដាញសាខាធំបំផុតនៅក្នុងប្រទេស និងជាធនាគារដែលធំជាងគេលំដាប់ទីពីរ ។ យើងមានអតិថិជនឥណទានសកម្មជិត ១៣៦.៧៨៦នាក់ ជិត៧០ភាគរយជាស្ត្រី និង ឥឡូវមានសមតុល្យឥណទានសរុបចំនួន ៨៩,៧លានដុល្លារអាមេរិក ។ ធនាគារអេស៊ីលីដាបានដាក់ឱ្យប្រើប្រាស់នូវសេវាបញ្ញើ-សន្សំទៅដល់ស្រទាប់ប្រជាជនសាមញ្ញ នៅតាមតំបន់ជនបទ និងទីក្រុង តាមរយៈបណ្ដាញការិយាល័យរបស់យើង ដែលមានចំនួន ១៣៧ការិយាល័យ ស្ថិតក្នុង ២២ខេត្ត-រាជធានី ក្នុងចំណោមខេត្ត-រាជធានីទាំង ២៤ ក្នុងព្រះរាជាណាចក្រកម្ពុជា ។ សព្វថ្ងៃនេះមានអតិថិជនដាក់ប្រាក់សន្សំតូចៗ ចំនួន ៨៣.៧៦៤នាក់ ដែលគាត់ មិនធ្លាប់បានប្រើសេវាធនាគារពីមុនមក បានយកប្រាក់របស់គាត់មកដាក់ផ្ញើនៅធនាគារអេស៊ីលីដា ។ ចំនួនទឹកប្រាក់បញ្ញើនៅធនាគារអេស៊ីលីដា បានកើនឡើងស្ទើរពីចំណុចសូន្យកាលពីបួនឆ្នាំមុន មកដល់ជិត ៦១លានដុល្លារអាមេរិក នាពេលបច្ចុប្បន្ននេះ ។

សៀវភៅ "នៅពេលដែលគ្មានលុយ ៖ ការបង្កើតធនាគារអេស៊ីលីដា នៅក្នុងដំណាក់កាលវិវដ្តនៃវិស័យហិរញ្ញវត្ថុនៅកម្ពុជា"

ខ្ញុំសូមជម្រាបជូនលោក-អ្នកនូវហេតុផលខ្លះៗ ដែលយើងខ្ញុំចង់ចែករំលែកនូវបទពិសោធន៍របស់យើង តាមរយៈសៀវភៅនេះ ។ បទពិសោធន៍របស់យើងប្រហែលជាមានភាពទាក់ទាញជាងអង្គការមីក្រូហិរញ្ញវត្ថុផ្សេងៗទៀត ប៉ុន្តែអង្គការនីមួយៗមានបញ្ហាផ្ទាល់ខ្លួនរបស់គេ និងអាចដោះស្រាយបញ្ហាទាំងនោះទៅតាមមធ្យោបាយផ្ទាល់ខ្លួនរបស់ពួកគេ ។

យើងចង់ចែករំលែកនូវរឿងរ៉ាវរបស់អេស៊ីលីដា តាមរយៈមូលហេតុពីរ ៖

មូលហេតុទី១ គឺដើម្បីយើងរំលឹកឡើងវិញនូវប្រវត្តិរបស់អេស៊ីលីដា ដូច្នេះបុគ្គលិកថ្មីៗរបស់យើងអាចដឹងថាធនាគារអេស៊ីលីដាមានប្រភពមកពីណា ឫសគល់របស់អេស៊ីលីដាគឺជាអ្វី និងអ្វីដែលមានសារៈសំខាន់សម្រាប់បង្កើតអេស៊ីលីដា ។

យើងខ្ញុំចង់ឱ្យពួកគេបានដឹងនូវអ្វីដែលយើងបានសិក្សារៀនសូត្រ នៅពេលយើងបានកសាងឡើងនូវអ្វីដែលយើងបានគិតថា ជាសារៈសំខាន់ដល់ប្រជាជន និងប្រទេសរបស់យើង ។

