ព័ត៌មានហិរញ្ញវត្ថុរបាយការណ៍ប្រធានក្រុមប្រឹក្សាភិបាល

របាយការណ៍ប្រធានក្រុមប្រឹក្សាភិបាល

លោក ឆាយ សឿន ប្រធានក្រុមប្រឹក្សាភិបាល

តាងនាមឱ្យធនាគារ អេស៊ីលីដា និងក្រុមប្រឹក្សាភិបាល ខ្ញុំបាទមានកិត្តិយស និងសេចក្តីសោមនស្ស បង្ហាញបង្ហាញជូន របាយការណ៍ប្រចាំឆ្នាំ២០២៣ របស់ធនាគារ។

នៅក្នុងឆ្នាំ២០២៣ សេដ្ឋកិច្ចពិភពលោកបានបង្ហាញនូវភាពធន់ ដែលគាំទ្រយ៉ាងខ្លាំងដោយសេដ្ឋកិច្ចសហរដ្ឋអាមេរិក និងបណ្តាប្រទេសដែលទីផ្សារកំពុងរីកចម្រើនលេចធ្លោ និងសេដ្ឋកិច្ចកំពុងអភិវឌ្ឍន៍ ព្រមទាំងគោលនយោបាយគាំទ្រសារពើពន្ធរបស់ចិន។ ទោះជាយ៉ាងណាក៏ដោយ កំណើនសេដ្ឋកិច្ចពិភពលោកប្រកបដោយចីរភាពនៅតែថមថយពេញមួយឆ្នាំ ដោយសារអត្រាអតិផរណាបានឈានដល់កម្រិតខ្ពស់ ដែលបណ្តាលមកពីកត្តាសង្រ្គាមអ៊ុយក្រែន និងការរំខាននៃជំងឺរាតត្បាតដែលកំពុងបន្ត ប៉ុន្តែបានថយចុះវិញនៅចុងឆ្នាំ២០២៣ និងមួយផ្នែករងឥទ្ធិពលពីគោលនយោបាយរូបិយវត្ថុកាន់តែតឹងតែងរបស់ធនាគារកណ្តាល។ សេដ្ឋកិច្ចពិភពលោកកំពុងងើបឡើងវិញបន្តិចម្តងៗពីបញ្ហាប្រឈមដែលបង្កឡើងដោយជំងឺរាតត្បាត សង្គ្រាមរុស្ស៊ី-អ៊ុយក្រែន អតិផរណា ភាពតានតឹងភូមិសាស្ត្រនយោបាយ និងគោលនយោបាយរឹតបន្តឹងទូទាំងពិភពលោករបស់ធនាគារកណ្តាល។ យោងតាមរបាយការណ៍ចុងក្រោយរបស់ IMF កំណើនសេដ្ឋកិច្ចសកលដែលបានប៉ាន់ប្រមាណសម្រាប់ឆ្នាំ២០២៣ គឺ ៣,១% ធ្លាក់ចុះពី ៣,៥% ក្នុងឆ្នាំ២០២២ និងទាបជាងមធ្យមភាគជាប្រវត្តិសាស្ត្រ ៣,៨% ពីឆ្នាំ២០០០ ដល់ឆ្នាំ២០១៩។ ទន្ទឹមនឹងនោះ អតិផរណាបានថយចុះមកនៅត្រឹម៦,៨% ក្នុងឆ្នាំ២០២៣ ពី៨,៧% នៅឆ្នាំ២០២២។ សេដ្ឋកិច្ចអាមេរិកមានកំណើនលើសពីការរំពឹងទុកចំនួន ២,៥% នៅឆ្នាំ២០២៣ កើនឡើងពី ១,៩%។ កំណើនសេដ្ឋកិច្ចតំបន់អឺរ៉ូមានកម្រិតទាបត្រឹម ០,៥% ក្នុងឆ្នាំ២០២៣ ទាបជាងឆ្នាំ២០២២ ដែលមានកំណើនរហូតដល់ ២,៤%។ ផ្ទុយទៅវិញ សេដ្ឋកិច្ចចិនមានកំណើន ៥,២% ប្រឈមមុខនឹងហានិភ័យជាបន្តបន្ទាប់ពីការធ្លាក់ចុះទីផ្សារអចលនទ្រព្យ និងសេដ្ឋកិច្ចពិភពលោក។ សេដ្ឋកិច្ចជប៉ុនត្រូវបានប៉ាន់ប្រមាណថាកើនឡើងពី ១% ក្នុងឆ្នាំ២០២២ ដល់ ១,៩% ក្នុងឆ្នាំ២០២៣ ខណៈពេលដែលសេដ្ឋកិច្ចអាស៊ានជួបប្រទះនឹងកំណើនយឺតនៅត្រឹម ៤,៤% ក្នុងឆ្នាំ២០២៣ ស្របពេលមានការប្រកួតប្រជែងសេដ្ឋកិច្ចពិភពលោក។

