ព័ត៌មានព័ត៌មានថ្មីៗសារប្រសិទ្ធពរឆ្នាំថ្មី-ឆ្នាំសកល ២០១៦ របស់ប្រធាននាយកប្រតិបត្តិ ធនាគារ អេស៊ីលីដា ភីអិលស៊ី

សារប្រសិទ្ធពរឆ្នាំថ្មី-ឆ្នាំសកល ២០១៦ របស់ប្រធាននាយកប្រតិបត្តិ ធនាគារ អេស៊ីលីដា ភីអិលស៊ី

បណ្ឌិត អ៊ិន ចាន់នី ប្រធាននាយកប្រតិបត្តិ ធនាគារ អេស៊ីលីដា ភីអិលស៊ី

ប័ណ្ណជូនពរក្នុងឱកាសបុណ្យចូលឆ្នាំថ្មី ឆ្នាំសកល ២០១៦

កម្មករនិយោជិត ធនាគារ អេស៊ីលីដា ភីអិលស៊ី ទាំងអស់ ជាទីគោរពរាប់អានដ៏ខ្ពង់ខ្ពស់ និងជ្រាលជ្រៅបំផុត !

ក្នុងឱកាស ឆ្នាំថ្មី-ឆ្នាំសកល ២០១៦ ខ្ញុំសូមសម្ដែងនូវក្ដីសោមនស្សរីករាយ និងថ្លែងនូវអំណរគុណដ៏ស្មោះស្ម័គ្រឧត្ដុង្គឧត្ដមបំផុត ចំពោះភាគហ៊ុនិក ក្រុមប្រឹក្សាភិបាល ថ្នាក់គ្រប់គ្រង និងបុគ្គលិកទាំងអស់ ដែលបានចូលរួមអនុវត្ដការងារទទួលបានលទ្ធផលល្អ តាមនាទីរៀងៗខ្លួន ប្រកបដោយគតិបណ្ឌិត ស្ថិតក្នុងក្រមសីលធម៌ ទាំងចំណេះដឹង និងជំនាញយ៉ាងមានប្រសិទ្ធភាព ដែលធ្វើឲ្យផែនការអាជីវកម្ម ធនាគារ អេស៊ីលីដា ភីអិលស៊ី ទាំងមូល ទទួលបាននូវជោគជ័យជាកុសលយ៉ាងត្រចះត្រចង់ និងជាពិសេស សូមថ្លែងអំណរគុណចំពោះការគាំទ្ររបស់រាជរដ្ឋាភិបាល ដែលមានធនាគារជាតិនៃកម្ពុជា ជាអាណាព្យាបាល និងអតិថិជនជាទីគោរពទាំងអស់ ។

មកដល់ពេលបច្ចុប្បន្ននេះ មានរយៈពេលជិត១០ឆ្នាំហើយ ដែលធនាគារ អេស៊ីលីដា ភីអិលស៊ី ប្រើប្រាស់ហេដ្ឋារចនាសម្ព័ន្ធធនាគារអេឡិចត្រូនិក ដែលទទួលបានអត្ថប្រយោជន៍ពីសេវាកម្មហិរញ្ញវត្ថុកាន់តែងាយស្រួល និងធ្វើឲ្យកាន់តែប្រសើរឡើងលើសគេ នូវគុណភាពបម្រើសេវាកម្ម ក្នុងព្រះរាជាណាចក្រកម្ពុជា តាមរយៈយុទ្ធសាស្ត្រសម្បូរបែប ។

នៅចុងឆ្នាំ២០១៥ នេះ ធនាគារ អេស៊ីលីដា ភីអិលស៊ី បង្កើតបាននូវសមិទ្ធផលថ្មីៗទាន់សម័យបំផុត គឺអគារថ្មីការិយាល័យកណ្តាល ដែលមានលក្ខណៈធំទូលាយ និងប្រណិតជាងមុន ។ ទាំងនេះជាភស្ដុតាងដែលបង្ហាញឲ្យឃើញថា ធនាគារ អេស៊ីលីដា ភីអិលស៊ី បានរីកចម្រើន និងធំធាត់យ៉ាងឆាប់រហ័ស ទាំងផ្នែកប្រតិបត្ដិការ ទាំងផ្នែកហេដ្ឋារចនាសម្ព័ន្ធ និងទាំងផ្នែកប្រសិទ្ធភាពអាជីវកម្ម ជាសក្ខីភាពបង្ហាញជូនដល់អតិថិជន និងសាធារណជន គ្រប់មជ្ឈដ្ឋានក្នុងសហគមន៍ ឲ្យកាន់តែមានភាពជឿជាក់ និងទំនុកចិត្តខ្ពស់មកលើធនាគារ អេស៊ីលីដា ភីអិលស៊ី ។ វឌ្ឍនភាពគ្រប់វិស័យរបស់ធនាគារ អេស៊ីលីដា ភីអិលស៊ី ជាសក្ខីកម្មដែលបញ្ជាក់ពីការរីកចម្រើន ភាពរឹងមាំ និងថែមទាំងបានបង្ហាញពីការចូលរួមចំណែកក្នុងការអភិវឌ្ឍសេដ្ឋកិច្ច ក្នុងព្រះរាជាណាចក្រកម្ពុជា ស្របពេលជាមួយសមាហរណកម្មសហគមន៍សេដ្ឋកិច្ចអាស៊ាន នៅចុងឆ្នាំ២០១៥ នេះ ។

