ព័ត៌មានព័ត៌មានថ្មីៗពិធីដាក់ឱ្យប្រើប្រាស់ជាផ្លូវការសៀវភៅ 'នៅពេលដែលគ្មានលុយ...' នៅរាជធានីភ្នំពេញ

ពិធីដាក់ឱ្យប្រើប្រាស់ជាផ្លូវការសៀវភៅ "នៅពេលដែលគ្មានលុយ ៖ ការបង្កើតធនាគារអេស៊ីលីដា នៅក្នុងដំណាក់កាលវិវដ្តនៃវិស័យហិរញ្ញវត្ថុនៅកម្ពុជា" នៅរាជធានីភ្នំពេញ

ថ្ងៃទី២៩ ខែវិច្ឆិកា ឆ្នាំ២០០៥

លោក អ៊ិន ចាន់នី និង អ្នកស្រី Heather A. Clark ចុះហត្ថលេខាលើសៀវភៅ

ភ្នំពេញ, ព្រះរាជាណាចក្រកម្ពុជា, ពិធីដាក់ឱ្យប្រើប្រាស់ជាផ្លូវការនូវសៀវភៅ "នៅពេលដែលគ្មានលុយ ៖ ការបង្កើតធនាគារអេស៊ីលីដា នៅក្នុងដំណាក់កាលវិវដ្តនៃវិស័យហិរញ្ញវត្ថុនៅកម្ពុជា" នៅថ្ងៃទី២៩ ខែវិច្ឆិកា ឆ្នាំ២០០៥ នៅសណ្ឋាគារឡឺរ៉ូយ៉ាល់ ។ នៅក្នុងឱកាសនោះ លោក អ៊ិន ចាន់នី អគ្គនាយក លោក Pieter Kooi គណៈកម្មាធិការក្រុមប្រឹក្សាភិបាលធនាគារអេស៊ីលីដា ភីអិលស៊ី លោក Douglas Gardner អ្នកតំណាងប្រទេសនៃកម្មវិធីអភិវឌ្ឍន៍អង្គការសហប្រជាជាតិ (UNDP) និង អ្នកស្រី Heather A. Clark ជាអ្នកសរសេរសៀវភៅនេះ បានឡើងថ្លែងសន្ទរកថាជូនដល់ភ្ញៀវកិត្តិយសទាំងអស់ ។

លោក អ៊ិន ចាន់នី បានមានប្រសាសន៍ថា អ្នករាល់គ្នាប្រហែលជាគិតថា នេះជាចំណងជើងចម្លែកមួយរបស់សៀវភៅដែលសរសេរអំពីមីក្រូហិរញ្ញវត្ថុ និងការបង្កើតធនាគារមួយ ។ ប៉ុន្តែ កាលពីជាងមួយទសវត្សរ៍ មុនពេលអេស៊ីលីដាបានចាប់ផ្តើមនៅក្នុងឆ្នាំ១៩៩២ ប្រទេសកម្ពុជាមិនមានរូបិយវត្ថុជាតិទេ គឺមិនមានលុយ ។ គាត់ក៏បានបន្ថែមផងដែរពីមូលហេតុ២យ៉ាង ដែលនិយាយពីរឿងរ៉ាវរបស់ធនាគារអេស៊ីលីដានៅក្នុងសៀវភៅនេះ ។ មូលហេតុទីមួយ គឺដើម្បីឱ្យបុគ្គលិកថ្មីៗរបស់អេស៊ីលីដាទាំងអស់អាចដឹងថា ធនាគារអេស៊ីលីដាមានប្រភពមកពីណា ឫសគល់របស់វាគឺជាអ្វី និងអ្វីដែលមានសារៈសំខាន់សម្រាប់បង្កើតអេស៊ីលីដា ។ មូលហេតុទីពីរ គឺយើងអាចចូលរួមចំណែកក្នុងការអភិវឌ្ឍរបស់អ្នកដទៃ ។ ហើយគាត់ក៏បានជម្រាបជូនផងដែរ នូវមូលហេតុដែលយើងចង់ឱ្យលោកស្រី Heather A. Clark សរសេរសៀវភៅនេះឡើង និងបានថ្លែងអំណរគុណយ៉ាងជ្រាលជ្រៅ ដល់អ្នកជួយគ្រាំទ្រ និងភាគហ៊ុនិកទាំងអស់ ដែលបានជួយជ្រោមជ្រែងអេស៊ីលីដារហូតមកដល់សព្វថ្ងៃ ។

