ព័ត៌មានព័ត៌មានថ្មីៗក្រសួងសេដ្ឋកិច្ច និងហិរញ្ញវត្ថុជ្រើសរើសធនាគារអេស៊ីលីដា ជាដៃគូ

ក្រសួងសេដ្ឋកិច្ច និងហិរញ្ញវត្ថុជ្រើសរើសធនាគារអេស៊ីលីដា ជាដៃគូ
ឱ្យអគ្គនាយកដ្ឋានរតនាគារជាតិ ក្នុងការប្រើប្រាស់សេវាកម្មធនាគារ សម្រាប់ប្រតិបត្តិការចំណូល-ចំណាយថវិកាជាតិ

ថ្ងៃទី២២ ខែមិថុនា ឆ្នាំ២០០៩

ពិធីចុះហត្ថលេខារវាងធនាគារអេស៊ីលីដា និងអគ្គនាយកដ្ឋានរតនាគារជាតិ

រាជធានីភ្នំពេញ, ថ្ងៃទី២២ ខែមិថុនា ឆ្នាំ២០០៩ ៖ ក្រសួងសេដ្ឋកិច្ច និងហិរញ្ញវត្ថុ បានប្រកាសជាសាធារណៈ នាថ្ងៃនេះ នៅក្នុងពិធីចុះហត្ថលេខាលើអនុស្សរណៈនៃការយោគយល់គ្នា រវាងក្រសួងសេដ្ឋកិច្ច និងហិរញ្ញវត្ថុ និងធនាគារអេស៊ីលីដា ភីអិលស៊ី ស្តីពីការអនុវត្តសាកល្បងក្នុងការប្រើប្រាស់សេវាកម្មធនាគារពាណិជ្ជ សម្រាប់ប្រតិបត្តិការចំណូល-ចំណាយថវិកាជាតិ ក្រោមអធិបតីភាពដ៏ខ្ពង់ខ្ពស់របស់ ឯកឧត្តម គាត ឈន់ ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ ។

កម្មវិធីកំណែទម្រង់ការគ្រប់គ្រងហិរញ្ញវត្ថុសាធារណៈ គឺជាសមាសធាតុមួយដ៏សំខាន់នៅក្នុងស្នូលនៃយុទ្ធសាស្ត្រចតុកោណរបស់រាជរដ្ឋាភិបាល ដែលមានគោលដៅកសាងប្រព័ន្ធគ្រប់គ្រងហិរញ្ញវត្ថុសាធារណៈមួយ ឆ្ពោះទៅរកស្តង់ដារអន្តរជាតិ ។ បច្ចុប្បន្ននេះ រាជរដ្ឋាភិបាលនៃព្រះរាជាណាចក្រកម្ពុជា បាននិងកំពុងអនុវត្តផែនការសកម្មភាពជំហានទី២ នៃកំណែទម្រង់ ការគ្រប់គ្រងហិរញ្ញវត្ថុសាធារណៈ ក្នុងគោលបំណងបង្កើនគណនេយ្យភាពហិរញ្ញវត្ថុ និងការគ្រប់គ្រងហិរញ្ញវត្ថុសាធារណៈ ឱ្យមានប្រសិទ្ធភាពខ្ពស់ ជាពិសេសការគ្រប់គ្រងចំណូល-ចំណាយថវិកាជាតិ ។

ឯកឧត្តម បណ្ឌិត អូន ព័ន្ធមុនីរ័ត្ន រដ្ឋមន្ត្រីប្រតិភូអមនាយករដ្ឋមន្ត្រី រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ និងជាប្រធានគណៈកម្មាធិការដឹកនាំការងារកំណែទម្រង់ការគ្រប់គ្រងហិរញ្ញវត្ថុសាធារណៈ មានប្រសាសន៍ថា "ក្រសួងសេដ្ឋកិច្ច និងហិរញ្ញវត្ថុ បានជ្រើសរើសយក ធនាគារអេស៊ីលីដា ភីអិលស៊ី ធ្វើជាដៃគូក្នុងការផ្តល់សេវាកម្មធនាគារ សម្រាប់ប្រតិបត្តិការចំណូល-ចំណាយថវិកាជាតិ ដើម្បីអនុវត្តសាកល្បងនៅខេត្តពីរ គឺខេត្តកណ្តាល និងខេត្តបន្ទាយមានជ័យ ។ ការជ្រើសរើសយកធនាគារអេស៊ីលីដា ធ្វើជាដៃគូជាមួយក្រសួងសេដ្ឋកិច្ច និងហិរញ្ញវត្ថុ ដោយសារធនាគារនេះ មានបណ្តាញសាខាច្រើនភ្ជាប់ទំនាក់ទំនងគ្នាដោយប្រព័ន្ធទំនើបជឿនលឿន និងរៀបចំបានល្អនៅក្នុងប្រទេស ព្រមទាំងមានបទពិសោធន៍ខ្ពស់នៃកិច្ចប្រតិបត្តិការចំណូល-ចំណាយ ។ នៅពេលដែលការអនុវត្តសាកល្បងនេះ ទទួលបានជោគជ័យ នោះយើងនឹងពង្រីក វិសាលភាពដល់ខេត្តមួយចំនួនទៀត ហើយអាចនឹងឈានដល់ការអនុវត្តព្រមៗគ្នានៅទូទាំងប្រទេស ។ ការប្រើប្រាស់ប្រព័ន្ធធនាគារពាណិជ្ជ ដើម្បីគ្រប់គ្រងប្រតិបត្តិការចំណូល-ចំណាយថវិកាជាតិ គឺដើម្បីបង្កើនគណនេយ្យភាពហិរញ្ញវត្ថុ និងបង្កើនការគ្រប់គ្រងហិរញ្ញវត្ថុសាធារណៈឱ្យមានប្រសិទ្ធភាព ជាពិសេសទាក់ទងទៅនឹងប្រតិបត្តិការចំណូល-ចំណាយថវិកាជាតិ ដែលជាកត្តាដ៏សំខាន់ ដើម្បីពង្រឹងគណនីទោលរបស់រតនាគារ និងការគ្រប់គ្រងសាច់ប្រាក់ ឱ្យមានប្រសិទ្ធភាពខ្ពស់ ។"

