ព័ត៌មានព័ត៌មានថ្មីៗពិធីសម្ពោធអគារការិយាល័យថ្មី សាខាក្រុងបាវិត

ពិធីសម្ពោធអគារការិយាល័យថ្មី សាខាក្រុងបាវិត

ធនាគារអេស៊ីលីដា សាខាក្រុងបាវិត

ថ្ងៃទី១៧ ខែមករា ឆ្នាំ២០១៤

នៅថ្ងៃទី១៧ ខែមករា ឆ្នាំ២០១៤ ធនាគារអេស៊ីលីដា សាខាក្រុងបាវិត ដែលមានទីតាំងស្ថិតនៅ ផ្លូវជាតិលេខ១ ភូមិបាវិតកណ្តាល សង្កាត់បាវិត ក្រុងបាវិត ខេត្តស្វាយរៀង បានប្រារព្ធពិធីសម្ពោធជាផ្លូវការ ដោយមានការអញ្ជើញចូលរួមជាគណៈអធិបតីយ៉ាងខ្ពង់ខ្ពស់ពីសំណាក់ ឯកឧត្តមអភិបាលរងខេត្តស្វាយរៀង មន្ត្រីអមសាលាខេត្ត អាជ្ញាធរមូលដ្ឋានគ្រប់លំដាប់ថ្នាក់ និងក្រុមប្រឹក្សាភិបាល ប្រធាននាយកប្រតិបត្តិ អនុប្រធាននាយកប្រតិបត្តិនិងជាគណៈប្រធាននាយក-នាយិកាប្រតិបត្ដិ នាយក-នាយិកាប្រតិបត្តិគ្រប់នាយកដ្ឋាន នាយក-នាយិកាគ្រប់សាខាធនាគារអេស៊ីលីដា ព្រមទាំងភ្ញៀវកិត្តិយសជាច្រើននាក់ទៀត ។

លោក អេង ចន្ទតារ៉ា នាយកធនាគារអេស៊ីលីដា សាខាក្រុងបាវិត បានមានប្រសាសន៍ថា ៖ គិតត្រឹមថ្ងៃទី៣១ ខែធ្នូ ឆ្នាំ២០១៣ នេះ សាខាក្រុងបាវិត មានបណ្ដាញប្រតិបត្ដិការចំនួន ០៤, បុគ្គលិកចំនួន ១០៨ នាក់, ទ្រព្យសកម្មសរុបចំនួនជាង ១៤លានដុល្លារអាមេរិក, អតិថិជនចំនួន ៤.៣១៧នាក់ កំពុងប្រើប្រាស់សេវាឥណទានចំនួន ១២,២៥លានដុល្លារ និងអតិថិជនចំនួន ១១.៨១០នាក់ កំពុងដាក់ប្រាក់បញ្ញើសន្សំចំនួន ១៣,២៥លានដុល្លារ និងអតិថិជនជាច្រើនទៀត បាននឹងកំពុងប្រើប្រាស់សេវាកម្មផ្សេងៗទៀត រួមទាំងសេវាអេស៊ីលីដាយូនីធី និងប័ណ្ណឥណទានវីសាអេស៊ីលីដា ផងដែរ ។ សាខាក្រុងបាវិត មានម៉ាស៊ីនដកប្រាក់ស្វ័យប្រវត្ដិអេធីអឹម ចំនួន ០៣គ្រឿង សម្រាប់បម្រើសេវាដកប្រាក់ ជូនដល់អតិថិជន ២៤ម៉ោងក្នុងមួយថ្ងៃ ០៧ថ្ងៃក្នុងមួយសប្តាហ៍ តាមរយៈប័ណ្ណអេស៊ីលីដា ប័ណ្ណវីសាអេស៊ីលីដា និងប័ណ្ណវីសាធនាគារផ្សេងទៀតនៅទូទាំងពិភពលោក ។

