USD
THB
EUR
AUD
VND
CAD
LAK
JPY
GBP
CNY
navigate_nextព័ត៌មានnavigate_nextព័ត៌មានថ្មីៗnavigate_nextធនាគារអេស៊ីលីដា ត្រូវបានទទួលស្គាល់ពាសពេញសកលលោក...
ធនាគារអេស៊ីលីដា ត្រូវបានទទួលស្គាល់ពាសពេញសកលលោក ចំពោះភាពជោគជ័យ និងបទដ្ឋានកម្រិតខ្ពស់
ថ្ងៃទី០៧ ខែមិថុនា ឆ្នាំ២០០៦
បកប្រែក្រៅផ្លូវការ
ADB 
Australia 
Canada 
Finland 
IFC 
Ireland 
Japan 
Netherlands 
New Zealand 
Norway 
Sweden 
Switzerland 
United Kingdom 
ដោយមានជំនួយផ្នែកបច្ចេកទេសពីកម្មវិធីអភិវឌ្ឍន៍វិស័យឯកជនតំបន់ទន្លេមេគង្គ (MPDF) និងការផ្តល់មូលនិធិពីសាជីវកម្មហិរញ្ញវត្ថុអន្តរជាតិ (IFC) ធ្វើឱ្យធនាគារអេស៊ីលីដា ទទួលបាននូវជោគជ័យដ៏ធំធេងនៅក្នុងប្រទេសកម្ពុជា ។ ធនាគារអេស៊ីលីដា បានចាប់បដិសន្ធិឡើងចាប់តាំងពីឆ្នាំ១៩៩៣ ក្នុងនាមជាអង្គការក្រៅរដ្ឋាភិបាលមួយ ផ្តល់ហិរញ្ញប្បទានខ្នាតតូចបំផុត បានវិវដ្ដមកជាធនាគារពាណិជ្ជធំបំផុតលំដាប់ទីពីរនៅក្នុងប្រទេស ។ អេស៊ីលីដា គឺជាស្ថាប័នហិរញ្ញវត្ថុដែលមានប្រតិបត្តិការធំទូលាយជាងគេនៅក្នុងប្រទេសកម្ពុជា ដោយមាន ១៣៦សាខានិងការិយាល័យ ទូទាំងប្រទេស និងមានអតិថិជនឥណទានចំនួន ១៤០.០០០ នៅក្នុងនោះជិត ៧០ភាគរយជាស្ត្រី ។ ម្យ៉ាងទៀតធនាគារអេស៊ីលីដា គឺជាធនាគារតែមួយគត់ ដែលមានឯកទេសខាងផ្តល់ឥណទានជួយដល់ជនក្រីក្រ ។
MPDF បានចាប់ផ្តើមជួយអេស៊ីលីដានៅក្នុងឆ្នាំ១៩៩៩ និង ២០០០ គឺនៅពេលដែល MPDF ជួយអេស៊ីលីដាចាប់ផ្តើមកម្លាយខ្លួនពីអង្គការក្រៅរដ្ឋាភិបាល ទៅជាធនាគារមួយដែលផ្តល់សេវាកម្មធនាគារពេញលេញ ។ MPDF បានជួយដល់អេស៊ីលីដាក្នុងការបង្កើតឡើងនូវការអនុវត្ត និងនីតិវិធីធនាគារតាមបទដ្ឋានអន្តរជាតិ និងប្រព័ន្ធគ្រប់គ្រងកាន់តែប្រសើរជាងមុន ។ នៅក្នុងឆ្នាំ២០០១ MPDF បានផ្តល់ការបណ្ដុះបណ្ដាលដល់បុគ្គលិកការិយាល័យទំនាក់ទំនងអតិថិជន នូវជំនាញផ្នែកទីផ្សារសេវាកម្មហិរញ្ញវត្ថុ និងនៅក្នុងឆ្នាំ២០០២ បានបណ្ដុះបណ្ដាលដល់មន្ត្រីឥណទាន នូវជំនាញដោះស្រាយបំណុល និងគ្រប់គ្រងឥណទាន ។ សូមថ្លែងអំណរគុណផងដែរសម្រាប់ការជួយបណ្ដុះបណ្ដាលបន្តបន្ទាប់មកទៀត ដែលបានជួយឱ្យភាគរយនៃឥណទានហួសកាលកំណត់ ៣០ថ្ងៃ បានធ្លាក់ចុះពី ៦,២% នៅក្នុងឆ្នាំ២០០២ មកតិចជាង ១% នៅក្នុងឆ្នាំ២០០៣ ។ នាពេលថ្មីៗកន្លងមកនេះ MPDF បានផ្តល់ការបណ្ដុះបណ្ដាល ស្តីពីការផ្តល់ប្រាក់កម្ចីដល់សហគ្រាសខ្នាតតូចនិងខ្នាតមធ្យម និងកំពុងបន្តជំនួយផ្នែកបច្ចេកទេសដល់មន្ត្រីឥណទាន ក្នុងការវាយតម្លៃអាជីវកម្មរបស់អតិថិជនដែលអាចទទួលឥណទានសហគ្រាសខ្នាតតូចនិងខ្នាតមធ្យម ។
