ព័ត៌មានព័ត៌មានថ្មីៗធនាគារអេស៊ីលីដា ទទួលបានពានរង្វាន់ជាសហគ្រាសឆ្នើមអាស៊ាន

ធនាគារអេស៊ីលីដា ទទួលបានពានរង្វាន់ជាសហគ្រាសឆ្នើមអាស៊ាន ឆ្នាំ២០១២

ពានរង្វាន់ជាសហគ្រាសឆ្នើមអាស៊ាន ឆ្នាំ២០១២ លើផ្នែកធុរៈកិច្ចដែលមានភាពលូតលាស់ខ្លាំងជាងគេ និងលើផ្នែកបង្កើតការងារថ្មីបានច្រើនជាងគេ

ថ្ងៃទី១៧ ខែវិច្ឆិកា ឆ្នាំ២០១២

ភ្នំពេញ, ថ្ងៃទី១៧ ខែវិច្ឆិកា ឆ្នាំ២០១២ ធនាគារ អេស៊ីលីដា ភីអិលស៊ី ជាធនាគារដែលលោកអ្នកជឿទុកចិត្ត បានប្រកាសនៅថ្ងៃនេះថា ធនាគារបានទទួលពានរង្វាន់ជាសហគ្រាសឆ្នើមអាស៊ាន ឆ្នាំ២០១២ លើផ្នែកធុរៈកិច្ចដែលមានភាពលូតលាស់ខ្លាំងជាងគេ និងលើផ្នែកបង្កើតការងារថ្មីបានច្រើនជាងគេ ។

ក្រុមប្រឹក្សាពិគ្រោះយោបល់ធុរៈកិច្ចអាស៊ាន បានចាប់ផ្តើមប្រគល់ពានរង្វាន់ធុរៈកិច្ចអាស៊ាន ម្តងទៀត សម្រាប់ការទទួលស្គាល់ពីភាពល្អប្រសើរបំផុត និងការទទួលបានជោគជ័យរបស់ក្រុមហ៊ុនអាស៊ានជាច្រើន ដែលបាននិងកំពុងចូលរួមយ៉ាងសកម្មទៅក្នុងការរីកលូតលាស់ និងវិបុលភាព នៃសេដ្ឋកិច្ចអាស៊ាន ។ ពានរង្វាន់នឹងអនុវត្តទៅលើការទទួលស្គាល់ "សហគ្រាសឆ្នើមក្នុងអាស៊ាន" ដែលបានប្រគល់ជូនទៅផ្នែកមួយចំនួនដូចជា ៖ ការបង្កើតការងារច្រើនជាងគេ ការចូលរួមក្នុងសង្គម ការបង្ហាញពីវិសាលភាពដ៏ធំធេងរបស់ក្រុមហ៊ុនជាច្រើន និងសហគ្រាសខ្នាតតូចនិងមធ្យម ដែលមកពីប្រទេសប្រ៊ុយណេ ប្រទេសកម្ពុជា ប្រទេសឥណ្ឌូនេស៊ី ប្រទេសឡាវ ប្រទេសម៉ាឡេស៊ី ប្រទេសមីយ៉ាន់ម៉ា ប្រទេសហ្វីលីពិន ប្រទេសសឹង្ហបូរី ប្រទេសថៃ និងប្រទេសវៀតណាម ។

ឯកឧត្តម ចម ប្រសិទ្ធ ទេសរដ្ឋមន្ត្រី រដ្ឋមន្ត្រីក្រសួងពាណិជ្ជកម្ម ប្រគល់ពានរង្វាន់ជាសហគ្រាសឆ្នើមអាស៊ានឆ្នាំ២០១២ ជូនបណ្ឌិត អ៊ិន ចាន់នី ប្រធាននាយកប្រតិបត្តិ ធនាគារ អេស៊ីលីដា ភីអិលស៊ី

ពានរង្វាន់សម្រាប់ផ្នែកធុរៈកិច្ចដែលមានភាពលូតលាស់ខ្លាំងនេះ ត្រូវបានវាយតម្លៃដោយផ្អែកលើលក្ខណៈវិនិច្ឆ័យដូចជា ៖ កម្រិតនៃការកើនឡើងប្រាក់ចំណេញ កំណែទម្រង់រយៈពេលវែងសម្រាប់ទ្រទ្រង់កម្រិតនៃការរីកចម្រើន ប្រាក់ចំណូលធៀបនឹងទុនវិនិយោគ ប្រាក់ចំណូលធៀបនឹងទ្រព្យសកម្ម និងភាគរយនៃការកើនឡើងប្រាក់ចំណូលប្រចាំឆ្នាំ ។ ពានរង្វាន់សម្រាប់ផ្នែកបង្កើតការងារថ្មីបានច្រើនជាងគេ ត្រូវបានវាយតម្លៃ ដោយផ្អែកលើលក្ខណៈវិនិច្ឆ័យដូចជា ៖ ចំនួននៃការបង្កើតការងារថ្មី អត្រាកំណើននៃបុគ្គលិក ចំណាយលើការហ្វឹកហ្វឺនបុគ្គលិកក្នុងម្នាក់ ការបង្កើតបរិយាកាសការងារដ៏ជាក់លាក់មួយ ការថែទាំសុខភាព និងប្រព័ន្ធវាយតម្លៃអនុវត្តការងារដ៏ត្រឹមត្រូវ ។

