USD
THB
EUR
AUD
VND
CAD
LAK
JPY
GBP
CNY
navigate_nextព័ត៌មានnavigate_nextព័ត៌មានថ្មីៗnavigate_nextរង្វាន់ CGAP ស្តីពីតម្លាភាពផ្នែកហិរញ្ញវត្ថុ ប្រចាំឆ្នាំ២០០៥
ធនាគារ អេស៊ីលីដា ភីអិលស៊ី បានទទួលរង្វាន់ CGAP ស្តីពីតម្លាភាពផ្នែកហិរញ្ញវត្ថុ ប្រចាំឆ្នាំ២០០៥
ថ្ងៃទី០៧ ខែមិថុនា ឆ្នាំ២០០៦
ភ្នំពេញ ថ្ងៃទី០៧ ខែមិថុនា ឆ្នាំ២០០៦ ធនាគារអេស៊ីលីដា ភីអិលស៊ី បានទទួលរង្វាន់ចំពោះតម្លាភាពផ្នែកហិរញ្ញវត្ថុ ប្រចាំឆ្នាំ២០០៥ របស់ក្រុមប្រឹក្សាជួយជនក្រីក្រ (CGAP) ។ ក្នុងការប្រកួតប្រជែងជាសកលសម្រាប់រង្វាន់តម្លាភាពហិរញ្ញវត្ថុ មានស្ថាប័ន ៣ ក្នុងចំណោមស្ថាប័នទាំង ៥ ដែលបានឈ្នះរង្វាន់នេះ និងស្ថាប័ន ៤ ផ្សេងទៀតបានទទួលលិខិតសរសើរ គឺមានទីតាំងនៅក្នុងប្រទេសកម្ពុជា ក្នុងចំណោម ១៧៥ស្ថាប័នដែលបានចូលរួមពីគ្រប់តំបន់ក្នុងពិភពលោក ។ យើងគួរតែមានមោទនភាពយ៉ាងខ្លាំង ចំពោះការសម្រេចបានជោគជ័យរបស់ស្ថាប័នមីក្រូហិរញ្ញវត្ថុនៅក្នុងប្រទេសកម្ពុជា ដែលកំពុងនាំមុខគេនៅលើបទដ្ឋានតម្លាភាពសកលលោក ។
ក្រុមប្រឹក្សាជួយជនក្រីក្រ (CGAP) គឺជាមជ្ឈមណ្ឌលធនធានមួយសម្រាប់វិស័យមីក្រូហិរញ្ញវត្ថុទាំងមូល ដែលមានទីតាំងនៅក្នុងធនាគារពិភពលោក ។ CGAP គឺជាសហគមន៍មួយមានភ្នាក់ងារអភិវឌ្ឍន៍ឯកជន និងសាធារណៈ ចំនួន ៣៣ ដោយរួមបញ្ចូលទាំងសាជីវកម្មហិរញ្ញវត្ថុអន្តរជាតិ (IFC) និងបានប្តេជ្ញាកសាងប្រព័ន្ធហិរញ្ញវត្ថុឱ្យកាន់តែរីកចម្រើនដើម្បីជួយដល់ជនក្រីក្រ ។ ដូចស្ថាប័នមួយចំនួនទៀតដែរ CGAP គឺជាអ្នកវិនិច្ឆ័យនូវបទដ្ឋានផ្សេងៗ ផ្តល់សេវាបច្ចេកទេសនិងការប្រឹក្សា និង ផ្តល់ការហ្វឹកហ្វឺននិងព័ត៌មានលើការអនុវត្តល្អឥតខ្ចោះ ។ CGAP ក៏ផ្តល់ផងដែរនូវមូលនិធិសម្រាប់គម្រោងច្នៃប្រឌិតថ្មីៗ ។ នៅក្នុងកិច្ចប្រជុំ Sea Island ឆ្នាំ២០០៤ ប្រទេសមានឧស្សាហកម្មជឿនលឿនទាំង ៨ នៅក្នុងពិភពលោក បានស្នើសុំឱ្យ CGAP ដឹកនាំគំនិតផ្តួចផ្តើមមួយលើមីក្រូហិរញ្ញវត្ថុ និងបានគាំទ្រគោលការណ៍សំខាន់ៗផ្នែកមីក្រូហិរញ្ញវត្ថុរបស់ CGAP ។
