ព័ត៌មានព័ត៌មានថ្មីៗក្រសួងសេដ្ឋកិច្ច និងហិរញ្ញវត្ថុជ្រើសរើសធនាគារអេស៊ីលីដា ជាដៃគូ

ក្រសួងសេដ្ឋកិច្ច និងហិរញ្ញវត្ថុជ្រើសរើសធនាគារអេស៊ីលីដា ជាដៃគូ
ឱ្យអគ្គនាយកដ្ឋាន រតនាគារជាតិ ក្នុងការប្រើប្រាស់សេវាកម្មធនាគារ សម្រាប់ប្រតិបត្ដិការចំណូល-ចំណាយថវិកា

ថ្ងៃទី០៩ ខែកុម្ភៈ ឆ្នាំ២០១២

លោក អ៊ិន ចាន់នី ប្រធាននាយកប្រតិបត្តិធនាគារអេស៊ីលីដា និងឯកឧត្ដមបណ្ឌិត អូន ព័ន្ធមុនីរ័ត្ន រដ្ឋមន្ដ្រីប្រតិភូអមនាយករដ្ឋមន្ដ្រី រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ និងជាប្រធានគណៈកម្មាធិការដឹកនាំការងារកែទម្រង់ការគ្រប់គ្រងហិរញ្ញវត្ថុសាធារណៈ ចុះហត្ថលេខាលើអនុស្សរណៈ

រាជធានីភ្នំពេញ ថ្ងៃទី០៩ ខែកុម្ភៈ ឆ្នាំ២០១២ ៖ ក្រសួងសេដ្ឋកិច្ច និងហិរញ្ញវត្ថុ បានប្រកាសជាសាធារណៈនាថ្ងៃនេះថា ក្រសួងបានចុះហត្ថលេខាលើអនុស្សរណៈនៃការយោគយល់គ្នា ជាមួយធនាគារអេស៊ីលីដា ស្ដីពីការអនុវត្ដសាកល្បងជំហានទី៣ ក្នុងការប្រើប្រាស់សេវាកម្មធនាគារពាណិជ្ជ សម្រាប់ប្រតិបត្ដិការចំណូល-ចំណាយថវិកា ក្រោមអធិបតីភាពដ៏ខ្ពង់ខ្ពស់របស់ឯកឧត្ដម គាត ឈន់ ឧបនាយករដ្ឋមន្ដ្រី និងជារដ្ឋមន្ដ្រីក្រសួងសេដ្ឋកិច្ចនិងហិរញ្ញវត្ថុ ។

កម្មវិធីកំណែទម្រង់ការគ្រប់គ្រងហិរញ្ញវត្ថុសាធារណៈ គឺជាសមាសធាតុមួយដ៏សំខាន់នៅក្នុងស្នូលនៃយុទ្ធសាស្ដ្រចតុកោណរបស់រាជរដ្ឋាភិបាល ដែលមានគោលដៅកសាងប្រព័ន្ធគ្រប់គ្រងហិរញ្ញវត្ថុសាធារណៈមួយឆ្ពោះទៅរកស្ដង់ដារអន្ដរជាតិ ។ បច្ចុប្បន្ននេះ រាជរដ្ឋាភិបាលនៃព្រះរាជាណាចក្រកម្ពុជា បាននិងកំពុងអនុវត្ដផែនការសកម្មភាពជំហានទី២នៃកំណែទម្រង់ការគ្រប់គ្រងហិរញ្ញវត្ថុសាធារណៈ ក្នុងគោលបំណងបង្កើនគណនេយ្យភាពហិរញ្ញវត្ថុ និងការគ្រប់គ្រងហិរញ្ញវត្ថុសាធារណៈឱ្យមានប្រសិទ្ធភាពខ្ពស់ ជាពិសេសការគ្រប់គ្រងចំណូល-ចំណាយថវិកាជាតិ ។

ក្រសួងសេដ្ឋកិច្ចនិងហិរញ្ញវត្ថុ បានជ្រើសរើសយកធនាគារអេស៊ីលីដា ធ្វើជាដៃគូដើម្បីអនុវត្តសាកល្បងជំហានទី៣ នៅរតនាគារខេត្តចំនួន១៣ ដែលក្នុងនោះនៅខេត្តកំពង់ធំ ខេត្តពោធិសាត់ ខេត្តកំពត ខេត្តក្រចេះ ខេត្តរតនគិរី និងខេត្ត៨ទៀត គឺខេត្តកណ្តាល ខេត្តបន្ទាយមានជ័យ ខេត្តកំពង់ចាម ខេត្តមណ្ឌលគិរី ខេត្តស្ទឹងត្រែង ខេត្តកោះកុង ខេត្តព្រះវិហារ និងខេត្តឧត្តរមានជ័យ ដែលបន្តពីជំហានទី១និងទី២ ក្នុងការផ្តល់សេវាកម្មធនាគារសម្រាប់ប្រតិបត្តិការចំណូល-ចំណាយថវិកា ។

