ព័ត៌មានព័ត៌មានថ្មីៗពិធីសម្ពោធអគារថ្មី ការិយាល័យសាខាខេត្តស្វាយរៀង

ពិធីសម្ពោធអគារថ្មី ការិយាល័យសាខាខេត្តស្វាយរៀង

ឯកឧត្តម ជៀង អំ អភិបាលខេត្តស្វាយរៀង ចាប់ដៃជាមួយលោក អ៊ិន ចាន់នី ប្រធាននាយកប្រតិបត្តិ ធនាគារអេស៊ីលីដា

ថ្ងៃទី១៤ ខែសីហា ឆ្នាំ២០០៩

នៅថ្ងៃទី១៤ ខែសីហា ឆ្នាំ២០០៩ ធនាគារអេស៊ីលីដា ភីអិលស៊ី សាខាខេត្តស្វាយរៀង មានទីតាំងស្ថិតនៅផ្លូវជាតិលេខ១ ភូមិកៀនសាំង សង្កាត់ស្វាយរៀង ក្រុងស្វាយរៀង បានប្រារព្ធពិធីសម្ពោធជាផ្លូវការ ដោយមានការអញ្ជើញចូលរួមជាគណៈអធិបតីក្នុងឱកាសនោះមាន ៖ ឯកឧត្តមអភិបាលខេត្ត ឯកអគ្គរដ្ឋទូតនៃប្រទេសអាល្លឺម៉ង់ ឯកអគ្គរាជទូតនៃចក្រភពអង់គ្លេស ប្រធានសមាគមពាណិជ្ជកម្មអន្តរជាតិនិងគណៈប្រតិភូសមាគមពាណិជ្ជកម្មអន្តរជាតិទាំង៨ក្រុមហ៊ុន ឯកឧត្តម-លោកជំទាវរដ្ឋអំណាចមូលដ្ឋានគ្រប់លំដាប់ថ្នាក់ លោកប្រធាន-អនុប្រធានក្រុមប្រឹក្សាភិបាល ក្រុមប្រឹក្សាភិបាល លោកប្រធាននាយកប្រតិបត្តិនិងលោកនាយក-នាយិកាធនាគារអេស៊ីលីដា ព្រមទាំងភ្ញៀវកិត្តិយសជាតិនិងអន្តរជាតិជាច្រើននាក់ទៀត ។

លោក តុល ថុល នាយកធនាគារ អេស៊ីលីដា ភីអិលស៊ី សាខាខេត្តស្វាយរៀង បានថ្លែងថា "ធនាគារអេស៊ីលីដា ភីអិលស៊ី សាខាខេត្តស្វាយរៀង បានបង្កើតឡើង នៅខែមិថុនា ឆ្នាំ២០០០ ក្នុងក្របខ័ណ្ឌជាអង្គការមីក្រូហិរញ្ញវត្ថុ ។ នៅខែតុលា ឆ្នាំ២០០០ ធនាគារអេស៊ីលីដា សាខាខេត្តស្វាយរៀង ក៏ដូចជាធនាគារអេស៊ីលីដាទូទាំងប្រទេស បានកម្លាយខ្លួនទៅជាធនាគារឯកទេស លុះដល់ខែធ្នូ ឆ្នាំ២០០៣ ក៏បានទទួលអាជ្ញាប័ណ្ណជាធនាគារពាណិជ្ជពីធនាគារជាតិនៃកម្ពុជា ។ បច្ចុប្បន្ននេះ ធនាគារអេស៊ីលីដា ភីអិលស៊ី សាខាខេត្តស្វាយរៀង បានប្តូរទីតាំងមកអគារការិយាល័យថ្មី ដែលសាងសង់ឡើងតាមស្តង់ដារធនាគារពាណិជ្ជ ។ អគារនេះមានកម្ពស់បីជាន់ និងមានផ្ទៃក្រឡាសម្រាប់បំពេញការងារធំទូលាយប្រកបដោយផាសុកភាពនិងសុវត្ថិភាព និងស្ថិតនៅជិតអតិថិជន" ។