នៅក្នុងឆ្នាំ២០០១ សាជីវកម្មហិរញ្ញវត្ថុអន្តរជាតិ និងវិនិយោគិនអន្តរជាតិដទៃទៀត បានបណ្ដាក់ទុនក្នុងធនាគារអេស៊ីលីដា ។ នៅក្នុងឆ្នាំ២០០៣ សាជីវកម្មហិរញ្ញវត្ថុអន្តរជាតិ បានដឹកនាំភាគហ៊ុនិក ៥ ទៀតរបស់អេស៊ីលីដា ឱ្យបង្កើនដើមទុនរបស់ពួកគេចំនួន ៨លានដុល្លារអាមេរិកបន្ថែមទៀត ដែលជាជំហានចុងក្រោយក្នុងការកម្លាយខ្លួនទៅជាធនាគារពាណិជ្ជ ។ នៅក្នុងឆ្នាំ២០០៤ សាជីវកម្មហិរញ្ញវត្ថុអន្តរជាតិ បានផ្តល់ឱ្យអេស៊ីលីដានូវបន្ទាត់ឥណទានចំនួន ៦លានដុល្លារអាមេរិក ដើម្បីបង្កើនការផ្តល់ប្រាក់កម្ចីសម្រាប់សហគ្រាសខ្នាតតូចនិងមធ្យម ។
សូមថ្លែងអំណរគុណដល់ថ្នាក់ដឹកនាំដ៏ប្រពៃ និងបុគ្គលិកទាំង ២.៣០០នាក់ ដែលបានខិតខំប្រឹងប្រែងរយៈពេលជាច្រើនឆ្នាំមកនេះ ឥឡូវនេះអេស៊ីលីដា ត្រូវបានទទួលស្គាល់យ៉ាងទូលំទូលាយថា ជាធនាគារដែលមានការគ្រប់គ្រងដ៏ល្អបំផុតនៅក្នុងប្រទេសកម្ពុជា ។ អេស៊ីលីដា គឺជាធនាគារដំបូងគេបង្អស់ និងតែមួយនៅក្នុងប្រទេសកម្ពុជា ដែលត្រូវបានផ្តល់ចំណាត់ថ្នាក់ដោយស្ថាប័នផ្តល់ចំណាត់ថ្នាក់ធនាគារអន្តរជាតិ Moody's Investor Services ឬភ្នាក់ងារផ្តល់ចំណាត់ថ្នាក់អន្តរជាតិដទៃ ហើយ Moody's បានផ្តល់ចំណាត់ថ្នាក់ឱ្យអេស៊ីលីដាជាធនាគារដែលមានភាពរឹងមាំផ្នែកហិរញ្ញវត្ថុខ្ពស់ជាងធនាគារទាំងអស់នៅក្នុងប្រទេសឥណ្ឌូនេស៊ី និងធនាគារមួយភាគធំទៀតនៅក្នុងប្រទេសថៃ ។
ធនាគារអេស៊ីលីដា ក៏បាននាំមកនូវសេវាហិរញ្ញវត្ថុសំខាន់ៗជូនដល់ប្រជាជន ដែលពុំធ្លាប់មានពីមុនមក ។ ឥឡូវនេះ អតិថិជនសន្សំប្រាក់តូចៗប្រមាណជិត ៨០.០០០នាក់ ជឿទុកចិត្តដាក់ប្រាក់របស់ពួកគាត់នៅធនាគារអេស៊ីលីដា ហើយធ្វើឱ្យប្រាក់បញ្ញើរបស់ធនាគារកើនឡើងស្ទើរតែពីចំណុចសូន្យ កាលពី៤ឆ្នាំមុន មកដល់ ៦២លានដុល្លារអាមេរិក នៅចុងឆ្នាំ២០០៥ ។ ធនាគារក៏បានផ្តល់ជូនអតិថិជននូវសេវាផ្ទេរប្រាក់ ដែលអាចឱ្យពួកគាត់ធ្វើការផ្ទេរប្រាក់យ៉ាងងាយស្រួលទាំងនៅក្នុងប្រទេស និងក្រៅប្រទេស ដែលមានសារសំខាន់យ៉ាងខ្លាំង សម្រាប់ពលករខ្មែរដែលធ្វើការនៅក្រៅប្រទេស ក្នុងការផ្គត់ផ្គង់គ្រួសាររបស់ពួកគាត់នៅតំបន់ជនបទ ។
