ព័ត៌មានព័ត៌មានថ្មីៗធនាគារអេស៊ីលីដា ពង្រីកបណ្តាញប្រតិបត្តិការទៅកាន់សាធារណរដ្ឋសហភាពមីយ៉ាន់ម៉ា

ធនាគារអេស៊ីលីដា ពង្រីកបណ្តាញប្រតិបត្តិការទៅកាន់សាធារណរដ្ឋសហភាពមីយ៉ាន់ម៉ា

ថ្ងៃទី១៩ ខែវិច្ឆិកា ឆ្នាំ២០១២

ការមកដល់របស់បុគ្គលិកមីយ៉ាន់ម៉ានៅព្រលានយន្តហោះអន្តរជាតិភ្នំពេញ

ភ្នំពេញ, ថ្ងៃទី១៩ ខែវិច្ឆិកា ឆ្នាំ២០១២, ធនាគារអេស៊ីលីដា ជាធនាគារដែលលោកអ្នកជឿទុកចិត្ត បានប្រកាសនៅថ្ងៃនេះថា ធនាគារបានពង្រីកបណ្តាញប្រតិបត្តិការរបស់ខ្លួនទៅកាន់សាធារណរដ្ឋសហភាពមីយ៉ាន់ម៉ា ដោយបានចុះបញ្ជី និងបង្កើតជាក្រុមហ៊ុនបុត្រសម្ព័ន្ធពេញលេញរបស់ខ្លួនមួយ គឺស្ថាប័នមីក្រូហិរញ្ញវត្ថុ ACLEDA MFI Myanmar Co., Ltd. ។ ពេលនេះស្ថាប័នមីក្រូហិរញ្ញវត្ថុ ACLEDA MFI Myanmar Co., Ltd. បានជ្រើសរើសបុគ្គលិកដែលជាជនជាតិមីយ៉ាន់ម៉ាចំនួន ២៦រូប នៃគម្រោងផែនការដែលត្រូវជ្រើសរើសទាំងថ្នាក់គ្រប់គ្រង និងបុគ្គលិកចំនួន ៧៥០រូប ដែលបានបញ្ចប់ការសិក្សានៅតាមសាកលវិទ្យាល័យមួយចំនួន នៅប្រទេសមីយ៉ាន់ម៉ា ។ ថ្ងៃនេះបុគ្គលិកដែលបានជ្រើសរើសប្រកបដោយគុណវុឌ្ឍិខ្ពស់ចំនួន ២៦រូបនោះ មានឱកាសជាលើកដំបូង ដែលពួកគាត់បានមកដល់ប្រទេសកម្ពុជា សម្រាប់វគ្គហ្វឹកហ្វឺនទ្រឹស្តី រយៈពេលបីសប្តាហ៍ ហើយបីសប្តាហ៍ទៀត សម្រាប់ការអនុវត្តជាក់ស្តែងជាមួយនឹងដៃគូកម្ពុជា និងបុគ្គលិកដែលមានវិជ្ជាជីវៈច្បាស់លាស់ របស់ធនាគារអេស៊ីលីដា ។ វគ្គហ្វឹកហ្វឺន នឹងរៀបចំដោយអេស៊ីលីដា ត្រេននីង សេនធ័រ ក្នុងរាជធានីភ្នំពេញ ព្រះរាជាណាចក្រកម្ពុជា ។

លោក គឹម ប៊ុនសុជាតិ អគ្គនាយកស្ថាប័នមីក្រូហិរញ្ញវត្ថុ ACLEDA MFI Myanmar Co., Ltd. បានមានប្រសាសន៍ថា ៖ ស្ថាប័នមីក្រូហិរញ្ញវត្ថុ ACLEDA MFI Myanmar Co., Ltd. គឺជាក្រុមហ៊ុនបុត្រសម្ព័ន្ធពេញលេញនៃធនាគារអេស៊ីលីដា ដែលត្រូវបានផ្តល់វិញ្ញាបនបត្រចុះបញ្ជីក្រុមហ៊ុនបណ្តោះអាសន្ន ដោយអគ្គនាយកដ្ឋាននៃការវិនិយោគ និងការគ្រប់គ្រងក្រុមហ៊ុន នៃប្រទេសមីយ៉ាន់ម៉ា នៅថ្ងៃទី០៦ ខែកញ្ញា ឆ្នាំ២០១២ ដែលអាចបង្កើតការិយាល័យរបស់ខ្លួន និងជ្រើសរើសបុគ្គលិក ។ ពេលនេះយើងបានបញ្ចប់រួចរាល់លើការជ្រើសរើសបុគ្គលិកមីយ៉ាន់ម៉ាចំនួន ២៦រូប ហើយក៏បានចាប់ផ្តើមបញ្ជូនពួកគាត់មកប្រទេសកម្ពុជា ដើម្បីចូលរួមវគ្គសិក្សាទ្រឹស្តី និងការអនុវត្តការងារជាក់ស្តែងសម្រាប់រយៈពេល ០៦សប្តាហ៍ នៅអេស៊ីលីដា ត្រេននីង សេនធ័រ នៅរាជធានីភ្នំពេញ ព្រះរាជាណាចក្រកម្ពុជា ។ ស្ថាប័នមីក្រូហិរញ្ញវត្ថុ ACLEDA MFI Myanmar Co., Ltd. នឹងចាប់ផ្តើមធ្វើប្រតិបត្តិការ របស់ខ្លួននៅពាក់កណ្តាល ខែមករា ឆ្នាំ២០១៣ ហើយមានគម្រោងជ្រើសរើសបុគ្គលិកមីយ៉ាន់ម៉ា ចំនួនរាប់រយនាក់បន្ថែមទៀត ដើម្បីជួយសម្រួលដល់ការពង្រីកប្រតិបត្តិការរបស់ខ្លួននៅប្រទេសមីយ៉ាន់ម៉ា ។

