ព័ត៌មានព័ត៌មានថ្មីៗប្រធានធនាគារពិភពលោក បានអញ្ជើញទៅធ្វើទស្សនកិច្ចអតិថិជនធនាគារអេស៊ីលីដា

ប្រធានធនាគារពិភពលោក បានអញ្ជើញទៅធ្វើទស្សនកិច្ចអតិថិជនធនាគារ អេស៊ីលីដា

ថ្ងៃទី០៤ ខែសីហា ឆ្នាំ២០០៧

គណៈប្រតិភូថតរូបជាមួយអតិថិជនឥណទានជំនួញខ្នាតតូច របស់ធនាគារអេស៊ីលីដា

ភ្នំពេញ, ថ្ងៃទី០៤ ខែសីហា ឆ្នាំ២០០៧ គណៈប្រតិភូជាន់ខ្ពស់នៃធនាគារពិភពលោក ដែលដឹកនាំដោយលោក Robert B. Zoellick ប្រធានធនាគារពិភពលោក រួមដំណើរដោយអគ្គទេសាភិបាលធនាគារជាតិនៃកម្ពុជា មន្ត្រីធនាគារជាតិនៃកម្ពុជា មន្ត្រីធនាគារពិភពលោក IFC, MPDF ប្រចាំនៅប្រទេសកម្ពុជា និងថ្នាក់ដឹកនាំធនាគារអេស៊ីលីដា ព្រមទាំងអ្នកមុខអ្នកការជាច្រើនរូបទៀត បានអញ្ជើញទៅធ្វើទស្សនកិច្ចជាផ្លូវការនៅកន្លែងប្រកបអាជីវកម្មរបស់អតិថិជន ធនាគារអេស៊ីលីដា ដែលទទួលបានជោគជ័យលើមុខរបរ ។ លោកស្រី យី ឡាប មានអាយុ ៥២ឆ្នាំ ជាសហគ្រិនប្រកបមុខរបរសិប្បកម្មតម្លើងគោយន្ត និងម៉ាស៊ីនបោកស្រូវ មានកម្មករចំនួន ១០នាក់ ស្ថិតនៅភូមិព្រៃជីសាក់ សង្កាត់ចោមចៅ ខណ្ឌដង្កោ រាជធានីភ្នំពេញ ដែលជាអតិថិជន ធនាគារអេស៊ីលីដា ភីអិលស៊ី សាខាខណ្ឌដង្កោ បានទទួលស្វាគមន៍គណៈប្រតិភូជាន់ខ្ពស់នៃធនាគារពិភពលោក នាឱកាសការធ្វើទស្សនកិច្ចនេះ ។

ដោយសារការជឿជាក់ចំពោះសេវាកម្មហិរញ្ញវត្ថុរបស់ធនាគារអេស៊ីលីដា លោកស្រី យី ឡាប និងស្វាមី លោក លាប រ័ត្ន បានប្រើប្រាស់សេវាឥណទានជំនួញខ្នាតតូច នៅធនាគារអេស៊ីលីដា សាខាខណ្ឌដង្កោ ដែលជាសាខាមួយក្នុងចំណោមសាខាទាំង១៦៧ របស់ ធនាគារ អេស៊ីលីដា ភីអិលស៊ី ។

គណៈប្រតិភូទស្សនកិច្ចកន្លែងប្រកបអាជីវកម្ម របស់អតិថិជនឥណទានជំនួញខ្នាតតូចធនាគារអេស៊ីលីដា

លោកប្រធានធនាគារពិភពលោក បានចុះទស្សនកិច្ច និងសំណេះសំណាលជាមួយអតិថិជនធនាគារអេស៊ីលីដា អំពីសកម្មភាពមុខរបររបស់គាត់ បានបម្រើដល់មធ្យោបាយប្រើប្រាស់នៅក្នុងវិស័យកសិកម្ម ដែលជាឧបករណ៍ដ៏សំខាន់ក្នុងការរួមចំណែកអភិវឌ្ឍសេដ្ឋកិច្ចកម្ពុជា ។ ដោយសារធនាគារអេស៊ីលីដា ជាធនាគារឈានមុខក្នុងវិស័យហិរញ្ញវត្ថុ និងឈានមុខគ្រប់ស្រទាប់មជ្ឈដ្ឋាននៅក្នុងសហគមន៍កម្ពុជា ទាំងជនបទ និងទីក្រុង បានបង្កើតនូវហេដ្ឋារចនាសម្ព័ន្ធហិរញ្ញវត្ថុដ៏មានប្រសិទ្ធភាព តាមច្បាប់របស់ព្រះរាជាណាចក្រកម្ពុជា ដែលមានធនាគារជាតិនៃកម្ពុជាជានិយ័តករ បាននិងកំពុងចូលរួមចំណែកក្នុងការអភិវឌ្ឍសេដ្ឋកិច្ចកម្ពុជា ដែលជាឧបករណ៍ដ៏សំខាន់ក្នុងការកាត់បន្ថយភាពក្រីក្រនៅកម្ពុជា ។

