ព័ត៌មានព័ត៌មានថ្មីៗគណៈប្រតិភូធនាគារពិភពលោក ស្វែងយល់អំពីការរីកចម្រើនរបស់ធនាគារអេស៊ីលីដា

គណៈប្រតិភូធនាគារពិភពលោក ស្វែងយល់អំពីការរីកចម្រើនរបស់ធនាគារអេស៊ីលីដា

កិច្ចប្រជុំរវាងថ្នាក់គ្រប់គ្រងធនាគារអេស៊ីលីដា និងគណៈប្រតិភូធនាគារពិភពលោក

ថ្ងៃទី០៦ ខែកញ្ញា ឆ្នាំ២០១០

រាជធានីភ្នំពេញ ថ្ងៃទី០៦ ខែកញ្ញា ឆ្នាំ២០១០ គណៈប្រតិភូជាន់ខ្ពស់របស់ធនាគារពិភពលោក ដឹកនាំដោយលោកបណ្ឌិត Justin Yifu Lin អនុប្រធានជាន់ខ្ពស់ និងជាប្រធានសេដ្ឋកិច្ចវិទូនៃធនាគារពិភពលោក បានចុះមកធ្វើទស្សនកិច្ចសិក្សា ទទួលយកនូវបទពិសោធន៍ពីភាពជោគជ័យ និងការរីកលូតលាស់របស់ធនាគារអេស៊ីលីដា ។ បេសកកម្មរបស់លោកនៅក្នុងទស្សនកិច្ចសិក្សានេះ គឺដើម្បីស្វែងយល់អំពីការអភិវឌ្ឍរបស់ធនាគារអេស៊ីលីដាក្នុងរយៈពេល ១៧ឆ្នាំ ដែលជាធនាគារនាំមុខគេនៅក្នុងប្រទេសកម្ពុជា ដើម្បីចែករំលែកទៅឱ្យស្ថាប័នដទៃទៀត ។

លោក អ៊ិន ចាន់នី ប្រធាននាយកប្រតិបត្តិធនាគារអេស៊ីលីដា បានជម្រាបទៅលោកអនុប្រធានជាន់ខ្ពស់ថា មានកត្តាសំខាន់ៗបី ដែលធ្វើឱ្យធនាគារអេស៊ីលីដាទទួលបាននូវភាពជោគជ័យមកដល់សព្វថ្ងៃនេះ ។ ទី១ ការរៀបចំ និងបម្រើសេវាទៅតាមតម្រូវការរបស់អតិថិជន ។ ទី២ ធនាគារធ្វើប្រតិបត្តិការ ដោយមានការគាំទ្រ និងសហការពីអាជ្ញាធរមូលដ្ឋានគ្រប់លំដាប់ថ្នាក់ ។ ទី៣ បុគ្គលិកគ្រប់លំដាប់ថ្នាក់ យកចិត្តទុកដាក់គោរពទៅតាមតួនាទីការងារ ច្បាប់របស់ធនាគារអេស៊ីលីដា ច្បាប់ជាតិ និងអន្តរជាតិ ។ ភាពជោគជ័យនេះធ្វើឱ្យអេស៊ីលីដាកសាងខ្លួនក្នុងរយៈពេល១៧ឆ្នាំ តាំងពីទ្រព្យសកម្មមានជាង ២០លានដុល្លារ រហូតដល់ ១.០៦០លានដុល្លារ នៅក្នុងខែសីហានេះ ។

ក្រៅពីនេះ អេស៊ីលីដាមានអតិថិជនឥណទានជាច្រើន រហូតដល់ជាង ២៦០.០០០នាក់ និងមានសមតុល្យឥណទាន ៦៣២លានដុល្លារ គឺដោយសារយើងយល់ច្បាស់ពីតម្រូវការ និងការរីកចម្រើនរបស់អតិថិជនគ្រប់លំដាប់ថ្នាក់ ចាប់ពីអតិថិជនមុខជំនួញខ្នាតតូចបំផុតឡើងទៅខ្នាតតូច និងខ្នាតតូចឡើងទៅខ្នាតមធ្យម ។ ដើម្បីបម្រើពួកគាត់ឱ្យបានកាន់តែល្អប្រសើរ ធនាគារបានរៀបចំជាផ្នែកបម្រើអតិថិជន ផ្នែកថែរក្សាអតិថិជន និងផ្នែកផ្តល់ព័ត៌មានដល់អតិថិជន ដើម្បីស្គាល់អតិថិជនឱ្យបានច្បាស់ថាគាត់ត្រូវការឥណទាន សម្រាប់ធ្វើអ្វី ឬប្រកបរបរអ្វី និងអាចផ្តល់សេវាអ្វីជូនពួកគាត់បន្ថែមទៀតបាន ពីព្រោះនៅពេលខ្លះអតិថិជនមិនដឹងថាគួរប្រើសេវាអ្វីនោះទេ មានតែភ្នាក់ងារធនាគារនេះហើយដែលដឹងថាពួកគាត់គួរប្រើសេវាមួយណាដែលអស់ចំណាយតិច និងទទួលបានអត្ថប្រយោជន៍ច្រើន ។

