ព័ត៌មានហិរញ្ញវត្ថុរបាយការណ៍ប្រធាននាយកប្រតិបត្តិ

របាយការណ៍ប្រធាននាយកប្រតិបត្តិ

បណ្ឌិត អ៊ិន ចាន់នី ប្រធាននាយកប្រតិបត្តិ ធនាគារ អេស៊ីលីដា ភីអិលស៊ី

"ធនាគារនឹងបន្តវិនិយោគបន្ថែម និងកំណត់អាទិភាពខ្ពស់បំផុត ដើម្បីភាពជោគជ័យយ៉ាងធំធេងក្នុងការកម្លាយខ្លួនទៅជាធនាគារឌីជីថល ដែលសម្រេចបានក្នុងរយៈពេលមួយទសវត្សរ៍កន្លងមកនេះ។ ដូច្នេះ ធនាគារមានគោលបំណងផ្តល់បទពិសោធន៍ឱ្យកាន់តែល្អប្រសើរ ក៏ដូចជាផ្តល់ភាពងាយស្រួលក្នុងការគ្រប់គ្រងតម្រូវការ និងកាត់បន្ថយថ្លៃប្រតិបត្តិការជូនអតិថិជន។ ធនាគារជឿជាក់ថា អតិថិជនទាំងអស់នឹងពេញចិត្តនឹងឱកាសធ្វើប្រតិបត្តិការ ឬគ្រប់គ្រងតម្រូវការសេវាធនាគារផ្សេងៗ តាមជម្រើសរបស់ខ្លួនផ្ទាល់ នៅគ្រប់កាលៈទេសៈ។
កិច្ចខិតខំប្រឹងប្រែងបន្ទាប់សម្រាប់ធនាគារ គឺការបង្កើតបញ្ញាសប្បនិម្មិត/ការវិភាគទិន្នន័យធំៗ (Artificial Intelligent/Big Data Analytic)។ ធនាគារកំពុងពង្រីក និងធ្វើបច្ចុប្បន្នភាពប្រព័ន្ធព័ត៌មានវិទ្យា ដើម្បីដោះស្រាយសំណុំទិន្នន័យធំៗ (silo-data sets) រួមបញ្ចូលបទពិសោធន៍ជាច្រើនឆ្នាំ ដើម្បីសម្រេចបាននូវគោលដៅផ្សព្វផ្សាយវៃឆ្លាត ទីផ្សារ និងការលក់ រួមទាំងគុណតម្លៃ និងឱកាសជាច្រើន។ ធនាគារជឿជាក់ថា ទាំងអស់នេះនឹងជួយពង្រឹងតួនាទីជាធនាគារពាណិជ្ជឈានមុខគេ ព្រមទាំងពេញនិយម និងគួរឱ្យជឿជាក់បំផុត នៅក្នុងប្រទេសកម្ពុជា សម្រាប់អតិថិជនជារូបវ័ន្តបុគ្គល ឬនីតិបុគ្គល និងដៃគូអាជីវកម្ម ទាំងនៅក្នុង និងក្រៅប្រទេស។"

សមិទ្ធិផលសម្រេចបានក្នុងឆ្នាំ២០២២

ស្ថានភាពប្រកួតប្រជែង

ផលប៉ះពាល់ជាបន្តនៃបញ្ហាខ្សែច្រវាក់ផ្គត់ផ្គង់ជាសកល និងសង្រ្គាមនៅអ៊ុយក្រែនបាននាំឱ្យមានការកើនឡើងនៃតម្លៃប្រេង តម្លៃម្ហូបអាហារ និងអតិផរណាខ្ពស់ទូទាំងពិភពលោក។ ប្រទេសអភិវឌ្ឍន៍ និងមានសេដ្ឋកិច្ចធំៗជាច្រើនបានដំឡើងអត្រាការប្រាក់ជាបន្តបន្ទាប់ ដើម្បីទប់ស្កាត់ការកើនឡើងនៃអតិផរណា។ ហេតុនេះបណ្តាលឱ្យមាននិន្នាការកើនឡើងនៃការចំណាយទុនមូលនិធិ ក្នុងអំឡុងនៃឆ្នាំ និងគ្រាខាងមុខ។