ប្រវត្តិសង្ខេបរបស់ធនាគារ អេស៊ីលីដា ភីអិលស៊ី

ធនាគារ អេស៊ីលីដា ភីអិលស៊ី គឺជាក្រុមហ៊ុនមហាជនទទួលខុសត្រូវមានកម្រិត ដែលបង្កើតឡើងតាមប្រព័ន្ធច្បាប់នៃព្រះរាជាណាចក្រកម្ពុជា ។ ធនាគារអេស៊ីលីដា បានចាប់បដិសន្ធិឡើងនៅខែមករា ឆ្នាំ១៩៩៣ ជាអង្គការក្រៅរដ្ឋាភិបាលដែលមានទិសដៅចូលរួមអភិវឌ្ឍសេដ្ឋកិច្ចកម្ពុជា ហើយបានទទួលអាជ្ញាប័ណ្ណអចិន្ត្រៃយ៍ជាធនាគារពាណិជ្ជ ដែលធ្វើឱ្យធនាគារអេស៊ីលីដា មានលទ្ធភាពផ្តល់សេវាហិរញ្ញវត្ថុកាន់តែទូលំទូលាយជូនសាធារណជន ។

រហូតមកដល់ថ្ងៃទី៣១ ខែកក្កដា ឆ្នាំ២០០៧ ធនាគារអេស៊ីលីដា បានផ្តល់សេវាហិរញ្ញវត្ថុដល់អតិថិជនសកម្មសរុបចំនួន ១៧១.៣៤៥នាក់ សរុបទឹកប្រាក់ឥណទានចំនួន ២១៧.១៩៩.៩១២ដុល្លារអាមេរិក អតិថិជនបើកគណនីបញ្ញើ-សន្សំមានចំនួន ១៩២.១៨១គណនី ដែលមានទឹកប្រាក់ចំនួន ២២៧.៥៩៣.៧៧៣ដុល្លារអាមេរិក ទ្រព្យសកម្មសរុបមានចំនួនប្រមាណជា ៣៤០លានដុល្លារអាមេរិក ។

ធនាគារអេស៊ីលីដា មានភាគហ៊ុនិកអន្តរជាតិធំៗដូចជា ៖ ក្រុមហ៊ុនសាជីវកម្មអន្តរជាតិ (ជាផ្នែកមួយរបស់ធនាគារពិភពលោក), DEG (សាខារបស់ KfW នៃសាធារណរដ្ឋសហព័ន្ធអាល្លឺម៉ង់), FMO, Triodos-Doen Foundation និង Triodos Fair Share Fund នៃប្រទេសហុល្លង់ដ៍ ។ ធនាគារអេស៊ីលីដា ជាធនាគារពាណិជ្ជ មានបណ្តាញប្រតិបត្តិការធំជាងគេបំផុត នៅក្នុងព្រះរាជាណាចក្រកម្ពុជា ដែលមាន ១៦៧សាខា និងការិយាល័យនៅទូទាំង ២៤ខេត្ត-រាជធានី នៅក្នុងព្រះរាជាណាចក្រកម្ពុជា និងមានធនាគារដៃគូចំនួន ៧២ធនាគារ នៅក្នុង ៤៧ប្រទេស ក្នុងនោះមានចំនួនជាង ៧៦៨ សាខាធនាគារជាដៃគូនៅលើពិភពលោក ។

សម្រាប់ព័ត៌មានបន្ថែម សូមទាក់ទងតាមរយៈ ៖

លោកស្រី សូ ផនណារី នាយិកាប្រតិបត្តិទីផ្សារ
អ៊ីម៉ែល ៖

លោក ព្រំ វិសុទ្ធ នាយកប្រតិបត្តិនីតិកម្ម និងជាលេខាធិការក្រុមហ៊ុន
អ៊ីម៉ែល ៖

« ព័ត៌មានមុន
Moody's បានបង្កើនចំណាត់ថ្នាក់ធនាគារអេស៊ីលីដា ឡើងដល់ B1 លើការចេញផ្សាយមូលបត្រជារូបិយប័ណ្ណបរទេស ព័ត៌មានបន្ទាប់ »
ប្រធានធនាគារពិភពលោកផ្ញើលិខិតសរសើរធនាគារអេស៊ីលីដា

ប្រធាន​ធនាគារ​ពិភពលោក បាន​អញ្ជើញ​ទៅ​ធ្វើ​ទស្សនកិច្ច​អតិថិជន​ធនាគារ អេស៊ីលីដា

ប្រវត្តិ​សង្ខេប​របស់​ធនាគារ អេស៊ីលីដា ភីអិលស៊ី

ប្រធានធនាគារពិភពលោក បានអញ្ជើញទៅធ្វើទស្សនកិច្ចអតិថិជនធនាគារ អេស៊ីលីដា

ប្រវត្តិសង្ខេបរបស់ធនាគារ អេស៊ីលីដា ភីអិលស៊ី