លោក តុល ថុល នាយកធនាគារអេស៊ីលីដា សាខាខេត្តស្វាយរៀង

លោកបានបន្តទៀតថា "គិតត្រឹមថ្ងៃទី៣១ ខែកក្កដា ឆ្នាំ២០០៩ ធនាគារ អេស៊ីលីដា ភីអិលស៊ី សាខាខេត្តស្វាយរៀង មានបុគ្គលិកសរុបចំនួន ១១០នាក់ កំពុងបម្រើការងារ ។ ទ្រព្យសកម្មមានចំនួនជិត ៧លានដុល្លារអាមេរិក សមតុល្យឥណទានមានចំនួនជាង ៦លានដុល្លារអាមេរិក ផ្តល់ជូនអតិថិជនជិត ៥.៥០០នាក់ និងមានអតិថិជនចំនួនជាង ៤.០០០នាក់ បាននិងកំពុងដាក់ប្រាក់បញ្ញើសន្សំជាមួយធនាគារអេស៊ីលីដា សាខាខេត្តស្វាយរៀង ដែលមានទឹកប្រាក់សរុបចំនួនជិត ៤លានដុល្លារអាមេរិក ព្រមទាំងមានអតិថិជនជាច្រើននាក់ទៀតបាន និងកំពុងប្រើប្រាស់សេវាផ្សេងៗទៀត ។ លើសពីនេះ យើងខ្ញុំមានម៉ាស៊ីនដកប្រាក់ស្វ័យប្រវត្តិ អេធីអឹម និងម៉ាស៊ីនឆូតកាតជាច្រើនគ្រឿង សម្រាប់បម្រីសេវាទូទាត់ជូនដល់អតិថិជន" ។

ឯកឧត្តម ជៀង អំ ទីប្រឹក្សាផ្ទាល់របស់សមេ្តចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា និងជាអភិបាលខេត្តស្វាយរៀង បានមានប្រសាសន៍ថា "អគារថ្មី ០១ខ្នងដែលមានលក្ខណៈធំទូលាយ ល្អប្រណីត និងប្រកបដោយសោភ័ណភាព ដែលជាអគារការិយាល័យរបស់ ធនាគារអេស៊ីលីដា ភីអិលស៊ី សាខាខេត្តស្វាយរៀង ។ នេះជាការយកចិត្តទុកដាក់ខិតខំរបស់ថ្នាក់ដឹកនាំ ធនាគារអេស៊ីលីដា ភីអិលស៊ី ក្នុងការកសាង និងអភិវឌ្ឍកន្លែងធ្វើការរបស់ខ្លួនឱ្យកាន់តែមានលក្ខណៈទំនើប និងល្អប្រសើរ បង្កភាពងាយស្រួលក្នុងការផ្តល់សេវាជូនប្រជាពលរដ្ឋ និងអតិថិជនបានរហ័ស ប្រកបដោយសេចក្តីពេញចិត្តដើម្បីរួមចំណែកក្នុងការកសាង និងអភិវឌ្ឍសេដ្ឋកិច្ច-សង្គម ក៏ដូចជាការអភិវឌ្ឍខេត្តស្វាយរៀងឱ្យកាន់តែមានការរីកចម្រើនឈានឡើង និងរួមចំណែកកាត់បន្ថយភាពក្រីក្ររបស់ប្រជាពលរដ្ឋ ស្របតាមកម្មវិធីនយោបាយ និងយុទ្ធសាស្ត្រចតុកោណរបស់រាជរដ្ឋាភិបាលកម្ពុជា" ។

នៅក្នុងឱកាសនោះដែរ លោក អ៊ិន ចាន់នី ប្រធាននាយកប្រតិបត្តិ ធនាគារអេស៊ីលីដា ភីអិលស៊ី បានសម្តែងនូវមោទនភាពយ៉ាងខ្លាំងចំពោះសំណង់អគារការិយាល័យនេះ ដែលបានសាងសង់តាមស្តង់ដាររបស់ធនាគារស្របតាមយុទ្ធសាស្ត្រយូរអង្វែង និងមានជំនឿយ៉ាងមុតមាំចំពោះសម្ព័ន្ធភាពដ៏រឹងមាំដែលជាឧបករណ៍ និងកាតាលីករដ៏សំខាន់បំផុត និងជាមធ្យោបាយដ៏មុតថ្លា ដើម្បីអភិវឌ្ឍសង្គម និងសេដ្ឋកិច្ចរបស់ប្រទេសកម្ពុជា ។

« ព័ត៌មានមុន
ធនាគារអេស៊ីលីដា សាខាមានជ័យ ប្តូរទីតាំងការិយាល័យ ព័ត៌មានបន្ទាប់ »
អគ្គិសនីកម្ពុជា ជ្រើសរើសធនាគារអេស៊ីលីដា ភីអិលស៊ី ជាដៃគូ

ពិធី​សម្ពោធ​អគារ​ថ្មី ការិយាល័យ​សាខា​​ខេត្តស្វាយរៀង

ពិធីសម្ពោធអគារថ្មី ការិយាល័យសាខាខេត្តស្វាយរៀង