ព័ត៌មានព័ត៌មានថ្មីៗពិធីសម្ពោធអគារថ្មីការិយាល័យកណ្តាល

ពិធីសម្ពោធអគារថ្មីការិយាល័យកណ្តាល របស់ធនាគារអេស៊ីលីដា ភីអិលស៊ី

ថ្ងៃទី១៨ ខែឧសភា ឆ្នាំ២០០៧

ការិយាល័យកណ្តាលថ្មីរបស់ធនាគារអេស៊ីលីដា

អគារថ្មីការិយាល័យកណ្តាលរបស់ធនាគារអេស៊ីលីដា ភីអិលស៊ី ដែលមានទីតាំងនៅអគារលេខ៦១ មហាវិថីព្រះមុនីវង្ស សង្កាត់ស្រះចក ខណ្ឌដូនពេញ រាជធានីភ្នំពេញ ត្រូវបានបើកសម្ពោធជាផ្លូវការនៅថ្ងៃទី១៨ ខែឧសភា ឆ្នាំ២០០៧ ក្រោមអធិបតីភាពឯកឧត្តម គាត ឈន់ ទេសរដ្ឋមន្ត្រី រដ្ឋមន្ត្រីក្រសួងសេដ្ឋកិច្ចនិងហិរញ្ញវត្ថុ ឯកឧត្តម ជា ចាន់តូ អគ្គទេសាភិបាលធនាគារជាតិនៃកម្ពុជា និងឯកឧត្តម ឯកអគ្គរដ្ឋទូត តំណាងអង្គទូត និងតំណាងស្ថាប័នផ្តល់ជំនួយទាំងអស់ ព្រមទាំងភ្ញៀវជាតិ និងអន្តរជាតិយ៉ាងច្រើនកុះករ ។

លោក អ៊ិន ចាន់នី ប្រធាននាយកប្រតិបត្តិ ធនាគារអេស៊ីលីដា ភីអិលស៊ី បានសំដែងនូវក្តីសោមនស្សរីករាយ និងថ្លែងអំណរគុណចំពោះភ្ញៀវជាតិ និងអន្តរជាតិទាំងអស់ដែលបានផ្តល់កិត្តិយសចូលរួម ។ លោកបានលើកឡើងពីប្រវត្តិសង្ខេបរបស់អេស៊ីលីដា ដែលបានបង្កើតឡើងនៅខែមករា ឆ្នាំ១៩៩៣ ជាអង្គការក្រៅរដ្ឋាភិបាលក្នុងស្រុកមួយ ហើយបានក្លាយខ្លួនជាធនាគារឯកទេស នៅខែតុលា ឆ្នាំ២០០០ និងបានទទួលអាជ្ញាប័ណ្ណជាធនាគារពាណិជ្ជពេញលេញ នៅដើមខែធ្នូ ឆ្នាំ២០០៣ ពីធនាគារជាតិនៃកម្ពុជា ដោយបានបង្កើនដើមទុនពី ៤លានដុល្លារអាមេរិក ទៅដល់ ១៣លានដុល្លារអាមេរិក ។ ដើម្បីគាំទ្រនូវការរីកលូតលាស់ដ៏ឆាប់រហ័ស ធនាគារអេស៊ីលីដាបានបង្កើនដើមទុនបន្ថែមចំនួន ១៧លានដុល្លារអាមេរិក នៅខែវិច្ឆិកា នាឆ្នាំកន្លងទៅនេះ តាមរយៈការលក់នូវសិទ្ធិទិញភាគហ៊ុនទៅឱ្យភាគហ៊ុនិកដើមរបស់ខ្លួនដើម្បីបង្កើនដើមទុន ។ លោក អ៊ិន ចាន់នី ក៏បានថ្លែងអំណរគុណចំពោះភាគហ៊ុនិក រួមមាន IFC, DEG, Triodos Doen, Triodos Fair Share Fund, អង្គការអេស៊ីលីដា និងក្រុមហ៊ុន ASA ចំពោះការប្តេជ្ញាចិត្ត និងការគាំទ្រការអភិវឌ្ឍឥតឈប់ឈររបស់ធនាគារអេស៊ីលីដា ភីអិលស៊ី ។

