ព័ត៌មានព័ត៌មានថ្មីៗពិធីសម្ពោធអគារការិយាល័យថ្មី សាខាខេត្តឧត្តរមានជ័យ

ពិធីសម្ពោធអគារការិយាល័យថ្មី សាខាខេត្តឧត្តរមានជ័យ

ថ្ងៃទី២៧ ខែមេសា ឆ្នាំ២០១២

គណៈអធិបតីចូលរួមក្នុងពិធីសម្ពោធអគារការិយាល័យថ្មី សាខាខេត្តឧត្តរមានជ័យ

ធនាគារអេស៊ីលីដា សាខាខេត្តឧត្តរមានជ័យ មានទីតាំងស្ថិតនៅ ភូមិសំរោង សង្កាត់សំរោង ក្រុងសំរោង ខេត្តឧត្តរមានជ័យ បានប្រារព្ធពិធីសម្ពោធជាផ្លូវការ ដោយមានការអញ្ជើញចូលរួមជាគណៈអធិបតីយ៉ាងខ្ពង់ខ្ពស់ពីសំណាក់ អភិបាលរងខេត្តព្រះវិហារនិងអាជ្ញាធរមូលដ្ឋានគ្រប់លំដាប់ថ្នាក់ និង ប្រធានក្រុមប្រឹក្សាភិបាល ប្រធាននាយកប្រតិបត្តិ លោក-លោកស្រីអនុប្រធាននាយកប្រតិបត្តិនិងជាប្រធាននាយក-នាយិកាប្រតិបត្តិ និងថ្នាក់ដឹកនាំធនាគារអេស៊ីលីដា ព្រមទាំងភ្ញៀវកិត្តិយសជាច្រើននាក់ទៀត ។

លោក សូយ ដារិទ្ធ នាយក ធនាគារអេស៊ីលីដា សាខាខេត្ដឧត្តរមានជ័យ បានមានប្រសាសន៍ថា ៖ គិតត្រឹមថ្ងៃទី៣១ ខែមីនា ឆ្នាំ២០១២ នេះ សាខាខេត្តឧត្តរមានជ័យ មានបណ្តាញប្រតិបត្តិការចំនួន០៥ បុគ្គលិកចំនួន៩៩នាក់ ទ្រព្យសកម្មចំនួន ១១,៧លានដុល្លារអាមេរិក អតិថិជនចំនួន ៤.៤៣៧នាក់ កំពុងប្រើប្រាស់សេវាឥណទានចំនួន ៩,២លានដុល្លារអាមេរិក និងអតិថិជនចំនួន ១១.០៨៧នាក់ កំពុងដាក់ប្រាក់បញ្ញើសន្សំចំនួន ៧,៥លានដុល្លារអាមេរិក និងអតិថិជនជាច្រើននាក់ទៀត បាននិងកំពុងប្រើប្រាស់សេវាកម្មផ្សេងៗទៀត រួមទាំងសេវាអេស៊ីលីដាយូនីធី ផងដែរ ។ យើងខ្ញុំក៏មានម៉ាស៊ីនដកប្រាក់ស្វ័យប្រវត្តិអេធីអឹម ចំនួន ២គ្រឿង ១គ្រឿងនៅសាខាខេត្តឧត្តរមានជ័យ និង១គ្រឿងទៀតនៅការិយាល័យស្រុកអន្លង់វែង សម្រាប់បម្រើសេវាជូនដល់អតិថិជន ២៤ម៉ោងក្នុងមួយថ្ងៃ ០៧ថ្ងៃក្នុងមួយសប្តាហ៍ តាមរយៈប័ណ្ណអេស៊ីលីដា ប័ណ្ណឥណពន្ធវីសាអេស៊ីលីដា និងប័ណ្ណវីសាធនាគារផ្សេងទៀត នៅទូទាំងពិភពលោក ។

