ព័ត៌មានព័ត៌មានថ្មីៗពិធីសម្ពោធការិយាល័យ សាខាចំការលើ

ពិធីសម្ពោធការិយាល័យធនាគារអេស៊ីលីដា សាខាចំការលើ

ថ្ងៃទី១៥ ខែសីហា ឆ្នាំ២០០៨

លោក សាន ចន្ថា នាយកធនាគារអេស៊ីលីដា សាខាចំការលើ

នៅថ្ងៃទី១៥ ខែសីហា ឆ្នាំ២០០៨ ធនាគារអេស៊ីលីដា សាខាចំការលើ ដែលមានទីតាំងនៅភូមិថ្នល់បែកកើត ឃុំស្វាយទាប ស្រុកចំការលើ ខេត្តកំពង់ចាម បានប្រារព្ធពិធីសម្ពោធជាផ្លូវការ ដោយមានការអញ្ជើញចូលរួមជាគណៈអធិបតីក្នុងឱកាសនោះមានឯកឧត្តម គឹម នុតនិត្យា អភិបាលស្រុកចំការលើ លោក ឆាយ សឿន ប្រធាននាយកប្រតិបត្តិរងនិងជាប្រធាននាយកប្រតិបត្តិហិរញ្ញវត្ថុធនាគារអេស៊ីលីដាភីអិលស៊ី និងភ្ញៀវកិត្តិយសជាតិអន្តរជាតិជាច្រើន ។

លោក សាន ចន្ថា នាយកធនាគារអេស៊ីលីដា សាខាចំការលើ បានមានមតិជម្រាបជូនភ្ញៀវកិត្តិយសថា គិតមកត្រឹមថ្ងៃទី៣១ ខែកក្កដា ឆ្នាំ២០០៨ ធនាគារអេស៊ីលីដា សាខាចំការលើ មានបុគ្គលិកសរុប៨០នាក់ កំពុងបម្រើការងារ មានទ្រព្យសកម្មចំនួនជិត៨លានដុល្លារអាមេរិក សមតុល្យឥណទានមានចំនួនជាង៧លានដុល្លារអាមេរិក ដែលមានអតិថិជនជិត៥.០០០នាក់ និងមានអតិថិជនជាង២.០០០នាក់កំពុងដាក់ប្រាក់បញ្ញើ-សន្សំជាមួយធនាគារនិងមានទឹកប្រាក់សរុបជាង១លានដុល្លារអាមេរិក និងអតិថិជនជាច្រើនកំពុងប្រើប្រាស់សេវាផ្សេងៗទៀត ។

ធនាគារអេស៊ីលីដា សាខាចំការលើ បានប្តូរទីតាំងមកអគារការិយាល័យថ្មី ដែលបានសាងសង់ឡើងតាមបទដ្ឋានធនាគារពាណិជ្ជ មានកម្ពស់២ជាន់កន្លះ និងមានផ្ទៃក្រឡាសម្រាប់បំពេញការងារធំទូលាយប្រកបដោយសុវត្ថិភាពខ្ពស់ ។

ឯកឧត្តម គឹម នុតនិត្យា អភិបាលស្រុកចំការលើ និងលោក ឆាយ សឿន ប្រធាននាយកប្រតិបត្តិរងនិងជាប្រធាននាយកប្រតិបត្តិហិរញ្ញវត្ថុធនាគារអេស៊ីលីដា

ឯកឧត្តម គឹម នុតនិត្យា បានគូសបញ្ជាក់ថា អគារការិយាល័យថ្មីធនាគារអេស៊ីលីដា សាខាចំការលើ បានសាងសង់ឡើងស្របពេលដែលសេដ្ឋកិច្ចនៃប្រទេសកម្ពុជា ពិសេសស្រុកចំការលើកំពុងមានការរីកចម្រើន មានស្ថិរភាពនិងមានកំណើនលើសលប់ពីការរំពឹងទុកក្នុងរយៈពេលប៉ុន្មានឆ្នាំចុងក្រោយនេះ ។ ការវិវឌ្ឍរបស់ធនាគារអេស៊ីលីដា សាខាចំការលើ ជាសក្ខីកម្មដែលបញ្ជាក់ពីការរីកចម្រើន ភាពរឹងមាំ និងបានបង្ហាញពីការចូលរួមចំណែកក្នុងការអភិវឌ្ឍសេដ្ឋកិច្ចក្នុងព្រះរាជាណាចក្រកម្ពុជា ពិសេសនៅក្នុងស្រុកចំការលើ ។

លោក ឆាយ សឿន ប្រធាននាយកប្រតិបត្តិរង និងប្រធាននាយកប្រតិបត្តិហិរញ្ញវត្ថុ ធនាគារអេស៊ីលីដា បានមានប្រសាសន៍ថា នេះជាឆ្នាំទី១៥ហើយដែលធនាគារអេស៊ីលីដា បានបម្រើសេវាហិរញ្ញវត្ថុជូនដល់អតិថិជន និងសាធារណជនគ្រប់មជ្ឈដ្ឋានតាមរយៈបណ្តាញប្រតិបត្តិការទាំង២១៦ ទូទាំង២៤ខេត្ត-រាជធានីនៃព្រះរាជាណាចក្រកម្ពុជា និង មានសាខានិងការិយាល័យចំនួន៣នៅប្រទេសឡាវ ។

លោកក៏បានសម្តែងនូវអំណរគុណយ៉ាងខ្ពស់បំផុតចំពោះរាជរដ្ឋាភិបាល ធនាគារជាតិនៃកម្ពុជា អាជ្ញាធរគ្រប់លំដាប់ថ្នាក់ ភាគហ៊ុនិក ក្រុមប្រឹក្សាភិបាល កម្មករនិយោជិតគ្រប់លំដាប់ថ្នាក់ទាំង៥.៣៤១នាក់ និងអតិថិជនរបស់ធនាគារអេស៊ីលីដាទាំងជាង៨០០.០០០នាក់ ដែលបានចូលរួមវិវត្តន៍ជាមួយធនាគារតាំងពីដើមរៀងមក ធ្វើឱ្យទ្រព្យសកម្មរបស់ធនាគារអេស៊ីលីដា កើនដល់ចំនួន៦៤៥លានដុល្លារអាមេរិក នៅដំណាច់ខែកក្កដា ឆ្នាំ២០០៨ រួមទាំងសមិទ្ធផលរបស់សាខាចំការលើ ។

លោក ឆាយ សឿន បានសន្យានិងសូមផ្ញើសញ្ញាណដ៏រឹងមាំដល់អតិថិជននិងសាធារណជនថា លោកនិងសហការីទាំងអស់ សូមធ្វើការធានាអះអាងថា ធនាគារអេស៊ីលីដានឹងផ្តល់នូវការការពារ និងសុវត្ថិភាពដ៏ខ្ពង់ខ្ពស់បំផុតចំពោះទ្រព្យសម្បត្តិរបស់អតិថិជនដែលមាននៅជាមួយធនាគារអេស៊ីលីដា ។

« ព័ត៌មានមុន
ធនាគារ អេស៊ីលីដា សាខាខេត្តកំពង់ចាមសម្ពោធអគារការិយាល័យថ្មី ព័ត៌មានបន្ទាប់ »
បើកសម្ពោធសាខាសាក់វណ្ណខេត និងសាខាចំប៉ាសាក់

ពិធីសម្ពោធ​ការិយាល័យ​ធនាគារ​អេស៊ីលីដា សាខា​ចំការលើ

ពិធីសម្ពោធការិយាល័យធនាគារអេស៊ីលីដា សាខាចំការលើ