ព័ត៌មានព័ត៌មានថ្មីៗធនាគារអេស៊ីលីដា បង្កើនដើមទុនដល់ ៣០លានដុល្លារអាមេរិក

ធនាគារអេស៊ីលីដា ភីអិលស៊ី បង្កើនដើមទុនដល់ ៣០.០០០.០០០ដុល្លារអាមេរិក

ថ្ងៃទី៣០ ខែវិច្ឆិកា ឆ្នាំ២០០៦

ភ្នំពេញ, ថ្ងៃទី៣០ ខែវិច្ឆិកា ឆ្នាំ២០០៦, ធនាគារអេស៊ីលីដា ភីអិលស៊ី ដែលជាធនាគារឈានមុខគេក្នុងប្រទេសកម្ពុជាលើវិស័យបម្រើសេវាធនាគារដល់អតិថិជននៅក្នុងទីក្រុង និងជនបទ បានប្រារព្ធពិធីគម្រប់ខួបទី១៣ឆ្នាំនៃការធ្វើប្រតិបត្តិការរបស់ខ្លួនដើម្បីប្រកាសពីការបង្កើនដើមទុនដែលមានពី ១៣.០០០.០០០ដុល្លារអាមេរិក ទៅដល់ ៣០.០០០.០០០ដុល្លារអាមេរិក ។ បច្ចុប្បន្ន ធនាគារអេស៊ីលីដា ភីអិលស៊ី មានបណ្តាញប្រតិបត្តិការចំនួន ១៥៣ការិយាល័យ នៅទូទាំង២៤ខេត្ត-រាជធានីនៃព្រះរាជាណាចក្រកម្ពុជា ។ តាមរបាយការណ៍ប្រាក់ចំណេញឆ្នាំ២០០៥ និងលទ្ធផលប្រតិបត្តិការសម្រាប់ឆមាសទីមួយឆ្នាំ២០០៦ បានបង្ហាញថា ប្រតិបត្តិការរបស់ធនាគារក្នុងឆ្នាំ២០០៦នេះនឹងមានការកើនឡើង បើប្រៀបធៀបទៅនឹងឆ្នាំមុនៗ ។

ធនាគារអេស៊ីលីដា ភីអិលស៊ី មានដើមទុន ៥១% កាន់កាប់ដោយភាគហ៊ុនិកកម្ពុជា ក្នុងនោះរួមបញ្ចូលទាំងភាគហ៊ុនកាន់កាប់ដោយបុគ្គលិកធនាគារអេស៊ីលីដា និង ៤៩% ដែលនៅសល់ កាន់កាប់តាមចំណែកស្មើៗគ្នាដោយភាគហ៊ុនិកបរទេសសំខាន់ៗដូចជា សាជីវកម្មហិរញ្ញវត្ថុអន្តរជាតិ (IFC), ធនាគារអភិវឌ្ឍន៍អាល្លឺម៉ង់ (DEG), ធនាគារអភិវឌ្ឍន៍ហុល្លង់ដ៍ (FMO), និងធនាគារឯកជនហុល្លង់ដ៍ (Stichting Triodos Doen and Triodos Cusdody B.V) ។ ការបង្កើនដើមទុននេះ ត្រូវបានធ្វើឡើងតាមរយៈការចេញសិទ្ធិទិញហ៊ុនបន្ថែមចំនួន ១៧លានភាគហ៊ុនថ្មី ដោយធ្វើការទូទាត់តាមតម្លៃ ១ដុល្លារក្នុងមួយហ៊ុន សមាមាត្រទៅនឹងភាគហ៊ុនរបស់ភាគហ៊ុនិកនីមួយៗ ។

នេះជាលើកទីបីហើយដែលធនាគារអេស៊ីលីដា ភីអិលស៊ី បានបង្កើនដើមទុនរបស់ខ្លួនចាប់តាំងពីបានចុះបញ្ជីជាធនាគារ ។ នៅឆ្នាំ២០០០ ធនាគារអេស៊ីលីដា បានបង្កើនដើមទុនរហូតដល់ ៤លានដុល្លារអាមេរិក ដើម្បីទទួលបានអាជ្ញាប័ណ្ណធ្វើប្រតិបត្តិការជាធនាគារឯកទេស ដែលមានឈ្មោះថា "ធនាគារ អេស៊ីលីដា លីមីធីត" ។ បីឆ្នាំក្រោយមក ធនាគារអេស៊ីលីដាបានបង្កើនដើមទុនរបស់ខ្លួនរហូតដល់ទៅ ១៣លានដុល្លារអាមេរិក តាមរយៈការចេញសិទ្ធិ និងបានចុះបញ្ជីសារជាថ្មី ដើម្បីក្លាយខ្លួនជាធនាគារពាណិជ្ជ ដែលមានឈ្មោះថា "ធនាគារ អេស៊ីលីដា ភីអិលស៊ី" ។ ឥឡូវនេះអ្វីៗហាក់បានក្លាយជាភាពទៀងទាត់ក្នុងការបង្កើនដើមទុនក្នុងខួបបីឆ្នាំម្តង ដែលនឹងផ្តល់ឱ្យធនាគារអេស៊ីលីដា នូវតារាងតុល្យភាពមួយរឹងមាំបំផុតក្នុងចំណោមធនាគារនៅក្នុងប្រទេសកម្ពុជា ។ លើសពីនេះ ធនាគារអេស៊ីលីដាបានទទួលកំណើនប្រាក់ចំណេញក្រោយពីបង់ពន្ធរួច ពី ៤៧៥.០០០ដុល្លារអាមេរិក ក្នុងឆ្នាំ២០០១ រហូតដល់ ៤,២លានដុល្លារអាមេរិក ក្នុងឆ្នាំ២០០៥ ដែលបានអនុវត្តតាមគោលការណ៍អភិរក្សប្រាក់ចំណេញរក្សាទុកភាគច្រើន ដើម្បីបង្កើននូវទុនបម្រុងទុករបស់ខ្លួន (General Reserve) ។ ជាលទ្ធផល ធនាគារអេស៊ីលីដា ភីអិលស៊ី រំពឹងថា ដើមទុនរបស់ខ្លួននឹងមានកំណើនច្រើនជាង ៤០លានដុល្លារអាមេរិក នៅចុងឆ្នាំនេះ ។