លោក អេង ចន្ទតារ៉ា នាយកធនាគារអេស៊ីលីដា សាខាក្រុងបាវិត

លោកបានបន្ថែមថា ៖ សាខាក្រុងបាវិត បានប្ដូរទីតាំងមកអគារការិយាល័យថ្មី ដែលបានសាងសង់ឡើងតាមស្ដង់ដារធនាគារពាណិជ្ជ ។ អគារនេះមានកំពស់ ០៣ជាន់កន្លះ ដែលមានផ្ទៃក្រឡាសម្រាប់បំពេញការងារ និងមានសាលសម្រាប់បម្រើអតិថិជនធំទូលាយ ។ អគារនេះ សាងសង់តាមបទដ្ឋានរបស់ធនាគារអេស៊ីលីដា ដោយយកចិត្ដទុកដាក់ខ្លាំងលើការរក្សាសន្ដិសុខ កំណារពារអគ្គីភ័យ ការបម្រុងថាមពល ផាសុកភាព និងសុវត្ថិភាពការងារ ។ នេះជាព្រឹត្ដិការណ៍ដ៏ពិសេសមួយនៅក្នុងឆ្នាំនេះរបស់ធនាគារអេស៊ីលីដា សាខាក្រុងបាវិត ដែលបានបង្ហាញអំពីភាពរឹងមាំ ជាមួយការអភិវឌ្ឍឥតឈប់ឈរក្នុងការបម្រើសេវាកម្មហិរញ្ញវត្ថុ កាន់តែលឿន រហ័សទាន់ចិត្ដ អាចជឿជាក់បាន និងមានសុវត្ថិភាពខ្ពស់ស្របតាមតម្រូវការរបស់អតិថិជននៅក្នុងក្រុងបាវិតទាំងមូល ។

ឆ្លៀតក្នុងឱកាសដ៏មានសារៈសំខាន់នេះ បណ្ឌិត អ៊ិន ចាន់នី ប្រធាននាយកប្រតិបត្ដិ ធនាគារ អេស៊ីលីដា ភីអិលស៊ី បានមានប្រសាសន៍ថា ៖ អារ្យភាពទាន់សម័យជានិរន្តរ៍ គឺជាគោលដៅដ៏ចម្បងរបស់ធនាគារអេស៊ីលីដា ។ ធនាគារអេស៊ីលីដា បានបង្កើតឱ្យមានអារ្យភាពទាន់សម័យជានិរន្តរ៍ សម្រាប់សេវាកម្មហិរញ្ញវត្ថុបែបនេះ អស់រយៈពេលជាង ២១ឆ្នាំ មកហើយ ដើម្បីបម្រើសេវាកម្មហិរញ្ញវត្ថុ ជូនដល់អតិថិជនទាំងវិស័យឯកជន និងវិស័យសាធារណៈ តាមរយៈបណ្តាញប្រតិបត្តិការរហូតដល់ ២៣៨ការិយាល័យ ទូទាំងព្រះរាជាណាចក្រកម្ពុជា ៤១ការិយាល័យ នៅប្រទេសឡាវ និង ០៦ការិយាល័យ នៅប្រទេសមីយ៉ាន់ម៉ា នៅដំណាច់ខែធ្នូ ឆ្នាំ២០១៣នេះ ។ បច្ចុប្បន្ន ធនាគារ អេស៊ីលីដា ភីអិលស៊ី មានអគារការិយាល័យស្ដង់ដារបែបនេះ ចំនួន ១២៩ និងកំពុងសាងសង់បន្ថែមជាបន្ដបន្ទាប់មានចំនួន ២០ការិយាល័យ បន្តទៀត ដើម្បីទទួលបម្រើអតិថិជន និងបង្កឱ្យមានភាពងាយស្រួលដល់អតិថិជន សម្រាប់ប្រើប្រាស់សេវាហិរញ្ញវត្ថុនានារបស់ធនាគារអេស៊ីលីដា ជាពិសេសដើម្បីការពារសុវត្ថិភាពទ្រព្យសម្បត្ដិរបស់អតិថិជន ព្រមទាំងផ្តល់នូវផាសុកភាព និងសុវត្ថិភាពការងារដល់បុគ្គលិកដែលបាន និងកំពុងបម្រើការងារជាមួយធនាគារអេស៊ីលីដា ។ ថ្ងៃនេះខ្ញុំបាទ មានមោទនភាពយ៉ាងខ្លាំង ចំពោះសំណង់អគារការិយាល័យនេះ ដែលបានសាងសង់តាមស្ដង់ដាររបស់ធនាគារអេស៊ីលីដា ស្របតាមយុទ្ធសាស្ដ្រយូរអង្វែងរបស់យើង ។