ឥណទានភាគច្រើនរបស់ធនាគារអេស៊ីលីដា ត្រូវផ្តល់ជូនសហគ្រិនខ្នាតតូចបំផុត ដែលលក់ដូរទំនិញចាំបាច់ដូចជា ស្រូវ ត្រី និង ផលិតនិងលក់សំភារៈសិប្បកម្ម ប៉ុន្តែក៏សូមថ្លែងអំណរគុណចំពោះ MPDF និងម្ចាស់ជំនួយផ្សេងៗទៀតផងដែរ ក្នុងការចូលរួមចំណែកធ្វើឱ្យប្រាក់កម្ចី និងសេវាកម្មជាច្រើនដែលផ្តល់ជូនដល់សហគ្រាសខ្នាតតូច និងតូចបំផុត កំពុងតែរីកចម្រើនយ៉ាងឆាប់រហ័ស ។ ជាឧទាហរណ៍ អេស៊ីលីដា បានផ្តល់នូវសេវាបើកប្រាក់បៀវត្ស ជូនដល់រោងចក្រ និងក្រុមហ៊ុនពាណិជ្ជកម្មជាច្រើន ដូច្នេះពួកគេពុំចាំបាច់ធ្វើការទូទាត់ដោយបើកប្រាក់សុទ្ធទៀតទេ ។ ទាំងនេះធ្វើឱ្យធូរស្រាលទាំងបន្ទុក និងហានិភ័យនៃប្រតិបត្តិការសាច់ប្រាក់សុទ្ធ និងកាន់តែល្អប្រសើរថែមទៀតសម្រាប់កម្មករនិយោជិតធ្វើការសន្សំប្រាក់ ។ ដើម្បីជាចំណែកមួយក្នុងកិច្ចប្រឹងប្រែងលើកស្ទួយជីវភាពរស់នៅឱ្យប្រសើរឡើង ធនាគារអេស៊ីលីដាផ្តល់ជាហិរញ្ញប្បទានសម្រាប់អ្នកផលិតថាមពលក្នុងទ្រង់ទ្រាយតូចៗ ដែលផ្គត់ផ្គង់អគ្គិសនីនៅក្នុងតំបន់ដាច់ស្រយាល និងបានវិនិយោគលើហេដ្ឋារចនាសម្ព័ន្ធគមនាគមន៍ ដើម្បីផ្គត់ផ្គង់ការផ្ទេរប្រាក់រវាងសាខានិងសាខានៅតាមតំបន់ជនបទ ។
អេស៊ីលីដា ត្រូវបានទទួលស្គាល់យ៉ាងខ្ពង់ខ្ពស់ទាំងនៅក្នុងស្រុក និងអន្តរជាតិ ។ នាខែកញ្ញាឆ្នាំ២០០៥ សាជីវកម្មហិរញ្ញវត្ថុអន្តរជាតិបានផ្តល់ពានរង្វាន់ប្រចាំឆ្នាំនៃភាពជាដៃគូឈានមុខគេ ជូនដល់ធនាគារអេស៊ីលីដា ចំពោះការអនុវត្តយ៉ាងខ្ជាប់ខ្ជួននូវកម្រិតបទដ្ឋានខ្ពស់ដែលបានកំណត់ដោយខ្លួនឯង ។ កិត្តិយសដែលទទួលស្គាល់ទូទាំងពិភពលោកនេះ ត្រូវបានផ្តល់ជូនអតិថិជនគំរូរបស់ IFC ដែលបានចូលរួមយ៉ាងគួរឱ្យគត់សម្គាល់ក្នុងការអភិវឌ្ឍប្រកបដោយនិរន្តរភាព ហើយស្របតាមបេសកកម្មរបស់ IFC ។
នៅក្នុងពិធីផ្តល់ពានរង្វាន់ នាទីក្រុងវ៉ាស៊ីនតោន ឌីស៊ី លោក Assaad Jabre ដែលពេលនោះគាត់ជាអគ្គនាយករងប្រតិបត្តិស្តីទី របស់សាជីវកម្មហិរញ្ញវត្ថុអន្តរជាតិនាពេលនោះ បានកោតសរសើរអេស៊ីលីដា ចំពោះការវិវដ្តរបស់ខ្លួន ទៅជាធនាគារពាណិជ្ជកម្រិតទីមួយ ។ លោកបានមានប្រសាសន៍ថា "អេស៊ីលីដា គឺជាគំរូដ៏ល្អសម្រាប់អាជីវកម្មគ្រប់ប្រភេទ មិនត្រឹមតែសម្រាប់ស្ថាប័នមីក្រូហិរញ្ញវត្ថុប៉ុណ្ណោះទេ ។ អ្នកទទួលបានពានរង្វាន់នៃភាពជាដៃគូឈានមុខពីសាជីវកម្មហិរញ្ញវត្ថុអន្តរជាតិ គឺសម្រាប់ក្រុមហ៊ុនមួយដែលបានបង្កើតឱ្យមាននូវបទដ្ឋានឈានមុខគេក្នុងអភិបាលកិច្ចសាជីវកម្ម ការចូលរួមក្នុងសហគមន៍ និរន្តរភាពនៃបរិស្ថាននិងសង្គម និងភាពជោគជ័យក្នុងមុខជំនួញ ។ អេស៊ីលីដា ពិតជាសក្តិសមនឹងទទួលបានពានរង្វាន់នេះ" ។