លោក អ៊ិន ចាន់នី ប្រធាននាយកប្រតិបត្តិ ធនាគារ អេស៊ីលីដា ភីអិលស៊ី មានប្រសាសន៍ថា ធនាគារ អេស៊ីលីដា មានមោទនភាព ដែលតែងតែទទួលបានការផ្តល់ទំនុកចិត្ត និងជ្រើសរើសធ្វើជាដៃគូជាបន្តបន្តាប់ពីគ្រឹះស្ថានសាធារណៈរបស់រាជរដ្ឋាភិបាលក្នុងការបម្រើសេវាកម្មធនាគារ ដែលជាកត្តាជម្រុញលើកទឹកចិត្តឱ្យធនាគារអេស៊ីលីដា បន្តពង្រីកបណ្តាញប្រតិបត្តិការ ពង្រឹងគុណភាព និងបង្កើតឱ្យមានប្រព័ន្ធធនាគារអេឡិចត្រូនិកឈានមុខគេ ដោយបំពាក់នូវប្រព័ន្ធទំនើប ធ្វើប្រតិបត្តិការធនាគារតាមប្រព័ន្ធទូរស័ព្ទចល័ត ដាក់ពង្រាយម៉ាស៊ីនដកប្រាក់ស្វ័យប្រវត្តិ (ATM) ពាស់ពេញប្រទេស ដើម្បីអាចបម្រើអតិថិជនឱ្យបាន ២៤ម៉ោងក្នុង១ថ្ងៃ និង៧ថ្ងៃក្នុង១សប្តាហ៍ ។

ឆ្លៀតក្នុងឱកាសដ៏មានសារៈសំខាន់នេះ លោក អ៊ិន ចាន់នី បានសំដែងនូវអំណរគុណយ៉ាងជ្រាលជ្រៅចំពោះ រាជរដ្ឋាភិបាល ក្រសួងសេដ្ឋកិច្ចនិងហិរញ្ញវត្ថុ និងអគ្គនាយកដ្ឋានរតនាគារជាតិ ដែលបានសម្រេចចិត្តជ្រើសរើសធនាគារអេស៊ីលីដា បន្តធ្វើជាដៃគូផ្តល់សេវាកម្មធនាគារ សម្រាប់ប្រតិបត្តិការចំណូល-ចំណាយថវិកា អនុវត្តសាកល្បងជំហានទី៣ ដែលសរុបទាំងជំហានទី១ និងទី២ មានចំនួន១៣ខេត្ត ហើយលោក និងសហការីរបស់លោកទាំងអស់ ក៏បានសន្យា និងអះអាងខ្ពស់ក្នុងការបម្រើសេវានេះឱ្យមានភាពរលូន និងប្រសិទ្ធភាពខ្ពស់ តាមរយៈគោលការណ៍ និងបទពិសោធន៍ដ៏ជោគជ័យរបស់ធនាគារកន្លងមក ។

សម្រាប់ព័ត៌មានបន្ថែម សូមទាក់ទងតាមរយៈ ៖

អគ្គនាយកដ្ឋានរតនាគារជាតិ

ឯកឧត្តម ហ៊ីវ សុវណ្ណ អគ្គនាយករង
ឯកឧត្តមបណ្ឌិត វង្ស ប៊ុនឥន្ទ្រាវុធ អគ្គនាយករង
អ៊ីម៉ែល ៖
លោក មាស ប៊ុនថុន អគ្គនាយករង

ធនាគារ អេស៊ីលីដា ភីអិលស៊ី

លោក លី ថៃ នាយកប្រតិបត្ដិប្រតិបត្តិការ
អ៊ីម៉ែល ៖
លោក សុខ សុវត្ថឌី នាយកប្រតិបត្តិរងប្រតិបត្តិការ
អ៊ីម៉ែល ៖
លោក នេត ពិសិដ្ឋ នាយកប្រតិបត្តិរងប្រតិបត្តិការ
អ៊ីម៉ែល ៖

« ព័ត៌មានមុន
ពិធីសម្ពោធអគារការិយាល័យថ្មី សាខាខេត្តព្រះវិហារ ព័ត៌មានបន្ទាប់ »
សាខាខេត្តឧត្តរមានជ័យ ប្តូរទីតាំងការិយាល័យថ្មី