ព័ត៌មានព័ត៌មានថ្មីៗអគ្គិសនីកម្ពុជា ជ្រើសរើសធនាគារអេស៊ីលីដា ជាដៃគូ

អគ្គិសនីកម្ពុជា ជ្រើសរើសធនាគារអេស៊ីលីដា ភីអិលស៊ី ជាដៃគូ
ក្នុងការបម្រើសេវាបង់ប្រាក់ថ្លៃប្រើប្រាស់ថាមពលអគ្គិសនីតាមរយៈម៉ាស៊ីន ATM ធនាគារអេស៊ីលីដា ភីអិលស៊ី

ថ្ងៃទី១៧ ខែសីហា ឆ្នាំ២០០៩

ឯកឧត្តម កែវ រតនៈ ប្រតិភូរាជរដ្ឋាភិបាលកម្ពុជាទទួលបន្ទុកជាអគ្គនាយកអគ្គិសនីកម្ពុជា និង លោក អ៊ិន ចាន់នី ប្រធាននាយកប្រតិបត្តិធនាគារអេស៊ីលីដា ចុះហត្ថលេខា លើអនុស្សរណៈ

រាជធានីភ្នំពេញ, ថ្ងៃទី១៧ ខែសីហា ឆ្នាំ២០០៩ ៖ អគ្គិសនីកម្ពុជា បានប្រកាសជាសាធារណៈ នៅក្នុងពិធីចុះហត្ថលេខា លើអនុស្សរណៈនាថ្ងៃនេះថា អគ្គិសនីកម្ពុជា បានជ្រើសរើសធនាគារអេស៊ីលីដា ភីអិលស៊ី ជាដៃគូក្នុងការបម្រើសេវាបង់ប្រាក់ថ្លៃប្រើប្រាស់ថាមពលអគ្គិសនីតាមរយៈម៉ាស៊ីន ATM ធនាគារអេស៊ីលីដា ភីអិលស៊ី ។

អគ្គិសនីកម្ពុជា គឺជាក្រុមហ៊ុនរដ្ឋទទួលខុសត្រូវមានកម្រិត ដែលត្រូវបានបង្កើតឡើងដើម្បីផលិត បញ្ជូន និងចែកចាយ ថាមពលអគ្គិសនី ទូទាំងព្រះរាជាណាចក្រកម្ពុជា ។ អគ្គិសនីកម្ពុជា ជានីតិបុគ្គលដែលមានស្វ័យភាពហិរញ្ញវត្ថុ រដ្ឋបាល និងការគ្រប់គ្រង ដោយទទួលខុសត្រូវលើចំណូល និងចំណាយ ព្រមទាំងបំណុលទាក់ទងនឹងការពង្រីកទ្រព្យសកម្មរបស់ខ្លួន ។ អតិថិជនសរុបរបស់អគ្គិសនីកម្ពុជានៅទូទាំងប្រទេសនៅដំណាច់ឆ្នាំ២០០៨ មានចំនួន ៣១៥.៥១០ និងបានកើនរហូតដល់ ចំនួន ៣២៥.១៤០ ត្រឹមដំណាច់ខែមិថុនា ឆ្នាំ២០០៩ ដែលក្នុងនោះមានអតិថិជនចំនួន ២១៧.០០៧ នៅរាជធានីភ្នំពេញ ។

