ព័ត៌មានព័ត៌មានថ្មីៗពិធីចុះហត្ថលេខាលើអនុស្សរណៈនៃការយោគយល់គ្នា រវាងធនាគារ អេស៊ីលីដា ភីអិលស៊ី និង ធនាគារកម្ពុជាពាណិជ្ជ

ពិធីចុះហត្ថលេខាលើអនុស្សរណៈនៃការយោគយល់គ្នា រវាងធនាគារ អេស៊ីលីដា ភីអិលស៊ី និង ធនាគារកម្ពុជាពាណិជ្ជ

បណ្ឌិត អ៊ិន ចាន់នី ប្រធាននាយកប្រតិបត្តិធនាគារ អេស៊ីលីដា ភីអិលស៊ី និង លោក Suriyah Termlertmanuswong អភិបាលនិងអគ្គនាយកធនាគារ CCB កំពុងចុះហត្ថលេខា

ថ្ងៃទី១៤ ខែមីនា ឆ្នាំ២០១៤

ភ្នំពេញ, ថ្ងៃទី១៤ ខែមីនា ឆ្នាំ២០១៤ ៖ ធនាគារ អេស៊ីលីដា ភីអិលស៊ី ជាធនាគារពាណិជ្ជឈានមុខគេលើគ្រប់វិស័យ បានប្រកាសនៅថ្ងៃនេះថា ធនាគារអេស៊ីលីដា ចុះហត្ថលេខាលើអនុស្សរណៈនៃការយោគយល់គ្នា ស្តីពីសហប្រតិបត្តិការអាជីវកម្មលើសេវាគ្រប់គ្រងសាច់ប្រាក់ជាមួយ ធនាគារកម្ពុជាពាណិជ្ជ (CCB) ដែលជាបុត្រសម្ព័ន្ធរបស់ធនាគារ Siam Commercial (SCB) ។

តាមរយៈកិច្ចព្រមព្រៀងនេះ ធនាគារទាំងពីរនឹងបង្កើតកិច្ចព្រមព្រៀងគោល សម្រាប់កិច្ចសហប្រតិបត្តិការអាជីវកម្មលើសេវាគ្រប់គ្រងសាច់ប្រាក់ ដើម្បីបម្រើសេវាកម្មជូនដល់អតិថិជនរបស់ខ្លួនលើសកម្មភាពប្រតិបត្តិការដូចជា ៖ សេវាបើកប្រាក់បៀវត្សរ៍/សេវាទូទាត់ឱ្យអ្នកផ្គត់ផ្គង់ សេវាទូទាត់វិក្កយបត្រ និងសេវាប្រមូលមូលប្បទានប័ត្រ ។

លោកស្រី Khun Kannika Chalitaporn, ប្រធានធនាគារ Siam Commercial បានមានប្រសាសន៍ថា ៖ លោកស្រីមានក្តីរីករាយយ៉ាងខ្លាំងក្នុងការចូលរួមធ្វើជាសក្ខីភាពក្នុងពិធីចុះហត្ថលេខា លើអនុស្សរណៈនៃការយោគយល់គ្នានេះ ។ កិច្ចសហប្រតិបត្តិការអាជីវកម្មប្រភេទនេះ គឺស្ថិតនៅក្នុងស្មារតីនៃកិច្ចព្រមព្រៀងរបស់សមាគមសេដ្ឋកិច្ចអាស៊ាន ។ កិច្ចព្រមព្រៀងនេះនឹងពង្រីកកិច្ចសហប្រតិបត្តិការរវាងធនាគារពីរ ដែលមានចំនួនការិយាល័យសាខា និងម៉ាស៊ីនអេធីអឹមច្រើនជាងគេនៅក្នុងប្រទេសរៀងៗខ្លួន ។ ធនាគារ SCB កំពុងបង្កើនវត្តមាន និងសកម្មភាពប្រតិបត្តិការរបស់ខ្លួននៅក្នុងមហាអនុតំបន់ទន្លេមេគង្គ ហើយកិច្ចព្រមព្រៀងនៃកិច្ចសហប្រតិបត្តិការនេះ នឹងក្លាយជាយុទ្ធសាស្ត្រឈ្នះឈ្នះដែលនាំមកនូវអត្ថប្រយោជន៍សម្រាប់ស្ថាប័ន និងប្រជាជនរបស់ប្រទេសទាំងពីរកម្ពុជា និងថៃ ។