កម្មវិធីអភិវឌ្ឍវិស័យឯកជនតំបន់ទន្លេមេគង្គ IFC-MPDF គឺជាគម្រោងមួយទទួលបានការឧបត្ថម្ភដោយមូលនិធិចំរុះ ដែលត្រូវបានបង្កើតឡើងដោយសាជីវកម្មហិរញ្ញវត្ថុអន្តរជាតិ ប្រចាំប្រទេសវៀតណាម កម្ពុជា និងឡាវ ដើម្បីកាត់បន្ថយភាពក្រីក្រ តាមរយៈការអភិវឌ្ឍវិស័យឯកជនប្រកបដោយនិរន្តរភាព ។ គោលបំណងរបស់ IFC-MPDF គឺជួយដល់សហគ្រាសខ្នាតតូច និងខ្នាតមធ្យម ដោះស្រាយនូវរាល់បញ្ហាទូទៅក្នុងប្រតិបត្តិការ និងការគ្រប់គ្រង និងទទួលនូវជោគជ័យបន្ថែមទៀតពីការប្រកួតប្រជែងនៅក្នុងសេដ្ឋកិច្ចសកល ។ IFC-MPDF ធ្វើប្រតិបត្តិការតាមរយៈកម្មវិធីចំនួន៦ ដែលស្វែងរកវិធីធ្វើឱ្យប្រសើរឡើងនូវបរិស្ថានពាណិជ្ជកម្ម ការអភិវឌ្ឍវិស័យហិរញ្ញវត្ថុ បង្កើនសមត្ថភាពនៃការគ្រប់គ្រង និងបង្កើនការអនុវត្តពាណិជ្ជកម្មប្រកបដោយនិរន្តរភាព នៅក្នុងវិស័យ ៣ ដែលជាស្នូលនៃភាពរីកចម្រើនខាងសេដ្ឋកិច្ច និងការកាត់បន្ថយភាពក្រីក្រ ដែលវិស័យទាំងនេះរួមមាន វិស័យទេសចរណ៍ វិស័យកសិ-ពាណិជ្ជកម្ម និងវិស័យកាត់ដេរ ។ អ្នកឧបត្ថម្ភដល់គម្រោង IFC-MPDF រួមមាន ធនាគារអភិវឌ្ឍន៍អាស៊ី ប្រទេសអូស្ត្រាលី ប្រទេសកាណាដា ប្រទេសហ្វាំងឡង់ដ៍ សាជីវកម្មហិរញ្ញវត្ថុអន្តរជាតិ ប្រទេសអៀរឡង់ដ៍ ប្រទេសជប៉ុន ប្រទេសញូវហ៊េ្សឡែន ប្រទេសហុល្លង់ដ៍ ប្រទេសណរវ៉េ ប្រទេសស៊ុយអ៊ែត ប្រទេសស្វ៊ីតហ៊េ្សឡែន និងចក្រភពអង់គ្លេស ។
3rd Floor, 63 Ly Thai To St.
Hoan Kiem Dist., Hanoi
Vietnam
Tel: +(84 4) 824 7892
Fax: +(84 4) 824 7898
3rd Floor, Somerset
Chancellor Court, 21-23
Nguyen Thi Minh Khai St.
Dist. 1, Ho Chi Minh City
Vietnam
Tel: +(84 8) 823 5266
Fax: +(84 8) 823 5271
70, Norodom Blvd.
Sangkat Chey Chumnas
P.O. Box 1115
Phnom Penh, Cambodia
Tel: +(855 23) 210 922
Fax: +(855 23) 215 157
Nehru Road
Pathou Xay
P.O. Box 9690
Vientiane, Lao PDR
Tel: +(856 21) 450 017-9
Fax: +(856 21) 450 020