ឯកឧត្តម កែវ រតនៈ ប្រតិភូរាជរដ្ឋាភិបាលកម្ពុជាទទួលបន្ទុកជាអគ្គនាយកអគ្គិសនីកម្ពុជា មានប្រសាសន៍ថា "មូលហេតុ ដែលអគ្គិសនីកម្ពុជា ជ្រើសរើសយកធនាគារអេស៊ីលីដា ភីអិលស៊ី ធ្វើជាដៃគូក្នុងការបម្រើសេវាបង់ប្រាក់ថ្លៃប្រើប្រាស់ថាមពលអគ្គិសនី តាមរយៈម៉ាស៊ីន ATM ធនាគារអេស៊ីលីដា សម្រាប់អតិថិជនរបស់អគ្គិសនីកម្ពុជា នៅរាជធានីភ្នំពេញ និងខេត្តកណ្តាល គឺដើម្បីសម្រួលដល់ការបង់ប្រាក់របស់អតិថិជនអគ្គិសនីកម្ពុជា និងកាត់បន្ថយបរិមាណអតិថិជន ដែលមកបង់ប្រាក់ផ្ទាល់ ក៏ដូចជាកាត់បន្ថយបរិមាណសាច់ប្រាក់ទទួលផ្ទាល់នៅតាមបណ្តាសាខាអាជីវកម្មអគ្គិសនីកម្ពុជា ។ ការជ្រើសរើសយក ធនាគារអេស៊ីលីដា ធ្វើជាដៃគូ គឺដោយសារធនាគារនេះ មានបណ្តាញសាខាច្រើនភ្ជាប់ទំទាក់ទំនងគ្នាដោយប្រព័ន្ធទំនើបជឿនលឿន និងរៀបចំបានល្អនៅក្នុងប្រទេស ជាពិសេសនៅរាជធានីភ្នំពេញ និងខេត្តកណ្តាល ព្រមទាំងមានបំពាក់នូវម៉ាស៊ីន ATM សម្រាប់បម្រើសេវាជូនអតិថិជន ២៤ម៉ោង លើ ២៤ម៉ោង និង៧ថ្ងៃ ក្នុងមួយសប្តាហ៍ ។ ម៉្យាងវិញទៀតការប្រើប្រាស់ ប្រព័ន្ធធនាគារពាណិជ្ជ ដើម្បីគ្រប់គ្រងប្រតិបត្តិការបង់ប្រាក់ថ្លៃប្រើប្រាស់ថាមពលអគ្គិសនី គឺដើម្បីបង្កើនគណនេយ្យភាពហិរញ្ញវត្ថុ របស់អគ្គិសនីកម្ពុជាឱ្យមានប្រសិទ្ធភាពខ្ពស់ថែមទៀត" ។

លោក អ៊ិន ចាន់នី ប្រធាននាយកប្រតិបត្តិ ធនាគារអេស៊ីលីដា ភីអិលស៊ី បានមានប្រសាសន៍ថា "ធនាគារអេស៊ីលីដា ភីអិលស៊ី មានមោទនភាពដែលទទួលបានការផ្តល់ទំនុកចិត្ត និងជ្រើសរើសធ្វើជាដៃគូរបស់អគ្គិសនីកម្ពុជា ក្នុងការបម្រើសេវាបង់ប្រាក់ថ្លៃប្រើប្រាស់ថាមពលអគ្គិសនីតាមរយៈម៉ាស៊ីន ATM បន្ទាប់ពីធនាគារអេស៊ីលីដា ត្រូវបានជ្រើសរើស ដោយក្រសួងសេដ្ឋកិច្ច និងហិរញ្ញវត្ថុ សម្រាប់ធ្វើជាដៃគូរបស់រតនាគារជាតិ ក្នុងការប្រើប្រាស់សេវាកម្មធនាគារ សម្រាប់ប្រតិបត្តិការចំណូល-ចំណាយថវិកាជាតិ កាលពីខែមិថុនា ថ្មីៗកន្លងមក ។ បច្ចុប្បន្ន ធនាគារអេស៊ីលីដា ភីអិលស៊ី មានម៉ាស៊ីន ATM ចំនួន ៦២គ្រឿង ធនាគារអេស៊ីលីដា នឹងមានបំពាក់ម៉ាស៊ីន ATM សរុបចំនួន ១០៥គ្រឿង នៅមុនដំណាច់ឆ្នាំ២០០៩ នេះ ដើម្បីឆ្លើយតបទៅនឹងសេចក្តីត្រូវការ និងបម្រើសេវាជូនអតិថិជន និងសាធារណជន រួមទាំងអតិថិជនរបស់អគ្គិសនីកម្ពុជា" ។

សម្រាប់ព័ត៌មានបន្ថែម សូមទាក់ទងតាមរយៈ ៖

លោកស្រី សូ ផនណារី អនុប្រធាននាយកប្រតិបត្តិ និងជាប្រធាននាយិកាប្រតិបត្តិប្រតិបត្តិការ
អ៊ីម៉ែល ៖

លោក ព្រំ វិសុទ្ធ នាយកប្រតិបត្តិនីតិកម្ម និងជាលេខាធិការក្រុមហ៊ុន
អ៊ីម៉ែល ៖

« ព័ត៌មានមុន
ពិធីសម្ពោធអគារថ្មី ការិយាល័យសាខាខេត្តស្វាយរៀង ព័ត៌មានបន្ទាប់ »
វិញ្ញាបនបត្រសរសើរពី MFTransparency សម្រាប់គំនិតផ្តួចផ្តើមកំណត់ថ្លៃប្រកបដោយតម្លាភាពនៅកម្ពុជា