លោកក៏បានធ្វើការពិពណ៌នានូវព្រឹត្តិការណ៍សំខាន់ៗមួយចំនួន ក្នុងការអភិវឌ្ឍក្នុងនាមជាធនាគារពាណិជ្ជ ដូចខាងក្រោម ៖

ឯកឧត្តម ទេសរដ្ឋមន្ត្រី គាត ឈន់ និង ឯកឧត្តម ជា ចាន់តូ ជាមួយនិងតំណាងភាគហ៊ុនិកធនាគារអេស៊ីលីដា

ផ្តើមចេញពីប្រភពដើមជាស្ថាប័នមីក្រូហិរញ្ញវត្ថុ ធនាគារអេស៊ីលីដា បានពង្រីកសេវាហិរញ្ញវត្ថុទូលំទូលាយដល់អតិថិជន និងសាធារណជនគ្រប់មជ្ឈដ្ឋាន ក្នុងនោះរួមមានអតិថិជនខ្នាតតូចបំផុត អតិថិជនខ្នាតតូច អតិថិជនខ្នាតមធ្យម និងអតិថិជនពាណិជ្ជកម្ម ។
ផ្តួចផ្តើមឱ្យមានតម្លាភាពក្នុងវិស័យធនាគារ និងហិរញ្ញវត្ថុ តាមរយៈការប្រកាសផ្សាយពីស្ថានភាពហិរញ្ញវត្ថុរបស់ខ្លួន ប្រចាំត្រីមាស និងប្រចាំឆ្នាំជាសាធារណៈ នៅក្នុងទំព័រសារព័ត៌មានក្នុងស្រុក និងអន្តរជាតិ និងគេហទំព័រ (Website) របស់ខ្លួន ។
នៅក្នុងឆ្នាំ២០០៤ បានផ្តួចផ្តើមឱ្យមានការធ្វើចំណាត់ថ្នាក់ ដោយស្ថាប័នធ្វើចំណាត់ថ្នាក់ធនាគារ និងស្ថាប័នហិរញ្ញវត្ថុអន្តរជាតិ Moody's ដោយទទួលចំណាត់ថ្នាក់កម្រិត D លើភាពរឹងមាំរបាយការណ៍ហិរញ្ញវត្ថុ ដែលជាចំណាត់ថ្នាក់ដ៏ខ្ពស់បំផុតក្នុងចំណោមធនាគារក្នុងស្រុកនៅក្នុងទីផ្សារតំបន់អាស៊ី ។
ការតាំងចិត្តអនុវត្តឱ្យមានអភិបាលកិច្ចល្អ និងការអនុវត្តល្អតាមបទដ្ឋានអន្តរជាតិ បានធ្វើឱ្យធនាគារអេស៊ីលីដាទទួលបាននូវ ៖