គ្រឹះស្ថានធនាគារ និងហិរញ្ញវត្ថុនានានៅក្នុងប្រទេសកម្ពុជាបានធ្វើការប្រកួតប្រជែងដ៏ខ្លាំងក្លា ក្នុងការប្រើប្រាស់បណ្តាញទីផ្សារផ្សេងៗ យុទ្ធសាស្ត្រផ្សព្វផ្សាយ វិធីសាស្ត្រកំណត់តម្លៃជាដើម។ល។ ស្ថិតក្នុងស្ថានភាពនោះ អតិថិជនទទួលបានភាពងាយស្រួលក្នុងការប្រើប្រាស់សេវាហិរញ្ញវត្ថុ អានុភាពនៃជម្រើស និងមានចំណេះដឹងផ្នែកហិរញ្ញវត្ថុកាន់តែប្រសើរ។

សេវាធនាគារតាមទូរស័ព្ទ (Mobile Banking App.) បានបង្ហាញពីប្រជាប្រិយភាព និងការប្រកួតប្រជែងរបស់ខ្លួន នៅក្នុងយុគសម័យឌីជីថល ដោយធនាគារប្រហែល ២/៣ បានដាក់ឱ្យប្រើប្រាស់នូវសេវាធនាគារតាមទូរស័ព្ទរបស់ពួកគេ។ សេវាអេស៊ីលីដាម៉ូបាលបាន និងកំពុងនាំមុខគេមួយ ជាមួយនឹងអ្នកប្រើប្រាស់/ដៃគូ ដែលបានចុះឈ្មោះប្រើប្រាស់ជាង២,៨៥លាននាក់។ អតិថិជនអាចប្រើប្រាស់សេវាអេស៊ីលីដាម៉ូបាលបានគ្រប់ទីកន្លែងក្នុងសកលលោក អាចស្កែន KHQR/QR ទូទាំងប្រទេសកម្ពុជា និងអាចធ្វើការទូទាត់ឆ្លងដែនជាមួយ QR Code នៅក្នុងប្រទេសថៃផងដែរ។

ចំណុចសំខាន់ៗនៃប្រតិបត្តិការក្នុងឆ្នាំ២០២២

សមតុល្យឥណទានសរុបនៅដំណាច់ឆ្នាំ២០២២ មានចំនួន៦.៤២១,៦៥លានដុល្លារអាមេរិក ក្នុងនោះមានឥណទានចំនួន១.៣៩២,១១លានដុល្លារអាមេរិក ស្មើនឹង២១,៦៨% បានផ្តល់ទៅឱ្យវិស័យកសិកម្ម។ ក្នុងឆ្នាំ២០២១ ការផ្តល់ឥណទានក្នុងវិស័យកសិកម្មមានចំនួន១.១០១,៥៤លានដុល្លារអាមេរិក។ គិតត្រឹមដំណាច់ខែធ្នូ ឆ្នាំ២០២២ ចំនួនអតិថិជនឥណទានអាជីវកម្មខ្នាតតូចរបស់សម្ព័ន្ធធនាគារបានកើនដល់៤៥៣.០១៤នាក់។
ឥណទានមិនដំណើរការស្ថិតក្នុងអត្រា២,៩០% ដែលជាអត្រាអាចគ្រប់គ្រងបាននៅក្នុងកំលុងនៃវិបត្តិកូវីដ-១៩នេះ។
ប្រាក់បញ្ញើ-សន្សំមានចំនួន៦.៣៨៨,៩៩លានដុល្លារអាមេរិក ដែលមានគណនីសកម្មចំនួន៣.៨៧លានគណនី។
សម័្ពន្ធធនាគារទទួលបានប្រាក់ចំណេញដែលផ្តល់ជូនភាគហ៊ុនិករបស់ធនាគារចំនួន១៨១,៧៤លានដុល្លារអាមេរិក។
ធនាគារនៅតែបន្តកាត់បន្ថយចំណាយ និងត្រួតពិនិត្យហានិភ័យជាប្រចាំ ដើម្បីទទួលបានប្រាក់ចំណេញខ្ពស់បំផុត។
ធនាគារកំពុងផ្តោតលើការអភិវឌ្ឍបន្ថែមទៀតនូវហេដ្ឋារចនាសម្ព័ន្ធធនាគារអេឡិចត្រូនិក ដើម្បីផ្តល់ជូនអតិថិជនរបស់ខ្លួននូវផលិតផល និងសេវាកម្មដ៏ធំទូលាយ ក្នុងការគ្រប់គ្រងធនធានហិរញ្ញវត្ថុ។