ខណៈពេលដែលសេដ្ឋកិច្ចសកលមានបញ្ហាប្រឈម សេដ្ឋកិច្ចកម្ពុជារក្សាបានស្ថិរភាព ដោយមានកំណើន ៥,៥% ក្នុងឆ្នាំ២០២៣ កើនឡើងពី ៥,២% ក្នុងឆ្នាំ២០២២ យោងតាមធនាគារជាតិ នៃ កម្ពុជា។ កំណើននេះបានគាំទ្រដោយការស្ទុះងើបឡើងវិញនៃតម្រូវការប្រើប្រាស់ក្នុងស្រុក ការលើកកម្ពស់ការងារ ការបន្ធូរបន្ថយអតិផរណា ការស្ទុះងើបឡើងវិញដ៏រឹងមាំនៅក្នុងវិស័យសេវាកម្មគាំទ្រដោយទេសចរណ៍ កំណើនការវិនិយោគថ្មី និងការនាំចេញផលិតផលមិនមែនកាត់ដេរ។ ទោះជាយ៉ាងនេះក្តី វិស័យអចលនទ្រព្យ និងសំណង់នៅតែបន្តមានការថយចុះ នៅពេលដែលវិស័យកសិកម្មមានកំណើនយឺត។

ក្នុងឆ្នាំ២០២៣ ប្រព័ន្ធធនាគារបន្តគ្របដណ្តប់វិស័យហិរញ្ញវត្ថុ និងបានដើរតួនាទីយ៉ាងសកម្មក្នុងការគាំទ្រដល់វិស័យសេដ្ឋកិច្ចចម្បងៗ បើទោះបីល្បឿនកំណើនឥណទានបានថមថយក៏ដោយ។ ប្រាក់បញ្ញើអតិថិជនមានកំណើនខ្ពស់ ១៣,១% ដល់ ៤៧,៩ ប៊ីលានដុល្លារអាមេរិក ស្របពេលដែលឥណទានមានកំណើនយឺត ៤,៨% ដល់ ៥៧,៦ ប៊ីលានដុល្លារអាមេរិក ដែលជាអត្រាកំណើនទាបបំផុតក្នុងរយៈពេលពីរទសវត្សរ៍ចុងក្រោយនេះ បណ្តាលមកពីការងើបឡើងវិញយឺតនៃវិស័យមួយចំនួន។ ក្នុងស្ថានភាពនេះ បទប្បញ្ញត្តិប្រុងប្រយ័ត្នមួយចំនួនត្រូវបានអនុគ្រោះ ដើម្បីផ្តល់លទ្ធភាពបន្ថែមដល់គ្រឹះស្ថានធនាគារ និងហិរញ្ញវត្ថុ ក្នុងការជួយទ្រទ្រង់វិស័យដែលត្រូវការហិរញ្ញប្បទាន ដើម្បីរក្សានិរន្តរភាព និងពង្រីកការវិនិយោគ។

