ព័ត៌មានព័ត៌មានថ្មីៗកិច្ចព្រមព្រៀងសហប្រតិបត្តិការរវាងធនាគារអេស៊ីលីដា...

កិច្ចព្រមព្រៀងសហប្រតិបត្តិការរវាងធនាគារ អេស៊ីលីដា ភីអិលស៊ី និង ធនាគារកសិកម្មនិងអភិវឌ្ឍន៍ជនបទ វៀតណាម

ថ្ងៃទី១៥ ខែកុម្ភៈ ឆ្នាំ២០០៦

លោក អ៊ិន ចាន់នី អគ្គនាយកធនាគារអេស៊ីលីដា និង Kieu Trong Tuyen អគ្គនាយករងធនាគារកសិកម្មនិងអភិវឌ្ឍន៍ជនបទវៀតណាម ចុះហត្ថលេខាលើកិច្ចព្រមព្រៀង

ថ្ងៃទី១៥ ខែកុម្ភៈ ឆ្នាំ២០០៦នេះ ធនាគារអេស៊ីលីដា ភីអិលស៊ី បានចុះកិច្ចព្រមព្រៀងសហប្រតិបត្តិការ ជាមួយធនាគារកសិកម្មនិងអភិវឌ្ឍន៍ជនបទវៀតណាម ដើម្បីបង្កើនសហប្រតិបត្តិការជាមួយធនាគារអន្តរជាតិជាដៃគូ ។

កិច្ចព្រមព្រៀងសហប្រតិបត្តិការនេះ គឺផ្តោតទៅលើ ៥ចំណុចសំខាន់ៗដូចខាងក្រោម ៖

ភាគីទាំងពីរព្រមព្រៀងគ្នាលើកិច្ចសហការបម្រើសេវាជូនអតិថិជនរបស់ភាគីនីមួយៗស្របតាមច្បាប់នៃប្រទេសរៀងៗខ្លួន និងច្បាប់ពាណិជ្ជកម្មអន្តរជាតិ (International Customs and Practices) ។ របៀបទូទាត់មានដូចជា ៖ ការទូទាត់តាមប្រព័ន្ធ SWIFT និងតាមរយៈ L/C ។
ភាគីទាំងពីរព្រមព្រៀងគ្នា ក្នុងការផ្លាស់ប្តូរព័ត៌មាន ដូចជា ៖ Monetary policies, Credit, Banking business, FX និង Money market ។ល។
ភាគីទាំងពីរព្រមព្រៀងគ្នា ក្នុងការបង្កើតឱ្យមានជំនួបផ្លាស់ប្តូរបទពិសោធន៍គ្នាឱ្យបានញឹកញាប់ និងជួយគាំទ្រគ្នាទៅវិញទៅមក លើវិស័យធនាគារ និងបច្ចេកវិជ្ជា ។
ភាគីនីមួយៗត្រូវណែនាំអតិថិជនទៅវិញទៅមក ដោយធ្វើការប្រឹក្សាផ្តល់យោបល់ និងពន្យល់អតិថិជនអំពីផលិតផល-សេវាកម្មដែលភាគីទាំងពីរមាន ។
ផ្អែកទៅលើកិច្ចព្រមព្រៀងនេះ ភាគីទាំងពីរឯកភាពគ្នាផ្តល់សិទ្ធិដល់បណ្ដាសាខាទាំងឡាយដែលនៅតាមព្រំដែនប្រទេសកម្ពុជា-វៀតណាម ក្នុងការចុះកិច្ចព្រមព្រៀងសហប្រតិបត្តិការលំដាប់សាខា ក្នុងការទូទាត់ជូនអតិថិជនទាំងសងខាង ជារូបិយវត្ថុ "រៀល" និងរូបិយប័ណ្ណ "ដុង" ។

កិច្ចសហប្រតិបត្តិការរវាងធនាគារ អេស៊ីលីដា ភីអិលស៊ី និង ធនាគារកសិកម្មនិងអភិវឌ្ឍន៍ជនបទ វៀតណាម គឺផ្អែកទៅតាមសក្តានុពលភាពទាំងឡាយរបស់ភាគីទាំងពីរ មានដូចជា ៖