យើងតែងតែគិតថាទ្រព្យសកម្មដ៏សំខាន់បំផុតរបស់យើង គឺអតិថិជននិងបុគ្គលិកទាំងអស់របស់យើង ។ វាជាការសំខាន់ណាស់ដែលយើងបន្តចងចាំពីរបៀបដែលយើងបានសិក្សាដំបូងអំពីអតិថិជនរបស់យើង និងសិក្សាពីរបៀបឆ្លើយតបទៅកាន់ពួកគាត់វិញ ដែលមានភាពងាយស្រួលសម្រាប់គាត់ និងសម្រាប់យើង ។ យើងទទួលបានការរីកចម្រើនជាមួយគ្នា ។
មូលហេតុទី២ គឺយើងអាចចូលរួមចំណែកក្នុងការអភិវឌ្ឍរបស់អ្នកដទៃ ។ ក្នុងអំឡុងពេល១៤ឆ្នាំនេះ យើងបានសិក្សាយ៉ាងសន្ឋឹកសន្ឋាប់ ពីអង្គការមីក្រូហិរញ្ញវត្ថុ និងធនាគារដទៃទៀតជាច្រើន ។ ឥឡូវនេះ យើងល្មមអាចផ្តល់ជូនអ្នកដទៃម្តងវិញហើយ ។

វាគឺជាការពិតណាស់ដែលថាយើងមិនអាចមានចម្លើយចំពោះគ្រប់បញ្ហានោះទេ ក៏ប៉ុន្តែយើងបានដឹងខ្លះៗដែរ ។ យើងសង្ឈឹមថាអង្គភាពដទៃអាចទទួលបាននូវអត្ថប្រយោជន៍ពីយើង ដូចមេរៀនដែលយើងធ្លាប់ទទួលបានកន្លងមកពីអង្គភាពផ្សេងៗដែលមានបទពិសោធន៍ច្រើនជាង ។

លោក អ៊ិន ចាន់នី និង អ្នកស្រី Heather Clark ចុះហត្ថលេខាលើសៀវភៅ

ហើយខ្ញុំក៏ចង់ជម្រាបជូនលោក-អ្នកផងដែរ នូវមូលហេតុអ្វីដែលយើងចង់ឱ្យអ្នកស្រី Heather Clark ជាអ្នកសរសេរសៀវភៅនេះឡើង ។ អ្នកស្រីមានបទពិសោធន៍យ៉ាងទូលំទូលាយក្នុងវិស័យមីក្រូហិរញ្ញវត្ថុ និងបានជួបប្រទះនូវលទ្ធផលជាច្រើនប្រទេសមកហើយ ។ យើងបានដឹងថា អ្នកស្រីអាចរៀបចំបញ្ចូលគ្នានូវបទពិសោធន៍ក្នុងវិស័យមីក្រូហិរញ្ញវត្ថុ និងផ្នែកអប់រំដែលអ្នកស្រីមាននៅក្នុងវិស័យនេះផងដែរ ។ យើងចង់ប្រៀបធៀបពីការពិតនៃបទពិសោធន៍របស់យើង ជាមួយនឹងបទពិសោធន៍ល្អៗរបស់មីក្រូហិរញ្ញវត្ថុលើពិភពលោក ហើយនេះជាអ្វីដែលមាននៅក្នុងសៀវភៅមួយនេះ ។

មិនតែប៉ុណ្ណោះ អ្នកនឹងអាចរកឃើញអ្វីៗជាច្រើនទៀតនៅក្នុងនោះ អ្នកនឹងអាចស្វែងរកប្រវត្តិរបស់ធនាគារអេស៊ីលីដា ដែលទាំងនេះមិនមែនជាផ្នែកនៅក្នុងមេរៀននៅក្នុងសាលាទេ និងមិនងាយនឹងរកបានដូចនៅក្នុងក្រាហ្វនៃការរីកចម្រើនរបស់អង្គការណាមួយនោះទេ ។ អ្នកនឹងអាចស្វែងរករឿងរ៉ាវរបស់អេស៊ីលីដា និងអ្នកដែលបានទំនុកបម្រុងយើងនៅពេលដែលយើងប្រឈមមុខនឹងឧបសគ្គចម្បងៗ និងគាំទ្រទិសដៅរបស់យើងក្នុងការបង្កើតធនាគារមួយដែលមានតម្លៃសម្រាប់សង្គម ។