លោកបានបន្តទៀតថា ៖ អគារថ្មីនេះបានសាងសង់ឡើងតាមបទដ្ឋានរបស់ធនាគារអេស៊ីលីដា ដោយយកចិត្តទុកដាក់ខ្លាំងលើការរក្សាសន្តិសុខ កំណារពារអគ្គិភ័យ ការបម្រុងថាមពល ផាសុកភាព និងសុវត្ថិភាពខ្ពស់ ព្រមទាំងមានទីកន្លែងសម្រាប់បម្រើអតិថិជន និងសម្រាប់បំពេញការងារធំទូលាយ ។ នេះជាព្រឹត្តិការណ៍ដ៏ពិសេសមួយនៅក្នុងឆ្នាំនេះ របស់សាខាខេត្តឧត្តរមានជ័យ ដែលបានបង្ហាញអំពីភាពរឹងមាំជាមួយការអភិវឌ្ឍឥតឈប់ឈរក្នុងការបម្រើសេវាកម្មហិរញ្ញវត្ថុកាន់តែលឿន រហ័សទាន់ចិត្ត អាចជឿជាក់បាន និងមានសុវត្ថិភាពខ្ពស់ សម្រាប់បំពេញតម្រូវការរបស់អតិថិជននៅក្នុងខេត្តឧត្តរមានជ័យទាំងមូល ។

លោក អ៊ិន ចាន់នី ប្រធាននាយកប្រតិបត្ដិ ធនាគារ អេស៊ីលីដា ភីអិលស៊ី

ឆ្លៀតក្នុងឱកាសដ៏មានសារៈសំខាន់នេះ លោក អ៊ិន ចាន់នី ប្រធាននាយកប្រតិបត្ដិ ធនាគារ អេស៊ីលីដា ភីអិលស៊ី បានថ្លែងថា ៖ អារ្យភាពទាន់សម័យជានិរន្តរ៍ គឺជាគោលដៅដ៏ចម្បងរបស់ធនាគារអេស៊ីលីដា ។ ធនាគារអេស៊ីលីដា បានបង្កើតឱ្យមានអារ្យភាពទាន់សម័យជានិរន្តរ៍សម្រាប់សេវាកម្មហិរញ្ញវត្ថុបែបនេះ អស់រយៈពេល ២០ឆ្នាំមកហើយ ដើម្បីបម្រើសេវាកម្មហិរញ្ញវត្ថុជូនដល់អតិថិជន ទាំងវិស័យឯកជន និងវិស័យសាធារណៈ តាមរយៈសាខា និងការិយាល័យទាំង២៥៩ ទូទាំងព្រះរាជាណាចក្រកម្ពុជា និងសាធារណរដ្ឋប្រជាធិបតេយ្យប្រជាមានិតឡាវ ។ បច្ចុប្បន្នធនាគារអេស៊ីលីដា មានអគារការិយាល័យស្ដង់ដារបែបនេះ ចំនួន១០២ និងកំពុងសាងសង់បន្ថែមជាបន្ដបន្ទាប់ ដើម្បីទទួលបម្រើអតិថិជន និងបង្កឱ្យមានភាពងាយស្រួលដល់អតិថិជនក្នុងការទាក់ទង សម្រាប់ប្រើប្រាស់សេវាហិរញ្ញវត្ថុនានារបស់ធនាគារអេស៊ីលីដា ជាពិសេសដើម្បីការពារសុវត្ថិភាពទ្រព្យសម្បត្ដិរបស់អតិថិជន ដែលបាននិងកំពុងប្រើប្រាស់សេវាធនាគារអេស៊ីលីដា ព្រមទាំងផ្តល់នូវផាសុកភាពនិងសុវត្ថិភាពការងារដល់បុគ្គលិក ដែលបាននិងកំពុងបម្រើការងារជាមួយធនាគារអេស៊ីលីដា ។ ថ្ងៃនេះខ្ញុំមានមោទនភាពយ៉ាងខ្លាំង ចំពោះសំណង់អគារការិយាល័យនេះ ដែលបានសាងសង់តាមស្ដង់ដាររបស់ធនាគារអេស៊ីលីដា ស្របតាមយុទ្ធសាស្ដ្រយូរអង្វែងរបស់យើង ។

