ព័ត៌មានហិរញ្ញវត្ថុរបាយការណ៍ប្រធានក្រុមប្រឹក្សាភិបាល

របាយការណ៍ប្រធានក្រុមប្រឹក្សាភិបាល

លោក ឆាយ សឿន ប្រធានក្រុមប្រឹក្សាភិបាល

តាងនាមឱ្យធនាគារ អេស៊ីលីដា និងក្រុមប្រឹក្សាភិបាល ខ្ញុំបាទមានកិត្តិយស និងសេចក្តីសោមនស្ស បង្ហាញបង្ហាញជូន របាយការណ៍ប្រចាំឆ្នាំ២០២២ របស់ធនាគារ។

ចាប់តាំងពីដើមឆ្នាំ២០២២ ស្ថានភាពសេដ្ឋកិច្ចពិភពលោកពុំមានស្ថិរភាព និងបង្កក្តីព្រួយបារម្ភពីវិបត្តិជាសកល ដោយសារការកើនឡើងអតិផរណារួមមានការកើនឡើងថ្លៃចំណាយប្រចាំថ្ងៃ ការប្រែប្រួលអត្រាប្តូរប្រាក់ ផលប៉ះពាល់លើថ្លៃដើមប្រាក់កម្ចី ការរឹតត្បិតគោលនយោបាយរូបិយវត្ថុបម្រុងរបស់សហព័ន្ធ ការបន្តរាំងស្ទះខ្សែច្រវាក់ផ្គត់ផ្គង់ ការផ្ទុះឡើងជំងឺកូវីដ-១៩ និងការអូសបន្លាយសង្រ្គាមរុស្ស៊ី-អ៊ុយក្រែន ជាដើម។ បន្ថែមលើនេះ សេដ្ឋកិច្ចអាមេរិកកំពុងកកស្ទះដោយសារហានិភ័យអតិផរណាកើនឡើងបន្តបន្ទាប់ ការរាំងស្ទះខ្សែច្រវាក់ផ្គត់ផ្គង់ និងគោលនយោបាយរឹតបន្តឹងរូបិយវត្ថុរបស់ Fed។ សេដ្ឋកិច្ចអឺរ៉ុបបានធ្លាក់ចូលក្នុងវិបត្តិសេដ្ឋកិច្ចចំពេលតម្រូវការប្រើប្រាស់កាន់តែថយចុះ ការផ្គត់ផ្គង់ថាមពលកាន់តែអាក្រក់ឡើងៗ និងលក្ខខណ្ឌរូបិយវត្ថុកាន់តែរឹតត្បិត។ សេដ្ឋកិច្ចចិនបានប្រឈមនឹងការវាយលុកយ៉ាងខ្លាំងដោយសារគោលនយោបាយសូន្យកូវីដ-១៩ ដ៏តឹងរ៉ឹង កត្តាជំរុញសេដ្ឋកិច្ចចុះខ្សោយ ការរឹតបន្តឹងបច្ចេកវិទ្យាចុងក្រោយ និងការធ្លាក់ចុះសេដ្ឋកិច្ចពិភពលោក។ សេដ្ឋកិច្ចជប៉ុនបានស្ទុះងើបឡើងវិញជាបណ្តើរៗ ជាមួយនឹងការកែលម្អវិស័យសេវាកម្ម ប៉ុន្តែកំណើននឹងត្រូវបានបិទ ដោយការកើនឡើងនៃកំណើនជាសកល។

ស្របពេលជាមួយគ្នានេះដែរ សេដ្ឋកិច្ចកម្ពុជាបានថយចុះ ដោយសាររងផលប៉ះពាល់ពីការអូសបន្លាយនៃសង្រ្គាមនៅរុស្ស៊ី-អ៊ុយក្រែន ការកើនឡើងនៃអតិផរណាថ្លៃទំនិញ និងការរាំងស្ទះខ្សែច្រវាក់ផ្គត់ផ្គង់ជាដើម។ ឆ្លើយតបនឹងស្ថានភាពនេះ រាជរដ្ឋាភិបាលកម្ពុជាបានដាក់ចេញនូវយុទ្ធសាស្ត្រ និងវិធានការជាច្រើន ដើម្បីកាត់បន្ថយកំណើនអតិផរណា និងរក្សាកំណើនសេដ្ឋកិច្ចក្នុងឆ្នាំ២០២២ និងឆ្នាំបន្តបន្ទាប់។ ជាងនេះទៅទៀត រាជរដ្ឋាភិបាលបានបញ្ចេញថវិកា ដើម្បីគាំទ្រ និងស្តារសកម្មភាពសេដ្ឋកិច្ច និងអាជីវកម្មខ្នាតតូចបំផុត និងខ្នាតតូច ព្រមទាំងក្រុមគ្រួសារ ដែលក្រីក្រ និងងាយរងគ្រោះដោយសារជំងឺកូវីដ-១៩។ ជាលទ្ធផល យន្តការទាំងនេះរបស់រាជរដ្ឋាភិបាលបានជួយកាត់បន្ថយអតិផរណា និងជំរុញកំណើនសេដ្ឋកិច្ចយ៉ាងមានប្រសិទ្ធភាព នៅក្នុងកំលុងឆ្នាំ២០២២នេះ។ ស្ថានភាពសេដ្ឋកិច្ចកម្ពុជាបានស្ទុះងើបឡើងវិញបន្តិចម្តងៗ ទៅរកភាពប្រក្រតីវិញ លឿនជាងការរំពឹងទុកក្នុងឆ្នាំ២០២១ ដោយសារការបើកសកម្មភាពសេដ្ឋកិច្ចឡើងវិញ និងការគាំទ្រដោយកំណើនសកម្មភាពពាណិជ្ជ។