ពានរង្វាន់ភាពជាដៃគូពាណិជ្ជកម្មដ៏ល្អបំផុតប្រចាំឆ្នាំ ពីមូលនិធិអភិវឌ្ឍន៍នៃប្រទេសហុល្លង់ដ៍ (Triodos-Doen) ក្នុងពិធីបុណ្យខួបគម្រប់១០ឆ្នាំរបស់ Triodos-Doen ដែលប្រព្រឹត្តិទៅនៅក្នុងប្រទេសហុល្លង់ដ៍ នៅខែមិថុនា ឆ្នាំ២០០៤ ។
បានទទួលវិញ្ញាបនបត្រសរសើរជាធនាគារអនុវត្តល្អបំផុតក្នុងការគ្រប់គ្រង និងចាត់ចែងសាច់ប្រាក់និងទូទាត់ជាលក្ខណៈអន្តរជាតិពីធនាគារដៃគូ HSBC ជារៀងរាល់ឆ្នាំ និង ធនាគារស្តាន់ដាឆាតទើរែត ទីក្រុងញូយ៉ក នាខែមករា ឆ្នាំ២០០៧ ។
បានទទួលពានរង្វាន់ជាស្ថាប័នហិរញ្ញវត្ថុឈានមុខគេលើអភិបាលកិច្ចល្អ អភិវឌ្ឍសហគមន៍ ចូលរួមការពារបរិស្ថាននិងសង្គម និងមាននិរន្តរភាពពាណិជ្ជកម្ម ពីសាជីវកម្មហិរញ្ញវត្ថុអន្តរជាតិ (IFC) នៅខែកញ្ញា ឆ្នាំ២០០៥ ។
បានទទួលពានរង្វាន់ជាស្ថាប័នដែលមានតម្លាភាពហិរញ្ញវត្ថុ ពី CGAP នៃធនាគារពិភពលោក នៅខែមិថុនា ឆ្នាំ២០០៦ ។

បានចូលជាសមាជិក VISA ជាមធ្យោបាយទូទាត់អន្តរជាតិ នៅខែមិថុនា ឆ្នាំ២០០៦ ដើម្បីបង្កើនការពង្រីកម៉ាស៊ីនដកប្រាក់ស្វ័យប្រវត្តិ (ATM) និងម៉ាស៊ីនទូទាត់ប្រាក់ (POS) ។
បានទទួលអាជ្ញាប័ណ្ណអចិន្ត្រៃយ៍ធ្វើប្រតិបត្តិការជាធនាគារដំបូងគេបំផុត ពីធនាគារជាតិនៃកម្ពុជានៅចុងឆ្នាំ២០០៦ ដោយសារតែការប្រកាន់ខ្ជាប់នូវការអនុវត្តត្រឹមត្រូវតាមច្បាប់ បទប្បញ្ញត្តិ និងសេចក្តីប្រកាសរបស់ធនាគារជាតិនៃកម្ពុជា ។
ជាធនាគារដំបូងបំផុតនៅក្នុងប្រទេសកម្ពុជា ដែលមានធានារ៉ាប់រងលើប្រតិបត្តិការធនាគារទាំងមូល (Bankers Blanket Bond), ធានារ៉ាប់រងលើឧក្រិដ្ឋកម្មតាមប្រព័ន្ធអេឡិចត្រូនិច និងកុំព្យូទ័រ (Electronic and Computer Crime Insurance) និងធានារ៉ាប់រងលើសំណងចំពោះការប្រព្រឹត្តរបស់អ្នកគ្រប់គ្រងនិងបុគ្គលិក និងសំណងក្រុមហ៊ុន (Directors & Officers Liabilities and Company Reimbursement Insurance) ដើម្បីការពារអត្ថប្រយោជន៍អតិថិជន ។
បានចូលជាសមាជិកនៃកម្មវិធីហិរញ្ញប្បទានពាណិជ្ជកម្មអន្តរជាតិរបស់សាជីវកម្មហិរញ្ញវត្ថុអន្តរជាតិ (IFC) នៅខែកុម្ភៈ ឆ្នាំ២០០៧ ។

