ព័ត៌មានព័ត៌មានថ្មីៗធនាគារអេស៊ីលីដា ប្រារព្ធពិធីបញ្ចុះបឋមសិលាបើកការដ្ឋានសាងសង់អគារការិយាល័យកណ្ដាលថ្មីបន្ថែម

ធនាគារអេស៊ីលីដា ប្រារព្ធពិធីបញ្ចុះបឋមសិលាបើកការដ្ឋានសាងសង់អគារការិយាល័យកណ្ដាលថ្មីបន្ថែម

គំនូរអគារការិយាល័យកណ្តាលថ្មីបន្ថែមរបស់ធនាគារ អេស៊ីលីដា ភីអិលស៊ី

ថ្ងៃទី១៧ ខែធ្នូ ឆ្នាំ២០១២

ភ្នំពេញ, ថ្ងៃទី១៧ ខែធ្នូ ឆ្នាំ២០១២ ធនាគារអេស៊ីលីដា ជាធនាគារដែលលោកអ្នកជឿទុកចិត្ត និងជាធនាគារពាណិជ្ជនាំមុខគេ ក្នុងព្រះរាជាណាចក្រកម្ពុជា បានប្រារព្ធពិធីបញ្ចុះបឋមសិលាបើកការដ្ឋានសាងសង់អគារការិយាល័យកណ្ដាលថ្មីបន្ថែម នៅខាងក្រោយអគារការិយាល័យកណ្ដាលបច្ចុប្បន្ន ដែលស្ថិតនៅអគារលេខ៦១ មហាវិថីព្រះមុនីវង្ស សង្កាត់ស្រះចក ខណ្ឌដូនពេញ រាជធានីភ្នំពេញ ។ អគារការិយាល័យកណ្ដាលថ្មីនេះ នឹងត្រូវសាងសង់ឡើងតាមលក្ខណៈទំនើប ដែលមានកំពស់ ២០ជាន់ និងអគារក្រោមដីចំនួន ៤ជាន់ ដែលមានទំហំ ៤៣.០០០ ម៉ែត្រការ៉េ សម្រាប់បំពេញការងារ រួមមាន ៖ (ការិយាល័យសម្រាប់ធ្វើការងារ, អាហារដ្ឋាន, និងចំណតយានយន្ត) ។ ការិយាល័យថ្មីនេះ នឹងបំពាក់ទៅដោយប្រព័ន្ធការពារសន្តិសុខ, ការសន្សំសំចៃថាមពលប្រើប្រាស់, ការបង្ការអគ្គិភ័យ, បណ្តាញត្រួតពិនិត្យ និងប្រព័ន្ធទូរគមនាគមន៍, ហើយនិងប្រព័ន្ធគាំទ្របច្ចេកវិទ្យាព័ត៌មានរួម ។

អគារការិយាល័យកណ្តាលថ្មីនេះ ត្រូវបានគូរប្លង់ដោយក្រុមហ៊ុនដែលមានឈ្មោះល្បីល្បាញ និងមានការទទួលស្គាល់ជាអន្តរជាតិ ដូចជា ៖ ក្រុមហ៊ុន Aedas ជាទីប្រឹក្សាបច្ចេកទេសផ្នែកស្ថាបត្យកម្ម, iLi Consulting Engineers Mekong Ltd. ជាទីប្រឹក្សាបច្ចេកទេសផ្នែកវិស្វកម្ម, Optima Consultant Ltd. ជាទីប្រឹក្សាបច្ចេកទេសផ្នែកមេកានិកអគ្គិសនីនិងប្រព័ន្ធបណ្តាញទឹក និង BK Asia Pacific ជាទីប្រឹក្សាផ្នែកគ្រប់គ្រងចំណាយ ។ អគារថ្មីនេះ នឹងត្រូវសាងសង់ដោយក្រុមហ៊ុន HYUNDAI AMCO CO., LTD. ដែលជាក្រុមហ៊ុនជំនាញ និងមានឈ្មោះល្បីល្បាញលើការសាងសង់អគារជាច្រើននៅប្រទេសកូរ៉េខាងត្បូង និងនៅបរទេស ព្រមទាំងទទួលបានជោគជ័យនៅក្នុងប្រទេសកម្ពុជា ។ ធនាគារអេស៊ីលីដា បានទទួលច្បាប់អនុញ្ញាតសាងសង់ ដោយអនុលោមតាមលិខិតលេខ ៖ ២៥៣ ដនស/អដន ចុះថ្ងៃទី២១ ខែវិច្ឆិកា ឆ្នាំ២០១២ របស់ក្រសួងរៀបចំដែនដីនគរូបនីយកម្ម និងសំណង់ និងលិខិតអនុញ្ញាតបើកការដ្ឋានសាងសង់លេខ ៖ ១៦២ អសណ/នសណ ចុះថ្ងៃទី២២ ខែវិច្ឆិកា ឆ្នាំ២០១២ របស់អគ្គនាយកដ្ឋានសំណង់ ។ ការដ្ឋានសាងសង់នេះ នឹងត្រូវចាប់ផ្តើមសាងសង់នៅក្នុង ខែធ្នូ ឆ្នាំ២០១២ ហើយរំពឹងថារយៈពេលសាងសង់នឹងត្រូវបញ្ចប់ឱ្យរួចរាល់ក្នុងរយៈពេល ២៤ខែ ។