ភ្ញៀវជាតិ និងអន្តរជាតិ នៅក្នុងឱកាសបើកសម្ភោធសៀវភៅ

លោក Douglas Gardner បានមានប្រសាសន៍ថា គាត់សប្បាយរីករាយណាស់ដែលឃើញអេស៊ីលីដារីកចម្រើនដូចសព្វថ្ងៃនេះ និងទៅទីណាក៏ឃើញតែការិយាល័យរបស់ធនាគារអេស៊ីលីដា ហើយគាត់នឹងចាត់ទុកអេស៊ីលីដា សម្រាប់ជាបទពិសោធន៍ទៅប្រើនៅប្រទេសផ្សេងៗទៀត ។ ជាធម្មតា ប្រតិបត្តិការនៅក្នុងក្រុមហ៊ុនមួយ គេមិនគិតតែលើ Transaction ទេ គឺគេគិតដល់ការពេញចិត្តរបស់អតិថិជនថែមទៀត ។ ធនាគារអេស៊ីលីដាបានចាប់ផ្តើមពីស្ថាប័នមីក្រូហិរញ្ញវត្ថុ ដែលផ្តល់តែសេវាឥណទាន រហូតដល់ក្លាយជាធនាគារដែលធំជាងគេលំដាប់ទី២ និងផ្តល់សេវាហិរញ្ញវត្ថុយ៉ាងទូលំទូលាយ ។

អ្នកស្រី Heather A. Clark ក៏បានមានប្រសាសន៍ថា នេះជារឿងមួយដែលបង្ហាញអំពីដំណើរការនៅក្នុងផ្នែកមីក្រូហិរញ្ញវត្ថុ ដែលចាប់ផ្តើមតាំងពីគម្រោងតូចមួយ រហូតដល់ក្លាយជាស្ថាប័នមួយដែលគួរឱ្យកត់សម្គាល់ និងមានតម្លៃជានិរន្តរ៍ចំពោះសង្គម ។ វាក៏ជារឿងមួយដែលបង្ហាញអំពី មនុស្ស ជំនឿ ក្តីស្រមៃ និងការប្តេជ្ញាចិត្តយ៉ាងមុតមាំរបស់ពួកគេ ព្រមទាំងការកំណត់ដើម្បីធ្វើឱ្យក្តីស្រមៃរបស់ពួកគេក្លាយជាការពិត ថ្វីបើពួកគេមានក្តីសង្ឃឹមដ៏តិចតួចបំផុតក៏ដោយ ។ រឿងរបស់អេស៊ីលីដានេះក៏បង្ហាញផងដែរថា ការសហការធ្វើការងាររវាងស្ថាប័នមីក្រូហិរញ្ញវត្ថុ ជាមួយនឹងស្ថាប័នហិរញ្ញវត្ថុដែលមានឥទ្ឋិពល គឺធ្វើឱ្យមានសក្តានុភាពខ្ពស់ជាងមុន ក្នុងការជួយគាំទ្រប្រជាជនក្រីក្រ និងមានឥទ្ឋិពលទៅលើប្រព័ន្ធហិរញ្ញវត្ថុនៅក្នុងពេលជាមួយគ្នានោះដែរ ។

« ព័ត៌មានមុន
សន្និសីទស្តីពីការវិនិយោគ ការធ្វើពាណិជ្ជកម្ម និង ហេដ្ឋារចនាសម្ព័ន្ធនៅប្រទេសកម្ពុជា ព័ត៌មានបន្ទាប់ »
កិច្ចព្រមព្រៀងសហប្រតិបត្តិការរវាងធនាគារ អេស៊ីលីដា ភីអិលស៊ី និង ធនាគារកសិកម្មនិងអភិវឌ្ឍន៍ជនបទ វៀតណាម