បណ្ដាញប្រតិបត្តិការដ៏ធំទូលាយរបស់ភាគីទាំងពីរ ។
ភាគីទាំងពីរមានសាខានៅជិតព្រំដែន ដែលកំពុងមានប្រតិបត្តិការបច្ចុប្បន្ន ។
ក្រៅពីប្រតិបត្តិការជាធនាគារពាណិជ្ជ ដែលផ្តោតជាចម្បងលើការលក់ដុំ ភាគីទាំងពីរក៏មានបម្រើសេវាជូនអតិថិជន ដែលមានជីវភាពកម្រិតទាបផងដែរ ។
ក្រុមហ៊ុនជាច្រើននៅប្រទេសវៀតណាម កំពុងមានផែនការមកវិនិយោគលើវិស័យផលិតកម្មនៅក្នុងព្រះរាជាណាចក្រកម្ពុជា ដើម្បីនាំចេញទៅកាន់ប្រទេសទីបី ។ សមាជិកភាព WTO របស់ប្រទេសកម្ពុជា ជំរុញឱ្យមានចំណាប់អារម្មណ៍ពីបណ្ដាក្រុមហ៊ុនវិនិយោគទាំងឡាយ ដែលកំពុងមានទីតាំងនៅក្នុងប្រទេសវៀតណាម ដោយពួកគេសម្លឹងឃើញអំពីភាពអនុគ្រោះពន្ធជាអាទិភាពចម្បង ។
តួលេខស្តីពីការធ្វើពាណិជ្ជកម្មរវាងប្រទេសទាំងពីរ ក្នុងឆ្នាំ២០០៣ មានទំហំទឹកប្រាក់ប្រមាណជាង ៣២៣ លានដុល្លារអាមេរិក និងបានកើនឡើងថែមទៀតនាឆ្នាំចុងក្រោយ ។ តាមតួលេខត្រូវបានរំពឹងថា នឹងមានការកើនឡើងថែមទៀតក្នុងឆ្នាំ២០០៦ និងកើនឡើងជាបន្តទៅឆ្នាំក្រោយៗទៀត ។

ការជូនកាដូអនុស្សាវរីយ៍របស់ធនាគារអេស៊ីលីដា និង ធនាគារកសិកម្ម និងអភិវឌ្ឍន៍ជនបទវៀតណាម

អេស៊ីលីដា បានបង្កើតឡើងនៅខែមករា ឆ្នាំ១៩៩៣ មានទិសដៅជាស្ថាប័នមីក្រូហិរញ្ញវត្ថុ ដើម្បីអភិវឌ្ឍ និងផ្តល់ឥណទានដល់សហគ្រាសខ្នាតតូចបំផុត និងខ្នាតតូច ។ ដោយមានជំនួយបច្ចេកទេសពី USAID, MPDF/IFC, និង UNDP កម្មវិធីបីឆ្នាំសម្រាប់ការកម្លាយខ្លួន ត្រូវបានចាប់ផ្តើមអនុវត្តក្នុងឆ្នាំ១៩៩៨ ហើយបានទទួលជោគជ័យ ដោយទទួលបានអាជ្ញាប័ណ្ណជាធនាគារឯកទេសក្នុងខែតុលា ឆ្នាំ២០០០ ។ នៅថ្ងៃទី០១ ខែធ្នូ ឆ្នាំ២០០៣ បន្ទាប់ពីបង្កើនទុនរហូតដល់ចំនួន ១៣ លានដុល្លារអាមេរិក ធនាគារអេស៊ីលីដា ត្រូវបានធនាគារជាតិនៃកម្ពុជាផ្តល់អាជ្ញាប័ណ្ណជាធនាគារពាណិជ្ជ ។

នៅចុងខែធ្នូ ឆ្នាំ២០០៥ បណ្ដាញសាខាត្រូវបានពង្រីករហូតដល់ចំនួន ១៣៩ការិយាល័យ ក្នុង ២២ខេត្ត-រាជធានី នៃព្រះរាជាណាចក្រកម្ពុជា ដោយមានបុគ្គលិកបម្រើការងារចំនួន ២៤៨៤នាក់ ។ សមតុល្យឥណទាន មានប្រមាណជាង ៩៩,៩៩ លានដុល្លារអាមេរិក និងអតិថិជនសកម្មបានកើនឡើងដល់ ១៤០.៩២០ នាក់ ។ សមតុល្យប្រាក់បញ្ញើ-សន្សំ មានប្រមាណជាង ៦១,៩៣ លានដុល្លារអាមេរិក និងមាន ៩២.៤១៣ គណនី ។ ទ្រព្យសកម្មសរុបមានជាង ១២៣,៦១ លានដុល្លារអាមេរិក ។