អ្នកដាក់ពាក្យស្នើសុំទាំងអស់ គឺត្រូវបានវិនិច្ឆ័យដោយយោងលើការប្តេជ្ញាចិត្តរបស់ពួកគេ ចំពោះគោលការណ៍ណែនាំដែលបានបង្ហាញជាអន្តរជាតិ ដោយរួមបញ្ចូលទាំងក្បួនច្បាប់ឧស្សាហកម្មជាក់លាក់របស់ CGAP និងបានទទួលយកយ៉ាងទូលំទូលាយនូវបទដ្ឋានរបាយការណ៍ហិរញ្ញវត្ថុអន្តរជាតិ ។ ធនាគារអេស៊ីលីដា ភីអិលស៊ី បានទទួលរង្វាន់សម្រាប់ការសម្រេចបាននូវលក្ខខណ្ឌវិនិច្ឆ័យតាមបទដ្ឋានខ្ពស់បំផុត ក្នុងការប្រកួតប្រជែងលើតម្លាភាព ក្នុងការធ្វើរបាយការណ៍ហិរញ្ញវត្ថុប្រចាំឆ្នាំរបស់ខ្លួន ។ យើងសង្ឃឹមថា ជោគជ័យក្នុងការប្រកួតប្រជែងនេះ គឺជាការរួមចំណែកដ៏សំខាន់ចំពោះការអភិវឌ្ឍបទដ្ឋានធ្វើរបាយការណ៍មីក្រូហិរញ្ញវត្ថុ និងអ្នកទទួលបានរង្វាន់នេះ នឹងក្លាយជាគំរូ ដែលញ៉ាំងឱ្យស្ថាប័នផ្សេងៗអនុវត្តតាម ក្នុងការធ្វើរបាយការណ៍ហិរញ្ញវត្ថុដ៏មានអត្ថន័យ និងមានសារសំខាន់នេះ ។
លោក Adam Sack អគ្គនាយករបស់ IFC-MPDF បានគូសបញ្ជាក់ថា "តម្លាភាព មានសារសំខាន់ណាស់សម្រាប់អ្នកដែលពាក់ព័ន្ធជាមួយនឹងស្ថាប័នទាំងអស់ ។ ថ្នាក់ដឹកនាំរដ្ឋាភិបាលត្រូវការនូវព័ត៌មានហិរញ្ញវត្ថុដែលអាចទុកចិត្តបាន ដើម្បីប្រាកដថា ស្ថាប័នមីក្រូហិរញ្ញវត្ថុទាំងអស់នោះ ត្រូវបានគ្រប់គ្រងយ៉ាងត្រឹមត្រូវ និងកាត់បន្ថយហានិភ័យឱ្យនៅត្រឹមកម្រិតតិចបំផុតសម្រាប់អតិថិជនប្រាក់បញ្ញើ-សន្សំទាំងអស់ ។ វិនិយោគិនត្រូវការព័ត៌មាននេះដើម្បីសម្រេចចិត្តថាតើគួរ ឬមិនគួរវិនិយោគជាមួយស្ថាប័នមីក្រូហិរញ្ញវត្ថុ និងដើម្បីត្រួតពិនិត្យការវិនិយោគរបស់ពួកគេ ។ តម្លាភាព ក៏មានសារសំខាន់ផងដែរ ចំពោះអតិថិជនរបស់ស្ថាប័នមីក្រូហិរញ្ញវត្ថុទាំងអស់ ។ អតិថិជនត្រូវការដឹងឱ្យបានច្បាស់នូវចំនួនសាច់ប្រាក់ដែលពួកគាត់ត្រូវបង់ មានន័យថា អតិថិជនត្រូវដឹងទាំងអស់នូវកម្រៃផ្សេងៗដែលទាក់ទងនឹងប្រាក់កម្ចីរបស់ពួកគាត់ មិនត្រឹមតែអត្រាការប្រាក់ប៉ុណ្ណោះទេ ។"
