ព័ត៌មានព័ត៌មានថ្មីៗគណៈប្រតិភូជាន់ខ្ពស់ធនាគារកណ្តាលឡាវ និងធនាគារជាតិនៃកម្ពុជា ទស្សនកិច្ចធនាគារ អេស៊ីលីដា ភីអិលស៊ី

គណៈប្រតិភូជាន់ខ្ពស់ធនាគារកណ្តាលឡាវ និងធនាគារជាតិនៃកម្ពុជា ទស្សនកិច្ចធនាគារ អេស៊ីលីដា ភីអិលស៊ី

គណៈប្រតិភូទស្សនកិច្ចសាខាក្រុង(ផ្សារលើ)

កិច្ចប្រជុំរវាងថ្នាក់ដឹកនាំជាន់ខ្ពស់របស់ធនាគារអេស៊ីលីដា និងគណៈប្រតិភូធនាគារជាតិនៃកម្ពុជា និងធនាគារសាធារណៈរដ្ឋប្រជាធិបតេយ្យប្រជាមានិតឡាវ

បណ្ឌិត អ៊ិន ចាន់នី ទទួលវត្ថុអនុស្សាវរីយ៍ពី ឯកឧត្តមបណ្ឌិត Somphao PHAYSITH

ថ្ងៃទី០៩ ខែធ្នូ ឆ្នាំ២០១៣

នៅថ្ងៃទី០៥ ខែធ្នូ ឆ្នាំ២០១៣ គណៈប្រតិភូជាន់ខ្ពស់របស់ធនាគារកណ្តាលឡាវ ដឹកនាំដោយឯកឧត្តមបណ្ឌិត Somphao PHAYSITH ទេសាភិបាលធនាគារសាធារណរដ្ឋប្រជាធិបតេយ្យប្រជាមានិតឡាវ និងគណៈប្រតិភូជាន់ខ្ពស់ធនាគារជាតិនៃកម្ពុជា ដឹកនាំដោយឯកឧត្តម ស៊ុំ សន្និសិទ្ធ អគ្គលេខាធិការធនាគារជាតិនៃកម្ពុជា បានធ្វើទស្សនកិច្ចពីការរីកចម្រើនរបស់ធនាគារអេស៊ីលីដា សាខាក្រុង(ផ្សារលើ) ស្ថិតក្នុងខេត្តសៀមរាប ។

នៅក្នុងដំណើរទស្សនកិច្ចនេះ ឯកឧត្តមបណ្ឌិត Somphao PHAYSITH បានមានមតិកោតសរសើរ និងបន្តគាំទ្រដល់ធនាគារអេស៊ីលីដា ជាធនាគារឈានមុខគេនៅក្នុងប្រទេសកម្ពុជា ដែលបានពង្រីកបណ្តាញប្រតិបត្តិការរបស់ខ្លួនទៅកាន់ប្រទេសឡាវ ។ ឯកឧត្តមក៏សង្ឃឹមយ៉ាងមុតមាំថា នាអនាគតដ៏ខ្លីខាងមុខ ធនាគារអេស៊ីលីដានៅក្នុងប្រទេសឡាវ នឹងរីកចម្រើនក្លាយជាធនាគារឈានមុខគេដូចនៅក្នុងប្រទេសកម្ពុជាដែរ ។

ឯកឧត្តម ស៊ុំ សន្និសិទ្ធ អគ្គលេខាធិការធនាគារជាតិនៃកម្ពុជា ក៏បានសម្តែងនូវមតិត្រេកអរ និងមានមោទនភាពយ៉ាងខ្លាំង ដែលមានធនាគារអេស៊ីលីដា ជាធនាគារក្នុងស្រុកមានភាពរីកចម្រើនគ្រប់វិស័យ បានពង្រីកសាខាបុត្រសម្ព័ន្ធរបស់ខ្លួនទៅក្រៅប្រទេសមុនដំបូងគេ រួមមានប្រទេសឡាវ និងមីយ៉ាន់ម៉ា ។

ឆ្លៀតក្នុងឱកាសនោះ បណ្ឌិត អ៊ិន ចាន់នី ប្រធាននាយកប្រតិបត្តិ ព្រមទាំងថ្នាក់ដឹកនាំ និងកម្មករនិយោជិតរបស់ធនាគារ អេស៊ីលីដា ភីអិលស៊ី ទាំងអស់ មានសេចក្តីរីករាយគោរពស្វាគមន៍យ៉ាងកក់ក្តៅ និងថ្លែងអំណរគុណយ៉ាងជ្រាលជ្រៅបំផុត ចំពោះសមភាគីធនាគារជាតិនៃកម្ពុជា និងធនាគារសាធារណៈរដ្ឋប្រជាធិបតេយ្យប្រជាមានិតឡាវ ដែលបានអញ្ជើញមកទស្សនកិច្ចនៅធនាគារ អេស៊ីលីដា ភីអិលស៊ី និងបានឧបត្ថម្ភគាំទ្រដល់ធនាគារអេស៊ីលីដា ទាំងនៅក្នុងប្រទេសកម្ពុជា និងប្រទេសឡាវ ។ សកម្មភាពទាំងអស់នេះហើយ ដែលបានធ្វើឱ្យធនាគារមានការរីកចម្រើនលូតលាស់ និងទទួលបានជោគជ័យ ដូចសព្វថ្ងៃនេះ ។

« ព័ត៌មានមុន
ធនាគារអេស៊ីលីដា បានជ្រើសរើសឱ្យបម្រើសេវាកម្ម សម្រាប់ប្រតិបត្ដិការចំណូល-ចំណាយថវិការដ្ឋ ព័ត៌មានបន្ទាប់ »
ធនាគារ អេស៊ីលីដា ឡាវ ទទួលបានប័ណ្ណសរសើរពីរដ្ឋាភិបាលប្រទេសឡាវ