លោក ឆន ពន្លឺ អគ្គនាយក អេស៊ីលីដា ត្រេននីង សេនធ័រ បានមានប្រសាសន៍ថា ៖ អេស៊ីលីដា ត្រេននីង សេនធ័រ គឺជាមជ្ឈមណ្ឌលហ្វឹកហ្វឺនចំណេះជំនាញដ៏ជាក់លាក់មួយ ដែលបានផ្តល់ជូននូវចំណេះដឹង និងជំនាញច្បាស់លាស់ ទាក់ទងនឹងមីក្រូហិរញ្ញវត្ថុ និងធនាគារ ជូនដល់រាល់គ្រប់ស្ថាប័នមីក្រូហិរញ្ញវត្ថុទាំងអស់ ធនាគារិក និងសិស្សនិស្សិតដែលបានបញ្ចប់ការសិក្សានៅក្នុងប្រទេសកម្ពុជា នៅក្នុងតំបន់ និងអន្តរជាតិ ។ គ្រប់បុគ្គលិកដែលបានជ្រើសរើសដោយធនាគារអេស៊ីលីដា ហើយនឹងក្រុមហ៊ុនបុត្រសម្ព័ន្ធទាំងអស់របស់ខ្លួន ត្រូវបានផ្តល់ការហ្វឹកហ្វឺនដោយអេស៊ីលីដា ត្រេននីង សេនធ័រ លើការសិក្សាទ្រឹស្តីរយៈពេលបីសប្តាហ៍ និងការអនុវត្តការងារជាក់ស្តែងរយៈពេលបីសប្តាហ៍បន្ថែមទៀតផងដែរ នៅធនាគារអេស៊ីលីដា រាជធានីភ្នំពេញ ព្រះរាជាណាចក្រកម្ពុជា ។

បណ្ឌិត អ៊ិន ចាន់នី ប្រធាននាយកប្រតិបត្តិ ធនាគារអេស៊ីលីដា ភីអិលស៊ី ជួបសំណេះសំណាលជាមួយបុគ្គលិកមីយ៉ាន់ម៉ា

