ព័ត៌មានព័ត៌មានថ្មីៗឧត្តមភាពរបស់ធនាគារអេស៊ីលីដា ភីអិលស៊ី

ឧត្តមភាពរបស់ធនាគារ អេស៊ីលីដា ភីអិលស៊ី

ថ្ងៃទី០៤ ខែកក្កដា ឆ្នាំ២០០៦

លោក អ៊ិន ចាន់នី ក្នុងពិធីចម្រើនមង្គលសិរីសួស្តីអគារការិយាល័យកណ្តាលថ្មី

សំណង់អគារថ្មីមួយ បានបង្ហាញរូបរាងយ៉ាងសង្ហាទាន់សម័យ នៅតាមបណ្តោយមហាវិថីព្រះមុនីវង្ស នោះគឺជាអគារការិយាល័យកណ្តាលធនាគារអេស៊ីលីដា ដែលបានសាងសង់ឡើងតាមបច្ចេកទេសស្ថាបត្យកម្មទំនើប មានទីតាំងស្ថិតនៅក្នុងសង្កាត់ស្រះចក ។ ស្របតាមទំនៀមទំលាប់ខ្មែរ ពិធីចម្រើនមង្គលសិរីសួស្តីអគារថ្មីនេះ ប្រារព្ធឡើងនៅថ្ងៃទី០៤ ខែកក្កដា ដើម្បីសំដែងនូវការអបអរចំពោះការប្រក់ដំបូលអគារ និងបួងសួងសុំឱ្យមានសុខភាពល្អ សំណាងល្អ និងសេចក្តីសុខសុភមង្គល ចម្រើនរុងរឿង កើតមានចំពោះអតិថិជន ក៏ដូចជាកម្មករនិយោជិតទាំងអស់របស់ធនាគារ ។

ការិយាល័យកណ្តាលថ្មីនេះ មានផ្ទៃក្រឡាសម្រាប់បំពេញការងារទំហំ ៦.៨០០ម៉ែត្រការ៉េ ដែលក្នុងនោះរួមមានសាលដ៏ធំមួយសម្រាប់ទទួលអតិថិជនទូទៅ ទំហំជាង ៥០០ម៉ែត្រការ៉េ ។ នៅផ្នែកខាងក្រោយអគារមានចំណតរថយន្តដាច់ដោយឡែកដ៏ធំទូលាយ ដែលអាចចតរថយន្តបានច្រើនជាង ១៦៨គ្រឿង និងមានចំណតបម្រុងសម្រាប់អតិថិជនដែលកាន់សាច់ប្រាក់ច្រើនផងដែរ ។ អគារការិយាល័យដ៏ធំនេះបានគូរប្លង់ដោយក្រុមហ៊ុនល្បីឈ្មោះរបស់ប្រទេសហុល្លង់ដ៍ និងថៃ ឈ្មោះ Royal Haskoning / Chuchawal-de Weger ស្របតាមបទដ្ឋានអន្តរជាតិ ដោយផ្តោតការយកចិត្តទុកដាក់ជាពិសេសលើបញ្ហាសន្តិសុខ កំណារពារអគ្គីភ័យ ការបម្រុងថាមពល ផាសុកភាព និងសុវត្ថិភាពក្នុងការងារ ។ ធនាគារនឹងរៀបចំជាពិសេសដើម្បីបំពេញតាមតម្រូវការរបស់ជនពិការ និងរៀបចំឱ្យមានភាពងាយស្រួលសម្រាប់សេវាប្តូរប្រាក់ ការផ្ទេរប្រាក់តាមរយៈ Western Union ព្រមទាំងមានម៉ាស៊ីនដកប្រាក់ស្វ័យប្រវត្តិ (ATM) បម្រើសេវាកម្មពេញ ២៤ម៉ោងទៀតផង ។

លោក អ៊ិន ចាន់នី អគ្គនាយក ធនាគារអេស៊ីលីដា ភីអិលស៊ី បានថ្លែងថា "ពិធីនេះជាសញ្ញាបង្ហាញឱ្យឃើញនូវជោគជ័យថ្មីមួយទៀតសម្រាប់ធនាគារនៅក្នុងឆ្នាំដ៏ពិសេសនេះ វាគឺជាឆ្នាំដែលធនាគារបានបើកការិយាល័យនៅក្នុងខេត្តរតនគិរី និងខេត្តមណ្ឌលគិរី ដែលធ្វើឱ្យយើងអាចបម្រើសេវាកម្មធនាគារបានគ្រប់ខេត្ត-រាជធានីក្នុងប្រទេសកម្ពុជា តាមរយៈបណ្តាញការិយាល័យប្រតិបត្តិការរបស់ធនាគារ ដែលសព្វថ្ងៃនេះមានចំនួន ១៤៦ការិយាល័យ ។ ការវិនិយោគរបស់យើងទៅលើអគារការិយាល័យកណ្តាលថ្មីនេះ បង្ហាញឱ្យឃើញយ៉ាងច្បាស់នូវភាពជឿជាក់របស់យើងចំពោះប្រទេសកម្ពុជា និងការប្តេជ្ញារបស់យើងចំពោះអតិថិជនទាំងអស់ ដែលបានផ្តល់នូវការជឿជាក់មកលើធនាគារអេស៊ីលីដា ដែលសព្វថ្ងៃមានចំនួន ២៥០.០០០នាក់" ។

លោកអគ្គនាយកបានថ្លែងបន្ថែមថា "យើងរង់ចាំស្វាគមន៍ដោយក្តីសោមនស្សរីករាយ ចំពោះអតិថិជនទាំងអស់ និងសាធារណជនគ្រប់មជ្ឈដ្ឋាន នៅពេលយើងផ្លាស់ប្តូរទីតាំងទៅអគារការិយាល័យថ្មីនៅចុងឆ្នាំនេះ ហើយយើងនឹងបង្កើនកម្រិតស្តង់ដារថ្មី លើការបម្រើសេវាកម្មធនាគារនៅក្នុងប្រទេសកម្ពុជា" ។

« ព័ត៌មានមុន
ពិធីអបអរសាទរចំពោះការបើកការិយាល័យថ្មីរបស់ធនាគារ អេស៊ីលីដា ភីអិលស៊ី ព័ត៌មានបន្ទាប់ »
ធនាគារអេស៊ីលីដា ភីអិលស៊ី បង្កើនដើមទុនដល់ ៣០.០០០.០០០ដុល្លារអាមេរិក

ឧត្តមភាព​របស់​ធនាគារ អេស៊ីលីដា ភីអិលស៊ី

ឧត្តមភាពរបស់ធនាគារ អេស៊ីលីដា ភីអិលស៊ី