បណ្ឌិត អ៊ិន ចាន់នី ប្រធាននាយកប្រតិបត្ដិ ធនាគារ អេស៊ីលីដា ភីអិលស៊ី

បណ្ឌិតបានសំដែងនូវអំណរគុណយ៉ាងជ្រាលជ្រៅ ចំពោះរាជរដ្ឋាភិបាល ធនាគារជាតិ នៃកម្ពុជា អាជ្ញាធរគ្រប់លំដាប់ថ្នាក់ ភាគហ៊ុនិក ក្រុមប្រឹក្សាភិបាល កម្មករនិយោជិតគ្រប់លំដាប់ថ្នាក់ទាំង ៩.៤៥១នាក់ និងអតិថិជនដ៏វៃឆ្លាតជាងមួយលានប្រាំសែននាក់ ដែលតែងតែជួយគាំទ្រទាំងមធ្យោបាយ កំលាំងកាយ កំលាំងចិត្ដ និងសហការយ៉ាងពេញទំហឹង តាំងពីដើមរៀងមក ធ្វើឱ្យប្រាក់ចំណេញរបស់ធនាគារអេស៊ីលីដាកើនឡើងដល់ ៧៧,៩លានដុល្លារអាមេរិក ទ្រព្យសកម្មកើនពីចំនួន ២២,៣លានដុល្លារអាមេរិក ក្នុងខែធ្នូ ឆ្នាំ២០០០ រហូតដល់ចំនួន ២.៣២៤,៦លានដុល្លារអាមេរិក នៅដំណាច់ខែធ្នូ ឆ្នាំ២០១៣ ។ ក្នុងឆ្នាំ២០១៤នេះ ធនាគារអេស៊ីលីដា បន្តធ្វើទំនើបនីយកម្ម បណ្តាញប្រតិបត្តិការរបស់ខ្លួនទាំងហេដ្ឋារចនាសម្ព័ន្ធអគារការិយាល័យ និងប្រព័ន្ធបច្ចេកវិជ្ជាព័ត៌មាន ក្នុងនោះរួមមាន សេវាអេស៊ីលីដាយូនីធី ដែលជាសេវាធនាគារតាមទូរស័ព្ទដៃ ម៉ាស៊ីនដាក់ប្រាក់និងម៉ាស៊ីនដកប្រាក់ស្វ័យប្រវត្តិអេធីអឹម ម៉ាស៊ីនឆូតកាតអេស៊ីលីដា ដែលជាឧបករណ៍អេឡិចត្រូនិក សម្រាប់ប្រើជាមួយប័ណ្ណអេស៊ីលីដា និងប័ណ្ណរបស់ធនាគារផ្សេង សម្រាប់ទូទាត់ទំនិញ ឬសេវាកម្មផ្សេងៗ ដែលមានលក្ខណៈងាយស្រួល និងសុវត្ថិភាពខ្ពស់បំផុត ដើម្បីបំពេញនូវកម្រិតពេញចិត្តរបស់អតិថិជនទាំងផ្នែកឯកជន និងគ្រឹះស្ថានសាធារណ: និងផ្តល់នូវសេវាកម្មដែលមានគុណភាព ២៤ម៉ោងក្នុង១ថ្ងៃ និង៧ថ្ងៃ ក្នុង១សប្តាហ៍ ។

លោកបណ្ឌិតបានបន្ថែមថា ៖ ធនាគារអេស៊ីលីដា បានបង្កើតក្រុមហ៊ុនបុត្រសម្ព័ន្ធចំនួនបួនគឺ ធនាគារ អេស៊ីលីដា ឡាវ, អេស៊ីលីដា ស៊ីឃ្យួរឹធី ភីអិលស៊ី, អេស៊ីលីដា ត្រេននីង សេនធ័រ និង អេស៊ីលីដា មីក្រូហិរញ្ញវត្ថុ មីយ៉ាន់ម៉ា ។ ហើយតាមយុទ្ធសាស្ត្រ ធនាគារអេស៊ីលីដា មានដៃគូជាមួយ ធនាគារជប៉ុន SMBC, ក្រុមហ៊ុនតុងយ៉ាង ស៊ីឃ្យួរឹធី (ខេមបូឌា) ភីអិលស៊ី, និងជាទីភា្នក់ងាររបស់ក្រុមហ៊ុន ព្រូដិនសល (ខេមបូឌា) ឡាយហ្វ៍ អឹសួរ៉ិនស៍ ភីអិលស៊ី និងបន្តពង្រីកវិសាលភាពប្រតិបត្តិការទៅក្នុងតំបន់អាស៊ាន និងបណ្តាប្រទេសនៅតាមដងទន្លេមេគង្គដទៃទៀត ។