លោក អ៊ិន ចាន់នី ប្រធាននាយកប្រតិបត្តិ ធនាគារអេស៊ីលីដា ភីអិលស៊ី បានមានប្រសាសន៍ថា "នេះគឺជាជំហានមួយដ៏ធំនៃវឌ្ឍនភាពនៃកម្មវិធីកំណែទម្រង់ការគ្រប់គ្រងកិច្ចហិរញ្ញវត្ថុសាធារណៈរបស់រាជរដ្ឋាភិបាល នៃព្រះរាជាណាចក្រកម្ពុជា ។ ធនាគារអេស៊ីលីដា ភីអិលស៊ី មានបទពិសោធន៍ច្រើន មានអភិបាលកិច្ចល្អ មានធនធានមនុស្ស និងធនធានហិរញ្ញវត្ថុគ្រប់គ្រាន់ មានប្រព័ន្ធការពារហានិភ័យដ៏ប្រសើរបំផុត និងបានទទួលចំណាត់ថ្នាក់ជាធនាគារមានស្ថិរភាពពីស្ថាប័នធ្វើចំណាត់ថ្នាក់អន្តរជាតិ ព្រមទាំងមានការធានារ៉ាប់រងលើទ្រព្យសម្បត្តិរបស់ធនាគារអេស៊ីលីដា និងអតិថិជនរបស់ធនាគារអេស៊ីលីដា ហើយធនាគារអេស៊ីលីដា ក៏មានសេវាបម្រើជូនអតិថិជន ២៤ម៉ោង លើ ២៤ម៉ោង និង៧ថ្ងៃក្នុងមួយសប្តាហ៍ ដើម្បីដោះស្រាយបញ្ហាជូនអតិថិជនរបស់ខ្លួន ។ អ្វីៗដែលបានរៀបរាប់ខាងលើ គឺបានឆ្លុះបញ្ចាំងឱ្យឃើញនូវការប្តេជ្ញាចិត្តខ្ពស់របស់ធនាគារ ក្នុងការបម្រើ ការពារ និងរក្សាសុវត្ថិភាពលើទ្រព្យសម្បត្តិអតិថិជនរបស់ធនាគារអេស៊ីលីដា ។"

សម្រាប់ព័ត៌មានបន្ថែម សូមទាក់ទងតាមរយៈ ៖

ឯកឧត្តម ហ៊ីវ សុវណ្ណ អគ្គនាយករងនៃអគ្គនាយកដ្ឋានរតនាគារជាតិ

បណ្ឌិត វង្ស ប៊ុនឥន្ទ្រាវុធ អគ្គនាយករងនៃអគ្គនាយកដ្ឋានរតនាគារជាតិ

លោក មាស ប៊ុនថុន អគ្គនាយករងនៃអគ្គនាយកដ្ឋានរតនាគារជាតិ
អ៊ីម៉ែល ៖

លោកស្រី សូ ផនណារី អនុប្រធាននាយកប្រតិបត្តិ និងជាប្រធាននាយិកាប្រតិបត្តិប្រតិបត្តិការ
ធនាគារ អេស៊ីលីដា ភីអិលស៊ី
អ៊ីម៉ែល ៖

លោក ព្រំ វិសុទ្ធ នាយកប្រតិបត្តិនីតិកម្ម និងជាលេខាធិការក្រុមហ៊ុន
ធនាគារ អេស៊ីលីដា ភីអិលស៊ី
អ៊ីម៉ែល ៖

« ព័ត៌មានមុន
Moody's បញ្ជាក់ពីចំណាត់ថ្នាក់របស់ធនាគារអេស៊ីលីដា ព័ត៌មានបន្ទាប់ »
ពិធីសម្ពោធអគារថ្មី ការិយាល័យសាខាខេត្តកំពត-កែប