បណ្ឌិត អ៊ិន ចាន់នី ប្រធាននាយកប្រតិបត្តិធនាគារ អេស៊ីលីដា ភីអិលស៊ី និង លោក HW Son ប្រធាននាយកប្រតិបត្តិក្រុមហ៊ុន HYUNDAI AMCO CO.,LTD.

បណ្ឌិត អ៊ិន ចាន់នី ប្រធាននាយកប្រតិបត្តិធនាគារ អេស៊ីលីដា ភីអិលស៊ី បានមានប្រសាសន៍ថា ៖ ដោយអតិថិជនបានផ្តល់ការជឿទុកចិត្តមកលើធនាគារអេស៊ីលីដាកាន់តែខ្លាំង ព្រមទាំងមានសេចក្តីត្រូវការសេវាកម្មហិរញ្ញវត្ថុ និងផលិតផលផ្សេងៗរបស់ធនាគារអេស៊ីលីដា កាន់តែខ្ពស់ក្នុងរយៈពេល ១២ឆ្នាំ កន្លងមកនេះ ហើយពិសេសជាងនេះទៅទៀត គឺរយៈពេល ៥ឆ្នាំ ដែលយើងបានប្តូរមកទីតាំងការិយាល័យថ្មី នៅក្នុងឆ្នាំ២០០៧ ។ ឥណទានមានការកើនឡើង ២៨៩% ពី ៣១៥លានដុល្លារអាមេរិក រហូតដល់ ១,២ពាន់លានដុល្លារអាមេរិក, ប្រាក់បញ្ញើសន្សំបានកើនឡើង ៣១៨% ពី ៣៤៤,៦លានដុល្លារអាមេរិក រហូតដល់ ១,៤៤ពាន់លានដុល្លារអាមេរិក នៅក្នុងខែវិច្ឆិកា ឆ្នាំ២០១២, សាខា និងការិយាល័យមានការកើនឡើងពី ២០៤ រហូតដល់ ២៣៨ សាខា និងការិយាល័យ គិតជាភាគរយមានការកើនឡើង ១៧% ហើយចំនួនបុគ្គលិកមានការកើនឡើងពី ៤.៤០១នាក់ រហូតដល់ ៧.៦១១នាក់ សម្រាប់រយៈពេលដូចគ្នា គិតជាភាគរយមានការកើនឡើង ៧៣% ។ ដើម្បីឆ្លើយតបទៅនឹងការកើនឡើងនេះ ធនាគារអេស៊ីលីដា មានតម្រូវការពង្រីកការិយាល័យបន្ថែមទៀត នៅក្នុងអំឡុងពេលនៃការបង្កើតសាខា និងការិយាល័យជាច្រើននៅទូទាំងប្រទេស ជាពិសេសជាងនេះទៅទៀតនោះ គឺការិយាល័យកណ្តាលបច្ចុប្បន្ន ផ្គួបផ្សំជាមួយនឹងការកើនឡើងនេះ ដើម្បីបម្រើសេវាកម្មល្អបំផុតជូនដល់អតិថិជនដ៏វៃឆ្លាតរបស់យើង និងសម្រាប់រក្សាសុវត្ថិភាពទ្រព្យសម្បត្តិរបស់ពួកគាត់ ដែលដាក់នៅធនាគារយើង ។ ៥ឆ្នាំ កន្លងមក យើងបានសាងសង់អគារការិយាល័យកណ្តាលបច្ចុប្បន្ននេះ មានចំនួន ៦ជាន់ ដែលមានកន្លែងបំពេញការងារទំហំ ៦.០៨៣ម៉ែត្រការ៉េ សម្រាប់បុគ្គលិកការិយាល័យកណ្តាល ចំនួន ៥០០នាក់ ហើយជាមួយនឹងចំណតយានយន្ត ចំនួន ១៦៨ គ្រឿង ។ ថ្ងៃនេះយើងប្រារព្ធពិធីបញ្ចុះបឋមសិលាបើកការដ្ឋានសាងសង់ ដើម្បីធ្វើការពង្រីកបន្ថែម និងសាងសង់ការិយាល័យកណ្តាលថ្មី ដែលមានកំពស់ ២០ជាន់ និងអគារក្រោមដីចំនួន ៤ជាន់ ដោយមានផ្ទៃអគារសរុបចំនួន ៤៣.០០០ម៉ែត្រការ៉េ សម្រាប់បុគ្គលិកការិយាល័យកណ្តាលចំនួន ១.៤០០នាក់ ដែលអាចដាក់រថយន្តបានចំនួន ៧០៣ គ្រឿង និងអាហារដ្ឋានដែលមានផាសុកភាពសម្រាប់បុគ្គលិក ។

