ព័ត៌មានព័ត៌មានថ្មីៗធនាគារ អេស៊ីលីដា ភីអិលស៊ី ចុះហត្ថលេខាលើកិច្ចព្រមព្រៀងជាដៃគូសហការឧបត្ថម្ភជាមួយ សហព័ន្ធកីឡាបាល់ទាត់កម្ពុជា

ធនាគារ អេស៊ីលីដា ភីអិលស៊ី ចុះហត្ថលេខាលើកិច្ចព្រមព្រៀងជាដៃគូសហការឧបត្ថម្ភជាមួយ សហព័ន្ធកីឡាបាល់ទាត់កម្ពុជា

ថ្ងៃទី១៩ ខែកញ្ញា ឆ្នាំ២០២៣

រាជធានីភ្នំពេញ ថ្ងៃអង្គារ ៥កើត ខែភទ្របទ ឆ្នាំថោះ បញ្ចស័ក ព.ស.២៥៦៧ ត្រូវនឹងថ្ងៃទី១៩ ខែកញ្ញា ឆ្នាំ២០២៣ ធនាគារ អេស៊ីលីដា ភីអិលស៊ី "ប្រជាធនាគារដែលលោកអ្នកជឿទុកចិត្ត" បានប្រកាសថា នៅថ្ងៃនេះ ធនាគារ អេស៊ីលីដា បានចុះហត្ថលេខាលើកិច្ចព្រមព្រៀងជាដៃគូសហការឧបត្ថម្ភជាមួយ សហព័ន្ធកីឡាបាល់ទាត់កម្ពុជា (FFC) ក្នុងគោលបំណងឧបត្ថម្ភគាំទ្រថវិកា ចំនួន ២០០.០០០ដុល្លារ (ពីររយពាន់ដុល្លារអាមេរិក) ដើម្បីចូលរួមចំណែកក្នុងការគាំទ្រ និងការអភិវឌ្ឍវិស័យបាល់ទាត់នៅកម្ពុជា។

បណ្ឌិត អ៊ិន ចាន់នី ប្រធាននាយកប្រតិបត្តិ ធនាគារ អេស៊ីលីដា បានមានប្រសាសន៍ថា "គោលនយោបាយសង្គមកិច្ចរបស់ធនាគារ អេស៊ីលីដា ស្តីពីទំនួលខុសត្រូវសង្គម ផ្សារភ្ជាប់នឹងគោលនយោបាយរបស់ រាជរដ្ឋាភិបាលក្នុងការលើកកម្ពស់វិស័យកីឡា និងការអភិវឌ្ឍវិស័យកីឡាបាល់ទាត់នៅកម្ពុជា ប្រកបដោយនិរន្តរភាព។ ធនាគារ អេស៊ីលីដា សូមចូលរួមចំណែកគាំទ្រ និងជំរុញការអភិវឌ្ឍលើកកម្ពស់កីឡាបាល់ទាត់កម្ពុជា តាមរយៈការចុះហត្ថលេខាលើកិច្ចព្រមព្រៀងជាដៃគូសហការឧបត្ថម្ភជាមួយ សហព័ន្ធកីឡាបាល់ទាត់កម្ពុជា សម្រាប់ឆ្នាំ២០២៣-២០២៤។"

លោកបណ្ឌិតបានបន្ថែមទៀតថា "កីឡា ជាពិសេសកីឡាបាល់ទាត់ ជួយឱ្យយើងមានសុខភាពល្អ រឹងមាំ សកម្ម និងនាំឱ្យយើងយល់ដឹងអំពីគុណតម្លៃនៃការងារជាក្រុម ហើយលើកទឹកចិត្តឱ្យយើងខិតខំប្រឹងប្រែងមិនងាយបោះបង់ ដោយសារកីឡានាំឱ្យយើងមានវិន័យ សេចក្តីអំណត់អត់ធន់ និងមានការប្តេជ្ញាចិត្តខ្ពស់ ដែលជាគុណតម្លៃចាំបាច់នាំឱ្យមានជ័យជំនះ។ ក្នុងជីវិតរស់នៅប្រចាំថ្ងៃ កីឡាជាមធ្យោបាយមួយក្នុងការទំនាក់ទំនងគ្នា និងបង្កើតនូវចំណងមិត្តភាពថ្មីៗថែមទៀត។ ក្នុងឱកាសដ៏មានសារៈសំខាន់នេះ ធនាគារ អេស៊ីលីដា ពិតជាមានកិត្តិយស និងមោទនភាពក្រៃលែង ដែលបានចូលរួមចំណែកជាដៃគូសហការឧបត្ថម្ភដល់សហព័ន្ធកីឡាបាល់ទាត់កម្ពុជា និងគាំទ្រការអភិវឌ្ឍទេពកោសល្យរបស់កីឡាករបាល់ទាត់យើងឱ្យកាន់តែរីកចម្រើន។"

លោកបណ្ឌិតក៏បានសម្តែងនូវការកោតសរសើរដោយស្មោះសរចំពោះការដឹកនាំរបស់ ឯកឧត្តមនាយឧត្តមសេនីយ៍ សៅ សុខា ក្នុងការដឹកនាំសហព័ន្ធកីឡាបាល់ទាត់កម្ពុជានាពេលកន្លងមក។ ក្នុងនោះការគ្រប់គ្រងរបស់ ឯកឧត្តមនាយឧត្តមសេនីយ៍ រយៈពេលជាង១០ឆ្នាំ បានធ្វើឱ្យកីឡាបាល់ទាត់កម្ពុជា មានការរីកចម្រើនទាំងបរិមាណ និងគុណភាព ជាអាទិ៍សមត្ថភាពកីឡាករ គ្រូបង្វឹក មន្ត្រីអាជ្ញាកណ្តាល និងក្លឹបបាល់ទាត់អាជីពនានា មានសមត្ថភាព និងមានលទ្ធភាពចូលរួមការប្រកួតប្រជែងជាលក្ខណៈតំបន់ និងអន្តរជាតិ។ ក្រោមការដឹកនាំរបស់ ឯកឧត្តមនាយឧត្តមសេនីយ៍ សៅ សុខា កីឡាបាល់ទាត់កម្ពុជាមានការរីកចម្រើនជាបន្តបន្ទាប់ និងមានឈ្មោះបោះសំលេងលើឆាកអន្តរជាតិ។

សម្រាប់ព័ត៌មានបន្ថែម សូមទំនាក់ទំនងតាមរយៈ

លោក នេត ពិសិដ្ឋ នាយកប្រតិបត្ដិសេវាហិរញ្ញវត្ថុ នៃធនាគារ អេស៊ីលីដា
ទូរស័ព្ទ៖ ០១៥ ៧០០ ១១១
អ៊ីម៉ែល៖ neth.piseth@acledabank.com.kh
វេបសាយ៖ www.acledabank.com.kh

« ព័ត៌មានមុន
ពានរង្វាន់ ហិរញ្ញប្បទានសហគ្រាសធុនតូច និងមធ្យម សកលលោក ឆ្នាំ២០២៣ ព័ត៌មានបន្ទាប់ »
ធនាគារ អេស៊ីលីដា ភីអិលស៊ី សហការជាមួយក្រុមហ៊ុនម៉ាស្ទ័រកាត ដាក់ឱ្យដំណើរការជាផ្លូវការនូវ ប័ណ្ណឡេឌីម៉ាស្ទ័រកាតអេស៊ីលីដា ក្នុងប្រទេសកម្ពុជា