បណ្ឌិត អ៊ិន ចាន់នី ប្រធាននាយកប្រតិបត្តិ ធនាគារ អេស៊ីលីដា ភីអិលស៊ី បានមានប្រសាសន៍ថា ៖ នេះជាសមិទ្ធផលដ៏មានសារៈសំខាន់បំផុតរបស់ធនាគារអេស៊ីលីដា ជាធនាគារក្នុងស្រុក ដែលជាធនាគារពាណិជ្ជនាំមុខគេក្នុងប្រទេសកម្ពុជា និងជាបេក្ខភាពនៃប្រទេសកម្ពុជា បានចូលរួមជាលើកដំបូង ដែលមានកិត្តិយសជាមួយនឹងកិត្យានុភាព ដែលទទួលបានពានរង្វាន់ជាសហគ្រាសឆ្នើមអាស៊ាន ឆ្នាំ២០១២ លើផ្នែកធុរៈកិច្ចដែលមានភាពលូតលាស់ខ្លាំងជាងគេ និងលើផ្នែកបង្កើតការងារថ្មីបានច្រើនជាងគេ ។ យើងមានមោទនភាពដែលថា មិនត្រឹមតែការចូលរួមចំណែកអភិវឌ្ឍន៍សេដ្ឋកិច្ចប្រទេសកម្ពុជាប៉ុណ្ណោះទេ ប៉ុន្តែយើងក៏បានសម្រេចនូវការចូលរួមអភិវឌ្ឍន៍សេដ្ឋកិច្ចអាស៊ាន ក៏ដូចជាសហគមន៍អាស៊ានផងដែរ ។ នេះជាកត្តាជំរុញលើកទឹកចិត្តឱ្យធនាគារអេស៊ីលីដា បន្តធ្វើការពង្រីកហេដ្ឋារចនាសម្ព័ន្ធបណ្តាញប្រតិបត្តិការ ពង្រឹងគុណភាព និងបង្កើតឱ្យមានប្រព័ន្ធធនាគារអេឡិចត្រូនិកឈានមុខគេ ដោយបំពាក់នូវប្រព័ន្ធ Online និងប្រព័ន្ធទំនើបធ្វើប្រតិបត្តិការធនាគារ តាមប្រព័ន្ធទូរស័ព្ទចល័ត ដាក់ពង្រាយម៉ាស៊ីនដកប្រាក់ស្វ័យប្រវត្តិអេធីអឹម ពាសពេញប្រទេស ដើម្បីអាចបម្រើអតិថិជនឱ្យបាន ២៤ម៉ោង ក្នុង១ថ្ងៃ និង៧ថ្ងៃ ក្នុង១សប្តាហ៍ ។

ថ្នាក់ដឹកនាំជាន់ខ្ពស់របស់ធនាគារអេស៊ីលីដា និងក្រុមហ៊ុនបុត្រសម្ព័ន្ធ ចូលរួមក្នុងពិធីប្រគល់ពាន់រង្វាន់នេះ

ធនាគារអេស៊ីលីដា មានបណ្តាញការិយាល័យប្រតិបត្តិការចំនួន ២៣៨ ទូទាំងព្រះរាជាណាចក្រកម្ពុជា, ២៨ការិយាល័យ នៅប្រទេសឡាវ និង ០១ការិយាល័យ នៅមីយ៉ាន់ម៉ា ជាមួយនឹងទ្រព្យសកម្មសរុបចំនួនជាង ១,៩ពាន់លានដុល្លារអាមេរិក នៅដំណាច់ខែតុលា ឆ្នាំ២០១២ ។ ធនាគារអេស៊ីលីដា មានក្រុមហ៊ុនបុត្រសម្ព័ន្ធចំនួនបួន គឺ ធនាគារ អេស៊ីលីដា ឡាវ, អេស៊ីលីដា ស៊ីឃ្យួរឹធី ភីអិលស៊ី, អេស៊ីលីដា ត្រេននីង សេនធ័រ និងស្ថាប័នមីក្រូហិរញ្ញវត្ថុ ACLEDA MFI Myanmar Co., Ltd. ហើយតាមយុទ្ធសាស្ត្រ យើងនឹងបន្តពង្រីកវិសាលភាពប្រតិបត្តិការទៅក្នុងតំបន់អាស៊ាន និងបណ្តាប្រទេសដែលមានសក្តានុពលនៅតាមដងទន្លេមេគង្គដទៃទៀត ។

សម្រាប់ព័ត៌មានបន្ថែម សូមទាក់ទងតាមរយៈ

លោកស្រី សូ ផនណារី អនុប្រធាននាយកប្រតិបត្តិ និងជាប្រធាននាយិកាប្រតិបត្តិប្រតិបត្តិការ
អ៊ីម៉ែល :

លោក ព្រំ វិសុទ្ធ អនុប្រធាននាយកប្រតិបត្តិ និងជាប្រធាននាយកប្រតិបត្តិនីតិកម្ម
អ៊ីម៉ែល :

« ព័ត៌មានមុន
ព្រះរាជសាររបស់ព្រះមហាក្សត្រនៃព្រះរាជាណាចក្រកម្ពុជា ព័ត៌មានបន្ទាប់ »
ធនាគារអេស៊ីលីដា ពង្រីកបណ្តាញប្រតិបត្តិការទៅកាន់សាធារណរដ្ឋសហភាពមីយ៉ាន់ម៉ា

ធនាគារ​អេស៊ីលីដា ទទួល​បាន​ពាន​រង្វាន់​ជា​សហគ្រាស​ឆ្នើម​អាស៊ាន ឆ្នាំ២០១២

ធនាគារអេស៊ីលីដា ទទួលបានពានរង្វាន់ជាសហគ្រាសឆ្នើមអាស៊ាន ឆ្នាំ២០១២