នៅក្នុងឱកាសសប្បាយរីករាយនេះ ខ្ញុំសូមអនុញ្ញាតថ្លែងអំណរគុណយ៉ាងជ្រាលជ្រៅ ៖

ដល់អ្នកជួយគាំទ្រដំបូងបង្អស់របស់យើងដូចជា កម្មវិធីអភិវឌ្ឍន៍អង្គការសហប្រជាជាតិ (UNDP) អង្គការពលកម្មអន្តរជាតិ (ILO) និងរដ្ឋាភិបាលរបស់ប្រទេសហុល្លង់ដ៍ ដែលបានទុកចិត្តលើអ្វីដែលមិនគួរឱ្យជឿថាអាចសម្រេចទៅបាននៅខណៈនោះ ។
ខ្ញុំសូមអរគុណដល់អ្នកដែលគាំទ្របន្ទាប់មកទៀតដូចជា KfW, Sida, ភ្នាក់ងារអភិវឌ្ឍន៍អន្តរជាតិនៃសហរដ្ឋអាមេរិក (USAID) និងកម្មវិធីអភិវឌ្ឍន៍វិស័យឯកជនតំបន់ទន្លេមេគង្គ (MPDF) ពួកគេដឹងថាវាពិតជាមានហានិភ័យខ្ពស់ណាស់ ប៉ុន្តែនៅតែទទួលយកនូវហានិភ័យនេះ ។
និងចុងក្រោយ ខ្ញុំសូមអរគុណដល់ភាគហ៊ុនិករបស់យើងពេលបច្ចុប្បន្ននេះដូចជា FMO, Triodos Doen and Fair Share Fund, DEG, ASA, និង IFC ដែលជួយឱ្យយើងរីកចម្រើន និងសម្រេចបាននូវអ្វីដែលយើងដឹងថាពិតជាទទួលបានជោគជ័យក្នុងពេលឥឡូវនេះ ។

នៅចុងបញ្ចប់នៃឆ្នាំអន្តរជាតិនៃមីក្រូឥណទានរបស់អង្គការសហប្រជាជាតិនេះ ខ្ញុំមានសង្ឃឹមយ៉ាងខ្លាំងថា អ្វីដែលទទួលបានជោគជ័យក្នុង២០ឆ្នាំមុននេះ នឹងក្លាយជាគ្រឹះយ៉ាងរឹងមាំសម្រាប់ការរីកចម្រើនក្នុង២០ឆ្នាំខាងមុខ និងឆ្នាំបន្តបន្ទាប់ទៀត ។

នៅអេស៊ីលីដា យើងរីករាយនឹងផ្តល់នូវបទពិសោធន៍របស់យើង ដើម្បីជួយធ្វើឱ្យទីផ្សារសេវាហិរញ្ញវត្ថុ ដំណើរការកាន់តែល្អឡើងៗសម្រាប់ប្រជាជនដែលទន់ខ្សោយ និងក្រីក្រនៅក្នុងប្រទេសកម្ពុជា ទាំងនៅក្នុងតំបន់និងគ្រប់ទីកន្លែង ។

សូមអរគុណ ។

« ព័ត៌មានមុន
ធនាគារ អេស៊ីលីដា ទទួលពានរង្វាន់នៃភាពជាដៃគូឈានមុខគេ ពីសាជីវកម្មហិរញ្ញវត្ថុអន្តរជាតិ ព័ត៌មានបន្ទាប់ »
សន្និសីទស្តីពីការវិនិយោគ ការធ្វើពាណិជ្ជកម្ម និង ហេដ្ឋារចនាសម្ព័ន្ធនៅប្រទេសកម្ពុជា