លោកបានសំដែងនូវអំណរគុណយ៉ាងជ្រាលជ្រៅចំពោះរាជរដ្ឋាភិបាល ធនាគារជាតិនៃកម្ពុជា អាជ្ញាធរគ្រប់លំដាប់ថ្នាក់ ភាគហ៊ុនិក ក្រុមប្រឹក្សាភិបាល កម្មករនិយោជិតគ្រប់លំដាប់ថ្នាក់ទាំង ៧.៧២៩នាក់ និងអតិថិជនដ៏វៃឆ្លាតជាងមួយលាននាក់ ដែលតែងតែជួយគាំទ្រទាំងមធ្យោបាយ កំលាំងកាយ កំលាំងចិត្ដ និងសហការយ៉ាងពេញទំហឹងតាំងពីដើមរៀងមក ធ្វើឱ្យទ្រព្យសកម្មរបស់ធនាគារអេស៊ីលីដា កើនពីចំនួន ២២,៣លានដុល្លារអាមេរិក ក្នុងខែធ្នូ ឆ្នាំ២០០០ រហូតដល់ចំនួន ១.៦៩៤លានដុល្លារអាមេរិក នៅដំណាច់ខែមីនា ឆ្នាំ២០១២ ដោយរួមបញ្ចូលទាំងសមិទ្ធផលរបស់សាខាខេត្តឧត្តរមានជ័យផងដែរ ។ យុទ្ធសាស្ត្រមួយក្នុងចំណោមយុទ្ធសាស្ត្រចម្បងៗ របស់ធនាគារអេស៊ីលីដា គឺបង្កើតឱ្យមានប្រព័ន្ធធនាគារអេឡិចត្រូនិកឈានមុខគេ ដោយបំពាក់នូវប្រព័ន្ធ Online និងប្រព័ន្ធទំនើបធ្វើប្រតិបត្តិការធនាគារតាមប្រព័ន្ធទូរស័ព្ទចល័ត និងដាក់ពង្រាយម៉ាស៊ីនដកប្រាក់ស្វ័យប្រវត្តិអេធីអឹម ពាសពេញផ្ទៃប្រទេស ដើម្បីអាចបម្រើអតិថិជនឱ្យបាន ២៤ម៉ោងក្នុង១ថ្ងៃ និង៧ថ្ងៃក្នុង១សប្តាហ៍ ។

លោកបានបន្ថែមថា ៖ ធនាគារអេស៊ីលីដា បានបង្កើតក្រុមហ៊ុនបុត្រសម្ព័ន្ធមួយចំនួនដូចជា អេស៊ីលីដា ស៊ីឃ្យួរឹធី ភីអិលស៊ី និងភ្នាក់ងារចំនួនបួនទៀតដូចជា ភ្នាក់ងារបញ្ជិកាមូលបត្រ ភ្នាក់ងារទូទាត់ ភ្នាក់ងារចុះបញ្ជីផ្ទេរមូលបត្រ និងភ្នាក់ងារទូទាត់សាច់ប្រាក់ពាក់ព័ន្ធនឹងមូលបត្រ ដើម្បីធ្វើជាកម្លាំងចលករសម្រាប់ទ្រទ្រង់ការអភិវឌ្ឍវិស័យមូលបត្រ និងជំរុញឱ្យមានកំណើនសេដ្ឋកិច្ច ។ ទន្ទឹមនឹងនេះដែរ ធនាគារអេស៊ីលីដា ក៏បានបង្កើតឱ្យមាន អេស៊ីលីដា ត្រេននីង សេនធ័រ ដើម្បីអភិវឌ្ឍធនធានមនុស្ស និងចូលរួមចែករំលែកបទពិសោធន៍ និងភាពជោគជ័យលើវិស័យមីក្រូហិរញ្ញវត្ថុដល់ប្រតិបត្តិករ និងស្ថាប័នមីក្រូហិរញ្ញវត្ថុ ទាំងក្នុងតំបន់ និងក្រៅតំបន់ ។ ជាមួយគ្នានេះ ធនាគារអេស៊ីលីដា ក៏បានបង្កើតធនាគារបុត្រសម្ព័ន្ធនៅក្រៅប្រទេសគឺ ធនាគារ អេស៊ីលីដា ឡាវ ហើយបន្តពង្រីកវិសាលភាពប្រតិបត្តិការនៅក្នុងតំបន់អាស៊ាន និងបណ្ដាប្រទេសនៅតាមដងទន្លេមេគង្គដទៃទៀត បន្ទាប់ពីទទួលបានជោគជ័យនៅក្នុងប្រទេសឡាវ និងមីយ៉ាន់ម៉ា ។