ធនាគារអេស៊ីលីដា មានសហប្រតិបត្តិការជាមួយធនាគារអន្តរការីល្បីល្បាញនៅលើឆាកអន្តរជាតិ រួមមាន ៖ Standard Chartered Bank, ING BELGIUM NV/SA, United Overseas Bank (Thai) Public Company Limited, HSBC Bank USA, American Express Bank Ltd., American Express Bank GMBH, Commonwealth Bank of Australia និងធនាគារដៃគូអន្តរជាតិចំនួន ៣៧ ផ្សេងទៀត នៅក្នុង ៤១ ប្រទេស ដែលមានសាខាទំនាក់ទំនងចំនួន ២៥៥ សាខា ។

ធនាគារកសិកម្មនិងអភិវឌ្ឍន៍ជនបទវៀតណាម គឺជាធនាគារដៃគូសំខាន់ទី៩ របស់ធនាគារអេស៊ីលីដា ភីអិលស៊ី សម្រាប់គណនីរូបិយប័ណ្ណ "ដុង" និង "ដុល្លារ" និងជាធនាគារដៃគូអន្តរជាតិទី១ ដែលមានគណនីសម្រាប់ទូទាត់ជារូបិយប័ណ្ណ "ដុល្លារ" និងរូបិយវត្ថុ "រៀល" ជាមួយធនាគារអេស៊ីលីដា ភីអិលស៊ី ។ ធនាគារកសិកម្មនិងអភិវឌ្ឍន៍ជនបទវៀតណាម គឺជាធនាគារធំបំផុត ហើយមានទ្រព្យសកម្មសរុប ១១,៨ ពាន់លានដុល្លារអាមេរិក បុគ្គលិកចំនួន ២៨.៥០០ នាក់ សាខានិងការិយាល័យប្រតិបត្តិការចំនួន ២០០២ ការិយាល័យ ។ ទឹកប្រាក់ឥណទានសរុបមាន ១១,២ ពាន់លានដុល្លារអាមេរិក និងមានអតិថិជនច្រើនជាងគេបំផុតនៅក្នុងប្រទេសវៀតណាម ។

សុន្ទរកថារបស់លោកជំទាវ នាវ ច័ន្ទថាណា ទេសាភិបាលរងធនាគារជាតិនៃកម្ពុជា និងលោក អ៊ិន ចាន់នី អគ្គនាយកធនាគារអេស៊ីលីដា

គណៈប្រតិភូក្នុងពិធីចុះហត្ថលេខា

នៅក្នុងពិធីចុះហត្ថលេខានេះ បានទទួលវត្តមានដ៏ខ្ពង់ខ្ពស់របស់លោកជំទាវទេសាភិបាលរងធនាគារជាតិនៃកម្ពុជា, ឯកឧត្តមអភិបាលរងខេត្តតាកែវ, តំណាងឯកឧត្តមអភិបាលរាជធានីភ្នំពេញ និងខេត្តកំពង់ចាម, ឯកឧត្តមឯកអគ្គរដ្ឋទូតប្រទេសវៀតណាមប្រចាំនៅព្រះរាជាណាចក្រកម្ពុជា, ឯកឧត្តមប្រធានក្រុមប្រឹក្សាភិបាលប្រជាជនខេត្តអានយ៉ាង និងខេត្តតាយនីញ ប្រទេសវៀតណាម, លោកនាយករងនាយកដ្ឋានគ្រប់គ្រងធនាគារ និងនាយកដ្ឋានសហប្រតិបត្តិការអន្តរជាតិនៃធនាគារវៀតណាម, ឯកឧត្តម, លោកជំទាវ, ប្រធានក្រុមប្រឹក្សាភិបាលធនាគារអេស៊ីលីដា, លោក-លោកស្រី, អតិថិជន និងពាណិជ្ជករជាច្រើននាក់ផងដែរ ។

