USD
THB
EUR
AUD
VND
CAD
LAK
JPY
GBP
CNY
navigate_nextព័ត៌មានnavigate_nextព័ត៌មានថ្មីៗnavigate_nextពិធីសម្ពោធអគារថ្មី ការិយាល័យសាខាស្រុកស្អាង
ពិធីសម្ពោធអគារថ្មី ការិយាល័យសាខាស្រុកស្អាង
ថ្ងៃទី១៧ ខែកញ្ញា ឆ្នាំ២០១០
ធនាគារអេស៊ីលីដា សាខាស្រុកស្អាង មានទីតាំងស្ថិតនៅបណ្តោយផ្លូវជាតិលេខ២១ ភូមិព្រែករុន ឃុំព្រែកគយ ស្រុកស្អាង ខេត្តកណ្តាល បានប្រារព្ធពិធីសម្ពោធជាផ្លូវការ ដោយមានការអញ្ជើញចូលរួមជាគណៈអធិបតីយ៉ាងខ្ពង់ខ្ពស់ពីសំណាក់ ឯកឧត្តមអភិបាលរងខេត្តកណ្តាល ឯកឧត្តម លោកជំទាវ លោកឧកញ៉ា អាជ្ញាធរគ្រប់លំដាប់ថ្នាក់ ប្រធាននិងក្រុមប្រឹក្សាភិបាលធនាគារអេស៊ីលីដា ប្រធាននាយកប្រតិបត្តិនិងថ្នាក់ដឹកនាំធនាគារអេស៊ីលីដា ព្រមទាំងភ្ញៀវកិត្តិយសជាតិ និងអន្តរជាតិជាច្រើននាក់ទៀត ។
លោក អ៊ន ប៊ុនលី នាយកធនាគារអេស៊ីលីដា សាខាស្រុកស្អាង បានមានប្រសាសន៍ថា ៖ គិតត្រឹមថ្ងៃទី៣១ ខែសីហា ឆ្នាំ២០១០ នេះ សាខាស្រុកស្អាងមានបណ្តាញប្រតិបត្តិការចំនួន៥ បុគ្គលិកចំនួន ១០៨នាក់ ទ្រព្យសកម្មសរុបចំនួនជិត ៦លានដុល្លារ អតិថិជនចំនួន ៧.៣៣៣នាក់ កំពុងប្រើប្រាស់ឥណទានចំនួនជាង ៥,៣លានដុល្លារ និងអតិថិជនចំនួន ៦.០៦៧នាក់ កំពុងដាក់ប្រាក់បញ្ញើសន្សំចំនួនជាង ២,៥លានដុល្លារ ព្រមទាំងអតិថិជនជាច្រើនទៀត បាននិងកំពុងប្រើប្រាស់សេវាកម្មផ្សេងៗទៀត ។ ជាងនេះទៅទៀតយើងមានម៉ាស៊ីនដកប្រាក់ស្វ័យប្រវត្តិអេធីអឹមចំនួន ១គ្រឿងសម្រាប់បម្រើសេវាជូនដល់អតិថិជន តាមរយៈប័ណ្ណអេស៊ីលីដា ប័ណ្ណវីសាអេស៊ីលីដា និងប័ណ្ណវីសាធនាគារផ្សេងទៀត នៅទូទាំងពិភពលោក ។
លោកបានបន្តថា ៖ ពេលនេះ សាខាស្រុកស្អាង បានប្តូរទីតាំងមកអគារការិយាល័យថ្មី ដែលបានសាងសង់ឡើងតាមស្តង់ដារធនាគារពាណិជ្ជ ដោយយកចិត្តទុកដាក់ខ្លាំងលើការរក្សាសន្តិសុខ កំណារពារអគ្គិភ័យ ការបម្រុងថាមពល ផាសុកភាព និងសុវត្ថិភាព ។ អគារនេះមានកម្ពស់ ៣ជាន់ និងមានផ្ទៃក្រឡាសម្រាប់បំពេញការងារ និងបម្រើអតិថិជនធំទូលាយ ។ នេះជាព្រឹត្តិការណ៍ដ៏ពិសេសមួយនៅក្នុងឆ្នាំនេះ របស់សាខាស្រុកស្អាង ដែលបានបង្ហាញអំពីភាពរឹងមាំជាមួយការអភិវឌ្ឍឥតឈប់ឈរក្នុងការបម្រើសេវាកម្មហិរញ្ញវត្ថុកាន់តែលឿន រហ័សទាន់ចិត្ត អាចជឿជាក់បាន និងមានសុវត្ថិភាពខ្ពស់ ដើម្បីបំពេញតម្រូវការរបស់អតិថិជនទាំងអស់ ។
នៅក្នុងឱកាសដ៏ពិសេសនេះ លោក អ៊ិន ចាន់នី ប្រធាននាយកប្រតិបត្តិ ធនាគារអេស៊ីលីដា បានថ្លែងថា ៖ បច្ចុប្បន្ន ធនាគារអេស៊ីលីដាមានអគារការិយាល័យស្តង់ដារចំនួន ៨៣ និងកំពុងសាងសង់បន្ថែមជាបន្តបន្ទាប់ ដើម្បីទទួលបម្រើអតិថិជន និងបង្កឱ្យមានភាពងាយស្រួលដល់ពួកគាត់ក្នុងការធ្វើទំនាក់ទំនង និងប្រើប្រាស់សេវាហិរញ្ញវត្ថុនានា ជាពិសេសដើម្បីការពារសុវត្ថិភាពទ្រព្យសម្បត្តិរបស់ពួកគាត់ ដែលបាននិងកំពុងប្រើប្រាស់សេវាធនាគារអេស៊ីលីដា ប្រកបដោយផាសុកភាព ។