គណៈប្រតិភូទស្សនកិច្ចសាលបម្រើអតិថិជនរបស់ការិយាល័យកណ្តាលធនាគារអេស៊ីលីដា

លោកប្រធាននាយកប្រតិបត្តិ បានជម្រាបបន្ថែមថា កត្តាជោគជ័យមួយទៀត គឺតម្លាភាពជាមូលដ្ឋាន សមនឹងពាក្យ "ធនាគារដែលលោកអ្នកជឿទុកចិត្ត" ។ តម្លាភាពត្រូវមានទាំងបុគ្គលិក និងអតិថិជន ។ បុគ្គលិកគ្រប់លំដាប់ថ្នាក់ប្រកាន់ខ្ជាប់នូវបទបញ្ជាផ្ទៃក្នុង ក្នុងការផ្តល់សេវាធនាគារជូនដល់អតិថិជន ដោយមិនទាមទារអ្វីដែលជាកម្រៃក្រៅពីធនាគារផ្តល់ជូននោះទេ ។ ធនាគារប្រកាន់ខ្ជាប់នូវគោលការណ៍ដែលមិនអាចលើកលែងបានជាដាច់ខាតចំពោះការកេងបន្លំ ឬអំពើពុករលួយទាំងឡាយ ។

លោកបានបន្តថា តួលេខត្រឹមខែសីហានេះ ឥណទានសរុបមានចំនួនជាង ៦៣២លានដុល្លារ ក្នុងនោះមានឥណទានកសិកម្មចំនួន ៩៩លានដុល្លារ ដែលកាលពីឆ្នាំ២០០៤ មានត្រឹមតែ ៣,៦លានដុល្លារប៉ុណ្ណោះ ។ ហេតុនេះ ឥណទានសម្រាប់វិស័យកសិកម្មមានការកើនឡើងខ្ពស់ជាលំដាប់ ពីព្រោះគោលនយោបាយរបស់រាជរដ្ឋាភិបាលផ្តោតទៅលើការកសាងហេដ្ឋារចនាសម្ព័ន្ធធារាសាស្ត្រ ប្រព័ន្ធប្រឡាយទំនប់ទឹក អាងស្តុកទឹក ប្រព័ន្ធស្រោចស្រព ធ្វើឱ្យមានទំនុកចិត្ត គ្មានបញ្ហាទឹកទៀតឡើយ ។ ចំណែកឯទីផ្សារក៏សម្បូរបែប ព្រោះដោយសារតែមានតម្រូវការនាំអង្ករចេញជាលក្ខណៈអន្តរជាតិ និងមានតម្លៃខ្ពស់ ។ មូលហេតុនេះហើយ ដែលជំរុញឱ្យអេស៊ីលីដាផ្តល់ប្រាក់កម្ចីដល់ពួកគាត់បានកាន់តែច្រើនខាងវិស័យកសិកម្ម ជាពិសេសស្របទៅនឹងគោលនយោបាយរបស់រដ្ឋាភិបាលដែលលើកទឹកចិត្តលើវិស័យកសិកម្ម ។

កត្តាទាំងនេះហើយ ដែលធ្វើឱ្យធនាគារអេស៊ីលីដា ក្លាយជាធនាគារពាណិជ្ជឈានមុខគេនៅក្នុងព្រះរាជាណាចក្រកម្ពុជា និងក្លាយជាធនាគារថ្នាក់តំបន់មួយ ដែលបានពង្រីកបណ្តាញប្រតិបត្តិការទៅក្រៅប្រទេសទៀតផង ៕

« ព័ត៌មានមុន
ធនាគារជាតិនៃកម្ពុជា និងធនាគារជាតិថៃ ទស្សនកិច្ចសិក្សានៅសាខាធនាគារអេស៊ីលីដា ក្រុងបាត់ដំបង ព័ត៌មានបន្ទាប់ »
ពិធីសម្ពោធអគារថ្មី ការិយាល័យសាខាស្រុកស្អាង

គណៈប្រតិភូ​ធនាគារ​ពិភពលោក ស្វែង​យល់អំពី​ការរីក​​ចម្រើន​របស់​ធនាគារ​អេស៊ីលីដា

គណៈប្រតិភូធនាគារពិភពលោក ស្វែងយល់អំពីការរីកចម្រើនរបស់ធនាគារអេស៊ីលីដា