ភ្ញៀវកិត្តិយសជាតិនិងអន្តរជាតិចូលរួមក្នុងពិធីសម្ពោធអគារថ្មី

លោក អ៊ិន ចាន់នី បានបន្តទៀតថា អគារការិយាល័យកណ្តាលមួយដ៏ធំនេះបានចំណាយមូលនិធិផ្ទាល់របស់ធនាគារអេស៊ីលីដា អស់ជាង៦លានដុល្លារអាមេរិក ដើម្បីឆ្លុះបញ្ចាំងពីសំណង់ធនាគារលំដាប់អន្តរជាតិ ។ អគារនេះមាន៦ជាន់ និងមានផ្ទៃក្រឡាសម្រាប់បំពេញការងារទំហំ ៦.៨០០ម៉ែត្រការ៉េ ដែលក្នុងនោះរួមមាន សាលដ៏ធំមួយសម្រាប់ទទួលអតិថិជនទូទៅទំហំជាង ៥០០ម៉ែត្រការ៉េ និងអាចផ្ទុកបុគ្គលិកបម្រើការងារបានរហូតដល់ជាង ១.០០០នាក់ និងមានចំណតយានយន្តដាច់ដោយឡែកដ៏ធំទូលាយ ។ អគារនេះគឺសាងសង់តាមបទដ្ឋានអន្តរជាតិខ្ពស់ ដោយយកចិត្តទុកដាក់ខ្លាំងលើការរក្សាសន្តិសុខ កំណារពារអគ្គីភ័យ ការបម្រុងថាមពល ផាសុកភាព និងសុវត្ថិភាពការងារ ។

នៅក្នុងថ្ងៃជាមួយគ្នានេះដែរ ធនាគារអេស៊ីលីដានឹងចាប់ផ្តើមបម្រើសេវាដកប្រាក់តាមម៉ាស៊ីនអេធីអឹម តាមរយៈការចេញប័ណ្ណអេស៊ីលីដា (ACLEDA Card) ជូនអតិថិជន និងសាធារណជនចាប់ពីថ្ងៃនេះតទៅ ។ ម៉ាស៊ីនដកប្រាក់ស្វ័យប្រវត្តិអេធីអឹម ត្រូវបានដាក់បង្រាយនៅតាមបណ្តាសាខាអេស៊ីលីដាចំនួន២០គ្រឿង ក្នុងនោះ១១គ្រឿងក្នុងរាជធានីភ្នំពេញ និង ៩គ្រឿងទៀតនៅបណ្តាសាខាខេត្ត-រាជធានី ហើយនឹងពង្រីកបន្ថែមទៅកាន់សាខាផ្សេងទៀត ដើម្បីបម្រើជូនអតិថិជន២៤ម៉ោងក្នុង១ថ្ងៃ ៧ថ្ងៃក្នុង១សប្តាហ៍ ។

ឯកឧត្តម ទេសរដ្ឋមន្ត្រី គាត ឈន់ និង ឯកឧត្តម ជា ចាន់តូ ទស្សនាទីកន្លែងធ្វើការរបស់ធនាគារអេស៊ីលីដា