នៅក្នុងកំឡុងឆ្នាំ២០២៣ ធនាគារ អេស៊ីលីដា បានផ្តល់នូវជម្រើសនៃការទូទាត់ជាច្រើនជូនអតិថិជនទាំងក្នុង និងក្រៅប្រទេស ប្រកបដោយភាពងាយស្រួល រហ័ស សុវត្ថិភាព និងសម្បូរបែប។ ធនាគារ បានទទួលការអនុញ្ញាតពី ធនាគារជាតិ នៃ កម្ពុជា ជាធនាគារទូទាត់ នៅក្នុងប្រព័ន្ធប្រតិបត្តិការទូទាត់ឆ្លងដែន រវាងប្រទេសកម្ពុជា ជាមួយប្រទេសជិតខាង រួមមាន ថៃ វៀតណាម និងឡាវ ព្រមទាំងកំពុងដំណើរការរៀបចំជាជំហានបន្ទាប់ទៅប្រទេសជាសមាជិកអាស៊ាន និងបណ្តាប្រទេសអាស៊ីផ្សេងទៀត ដូចជា ឥណ្ឌា ចិន ជប៉ុន និងកូរ៉េ ជាដើម។ ការដាក់ឱ្យប្រើប្រាស់ប្រព័ន្ធនេះ គឺក្នុងគោលបំណងដើម្បីរួមចំណែកលើកកម្ពស់ការទូទាត់រូបិយវត្ថុជាតិ ជំរុញបរិយាបន្នហិរញ្ញវត្ថុ សម្រួលការធ្វើពាណិជ្ជកម្មឆ្លងដែន និងកំណើនភ្ញៀវទេសចរផងដែរ។ ធនាគារ បានសហការជាមួយក្រុមហ៊ុនម៉ាស្ទ័រកាត ដាក់ឱ្យដំណើរការជាផ្លូវការនូវ ប័ណ្ណឡេឌីម៉ាស្ទ័រកាត អេស៊ីលីដា ក្នុងប្រទេសកម្ពុជា។ ប័ណ្ណឡេឌីម៉ាស្ទ័រកាត អេស៊ីលីដា សម្រាប់អតិថិជនជាសុភាពនារីនឹងផ្តល់ឱ្យពួកគាត់នូវមធ្យោបាយទូទាត់តាមបែបឌីជីថល និងបានចាប់ដៃគូជាមួយ RIA Money Transfer ក្នុងការពង្រីកសេវាកម្មផ្ទេរប្រាក់ ហើយភាពជាដៃគូនេះ បានបន្ថែមទីតាំងដកប្រាក់ និងទូទាត់ប្រាក់ជាច្រើនកន្លែង តាមរយៈបណ្តាញរបស់ RIA នៅក្នុងប្រទេសកម្ពុជា។ លើសពីនេះ ធនាគារ បានសហការជាមួយស្ថាប័ន Global Loyalty Network "GLN International Inc." ដែលជាក្រុមហ៊ុនបណ្តាញឌីជីថលសកល សម្រាប់ទូទាត់ឆ្លងដែន តាមរយៈទូរស័ព្ទចល័ត។ សមិទ្ធផលនេះនឹងអនុញ្ញាតឱ្យអ្នកប្រើប្រាស់ទូរស័ព្ទចល័តនៅក្នុងបណ្តាញ GLN មកពីសាធារណរដ្ឋកូរ៉េ និងនៅជុំវិញពិភពលោក អាចទូទាត់ថ្លៃទំនិញ និងសេវាកម្មផ្សេងៗ នៅក្នុងប្រទេសកម្ពុជា។