បណ្ឌិត អ៊ិន ចាន់នី ប្រធាននាយកប្រតិបត្តិ ធនាគារ អេស៊ីលីដា ភីអិលស៊ី បានមានប្រសាសន៍ថា ៖ នេះជាការពង្រីកបណ្តាញប្រតិបត្តិការក្រៅប្រទេសទីពីររបស់យើង បន្ទាប់ពីយើង ទទួលបានជោគជ័យកន្លងមកនៅប្រទេសឡាវ ហើយក៏ជាក្រុមហ៊ុនបុត្រសម្ព័នទីបួន របស់ធនាគារអេស៊ីលីដា ផងដែរ ។ ស្ថាប័នមីក្រូហិរញ្ញវត្ថុ ACLEDA MFI Myanmar Co., Ltd. នឹងចាប់ផ្តើមបើកប្រតិបត្តិការស្ថាប័នមីក្រូហិរញ្ញវត្ថុ ជាមួយនឹងដើមទុនដំបូងបង្អស់ដែលមានចំនួន ៨ពាន់លានក្យាត់ ឬប្រហែល ១០លានដុល្លារអាមេរិក ។ ការផ្តោតជាចម្បងរបស់យើងគឺ ការបង្កើតការិយាល័យកណ្តាល នៅប្រទេសមីយ៉ាន់ម៉ា ដែលយើងបានរៀបចំរួចរាល់ហើយ និងការកសាងនូវសមត្ថភាពរបស់បុគ្គលិកដែលមានវិជ្ជាជីវៈរបស់ពួកយើង ដោយផ្តល់ជូនពួកគេនូវចំណេះដឹង ជំនាញ និងទេពកោសល្យ ។ ដូច្នេះហើយពួកគេអាចទទួលខុសត្រូវ លើការងារដោយឯករាជ្យបានទាំងស្រុង ច្បាស់លាស់ និងផ្តល់ជូនសេវាកម្មរួមជាមួយនឹងការទទួលខុសត្រូវដែលមានគុណភាព យោងតាមតម្រូវការរបស់អតិថិជនខ្នាតតូចនៅប្រទេសមីយ៉ាន់ម៉ា ។ យើងមានការិយាល័យដែលរៀបចំល្អ ពេលនេះយើងក៏មានបុគ្គលិកល្អ លើដំណើរការហ្វឹកហ្វឺន និងទទួលបាននូវការអនុវត្តជាក់ស្តែង នៅប្រទេសកម្ពុជា ហើយផ្តល់ជូនពួកគេទាំងវិជ្ជាជីវៈ និងបទពិសោធន៍ ។ ផ្តល់ជូនឱ្យពួកគាត់ទទួលបាននូវបទពិសោធន៍ និងភាពជោគជ័យពីមុនៗ របស់ធនាគារអេស៊ីលីដា ក្នុងប្រទេសកម្ពុជា ។ ការបង្ហាញពីបទពិសោធន៍ ភាពជោគជ័យ និងការរីកចម្រើនរយៈពេល ៦សប្តាហ៍ នៅក្នុងប្រទេសកម្ពុជា ពួកគេអាចធ្វើឱ្យក្រុមហ៊ុនបុត្រសម្ព័ន្ធរបស់យើង នៅក្នុងប្រទេសមីយ៉ាន់ម៉ា គឺស្ថាប័នមីក្រូហិរញ្ញវត្ថុ ACLEDA MFI Myanmar Co., Ltd. ទទួលបាននូវកំណត់ត្រាជោគជ័យថ្មី បន្ថែមទៀត ។

ធនាគារអេស៊ីលីដា មានបណ្តាញការិយាល័យប្រតិបត្តិការចំនួន ២៣៨ទូទាំងព្រះរាជាណាចក្រកម្ពុជា និង ២៨ការិយាល័យនៅប្រទេសឡាវ និង ០១សាខានៅប្រទេសមីយ៉ាន់ម៉ា ជាមួយនឹងទ្រព្យសកម្មសរុបចំនួនជាង ១,៩ពាន់លានដុល្លារអាមេរិក នៅដំណាច់ ខែតុលា ឆ្នាំ២០១២ ។ ធនាគារអេស៊ីលីដា មានក្រុមហ៊ុនបុត្រសម្ព័ន្ធចំនួនបួន គឺ ធនាគារ អេស៊ីលីដា ឡាវ, អេស៊ីលីដា ស៊ីឃ្យួរឹធី ភីអិលស៊ី, អេស៊ីលីដា ត្រេននីង សេនធ័រ និងស្ថាប័នមីក្រូហិរញ្ញវត្ថុ ACLEDA MFI Myanmar Co., Ltd. ហើយតាមយុទ្ធសាស្ត្រ យើងនឹងបន្តពង្រីកវិសាលភាពប្រតិបត្តិការទៅក្នុងតំបន់អាស៊ាន និងបណ្តាប្រទេសនៅតាមដងទន្លេមេគង្គដទៃទៀត ។

សម្រាប់ព័ត៌មានបន្ថែម សូមទាក់ទងតាមរយៈ

លោកស្រី សូ ផនណារី អនុប្រធាននាយកប្រតិបត្តិ និងជាប្រធាននាយិកាប្រតិបត្តិប្រតិបត្តិការ
អ៊ីម៉ែល ៖

លោក ព្រំ វិសុទ្ធ អនុប្រធាននាយកប្រតិបត្តិ និងជាប្រធាននាយកប្រតិបត្តិនីតិកម្ម
អ៊ីម៉ែល ៖

« ព័ត៌មានមុន
ធនាគារអេស៊ីលីដា ទទួលបានពានរង្វាន់ជាសហគ្រាសឆ្នើមអាស៊ាន ឆ្នាំ២០១២ ព័ត៌មានបន្ទាប់ »
ធនាគារអេស៊ីលីដា ប្រារព្ធពិធីបញ្ចុះបឋមសិលាបើកការដ្ឋានសាងសង់អគារការិយាល័យកណ្ដាលថ្មីបន្ថែម

ធនាគារ​អេស៊ីលីដា ពង្រីក​បណ្តាញ​ប្រតិបត្តិការ​ទៅ​កាន់​សាធារណរដ្ឋ​សហភាព​មីយ៉ាន់ម៉ា

ធនាគារអេស៊ីលីដា ពង្រីកបណ្តាញប្រតិបត្តិការទៅកាន់សាធារណរដ្ឋសហភាពមីយ៉ាន់ម៉ា