ឯកឧត្តម ជា ចាន់តូ ទេសាភិបាលធនាគារជាតិនៃកម្ពុជា មានប្រសាសន៍ថា "អគារទីស្នាក់ការកណ្តាលថ្មីនេះត្រូវបានកសាងឡើងស្របពេលដែលសេដ្ឋកិច្ចជាតិយើងកំពុងមានការរីកចម្រើន មានស្ថិរភាព និងមានកំណើនលើសពីការរំពឹងទុកក្នុងរយៈពេលប៉ុន្មានឆ្នាំចុងក្រោយនេះ ។ ការអភិវឌ្ឍរបស់ធនាគារអេស៊ីលីដា ភីអិលស៊ី នៅពេលនេះជាសក្ខីកម្មដែលបញ្ជាក់ពីការរីកចម្រើនពីភាពរឹងមាំ និងថែមទាំងបានបង្ហាញពីការរួមចំណែកក្នុងការអភិវឌ្ឍវិស័យធនាគារនិងហិរញ្ញវត្ថុនៅកម្ពុជាឱ្យមានប្រសិទ្ធភាព និងទទួលបានជំនឿទុកចិត្តពីសាធារណជនបន្ថែមទៀតផងដែរ ។ ខ្ញុំសូមធ្វើការកត់សម្គាល់ថា អេស៊ីលីដាបានចាប់ផ្តើមប្រតិបត្តិការរបស់ខ្លួនតាំងពីឆ្នាំ១៩៩៣ ក្រោមរូបភាពអង្គការក្រៅរដ្ឋាភិបាល (NGO) ដែលធ្វើប្រតិបត្តិការខាងផ្នែកមីក្រូហិរញ្ញវត្ថុ ។ នៅឆ្នាំ១៩៩៨ អេស៊ីលីដាបានប្រែក្លាយខ្លួនជាគ្រឹះស្ថានមីក្រូហិរញ្ញវត្ថុ ដែលមានការចុះបញ្ជី និងអាជ្ញាប័ណ្ណពីធនាគារជាតិនៃកម្ពុជា ។ នៅឆ្នាំ២០០០ អេស៊ីលីដាបានបន្តប្រែក្លាយខ្លួនមកជាធនាគារឯកទេស ហើយបន្ទាប់មកនៅឆ្នាំ២០០៣ អេស៊ីលីដាក៏បានប្រែក្លាយខ្លួនពីធនាគារឯកទេស មកជាធនាគារពាណិជ្ជ ។ នេះជាភស្តុតាងដែលបង្ហាញឱ្យឃើញថា ក្នុងរយៈពេល១៤ឆ្នាំនេះ អេស៊ីលីដាបានកើតឡើង និងរីកចម្រើនធំធាត់យ៉ាងឆាប់រហ័ស ទាំងផ្នែកប្រតិបត្តិការ ទាំងផ្នែកហេដ្ឋារចនាសម្ព័ន្ធ និងទាំងផ្នែកប្រសិទ្ធភាពអាជីវកម្ម ។ ក្នុងនាមជាធនាគារជាតិនៃកម្ពុជា ខ្ញុំសូមសំដែងការអបអរសាទរ និងកោតសរសើរចំពោះការខិតខំប្រឹងប្រែងរបស់ថ្នាក់ដឹកនាំធនាគារអេស៊ីលីដា ភីអិលស៊ី និងសូមវាយតម្លៃយ៉ាងខ្ពស់ថា សមិទ្ធផលថ្មីនៅចំពោះមុខយើងនេះ និងការពង្រីកប្រតិបត្តិការ ក៏ដូចជាការបោះទីតាំង បណ្តាញហេដ្ឋារចនាសម្ព័ន្ធរបស់ខ្លួនដល់ជនបទ នៅពេលនេះគឺពិតជាកញ្ចក់មួយឆ្លុះបញ្ចាំងពីការរួមចំណែកក្នុងការអភិវឌ្ឍប្រព័ន្ធធនាគារ និងហិរញ្ញវត្ថុនៅកម្ពុជាឱ្យមានការរីកចម្រើន ស្របតាមយុទ្ធសាស្ត្រចតុកោណរបស់រដ្ឋាភិបាល" ។

ឯកឧត្តម ទេសរដ្ឋមន្ត្រី គាត ឈន់ រដ្ឋមន្ត្រីក្រសួងសេដ្ឋកិច្ចនិងហិរញ្ញវត្ថុ កំពុងប្រើប្រាស់ម៉ាស៊ីនអេធីអឹមរបស់ធនាគារអេស៊ីលីដា