នៅក្នុងឱកាសប្រារព្ធពិធីចុះហត្ថលេខានេះ លោកជំទាវ នាវ ច័ន្ទថាណា ទេសាភិបាលរងធនាគារជាតិនៃកម្ពុជាបានមានប្រសាសន៍ថា "តាមរយៈកិច្ចព្រមព្រៀងសហប្រតិបត្តិការនេះ ធនាគារទាំងពីរនឹងបើកគណនីជាប្រភេទប្រាក់របស់ខ្លួននៅភាគីម្ខាងទៀត រៀបចំបញ្ជរទូទាត់នៅតាមតំបន់ព្រំដែននៃប្រទេសទាំងពីរ ហើយភាគីធនាគារទាំងពីរនឹងដំណើរការបង្កើត បទប្បញ្ញត្តិ និងនីតិវិធីរួម ដើម្បីផ្តល់សេវាធនាគារជាច្រើនដូចជា សេវាផ្ទេរប្រាក់ ឯកសារពាណិជ្ជកម្ម សេវាទូទាត់ លិខិតឥណទាន លិខិតធានាលើការទូទាត់ ។ល។ លើសពីនេះទៀត ដើម្បីកាត់បន្ថយតម្រូវការនូវចំនួនសាច់ប្រាក់ដ៏ច្រើនលើសលប់ក្នុងការប្រតិបត្តិការទូទាត់ផ្នែកពាណិជ្ជកម្មនានា ក៏ដូចជាកាត់បន្ថយបានជាអតិបរមានូវហានិភ័យនាពេលបច្ចុប្បន្ននៅតាមតំបន់ព្រំដែន ការទូទាត់នឹងធ្វើបានឆាប់រហ័ស និងមានប្រសិទ្ធភាព ហើយដើមទុនជាច្រើនថែមទៀតនឹងត្រូវប្រមូលបាន ។"

ពីឆ្វេងទៅស្តាំ លោក ជា សុខ ប្រធានក្រុមប្រឹក្សាភិបាលធនាគារអេស៊ីលីដា លោកជំទាវ នាវ ច័ន្ទថាណា ទេសាភិបាលរងធនាគារជាតិនៃកម្ពុជា និង ឯកឧត្តម Nguyen Chien Thang ឯកអគ្គរដ្ឋទូតប្រទេសវៀតណាម ប្រចាំប្រទេសកម្ពុជា

លោកជំទាវបានបន្តទៀតថា "ក្នុងនាមរាជរដ្ឋាភិបាល ខ្ញុំសូមថ្លែងអំណរគុណយ៉ាងជ្រាលជ្រៅដល់ធនាគារអេស៊ីលីដា ភីអិលស៊ី និង ធនាគារកសិកម្មនិងអភិវឌ្ឍន៍ជនបទវៀតណាម លើការខិតខំប្រឹងប្រែងឈានដល់ការចុះកិច្ចព្រមព្រៀងសហប្រតិបត្តិការ ដែលជាជំហានកំណត់ខ្នាតគំរូថ្មីនៃសហប្រតិបត្តិការអន្តរធនាគារនៃប្រទេសទាំងពីរ កម្ពុជា-វៀតណាម ហើយដែលជាគំរូឈានមុខមួយ គួរយកតម្រាប់តាម ។ ក្នុងឱកាសដ៏វិសេសវិសាលនេះ ខ្ញុំសូមថ្លែងអំណរគុណដល់ ធនាគារកសិកម្មនិងអភិវឌ្ឍន៍ជនបទវៀតណាម ដែលមានជំនឿទុកចិត្តយ៉ាងមុតមាំចំពោះព្រះរាជាណាចក្រកម្ពុជា ជាធនាគារមានកេរ្តិ៍ឈ្មោះល្បី និងធំជាងគេរបស់វៀតណាម ដែលបើកការិយាល័យនៅរាជធានីភ្នំពេញ ហើយជាពិសេសចំពោះ ធនាគារអេស៊ីលីដា ភីអិលស៊ី សម្រាប់ទស្សនៈរបស់ខ្លួនក្នុងការធ្វើជាដៃគូ និងកិច្ចសហប្រតិបត្តិការជាមួយធនាគារដ៏សំខាន់នៅក្នុងតំបន់ ។ នេះជាគោលដៅចម្បងមួយ ក្នុងការអភិវឌ្ឍសេវាហិរញ្ញវត្ថុនៅកម្ពុជា និងជួយលើកទឹកចិត្តលើវិស័យជំនួញ ជំរុញការរីកចម្រើនខាងសេដ្ឋកិច្ច ដែលផ្តល់អត្ថប្រយោជន៍ដល់សហគមន៍ទាំងមូល ។"