បន្ថែមពីនេះទៀត ធនាគារបានបន្តធ្វើឱ្យប្រសើរឡើងនូវមុខងារស្វ័យប្រតិបត្តិការជាច្រើនលើអេស៊ីលីដាម៉ូបាល ឃ្យូអរកូដ ម៉ាស៊ីនអេធីអឹម និងម៉ាស៊ីនឆូតកាត ស្របតាមតម្រូវការរបស់អតិថិជន និងវិវឌ្ឍនាការបច្ចេកវិទ្យាឌីជីថល។ ទន្ទឹមនឹងនេះ ធនាគារបានពង្រីកសេវាកម្មធនាគារស្វ័យប្រវត្តិចំនួន១៧៧ទីតាំង (រាជធានីភ្នំពេញចំនួន៦១ទីតាំង និងបណ្តាខេត្តសរុបចំនួន១១៦ទីតាំង) បន្ថែមលើសាខាធនាគារទាំង២៦៤សាខា ព្រមទាំងបានបំពាក់ម៉ាស៊ីនអេធីអឹមចំនួន ១.៣៩៣គ្រឿង ម៉ាស៊ីនឆូតកាតចំនួន៤.៧២៨គ្រឿង និងឃ្យូអរកូដតាមសំណើសុំរបស់អតិថិជន សម្រាប់ប្រតិបត្តិការនៃការផ្ទេរ និងការទូទាត់នៅតាមបណ្តាផ្សារ ហាងទំនិញ សណ្ឋាគារ ភោជនីយដ្ឋាន គ្រឹះស្ថានសិក្សា មន្ទីរពេទ្យ ទីភ្នាក់ងារទេសចរណ៍ ស្ថានីយប្រេងឥន្ធនៈ និងអាជីវកម្មនានា នៅទូទាំងប្រទេស។ គិតត្រឹមដំណាច់ខែធ្នូ ឆ្នាំ២០២៣នេះ ធនាគារ មានដៃគូអាជីវកម្មសរុបជាង ០,៣៣លាន និងមានអ្នកប្រើប្រាស់អេស៊ីលីដាម៉ូបាលសរុបចំនួន ៣,៣ លាននាក់។

គិតត្រឹមថ្ងៃទី៣១ ខែធ្នូ ឆ្នាំ២០២៣ ប្រាក់បញ្ញើសរុបបានកើនឡើងចំនួន ៨៣៨,៨២ លានដុល្លារអាមេរិក សមតុល្យឥណទានសរុបបានកើនឡើងចំនួន ២៣៥,៦៦លានដុល្លារអាមេរិក បើធៀបនឹងដំណាច់ឆ្នាំ២០២២។ បើធៀបលទ្ធផលប្រចាំឆ្នាំ២០២៣ ទៅនឹងលទ្ធផលឆ្នាំ២០២២ សម័្ពន្ធធនាគារទទួលបានប្រាក់ចំណេញចំនួន ១៤៨,០៥លានដុល្លារអាមេរិក ថយចុះ ១៨,៥៣% ស្មើនឹង ៣៣,៦៨លានដុល្លារអាមេរិក។

យើងខ្ញុំសូមថ្លែងអំណរគុណ និងសំដែងនូវការដឹងគុណយ៉ាងជ្រាលជ្រៅចំពោះភាគហ៊ុនិក អតិថិជន និយោជិត និងជាពិសេសអាជ្ញាធរពាក់ព័ន្ធទាំងអស់ដែលតែងតែផ្តល់ការគាំទ្រចំពោះធនាគារដើម្បីទទួលបាននូវលទ្ធផលល្អជាពិសេសក្នុងឆ្នាំ២០២៣។

លោក ឆាយ សឿន
ប្រធានក្រុមប្រឹក្សាភិបាល ធនាគារ អេស៊ីលីដា ភីអិលស៊ី
ថ្ងៃទី២១ ខែមីនា ឆ្នាំ២០២៤

របាយការណ៍​ប្រធាន​ក្រុម​ប្រឹក្សាភិបាល

របាយការណ៍ប្រធានក្រុមប្រឹក្សាភិបាល