ពិធីក្រុងពាលីបើកការដ្ឋានសាងសង់អគារការិយាល័យកណ្ដាលថ្មី

លោកបានបន្តថា ៖ ការិយាល័យកណ្តាលថ្មីនេះ នឹងត្រូវបានសាងសង់ឡើងជាមួយនឹងការយកចិត្តទុកដាក់យ៉ាងពិសេសទៅលើផ្នែកការពារសន្តិសុខ ការបង្ការអគ្គិភ័យ ការសន្សំសំចៃថាមពលប្រើប្រាស់ និងការការពារសុវត្ថិភាព សុខភាព បរិស្ថាន ។ ជាមួយនឹងការវិនិយោគទៅលើអគារការិយាល័យកណ្តាលថ្មីរបស់យើង ជាការបង្ហាញបញ្ជាក់ពីជំនឿទុកចិត្តនៅក្នុងព្រះរាជាណាចក្រកម្ពុជា និងការអនុវត្តសេដ្ឋកិច្ចដ៏ខ្លាំងរបស់ប្រទេស ហើយជាការប្តេជ្ញាចិត្តរបស់យើងនេះ ក្នុងការបម្រើជូនអតិថិជនជាងមួយលាននាក់ និងអតិថិជនអនាគត ដែលពួកគាត់មានការជឿជាក់មកលើធនាគារអេស៊ីលីដា ជាធនាគារដែលលោកអ្នកជឿទុកចិត្ត ។

លោក Don Coning នាយកក្រុមហ៊ុន Aedas បានមានប្រសាសន៍ថា ៖ យើងមានកិត្តិយសជាពិសេស ដែលត្រូវបានជ្រើសតាំងដោយធនាគារអេស៊ីលីដា ក្នុងការសហការជាមួយក្រុមអ្នកជំនាញដ៏ពូកែក្នុងការគូរប្លង់ការិយាល័យកណ្តាលថ្មីនេះ ។ យើងជឿជាក់ថាបំណងប្រាថ្នា និងសេចក្តីត្រូវការរបស់ធនាគារអេស៊ីលីដា គឺកំពុងផ្តល់លទ្ធភាពដល់ក្រុមហ៊ុន Aedas ដើម្បីសិក្សាស្វែងរក និងបង្កើតភាពជឿជាក់ប្លែកគេមានតែមួយ និងបង្ហាញនូវអគារដ៏ស្រស់ស្អាតដែលជាមរតក និងវប្បធម៌របស់ធនាគារអេស៊ីលីដា មិនត្រឹមតែប៉ុណ្ណោះទេ ជាអគារពាណិជ្ជកម្ម នៅក្នុងទីក្រុងភ្នំពេញផងដែរ ។ ក្រុមហ៊ុន Aedas បានបង្កើតកម្មវិធីជាសកល សម្រាប់គំនិតច្នៃប្រឌិតដ៏ល្អបំផុតក្នុងស្ថាបត្យកម្ម ។ ការបង្ហាញគំនិតច្នៃប្រឌិតដ៏ល្អមួយនេះ អាចធ្វើទៅបានជាមួយនឹងការផ្សារភ្ជាប់ព័ត៌មានចុងក្រោយ និងការបែងចែកប្រព័ន្ធផ្សេងៗ ដែលត្រូវការបង្កើត និងរចនាប្លង់ដែលជាលក្ខណៈពិភពលោក ។