ឯកឧត្តម ស៊ុំ សុជាតិ អភិបាលរងខេត្តស្វាយរៀង និងបណ្ឌិត អ៊ិន ចាន់នី ប្រធាននាយកប្រតិបត្ដិ ធនាគារ អេស៊ីលីដា ភីអិលស៊ី

ជាមួយគ្នានេះដែរ ឯកឧត្តម ស៊ុំ សុជាតិ អភិបាលរងខេត្តស្វាយរៀង បានកត់សម្គាល់ថា ៖ ធនាគារអេស៊ីលីដា សាខាក្រុងបាវិត បានរៀបចំឡើង ស្របពេលដែលសេដ្ឋកិច្ចនៃព្រះរាជាណាចក្រកម្ពុជា ជាពិសេសក្រុងបាវិត កំពុងមានការរីកចម្រើន មានស្ថិរភាព និងមានកំណើនលើសពីការរំពឹងទុក ក្នុងរយៈពេលប៉ុន្មានឆ្នាំចុងក្រោយនេះ ។ ការវិវឌ្ឍរបស់សាខាក្រុងបាវិត ជាសក្ខីកម្មដែលបញ្ជាក់ពីការរីកចម្រើន ភាពរឹងមាំ និងថែមទាំងបានបង្ហាញពីការចូលរួមចំណែកក្នុងការអភិវឌ្ឍន៍សេដ្ឋកិច្ចក្នុងព្រះរាជាណាចក្រកម្ពុជា ជាពិសេសនៅក្នុងក្រុងបាវិត ។ ទាំងនេះជាភស្ដុតាងដែលបង្ហាញឱ្យឃើញថា សាខាក្រុងបាវិត បានកើតឡើង និងរីកចម្រើនធំធាត់យ៉ាងឆាប់រហ័ស ទាំងផ្នែកប្រតិបត្ដិការ ទាំងផ្នែកហេដ្ឋារចនាសម្ព័ន្ធ និងទាំងផ្នែកប្រសិទ្ធភាពអាជីវកម្ម ។ ក្នុងរយៈពេលកន្លងទៅ សាខានេះពិតជាបានផ្ដល់អត្ថប្រយោជន៍យ៉ាងច្រើន ចំពោះប្រជាពលរដ្ឋ និងអ្នកជំនួញនៅក្នុងស្រុកទាំងមូល ទទួលបាននូវប្រភពធនធានហិរញ្ញវត្ថុ និងសេវាកម្មហិរញ្ញវត្ថុផ្សេងៗទៀត ដែលជាគន្លឹះក្នុងការចូលរួមបង្កើតឱ្យមានការងារ ប្រភពចំណូល អភិវឌ្ឍន៍សេដ្ឋកិច្ច និងលើកកម្ពស់កម្រិតជីវភាពរបស់ប្រជាពលរដ្ឋនៅក្នុងក្រុងបាវិតទាំងមូល ៕

« ព័ត៌មានមុន
ពិធីអបអរសាទរខួបមួយឆ្នាំ ក្នុងការបង្កើតភាពជាដៃគូជាមួយក្រុមហ៊ុនព្រូដិនសលកម្ពុជា ព័ត៌មានបន្ទាប់ »
ពិធីចុះហត្ថលេខាលើអនុស្សរណៈនៃការយោគយល់គ្នា រវាងធនាគារ អេស៊ីលីដា ភីអិលស៊ី និង ធនាគារកម្ពុជាពាណិជ្ជ

ពិធី​សម្ពោធ​អគារ​ការិយាល័យ​ថ្មី សាខាក្រុងបាវិត

ពិធីសម្ពោធអគារការិយាល័យថ្មី សាខាក្រុងបាវិត