លោក Suriyah Termlertmanuswong, អភិបាល និងអគ្គនាយកធនាគារ CCB បានមានប្រសាសន៍ថា ៖ នេះជាកាលានុវត្តភាពដ៏ល្អបំផុត ដែលធនាគារកម្ពុជាពាណិជ្ជ និងធនាគារ អេស៊ីលីដា ភីអិលស៊ី ក្លាយជាដៃគូសហប្រតិបត្តិការអាជីវកម្មជាមួយគ្នា ដើម្បីផ្តល់អត្ថប្រយោជន៍ឱ្យគ្នាទៅវិញទៅមក ។

បណ្ឌិត អ៊ិន ចាន់នី, ប្រធាននាយកប្រតិបត្តិធនាគារ អេស៊ីលីដា ភីអិលស៊ី បានមានប្រសាសន៍ថា ៖ ធនាគារអេស៊ីលីដាមានមោទនភាព និងក្តីសោមនស្សរីករាយយ៉ាងខ្លាំង ដែលក្លាយជាដៃគូអាជីវកម្មជាមួយធនាគារ SCB តាមរយៈបុត្រសម្ព័ន្ធរបស់ខ្លួនគឺ ធនាគារកម្ពុជាពាណិជ្ជ ក្នុងការបម្រើសេវាកម្មគ្រប់គ្រងសាច់ប្រាក់ ដើម្បីផ្តល់ផលប្រយោជន៍ឱ្យគ្នាទៅវិញទៅមក ។ កិច្ចសហប្រតិបត្តិការនេះ នឹងធ្វើឱ្យធនាគារអេស៊ីលីដា និងធនាគារ SCB និងបុត្រសម្ព័ន្ធរបស់ខ្លួនគឺ ធនាគារកម្ពុជាពាណិជ្ជ កាន់តែមានភាពរីកចម្រើន និងទទួលជោគជ័យបន្ថែមមួយកម្រិតថែមទៀត ដើម្បីគាំទ្រយុទ្ធសាស្ត្ររយៈពេលវែងរបស់ខ្លួន ។

អំពីធនាគារ អេស៊ីលីដា ភីអិលស៊ី

នៅដំណាច់ខែកុម្ភៈ ឆ្នាំ២០១៤ ធនាគារអេស៊ីលីដា មានបណ្តាញការិយាល័យប្រតិបត្តិការចំនួន ២៣៨ ការិយាល័យ ទូទាំងព្រះរាជាណាចក្រកម្ពុជា, ៤១ ការិយាល័យនៅប្រទេសឡាវ និង ០៦ ការិយាល័យនៅប្រទេសមីយ៉ាន់ម៉ា ជាមួយទ្រព្យសកម្មសរុបចំនួនប្រមាណ ២,៤ ពាន់លានដុល្លារអាមេរិក ។ ធនាគារអេស៊ីលីដា បានបង្កើតក្រុមហ៊ុនបុត្រសម្ព័ន្ធចំនួនបួនគឺ ធនាគារ អេស៊ីលីដា ឡាវ, អេស៊ីលីដា ស៊ីឃ្យួរឹធី ភីអិលស៊ី, អេស៊ីលីដា ត្រេននីង សេនធ័រ និង ស្ថាប័នមីក្រូហិរញ្ញវត្ថុ អេស៊ីលីដា មីយ៉ាន់ម៉ា ។ ហើយតាមយុទ្ធសាស្ត្រ ធនាគារអេស៊ីលីដា មានដៃគូប្រតិបត្តិការជាមួយ ធនាគារជប៉ុន SMBC, ក្រុមហ៊ុនតុងយ៉ាង ស៊ីឃ្យួរឹធី (ខេមបូឌា) ភីអិលស៊ី និងជាទីភា្នក់ងាររបស់ក្រុមហ៊ុន ព្រូដិនសល (ខេមបូឌា) ឡាយហ្វ៍ អឹសួរ៉ិនស៍ ភីអិលស៊ី និងបន្តពង្រីកវិសាលភាពប្រតិបត្តិការទៅក្នុងតំបន់អាស៊ាន ព្រមទាំងបណ្តាប្រទេសនៅតាមដងទន្លេមេគង្គដទៃទៀត ។