លោកក៏បានថ្លែងអំណរគុណយ៉ាងជ្រាលជ្រៅផងដែរចំពោះរាជរដ្ឋាភិបាល ធនាគារជាតិនៃកម្ពុជា អាជ្ញាធរគ្រប់លំដាប់ថ្នាក់ និងអតិថិជនវៃឆ្លាតជាងមួយលាននាក់ ដែលតែងតែជួយគាំទ្រធនាគារអេស៊ីលីដាតាំងពីដើមរៀងមក ធ្វើឱ្យទ្រព្យសកម្មកើនពីចំនួនជាង ២២លានដុល្លារ ក្នុងខែធ្នូ ឆ្នាំ២០០០ រហូតដល់ជាង១ពាន់លានដុល្លារ នៅដំណាច់ខែសីហា ឆ្នាំ២០១០ ។ ដើម្បីវិវឌ្ឍតាមអតិថិជនដ៏ឆ្លាតវៃ ធនាគារអេស៊ីលីដាបានបង្កើតនូវសេវាថ្មីមួយទៀតដ៏ទំនើប ទាន់សម័យមុនគេបង្អស់នៅកម្ពុជាគឺ អេស៊ីលីដា យូនីធី ជាធនាគារពិតជាក់ស្តែង នៅក្នុងដៃរបស់លោកអ្នក ។ អេស៊ីលីដា យូនីធី ប្រមូលផ្តុំសេវាហិរញ្ញវត្ថុទាំងមូលនៅក្រោមប្រព័ន្ធតែមួយ សម្រួលក្នុងការធ្វើប្រតិបត្តិការសេវាធនាគារប្រចាំថ្ងៃ តាមរយៈទូរស័ព្ទដៃគ្រប់ប្រភេទ ជាភាសាជាតិ និងអន្តរជាតិ គ្រប់បណ្តាញប្រព័ន្ធទូរស័ព្ទចល័ត គ្រប់ទីកន្លែង គ្រប់ពេលវេលា នៅក្នុងប្រទេស និងទូទាំងពិភពលោក សម្រាប់អតិថិជនទាំងឡាយដែលបានភ្ជាប់ប្រព័ន្ធ Global Roaming ។
ឯកឧត្តម ផៃ ប៊ុនឈឿន អភិបាលរងខេត្តកណ្តាល បានកត់សម្គាល់ថា ៖ ធនាគារអេស៊ីលីដា សាខាស្រុកស្អាង ចាប់ផ្តើមធ្វើប្រតិបត្តិការ តាំងពីខែកុម្ភៈ ឆ្នាំ១៩៩៩ ក្រោមរូបភាពជាការិយាល័យស្រុក ។ នៅអំឡុងខែតុលា ឆ្នាំ២០០៦ ក៏បានប្រែក្លាយជាសាខា ហើយធ្វើប្រតិបត្តិការពេញលេញ និងទូលំទូលាយទូទាំងស្រុកស្អាង ដែលបញ្ជាក់ឱ្យឃើញថាមានការវិវត្ត និងរីកចម្រើនធំធាត់យ៉ាងឆាប់រហ័ស ទាំងផ្នែកប្រតិបត្តិការ និងផ្នែកអាជីវកម្ម ។ ចំពោះដំណើរការអភិវឌ្ឍន៍របស់ធនាគារអេស៊ីលីដា សាខាស្រុកស្អាងនេះ មានអត្ថប្រយោជន៍ណាស់ដល់ប្រជាពលរដ្ឋ និងអ្នកជំនួញតូចធំក្នុងស្រុកស្អាងទាំងមូលដើម្បីទទួលបាននូវប្រភពធនធានហិរញ្ញវត្ថុ និងសេវាកម្មផ្សេងៗទៀត ដែលជាផ្នែកមួយនៃការចូលរួមក្នុងការបង្កើតឱ្យមានការងារធ្វើ និងប្រភពចំណូល ដើម្បីចូលរួមអភិវឌ្ឍសេដ្ឋកិច្ច និងលើកកម្ពស់កម្រិតជីវភាពរស់នៅ ព្រមទាំងកាត់បន្ថយភាពក្រីក្ររបស់ប្រជាពលរដ្ឋក្នុងស្រុកស្អាង ។ ធនាគារអេស៊ីលីដា សាខាស្រុកស្អាង នឹងនៅតែជាដៃគូអភិវឌ្ឍន៍របស់ខេត្តស្រុក ជាប្រតិបត្តិករល្អជាមួយអាជ្ញាធរមូលដ្ឋានគ្រប់លំដាប់ថ្នាក់ និងជាអ្នកផ្តល់សេវាហិរញ្ញវត្ថុល្អដល់អតិថិជនទូទៅ ដើម្បីពង្រីកប្រតិបត្តិការរបស់ខ្លួនឱ្យមានប្រសិទ្ធភាព និងផលិតភាពថែមទៀត ៕