ធនាគារ អេស៊ីលីដា ភីអិលស៊ី ត្រូវបានមហាជនទទួលស្គាល់ថាជា "ប្រជាធនាគារដែលលោក អ្នកជឿទុកចិត្ត" តាមរយៈការផ្តល់ផលិតផល និងសេវាកម្មហិរញ្ញវត្ថុសម្បូរបែបគ្រប់ប្រភេទ ដល់គ្រប់មជ្ឈដ្ឋាន ទាំងវិស័យសាធារណៈ និងឯកជន ។ ដូច្នេះយើងទាំងអស់គ្នា បន្តចូលរួមអនុវត្តយ៉ាងសកម្មនូវផែនការយុទ្ធសាស្ត្រដែលមានស្រាប់ និងយុទ្ធសាស្ត្រថ្មី ដូចខាងក្រោម ៖

១

បង្កើត និងអភិវឌ្ឍសេវាហិរញ្ញប្បទានគម្រោង និងសហហិរញ្ញប្បទាន ដោយមានគោលដៅ ដើម្បីរីកចម្រើនជាមួយអតិថិជនសំខាន់ៗ ដោយសហប្រតិបត្តិការជាមួយដៃគូពាណិជ្ជកម្មដែលមានជំនាញ និងឯកទេសល្អបំផុត ក្នុងការផ្តល់សេវាហិរញ្ញប្បទានគម្រោង និងសហហិរញ្ញប្បទាន បង្កើតឲ្យមានចំណូលកាន់តែខ្ពស់ ។

២

អភិវឌ្ឍសេវាធនាគារអេឡិចត្រូនិកតាមប្រព័ន្ធបច្ចេកវិជ្ជាហិរញ្ញវត្ថុ (FinTech) និងស្វ័យប្រតិបត្តិការ (Branchless) ដោយមានគោលដៅ ដើម្បីពង្រីកបណ្តាញប្រតិបត្តិការ បង្កើនប្រសិទ្ធភាពប្រាក់ចំណូល បង្កើនកាលានុវត្តភាពនៃការលក់ផលិតផលជាកញ្ចប់ បម្រើអតិថិជនគោលប្រកបដោយភាពងាយស្រួល និងមានឧត្តមភាពក្នុងការប្រកួតប្រជែង ។

៣

អភិវឌ្ឍសេវាឌីជីថលប៊ែង (Digital Banking-Mobile App) ធ្វើឲ្យមានប្រតិបត្តិការជាសកល តាមរយៈ ប្រព័ន្ធ Biometric, CRM រួមផ្សំជាមួយសេវាកម្មហិរញ្ញវត្ថុថ្មីៗ ដោយមានគោលដៅលើកស្ទួយ និងគាំទ្រសេវាស័្វយប្រតិបត្តិការ (Self-service) ប្រើប្រាស់នូវបច្ចេកវិជ្ជាទំនើប ប្រសិទ្ធភាពចំណាយ ពង្រីកធុរកិច្ចជាសកល និងជួយគាំទ្រដល់ក្រុមហ៊ុនបុត្រសម្ព័ន្ធ បង្កើនចំណូល បង្កើនកាលានុវត្តភាពនៃការលក់ផលិតផលជាកញ្ចប់ បម្រើអតិថិជនដោយភាពងាយស្រួល មានឧត្តមភាពក្នុងការប្រកួតប្រជែង ។

ក្នុងឱកាស ឆ្នាំថ្មី-ឆ្នាំសកល ២០១៦ នេះ និងតទៅមុខ សូមភាគហ៊ុនិក ក្រុមប្រឹក្សាភិបាល ថ្នាក់គ្រប់គ្រង និងសហការីព្រមទាំងក្រុមគ្រួសារទាំងអស់ ទទួលបាននូវសេចក្តីសុខកាយ សប្បាយចិត្ត ចម្រើន រុងរឿង ជោគជ័យសិរីមង្គលតរៀងទៅ ព្រមទាំងសម្រេចផលតាមផែនការយុទ្ធសាស្ត្រ ដែលបានកំណត់ ប្រកបដោយគុណភាព និងប្រសិទ្ធភាពដ៏ឧត្តុង្គឧត្តម កុំបីឃ្លៀងឃ្លាតឡើយ ៕

ភ្នំពេញ ថ្ងៃទី៣១ ខែធ្នូ ឆ្នាំ២០១៥
ប្រធាននាយកប្រតិបត្តិ

បណ្ឌិត អ៊ិន ចាន់នី

« ព័ត៌មានមុន
អេស៊ីលីដា ស៊ីឃ្យួរឹធី ភីអិលស៊ី ប្តូរទីតាំងការិយាល័យថ្មី ព័ត៌មានបន្ទាប់ »
ពិធីអបអរសាទរខួបបីឆ្នាំនៃភាពជាដៃគូចែកចាយជាយុទ្ធសាស្ត្រជោគជ័យ និងយូរអង្វែង រវាងក្រុមហ៊ុនព្រូដិនសលកម្ពុជា និងធនាគារ អេស៊ីលីដា

សារ​ប្រសិទ្ធពរ​ឆ្នាំថ្មី-ឆ្នាំ​សកល ២០១៦ របស់​ប្រធាន​នាយក​ប្រតិបត្តិ ធនាគារ អេស៊ីលីដា ភីអិលស៊ី

សារប្រសិទ្ធពរឆ្នាំថ្មី-ឆ្នាំសកល ២០១៦ របស់ប្រធាននាយកប្រតិបត្តិ ធនាគារ អេស៊ីលីដា ភីអិលស៊ី