ឯកឧត្តម គាត ឈន់ ទេសរដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ បានមានប្រសាសន៍កោតសរសើរចំពោះភាគហ៊ុនិក ក្រុមប្រឹក្សាភិបាល ថ្នាក់ដឹកនាំ និងនិយោជិកទាំងអស់ ដែលបានខិតខំប្រឹងប្រែងពង្រឹង និងពង្រីកសកម្មភាពធនាគាររបស់ខ្លួន ហើយបានប្រតិស្នឡើងនូវអគារថ្មីដ៏ទំនើប និងរឹងមាំ ព្រមទាំងបំពាក់ដោយប្រព័ន្ធសុវត្ថិភាពទាន់សម័យស្របតាមបទដ្ឋានអន្តរជាតិ ។ រូបរាង និងទីតាំងអគារថ្មីនេះនឹងសម្រួលដល់អតិថិជនមានទីកន្លែង និងបរិដ្ឋានល្អ ដែលធ្វើឱ្យធនាគារបង្កើនបាននូវភាពជឿទុកចិត្តចំពោះសាធារណជនទាំងក្នុង និងក្រៅប្រទេស ។ ធនាគារអេស៊ីលីដា បានរួមចំណែកក្នុងការអភិវឌ្ឍវិស័យហិរញ្ញវត្ថុនៅកម្ពុជា ដោយបានទាក់ទាញវិនិយោគិនក្នុងនិងក្រៅប្រទេសក្នុងការគៀងគរប្រាក់សន្សំ ការផ្តល់ហិរញ្ញប្បទាន និងផ្តល់សេវាហិរញ្ញវត្ថុជាច្រើនទៀតដល់អាជីវករ ពាណិជ្ជករ វិនិយោគិន និងប្រជាពលរដ្ឋ ជាពិសេសបានពង្រីកសកម្មភាពសាខារបស់ខ្លួននៅតាមបណ្តាទីក្រុង និងទីប្រជុំជន រហូតដល់ជនបទដាច់ស្រយ៉ាលទូទាំង២៤ខេត្ត-រាជធានី រហូតមានចំនួន ១៦៤ការិយាល័យ និងកន្លែងផ្សេងទៀត ។ សកម្មភាពទាំងនេះ បានសម្រួលឱ្យមានការអភិវឌ្ឍសេវាធនាគារដល់ទីជនបទ ដែលជាទិសដៅរួមរបស់រាជរដ្ឋាភិបាលក្នុងការកាត់បន្ថយភាពក្រីក្រ ស្របតាមយុទ្ធសាស្ត្រចតុកោណរបស់រាជរដ្ឋាភិបាល ។

ឯកឧត្តមបានមានប្រសាសន៍បន្តទៀតថា "ជាមួយនឹងការខិតខំប្រឹងប្រែងក្នុងកំណែទម្រង់របស់រាជរដ្ឋាភិបាលលើវិស័យហិរញ្ញវត្ថុ ខ្ញុំសូមឱ្យធនាគារអេស៊ីលីដា (១) ដើរតួនាទីនាំមុខក្នុងការខិតខំបញ្ចុះអត្រាការប្រាក់ឱ្យខ្ចីខាងមីក្រូហិរញ្ញវត្ថុ ព្រមទាំងពង្រីកវិសាលភាពលើវិស័យមីក្រូហិរញ្ញវត្ថុឱ្យបានទូលំទូលាយថែមទៀត ដើម្បីចូលរួមចំណែកជាមួយរាជរដ្ឋាភិបាលកម្ពុជា ក្នុងការកាត់បន្ថយភាពក្រីក្ររបស់ប្រជាជន និង (២) បង្កើនការពង្រីកសេវាខាងសហគ្រាសធុនតូច និងមធ្យម (SMEs) ដើម្បីជួយទីផ្សារស្រូវ-អង្ករបន្ថែមទៀត ក្នុងការឈានទៅបង្កើនសកម្មភាពអាជីវកររោងម៉ាស៊ីនកិនស្រូវក្នុងស្រុកទទួលបានតម្លៃបន្ថែម និងបង្កើតការងារថែមទៀត" ។

« ព័ត៌មានមុន
ធនាគារអេស៊ីលីដា ភីអិលស៊ី ចាប់បម្រើសេវាអេធីអឹម ព័ត៌មានបន្ទាប់ »
Moody's បានបង្កើនចំណាត់ថ្នាក់ធនាគារអេស៊ីលីដា ឡើងដល់ B1 លើការចេញផ្សាយមូលបត្រជារូបិយប័ណ្ណបរទេស

ពិធី​សម្ពោធ​អគារ​ថ្មី​ការិយាល័យ​កណ្តាល របស់​ធនាគារ​អេស៊ីលីដា ភីអិលស៊ី

ពិធីសម្ពោធអគារថ្មីការិយាល័យកណ្តាល របស់ធនាគារអេស៊ីលីដា ភីអិលស៊ី