USD
THB
EUR
AUD
VND
CAD
LAK
JPY
GBP
CNY
navigate_nextព័ត៌មានnavigate_nextព័ត៌មានថ្មីៗnavigate_nextធនាគារជាតិនៃកម្ពុជា និងធនាគារជាតិថៃធ្វើទស្សនកិច្ចសិក្សា...
ធនាគារជាតិនៃកម្ពុជា និងធនាគារជាតិថៃ ទស្សនកិច្ចសិក្សានៅសាខាធនាគារអេស៊ីលីដា ក្រុងបាត់ដំបង
ថ្ងៃទី២៥ ខែសីហា ឆ្នាំ២០១០
បាត់ដំបង ថ្ងៃទី២៥ ខែសីហា ឆ្នាំ២០១០ ៖ ធនាគារជាតិថៃបានមកធ្វើទស្សនកិច្ចសិក្សា នៅសាខាធនាគារអេស៊ីលីដា ក្រុងបាត់ដំបង ក្រោមការដឹកនាំដោយលោក Pongrit Virachart ជាប្រធានក្រុមប្រតិបត្តិ និងចូលរួមដោយធនាគារជាតិនៃកម្ពុជាផងដែរ ។ អ្នកចូលរួមនៅក្នុងទស្សនកិច្ចសិក្សានេះ មានដូចជា ៖ អ្នកសេដ្ឋកិច្ចជាន់ខ្ពស់ ៤រូបរបស់ធនាគារជាតិថៃ គណៈប្រតិភូមកពីធនាគារជាតិនៃកម្ពុជា និងនាយកការិយាល័យប្រតិបត្តិការហិរញ្ញវត្ថុរបស់ធនាគារអេស៊ីលីដា ព្រមទាំងគណៈគ្រប់គ្រងនៃសាខាធនាគារអេស៊ីលីដា ក្រុងបាត់ដំបង ។
កម្មវត្ថុចម្បងនៃទស្សនកិច្ចនេះ គឺដើម្បីសិក្សាទៅលើប្រតិបត្តិការឥណទានខ្នាតតូចបំផុត នៅប្រទេសកម្ពុជា ។ ទស្សនកិច្ចសិក្សានេះមានរយៈពេលមួយថ្ងៃ និងមានសកម្មភាពសំខាន់ពីរ គឺកិច្ចប្រជុំនៅសាខាធនាគារអេស៊ីលីដា ក្រុងបាត់ដំបង និងការចុះទៅសិក្សាជាក់ស្តែងជាមួយអតិថិជនតែម្តង ។
កិច្ចប្រជុំនៅសាខាធនាគារអេស៊ីលីដា ក្រុងបាត់ដំបង គឺពិភាក្សាទៅលើចំណុចសំខាន់ៗទូទៅរបស់ធនាគារអេស៊ីលីដាដូចជា ៖ ប្រវត្តិធនាគារ ទស្សនៈនិងបេសកកម្ម អង្គការលេខ ភាគទុនិក ក្រុមប្រឹក្សាភិបាល គណៈកម្មាធិការប្រតិបត្តិ ព័ត៌មានអំពីសាជីវកម្ម បណ្តាញប្រតិបត្តិការ លទ្ធផលហិរញ្ញវត្ថុថ្មីៗដែលបានអនុវត្ត ព្រមទាំងរង្វាន់និងស្នាដៃផ្សេងៗទៀត ។ល។
ក្នុងអំឡុងពេលនៃកិច្ចប្រជុំនោះ សំណួរដែលបានលើកឡើង សុទ្ធតែទាក់ទងទៅនឹងការប្រតិបត្តិទីផ្សារនៃឥណទានខ្នាតតូចបំផុត និងវិធីសាស្ត្រក្នុងការគ្រប់គ្រងអាជីវកម្មប្រកបដោយភាពជោគជ័យ ។
បន្ទាប់ពីពិភាក្សាជាក្រុមនៅសាខាធនាគារអេស៊ីលីដា ក្រុងបាត់ដំបងរួចហើយ គណៈប្រតិភូទាំងអស់បានទៅជួបអតិថិជនដោយផ្ទាល់នៅក្នុងថ្ងៃដដែលនោះ ។ អំឡុងពេលទស្សនកិច្ចសិក្សានៅជុំវិញខេត្តបាត់ដំបងដែលមានរយៈពេល២ម៉ោង គណៈប្រតិភូបានធ្វើទស្សនកិច្ចសិក្សាទៅលើសកម្មភាពពាណិជ្ជកម្មរបស់អតិថិជនឥណទានខ្នាតតូចបំផុតរបស់ធនាគារអេស៊ីលីដាចំនួន ៣នាក់ ។
ទស្សនកិច្ចសិក្សានេះ ពិតជាផ្តល់នូវចំណេះដឹង បទពិសោធន៍ និងភាពរីករាយខ្លាំងណាស់ចំពោះពួកគេ ។