ពិធីបញ្ចុះបឋមសិលាបើកការដ្ឋានសាងសង់អគារការិយាល័យកណ្ដាលថ្មី

លោក HW Son ប្រធាននាយកប្រតិបត្តិក្រុមហ៊ុន HYUNDAI AMCO CO.,LTD. បានមានប្រសាសន៍ថា ៖ ការសាងសង់អគារការិយាល័យកណ្តាលថ្មីរបស់ធនាគារអេស៊ីលីដា ជាធនាគារពាណិជ្ជឈានមុខគេក្នុងប្រទេសកម្ពុជា ត្រូវបានសាងសង់ឡើងជាលក្ខណៈស្តង់ដារអន្តរជាតិ ជាមួយនឹងសម្ភារ និងគ្រឿងបរិក្ខារដែលមានគុណភាពខ្ពស់ ។ ក្រុមហ៊ុន HYUNDAI AMCO មានមោទនភាពយ៉ាងខ្លាំង ក្នុងការចូលរួមក្នុងគម្រោងសាងសង់នេះ ជាអ្នកទទួលម៉ៅការទូទៅ ហើយយើងសូមធានាអះអាង ក្នុងការផ្តល់សេវាសាងសង់ដ៏ល្អបំផុត ជូនដល់អតិថិជនរបស់យើង ជាមួយនឹងបទពិសោធន៍ ដែលមានកន្លងមកក្នុងប្រទេសកម្ពុជា ក៏ដូចជានៅក្នុងពិភពលោក ។

គួរបញ្ជាក់ដែរថាបច្ចុប្បន្ន ធនាគារអេស៊ីលីដា មានបណ្តាញការិយាល័យប្រតិបត្តិការ ចំនួន ២៣៨ ទូទាំងព្រះរាជាណាចក្រកម្ពុជា និង ២៨ការិយាល័យ នៅប្រទេសឡាវ និង ០១សាខា នៅប្រទេសមីយ៉ាន់ម៉ា ជាមួយនឹងទ្រព្យសកម្មសរុបចំនួន ១,៩ពាន់លានដុល្លារអាមេរិក នៅដំណាច់ ខែវិច្ឆិកា ឆ្នាំ២០១២ ។ ធនាគារអេស៊ីលីដា មានក្រុមហ៊ុនបុត្រសម្ព័ន្ធចំនួនបួន គឺ ធនាគារ អេស៊ីលីដា ឡាវ, អេស៊ីលីដា ស៊ីឃ្យួរឹធី ភីអិលស៊ី, អេស៊ីលីដា ត្រេននីង សេនធ័រ និងស្ថាប័ន មីក្រូហិរញ្ញវត្ថុ ACLEDA MFI Myanmar Co., Ltd. ហើយតាមយុទ្ធសាស្ត្រ យើងនឹងបន្តពង្រីកវិសាលភាពប្រតិបត្តិការទៅក្នុងតំបន់អាស៊ាន និងបណ្តាប្រទេសនៅតាមដងទន្លេមេគង្គដទៃទៀត ។

សម្រាប់ព័ត៌មានបន្ថែម សូមទាក់ទងតាមរយៈ

លោក ព្រំ វិសុទ្ធ អនុប្រធាននាយកប្រតិបត្តិ និងជាប្រធាននាយកប្រតិបត្តិនីតិកម្ម
អ៊ីម៉ែល ៖

« ព័ត៌មានមុន
ធនាគារអេស៊ីលីដា ពង្រីកបណ្តាញប្រតិបត្តិការទៅកាន់សាធារណរដ្ឋសហភាពមីយ៉ាន់ម៉ា ព័ត៌មានបន្ទាប់ »
ធនាគារអេស៊ីលីដា ប្រារព្ធពិធីប្រសិទ្ធពរឆ្នាំថ្មី-ឆ្នាំសកល ២០១៣

ធនាគារ​អេស៊ីលីដា ប្រារព្ធ​ពិធី​បញ្ចុះ​បឋមសិលា​បើក​ការដ្ឋាន​សាងសង់​អគារ​ការិយាល័យ​កណ្ដាល​ថ្មី​បន្ថែម

ធនាគារអេស៊ីលីដា ប្រារព្ធពិធីបញ្ចុះបឋមសិលាបើកការដ្ឋានសាងសង់អគារការិយាល័យកណ្ដាលថ្មីបន្ថែម