ព័ត៌មានព័ត៌មានថ្មីៗកិច្ចប្រជុំរំលឹកឡើងវិញអំពីការព្រមព្រៀង...

កិច្ចប្រជុំរំលឹកឡើងវិញអំពីការព្រមព្រៀងរវាងថ្នាក់ដឹកនាំជាន់ខ្ពស់ នៃធនាគារ អេស៊ីលីដា និង ធនាគារកសិកម្មនិងអភិវឌ្ឍន៍ជនបទវៀតណាម

ទីក្រុងហូជីមិញ ពីថ្ងៃទី២៩ ខែមិថុនា ដល់ថ្ងៃទី០២ ខែកក្កដា ឆ្នាំ២០០៦

រូបភាពថ្នាក់ដឹកនាំ ធនាគារអេស៊ីលីដា និង AGRIBANK

នៅរសៀលថ្ងៃទី២៩ ខែមិថុនា ឆ្នាំ២០០៦ គណៈប្រតិភូនៃថ្នាក់ដឹកនាំជាន់ខ្ពស់របស់ធនាគារអេស៊ីលីដា ដឹកនាំដោយលោក អ៊ិន ចាន់នី អគ្គនាយក ធនាគារ អេស៊ីលីដា ភីអិលស៊ី បានចាកចេញពីរាជធានីភ្នំពេញ ព្រះរាជាណាចក្រកម្ពុជា ក្នុងដំណើរទស្សនកិច្ចរយៈពេលបីថ្ងៃទៅកាន់ធនាគារកសិកម្មនិងអភិវឌ្ឍន៍ជនបទវៀតណាម ។ កិច្ចប្រជុំទាំងមូលបានចាប់ផ្តើមឡើងនៅវេលាម៉ោង ៨ព្រឹក ថ្ងៃទី៣០ ខែមិថុនា រហូតដល់រសៀល នៅការិយាល័យតំបន់របស់ធនាគារកសិកម្មនិងអភិវឌ្ឍន៍ជនបទវៀតណាម ។ នៅក្នុងអំឡុងពេលនៃកិច្ចប្រជុំនោះ គណៈប្រតិភូបានផ្តោតទៅលើ (១) កិច្ចព្រមព្រៀងទ្វេភាគីនៃការផ្សព្វផ្សាយរវាងធនាគារអេស៊ីលីដា និងធនាគារកសិកម្មនិងអភិវឌ្ឍន៍ជនបទវៀតណាម (២) រំលឹកឡើងវិញនូវការអនុវត្តកិច្ចព្រមព្រៀង កិច្ចការដែលកើតចេញពីការអនុវត្តកិច្ចព្រមព្រៀង និង (៣) អនុសាសន៍ទៅលើការអនុវត្តកិច្ចព្រមព្រៀង ។ ក្រោយពីការពិភាក្សាប្រកបដោយជោគជ័យ នៅព្រឹកថ្ងៃទី៣០ ខែមិថុនា ឆ្នាំ២០០៦ កិច្ចប្រជុំបានធ្វើការព្រមព្រៀងទៅលើចំណុច ៖

