ព័ត៌មានព័ត៌មានថ្មីៗអបអរខួប ១០ឆ្នាំ ភាពជាដៃគូ រវាងធនាគារ អេស៊ីលីដា និង SMBC

អបអរខួប ១០ឆ្នាំ ភាពជាដៃគូ រវាងធនាគារ អេស៊ីលីដា និង SMBC

ថ្ងៃទី១២ ខែសីហា ឆ្នាំ២០២២

រាជធានីភ្នំពេញ ថ្ងៃទី១២ ខែសីហា ឆ្នាំ២០២២ ធនាគារ អេស៊ីលីដា ភីអិលស៊ី និង SMBC បានប្រារព្ធខួបលើកទី១០ឆ្នាំ នៃភាពជាដៃគូយុទ្ធសាស្ត្រ នៅការិយាល័យកណ្តាល ធនាគារ អេស៊ីលីដា ភីអិលស៊ី។ ខាងក្រោមនេះ គឺជាការរំលេចរាល់ការអភិវឌ្ឍនៃភាពជាដៃគូនេះ៖

ក្នុងខែសីហា ឆ្នាំ២០១២ ធនាគារ អេស៊ីលីដា និង SMBC បានចុះហត្ថលេខាលើអនុស្សរណៈនៃការយោគយល់គ្នា ស្តីពីកិច្ចសហប្រតិបត្តិការធុរៈកិច្ចដែលផ្តល់អត្ថប្រយោជន៍គ្នាទៅវិញទៅមក។ ភាគីទាំងពីរបានចុះហត្ថលេខាលើកិច្ចព្រមព្រៀងសេវាកម្មប្រឹក្សាយោបល់ក្នុងខែកញ្ញា ឆ្នាំ២០១៣។ ក្រោមកិច្ចព្រមព្រៀងនេះ ផ្នែកសាជីវកម្មអន្តរជាតិ ត្រូវបានបង្កើតឡើងនៅក្នុងការិយាល័យកណ្តាលរបស់ធនាគារ អេស៊ីលីដា ដើម្បីជួយ និងគាំទ្រដល់ធនាគារ អេស៊ីលីដា ក្នុងការពង្រីកផលិតផល និងសេវាកម្មរបស់ធនាគារ ដើម្បីឆ្លើយតបទៅនឹងតម្រូវការអតិថិជនអន្តរជាតិ ជាពិសេសតម្រូវការរបស់អតិថិជនសាជីវកម្មជប៉ុន។

ក្នុងខែសីហា ឆ្នាំ២០១៤ SMBC បានទិញភាគហ៊ុន ១២,២៥% របស់ធនាគារ អេស៊ីលីដា ហើយបានតែងតាំងអភិបាលម្នាក់ជាសមាជិកក្រុមប្រឹក្សាភិបាលរបស់ធនាគារ។ ក្នុងខែសីហា ឆ្នាំ២០១៥ ភាគហ៊ុនរបស់ SMBC បានកើនឡើងពី ១២,២៥% ទៅ ១៨,២៥%។

SMBC បានផ្តល់ការគាំទ្រដល់ធនាគារ អេស៊ីលីដា គ្រប់កម្រិត ចាប់ពីថ្នាក់គ្រប់គ្រង ក្រុមប្រឹក្សាភិបាល និងភាគហ៊ុនិក។ SMBC ក៏បានផ្តល់ការបណ្តុះបណ្តាលដោយផ្ទាល់ដល់និយោជិតរបស់ធនាគារ អេស៊ីលីដា ព្រមទាំងរៀបចំ និងសម្របសម្រួលការចុះពិនិត្យ និងបណ្តុះបណ្តាលស្តីពីសេវាកម្មធនាគារអេឡិចត្រូនិក (EBS) និងសេវាឌីជីថលជាច្រើនទៀត ពីក្រុមបច្ចេកទេសធនាគារឌីជីថលថ្នាក់តំបន់ ជាច្រើនទៀត។

ជាមួយភាពជាដៃគូយុទ្ធសាស្រ្តប្រកបដោយនិរន្តរភាព និងយូរអង្វែងនេះ នឹងធ្វើឱ្យធនាគារ អេស៊ីលីដា ទទួលបានសមិទ្ធិផល និងភាពជោគជ័យកាន់តែច្រើនថែមទៀត នៅឆ្នាំបន្តបន្ទាប់ទៀត។

« ព័ត៌មានមុន
ACLEDA Agriculture Business-Matching Meeting ព័ត៌មានបន្ទាប់ »
វគ្គបណ្តុះបណ្តាលវិនិយោគិនក្នុងវិស័យមូលបត្រ