លោក Adam Sack មានប្រសាសន៍បន្តទៀតថា "វាមានសារសំខាន់ណាស់ ក្នុងការធានាថាស្ថាប័នមីក្រូហិរញ្ញវត្ថុមានការគ្រប់គ្រងបានយ៉ាងល្អ ។ ពួកគេជាប្រភពសេវាហិរញ្ញវត្ថុតែមួយគត់ដែលប្រជាពលរដ្ឋក្រីក្រអាចទទួលបាន ក្រៅពីទៅរកអ្នកឱ្យខ្ចីប្រាក់ឯកជននានា ។ តម្លាភាពល្អ នឹងធ្វើឱ្យស្ថាប័នទទួលបានការគ្រប់គ្រងកាន់តែល្អ និងអាចជំរុញការប្រកួតប្រជែងរវាងស្ថាប័នហិរញ្ញវត្ថុផ្សេងៗទៀត ។ ជាចុងបញ្ចប់ វានឹងធ្វើឱ្យសេវាហិរញ្ញវត្ថុមានគុណភាពកាន់តែល្អ និងមាននិរន្តរភាព ដោយសារតម្លៃកាន់តែប្រសើរជាងមុន ។ វាក៏ជួយផ្តល់ផងដែរក្នុងការពង្រីកសេវាទាំងនេះទៅដល់ប្រជាជនដែលមិនធ្លាប់បានប្រើប្រាស់សេវានេះនៅឡើយ ។ ពីព្រោះបុគ្គលិកនៅ IFC និង IFC-MPDF យល់ច្បាស់ថាតួនាទីសំខាន់របស់មីក្រូហិរញ្ញវត្ថុអាចជួយកាត់បន្ថយភាពក្រីក្របាន យើងបានគាំទ្រដល់ការអភិវឌ្ឍរបស់ស្ថាប័នមីក្រូហិរញ្ញវត្ថុនៅក្នុងប្រទេសកម្ពុជា អស់រយៈពេលជាច្រើនឆ្នាំមកហើយ ។ យើងបានចាប់ផ្តើមផ្តល់ជំនួយបច្ចេកទេសដល់អេស៊ីលីដា នៅពេលដែលអេស៊ីលីដាកំពុងកម្លាយខ្លួនពីអង្គការក្រៅរដ្ឋាភិបាល ទៅជាធនាគារពាណិជ្ជ ។ ដើមទុនរបស់ IFC នៅក្នុងធនាគារអេស៊ីលីដា បានជួយទាក់ទាញវិនិយោគិនអន្តរជាតិដទៃទៀតជាច្រើន និងឥឡូវនេះធនាគារអេស៊ីលីដា គឺជាធនាគារមួយក្នុងចំណោមធនាគារធំជាងគេនៅក្នុងប្រទេសកម្ពុជា ដែលកំពុងបម្រើសេវាហិរញ្ញវត្ថុយ៉ាងទូលំទូលាយបំផុតនៅក្នុងប្រទេសកម្ពុជា ។ អេស៊ីលីដា គឺជាធនាគារតែមួយគត់នៅក្នុងប្រទេសកម្ពុជា ដែលត្រូវបានផ្តល់ចំណាត់ថ្នាក់ដោយស្ថាប័នផ្តល់ចំណាត់ថ្នាក់ធនាគារអន្តរជាតិ Moody's នូវភាពខ្លាំងនៃស្ថានភាពហិរញ្ញវត្ថុរបស់ធនាគារ ដែលខ្ពស់ជាងធនាគារទាំងអស់នៅក្នុងប្រទេសឥណ្ឌូនេស៊ី និងប្រសើរជាងធនាគារមួយចំនួនធំនៅក្នុងប្រទេសថៃ ។"