នាយកសាខា ត្រូវបានជំរុញឱ្យផ្លាស់ប្តូរបញ្ជីឈ្មោះនៃក្រុមហ៊ុនដែលកំពុងធ្វើពាណិជ្ជកម្មនៅក្នុងប្រទេសទាំងពីរ ជាពិសេសក្នុងខេត្តនៅជាប់ព្រំដែននៃប្រទេសទាំងពីរ ។
បង្កើតឱ្យមានបញ្ជរនៅតាមការិយាល័យ ឬសាខា នៅតាមបណ្ដាខេត្តជាប់ព្រំដែន ដើម្បីបង្កឱ្យមានភាពងាយស្រួលក្នុងការទូទាត់ ។
ធនាគារកសិកម្មនិងអភិវឌ្ឍន៍ជនបទវៀតណាម បានព្រមព្រៀង និងបានផ្ញើសំណើរបស់ខ្លួនទៅធនាគាររដ្ឋរបស់វៀតណាមរួចហើយ ដើម្បីស្នើសុំប្តូរពីប្រាក់ដុង ទៅប្រាក់ផ្សេងៗទៀត ។
នាយកសាខានៃសាខានៅតាមព្រំដែនប្រទេសទាំងពីរ ត្រូវបានលើកទឹកចិត្តឱ្យធ្វើការទាក់ទង និងផ្លាស់ប្តូរព័ត៌មានគ្នាទៅវិញទៅមក ដើម្បីអាចមានលទ្ធភាពធ្វើការផ្សព្វផ្សាយនូវសេវាទូទាត់កាន់តែប្រសើរឡើងថែមទៀត ។
ការសហការធ្វើការផ្សព្វផ្សាយ និងការកំណត់ទីផ្សារ ត្រូវបានជំរុញដោយថ្នាក់ដឹកនាំនៃធនាគារទាំងពីរ និងតាមរយៈការធ្វើទស្សនកិច្ចទៅវិញទៅមក ។
ធនាគារអេស៊ីលីដា បានស្នើសុំឱ្យ AGRIBANK បើកគណនីជាប្រាក់រៀល និង ដុល្លារអាមេរិក ដើម្បីសម្រួលក្នុងការទូទាត់ ហើយ AGRIBANK ក៏បានពិចារណាធ្វើភ្លាមៗផងដែរ ។
ធនាគារទាំងពីរ ត្រូវផ្ញើរបាយការណ៍ធនាគារប្រចាំថ្ងៃ ទៅវិញទៅមក ហើយឥឡូវ កិច្ចការនេះកំពុងតែរៀបចំលើកុំព្យូទ័រ ។
ទាំងធនាគារអេស៊ីលីដា និងធនាគារកសិកម្មនិងអភិវឌ្ឍន៍ជនបទវៀតណាម បានធ្វើការបញ្ចុះតម្លៃសេវារបស់ខ្លួន ។
ធនាគារកសិកម្មនិងអភិវឌ្ឍន៍ជនបទវៀតណាម បានយល់ព្រមផ្តល់ការបណ្ដុះបណ្ដាលស្តីពីការកំណត់សម្គាល់លើប្រាក់ក្លែងក្លាយ ។

ដំណើរចុះទស្សនកិច្ចតាមសាខា បានចាប់ផ្តើមនៅរសៀលថ្ងៃទី៣០ ខែមិថុនា និងព្រឹកថ្ងៃទី០១ ខែកក្កដា ឆ្នាំ២០០៦ ទៅកាន់សាខាខេត្ត Sai Gon ខេត្ត Mac Thi Buoi ខេត្ត Quan ១០ និងខេត្ត Can Gio ។ គណៈប្រតិភូបានរៀនសូត្រយ៉ាងច្រើនពីកិច្ចប្រជុំទល់មុខគ្នា និងពីដំណើរទស្សនកិច្ចទៅកាន់សាខា ដើម្បីមើលពីរបៀបធ្វើការទូទាត់ប្រតិបត្តិការប្រចាំថ្ងៃ ព្រមទាំងដំណើរទស្សនាតាមបញ្ជរ និងកិច្ចពិភាក្សាអំពីការប្រឆាំងការលាងលុយកខ្វក់ និងប្រាក់ដុងក្លែងក្លាយ ។ គណៈប្រតិភូធនាគារអេស៊ីលីដា បានវិលត្រឡប់មករាជធានីភ្នំពេញវិញ នៅថ្ងៃទី០២ ខែកក្កដា ឆ្នាំ២០០៦ ។

« ព័ត៌មានមុន
ធនាគារអេស៊ីលីដា ត្រូវបានទទួលស្គាល់ពាសពេញសកលលោក ចំពោះភាពជោគជ័យ និងបទដ្ឋានកម្រិតខ្ពស់ ព័ត៌មានបន្ទាប់ »
ពិធីអបអរសាទរចំពោះការបើកការិយាល័យថ្មីរបស់ធនាគារ អេស៊ីលីដា ភីអិលស៊ី