លោក ជា សុខ ប្រធានក្រុមប្រឹក្សាភិបាលរបស់ធនាគារអេស៊ីលីដា ភីអិលស៊ី ជាអតីតធនាគារិកនៅធនាគារកណ្តាល និងជាអ្នកសេដ្ឋកិច្ច បានមានប្រសាសន៍ថា ទោះបីជាធនាគារបានរៀបចំដើមទុនរបស់ខ្លួនបានល្អប្រសើរហើយក៏ដោយ ក៏ធនាគារគួរតែធ្វើការស្វែងរកដើមទុនជាបន្ថែមទៀត ។ លោកបានបន្តទៀតថា ធនាគារអេស៊ីលីដា នៅតែបន្តភាពរឹងមាំនៃការរីកចម្រើនរបស់ខ្លួនជាបន្តបន្ទាប់ជាមួយដៃគូជំនួញនៅក្នុងស្រុកតាមរយៈការផ្តល់ប្រាក់កម្ចី ហើយទ្រព្យសកម្មរបស់ធនាគារមានការកើនឡើងជាប្រចាំឆ្នាំប្រមាណ ៥០% ។ ទំនោរបែបនេះ គឺត្រូវបានសង្ឃឹមទុកថានឹងបន្តកើនឡើងជាលំដាប់សម្រាប់រយៈពេល ៥ឆ្នាំទៅមុខទៀតសម្រាប់តម្រូវការទីផ្សារសក្តានុពលរបស់យើង ។ បើទោះបីជាមានការប្រកួតប្រជែងកើនឡើងយ៉ាងណាក៏ដោយ ក៏ការប្រកួតប្រជែងនេះកំពុងជំរុញឱ្យមានតម្រូវការដើម្បីបង្ហាញនូវសេវាកម្ម ផលិតផលថ្មីៗ ដើម្បីវិនិយោគលើសាខា និងប្រព័ន្ធថ្មីបន្ថែមទៀត ដែលទាំងអស់នេះគឺពឹងផ្អែកលើភាពរឹងមាំនៃដើមទុនជាមូលដ្ឋាន ។

លោក អ៊ិន ចាន់នី ប្រធាននាយកប្រតិបត្តិ ធនាគារអេស៊ីលីដា ភីអិលស៊ី បានមានប្រសាសន៍ថា នៅដើមឆ្នាំ២០០៧ ធនាគារអេស៊ីលីដានឹងដំណើរការបម្រើសេវាកម្មតាមប្រព័ន្ធអេឡិចត្រូនិច ដែលរួមមានការដាក់ឱ្យប្រើប្រាស់ម៉ាស៊ីន ATM នៅក្នុងរាជធានីភ្នំពេញ និងនៅតាមបណ្តាទីរួមខេត្តមួយចំនួនទៀត ។ បន្ថែមទៀតនោះ ធនាគារអេស៊ីលីដា មានគម្រោងបើកឱ្យមានបណ្តាញប្រតិបត្តិការចំនួន ៦៤ការិយាល័យថ្មីបន្ថែមទៀត ដើម្បីពង្រីកឱ្យមានរហូតដល់ ២១៧ការិយាល័យ ដែលផ្តល់ការងារឱ្យកម្មករនិយោជិកជាង ៤០០០នាក់ ។ ជាងនេះទៅទៀត យើងក៏នាំមកនូវប្រព័ន្ធគ្រប់គ្រងបច្ចេកវិជ្ជាព័ត៌មានបែបទំនើប ទាន់សម័យ និងការផ្លាស់ប្តូរទីតាំងការិយាល័យកណ្តាល ទៅកាន់ការិយាល័យថ្មីទំនើប ដែលស្ថិតនៅលើមហាវិថីព្រះមុនីវង្ស នៅក្នុងឆ្នាំ២០០៧ ។

សម្រាប់ព័ត៌មានបន្ថែម សូមទាក់ទងតាមរយៈ ៖

លោកស្រី សូ ផនណារី នាយិកាប្រតិបត្តិទីផ្សារ
អ៊ីម៉ែល ៖

លោក ព្រំ វិសុទ្ធ នាយកប្រតិបត្តិនីតិកម្ម និងជាលេខាធិការក្រុមហ៊ុន
អ៊ីម៉ែល ៖

« ព័ត៌មានមុន
ឧត្តមភាពរបស់ធនាគារ អេស៊ីលីដា ភីអិលស៊ី ព័ត៌មានបន្ទាប់ »
ធនាគារ អេស៊ីលីដា ភីអិលស៊ី បង្កើនការការពារទ្រព្យសម្បត្តិរបស់អតិថិជន

ធនាគារ​អេស៊ីលីដា ភីអិលស៊ី បង្កើន​ដើម​ទុន​ដល់ ៣០.០០០.០០០​ដុល្លារ​អាមេរិក

ធនាគារអេស៊ីលីដា ភីអិលស៊ី បង្កើនដើមទុនដល់ ៣០.០០០.០០០ដុល្លារអាមេរិក