ក្នុងឱកាសនោះដែរ លោក អ៊ិន ចាន់នី អគ្គនាយក ធនាគារអេស៊ីលីដា ភីអិលស៊ី ក៏បានបញ្ជាក់ផងដែរថា "ចាប់តាំងពីធនាគារអេស៊ីលីដា ភីអិលស៊ី បានក្លាយជាធនាគារពាណិជ្ជ នៅក្នុងខែធ្នូ ឆ្នាំ២០០៣ មក ធនាគារបានធ្វើសហប្រតិបត្តិការជាមួយធនាគារអន្តរជាតិ ដែលជា Correspondent Bank ចំនួន៣៥ ក្នុងប្រទេសចំនួន៤១ ដែលមាន ២៥៣សាខា គិតមកត្រឹមចុងខែធ្នូ ឆ្នាំ២០០៥ ជាមួយនឹងទំហំទឹកប្រាក់ដែលបានផ្ទេរ ចំនួន ៥៣,៤ លានដុល្លារអាមេរិកក្នុងមួយឆ្នាំ ។ ទំនាក់ទំនងថ្មីរបស់ធនាគារអេស៊ីលីដា ភីអិលស៊ី ជាមួយ ធនាគារកសិកម្មនិងអភិវឌ្ឍន៍ជនបទប្រទេសវៀតណាម ដែលជាធនាគាររដ្ឋធំទីបួនរបស់ប្រទេសវៀតណាម គឺជាការរំភើបមួយដែលយើងអាចបង្កើនប្រតិបត្តិការទូទាត់ឆ្លងព្រំដែនដ៏ធំសំបើម រវាងប្រទេសទាំងពីរក្នុងប៉ុន្មានខែថ្មីៗនេះ ។"

លោកក៏បានបន្តទៀតថា "ក្រោមកិច្ចព្រមព្រៀងសហប្រតិបត្តិការ ដែលបានចុះហត្ថលេខាក្នុងថ្ងៃនេះ ធនាគារអេស៊ីលីដា ភីអិលស៊ី សង្ឃឹមថា កិច្ចសហប្រតិបត្តិការនេះ នឹងបង្កើននូវការបម្រើសេវាទូទាត់ឆ្លងព្រំដែន ដូចជា សេវាផ្ទេរប្រាក់តាមតេឡក្រាម ឯកសារពាណិជ្ជកម្ម ការបញ្ជាចំណាយ លិខិតឥណទាន និង ការទូទាត់លើការធានា ចំពោះអតិថិជននៃភាគីទាំងសងខាង ហើយនឹងផ្តល់នូវអត្ថប្រយោជន៍បន្ថែម ក្នុងការកាត់បន្ថយតម្រូវការលើសាច់ប្រាក់ដែលមានទំហំធំ និងហានិភ័យផ្សេងៗ នៅក្នុងការទូទាត់ប្រតិបត្តិការអាជីវកម្ម ពិសេសនៅតាមតំបន់ជាប់ព្រំដែន ។"

« ព័ត៌មានមុន
ពិធីដាក់ឱ្យប្រើប្រាស់ជាផ្លូវការសៀវភៅ "នៅពេលដែលគ្មានលុយ ៖ ការបង្កើតធនាគារអេស៊ីលីដា នៅក្នុងដំណាក់កាលវិវដ្តនៃវិស័យហិរញ្ញវត្ថុនៅកម្ពុជា" នៅរាជធានីភ្នំពេញ ព័ត៌មានបន្ទាប់ »
ធនាគារ អេស៊ីលីដា ភីអិលស៊ី បានទទួលរង្វាន់ CGAP ស្តីពីតម្លាភាពផ្នែកហិរញ្ញវត្ថុ ប្រចាំឆ្នាំ២០០៥