នៅក្នុងកំលុងឆ្នាំ២០២២ ធនាគារ បានទទួលការអនុញ្ញាតពីធនាគារជាតិ នៃ កម្ពុជា ក្នុងការបោះផ្សាយលក់សញ្ញាបណ្ណបៃតង សម្រាប់វិនិយោគិនគុណវុឌ្ឍិ។ ការបោះផ្សាយលក់សញ្ញាបណ្ណបៃតងនេះ នឹងរួមចំណែកអនុវត្តតាមគោលដៅរបស់រាជរដ្ឋាភិបាល ក្នុងការកាត់បន្ថយការបំភាយឧស័្មនកាបូនិច និងផលប៉ះពាល់បរិស្ថាន ព្រមទាំងការលើកកម្ពស់វិស័យមូលបត្រនៅកម្ពុជា។ បន្ថែមពីនេះទៀត ធនាគារបានបង្កើនសមត្ថភាពប្រព័ន្ធធនាគារស្នូលដោយជោគជ័យ និងបន្តធ្វើឱ្យប្រសើរឡើងនូវមុខងារស្វ័យប្រតិបត្តិការជាច្រើនលើអេស៊ីលីដាម៉ូបាល ឃ្យូអរកូដ ម៉ាស៊ីនអេធីអឹម និងម៉ាស៊ីនឆូតកាត ស្របតាមតម្រូវការរបស់អតិថិជន និងវិវឌ្ឍនាការបច្ចេកវិទ្យាឌីជីថល។ ទន្ទឹមនឹងនេះ ធនាគារបានពង្រីកសេវាកម្មធនាគារស្វ័យប្រវត្តិចំនួន១២៥ទីតាំង (រាជធានីភ្នំពេញចំនួន៥១ទីតាំង និងបណ្តាខេត្តសរុបចំនួន៧៤ទីតាំង) បន្ថែមលើសាខាធនាគារទាំង២៦៤សាខា ព្រមទាំងបានបំពាក់ម៉ាស៊ីនអេធីអឹមចំនួន១.១៤០គ្រឿង ម៉ាស៊ីនឆូតកាតចំនួន៤.៣៥៨គ្រឿង និងឃ្យូអរកូដតាមសំណើសុំរបស់អតិថិជន សម្រាប់ប្រតិបត្តិការនៃការផ្ទេរ និងការទូទាត់នៅតាមបណ្តាផ្សារ ហាងទំនិញ សណ្ឋាគារ គ្រឹះស្ថានសិក្សា មន្ទីរពេទ្យ ទីភ្នាក់ងារទេសចរណ៍ ស្ថានីយប្រេងឥន្ធនៈ និងអាជីវកម្មនានា នៅទូទាំងប្រទេស។ គិតត្រឹមដំណាច់ខែធ្នូ ឆ្នាំ២០២២នេះ ធនាគារ មានដៃគូអាជីវកម្មសរុបជាង ០,២ លាន និងមានអ្នកប្រើប្រាស់អេស៊ីលីដាម៉ូបាលសរុបចំនួន ២,៦១លាននាក់។

គិតត្រឹមថ្ងៃទី៣១ ខែធ្នូ ឆ្នាំ២០២២ ប្រាក់បញ្ញើសរុបបានកើនឡើងចំនួន ៦៧២,៩៧ លានដុល្លារអាមេរិក សមតុល្យឥណទានសរុបបានកើនឡើងចំនួន ៩៩៣,០៧លានដុល្លារអាមេរិក បើធៀបនឹងដំណាច់ឆ្នាំ២០២១។ បើធៀបលទ្ធផលប្រចាំឆ្នាំ២០២២ ទៅនឹងលទ្ធផលឆ្នាំ២០២១ សម័្ពន្ធធនាគារទទួលបានប្រាក់ចំណេញចំនួន ១៨១,៧៤លានដុល្លារអាមេរិក កើនឡើង ៨,៨៨% ស្មើនឹង ១៤,៨៣លានដុល្លារអាមេរិក។

យើងខ្ញុំសូមថ្លែងអំណរគុណ និងសំដែងនូវការដឹងគុណយ៉ាងជ្រាលជ្រៅចំពោះភាគហ៊ុនិក អតិថិជន និយោជិត និងជាពិសេសអាជ្ញាធរពាក់ព័ន្ធទាំងអស់ដែលតែងតែផ្តល់ការគាំទ្រចំពោះធនាគារដើម្បីទទួលបាននូវលទ្ធផលសម្រេចស្របតាមផែនការជាពិសេសក្នុងឆ្នាំ២០២២។

លោក ឆាយ សឿន
ប្រធានក្រុមប្រឹក្សាភិបាល ធនាគារ អេស៊ីលីដា ភីអិលស៊ី
ថ្ងៃទី២២ ខែមីនា ឆ្នាំ២០២៣

របាយការណ៍​ប្រធាន​ក្រុម​ប្រឹក្សាភិបាល

របាយការណ៍ប្រធានក្រុមប្រឹក្សាភិបាល