ជាមួយគ្នានេះដែរ ឯកឧត្ដម លួន អាន អភិបាលរងខេត្ដឧត្តរមានជ័យ បានកត់សម្គាល់ថា ៖ ការវិវឌ្ឍរបស់ធនាគារ អេស៊ីលីដា សាខាខេត្ដឧត្តរមានជ័យ ជាសក្ខីកម្មដែលបញ្ជាក់ពីការរីកចម្រើន ភាពរឹងមាំ និងថែមទាំងបានបង្ហាញពីការចូលរួមចំណែកក្នុងការអភិវឌ្ឍសេដ្ឋកិច្ចក្នុងព្រះរាជាណាចក្រកម្ពុជា ជាពិសេសនៅក្នុងខេត្ដឧត្តរមានជ័យ ។ ថ្ងៃនេះក៏ជាពេលវេលាដ៏វិសេសវិសាល ក្នុងការបើកឱ្យដំណើរការនូវអគារការិយាល័យថ្មី របស់សាខាខេត្តឧត្តរមានជ័យ ដែលមានលក្ខណៈធំទូលាយ និងប្រណិតជាងមុន ។ ទាំងនេះជាភស្ដុតាងដែលបង្ហាញឱ្យឃើញថាសាខានេះ បានបង្កើតឡើង និងរីកចម្រើនធំធាត់យ៉ាងឆាប់រហ័ស ទាំងផ្នែកប្រតិបត្ដិការ ទាំងផ្នែកហេដ្ឋារចនាសម្ព័ន្ធ និងទាំងផ្នែកប្រសិទ្ធភាពអាជីវកម្ម ។ ក្នុងរយៈពេលកន្លងទៅ ដំណើរការវិវឌ្ឍរបស់សាខានេះ ពិតជាបានផ្ដល់អត្ថប្រយោជន៍យ៉ាងច្រើន ចំពោះប្រជាពលរដ្ឋ និងអ្នកជំនួញនៅក្នុងស្រុកទាំងមូល ទទួលបាននូវប្រភពធនធានហិរញ្ញវត្ថុ និងសេវាកម្មហិរញ្ញវត្ថុផ្សេងៗទៀត ដែលជាគន្លឹះក្នុងការចូលរួមបង្កើតឱ្យមានការងារ, ប្រភពចំណូល, អភិវឌ្ឍន៍សេដ្ឋកិច្ច និងលើកកម្ពស់កម្រិតជីវភាពរបស់ប្រជាពលរដ្ឋនៅក្នុងខេត្ដឧត្តរមានជ័យទាំងមូល ។

គណៈអធិបតី ព្រមទាំងភ្ញៀវកិត្តិយស ថតរូបទុកជាអនុស្សាវរីយ៍ក្នុងពិធីសម្ពោធអគារការិយាល័យថ្មី សាខាខេត្តឧត្តរមានជ័យ

« ព័ត៌មានមុន
ធនាគារ អេស៊ីលីដា បើកសាខាថ្មីនៅខាងត្បូងវិមានឯករាជ្យ ព័ត៌មានបន្ទាប់ »
ធនាគារ អេស៊ីលីដា ភីអិលស៊ី ចុះកិច្ចព្រមព្រៀងជាមួយបេឡាជាតិអតីតយុទ្ធជន

ពិធី​សម្ពោធ​​អគារ​ការិយាល័យ​ថ្មី សាខា​ខេត្ត​ឧត្តរមានជ័យ

ពិធីសម្ពោធអគារការិយាល័យថ្មី សាខាខេត្តឧត្តរមានជ័យ