អំពីធនាគារកម្ពុជាពាណិជ្ជ

ធនាគារកម្ពុជាពាណិជ្ជ បានបង្កើតឡើងក្នុងឆ្នាំ១៩៩១ ជាបុត្រសម្ព័ន្ធរបស់ធនាគារ SCB ដែលមានទីតាំងនៅក្នុងព្រះរាជាណាចក្រថៃ ។ ធនាគារនេះបានផ្តល់សេវាកម្មធនាគារស្នូល និងសេវាកម្មហិរញ្ញវត្ថុផ្សេងៗទៀត ។

SCB ជាធនាគារឈានមុខគេមួយនៅប្រទេសថៃ ដែលបានបង្កើតឡើងដោយ Royal Charter ក្នុងឆ្នាំ១៩០៦ ជាធនាគារទី១នៅប្រទេសថៃ ។ គិតមកដល់ថ្ងៃទី៣១ ខែធ្នូ ឆ្នាំ២០១៣ SCB មានដើមទុនច្រើនជាងគេបង្អស់នៅក្នុងទីផ្សារហិរញ្ញវត្ថុនៅប្រទេសថៃ (៤៨៨ពាន់លានបាត) ។ SCB មានបណ្តាញការិយាល័យប្រតិបត្តិការធំជាងគេ ១១៧៣, ហាងប្តូរប្រាក់ចំនួន១០៨ និងម៉ាស៊ីនអេធីអឹមមានចំនួន ៩,១៤២ និងបានឈរនៅក្នុងលំដាប់ថ្នាក់លេខ១នៅក្នុងទីផ្សារសេវាកម្មហិរញ្ញវត្ថុលក់រាយ ។ អតិថិជនរបស់ SCB រួមមានអតិជនក្រុមហ៊ុនសហគ្រាសខ្នាតតូចនិងមធ្យម និងអតិថិជនខ្នាតតូចបំផុតនៅទូទាំងប្រទេស ។ គិតមកដល់ថ្ងៃទី៣១ ខែធ្នូ ឆ្នាំ២០១៣ ធនាគារ SCB មានទ្រព្យសកម្មចំនួន ២.៥៣៤ ពាន់លានបាត ។ ធនាគារ SCB បានពង្រីកប្រតិបត្តិការរបស់ខ្លួនទាំងក្នុង និងក្រៅប្រទេសរួមមាន ថៃ ហុងកុង សឹង្ហបូរី កម្ពុជា ឡាវ វៀតណាម និងចិន ។

សម្រាប់ព័ត៌មានបន្ថែម សូមទាក់ទងតាមរយៈ

លោកស្រី សុវណ្ណ បូផា, នាយិកាការិយាល័យប្រតិបត្ដិការហិរញ្ញវត្ថុ
ទូរស័ព្ទ: ០១៥ ៩០០ ១៥១
អ៊ីម៉ែល:

« ព័ត៌មានមុន
ពិធីសម្ពោធអគារការិយាល័យថ្មី សាខាក្រុងបាវិត ព័ត៌មានបន្ទាប់ »
សាសាខាស្ទឹងមានជ័យ ប្តូរទីតាំងការិយាល័យនិងឈ្មោះថ្មី ទៅជាសាខាផ្លូវម៉ៅសេទុង (ផ្សារដើមគរ)

អំពី​ធនាគារ អេស៊ីលីដា ភីអិលស៊ី

អំពី​ធនាគារ​កម្ពុជា​ពាណិជ្ជ

អំពីធនាគារ អេស៊ីលីដា ភីអិលស៊ី

អំពីធនាគារកម្ពុជាពាណិជ្ជ