សេវាលក់រាយ និងអាជីវកម្មខ្នាតតូច

ឥណទានខ្នាតតូចបានកើនឡើង១៦,៨៩% ឬស្មើនឹង៤១៤,៦២លានដុល្លារអាមេរិក និងឥណទានសម្រាប់ប្រើប្រាស់ផ្ទាល់ខ្លួន និងផ្សេងៗ បានកើនឡើង២៩,៦៦% ឬស្មើនឹង៦០,០៨លានដុល្លារអាមេរិក។ ចំណែកឥណទានគេហដ្ឋានមានចំនួន១៨២,៩៣លានដុល្លារអាមេរិក។ សមតុល្យឥណទានសរុបមានចំនួន៦.៤២១,៦៥លានដុល្លារអាមេរិក នៅដំណាច់ឆ្នាំ២០២២។

សម្ព័ន្ធធនាគារមានសមតុល្យប្រាក់បញ្ញើ-សន្សំសរុបចំនួន៦.៣៨៨,៩៩លានដុល្លារអាមេរិក (កើនឡើង១១.៧៧% ឬស្មើនឹង៦៧២,៩៧លានដុល្លារអាមេរិក) និងមានគណនីសរុបជាង៣,៨៦៥,៧៤៩ គណនី។ វិស័យលក់រាយគឺជាផ្នែកដែលធំជាងគេបំផុតនៃកំណើនប្រាក់បញ្ញើសរុប ដែលភាគច្រើនបានមកពីអតិថិជនដាក់ប្រាក់បញ្ញើដំបូង ដូចជាកម្មករនិយោជិតតាមរយៈសេវាបើកប្រាក់បៀវត្ស និងអតិថិជននៅតាមជនបទ ដែលពួកគាត់បានប្រើប្រាស់គណនីវ៉លឡេត របស់អេស៊ីលីដាម៉ូបាល ដែលជាផលិតផល និងសេវាកម្មហិរញ្ញវត្ថុ តាមរយៈបច្ចេកវិទ្យាហិរញ្ញវត្ថុ បានចូលរួមចំណែកធ្វើឱ្យមានកំណើនយ៉ាងខ្លាំងក្លា។

សម្ព័ន្ធធនាគារកំពុងតែអភិវឌ្ឍនូវហេដ្ឋារចនាសម្ព័ន្ធឱ្យកាន់តែទូលំទូលាយ សម្រាប់ជាជម្រើសដ៏សម្បូរបែបជាមួយនឹងសាខាទាំង៣១៨ទីតាំង (ឬការិយាល័យ) និងសេវាកម្មធនាគារស្វ័យប្រវត្តិចំនួន១២៥ទីតាំង ព្រមទាំងមានម៉ាស៊ីនអេធីអឹមចំនួន១,២០០គ្រឿង និងម៉ាស៊ីនឆូតកាតចំនួន៤,៣៥៨គ្រឿង។ ចំណុចគួរជាទីមោទនភាព គឺសម័្ពន្ធធនាគារបានបោះពុម្ពប័ណ្ណឥណពន្ធចំនួន១,៨០លាន ប័ណ្ណជូនដល់អតិថិជន។ បន្ថែមលើនេះ អេស៊ីលីដាម៉ូបាល (ACLEDA mobile) បានទទួលប្រជាប្រិយភាពយ៉ាងខ្លាំង ដែលមានអ្នកចុះឈ្មោះប្រើប្រាស់ច្រើនជាង២,៨៥លាននាក់ នៅដំណាច់ឆ្នាំ២០២២នេះ។

ឥណទានខ្នាតមធ្យម និងសាជីវកម្ម

ក្នុងឆ្នាំ២០២២ សេវាចាត់ចែងសាច់ប្រាក់បានកើនឡើងយ៉ាងខ្លាំង តាមរយៈការចាប់ដៃគូជាមួយនឹងវិស័យសាធារណៈ ជាពិសេស បេឡាជាតិរបបសន្តិសុខសង្គម (ប.ស.ស.) សេវាបើកប្រាក់បៀវត្សសម្រាប់មន្ត្រីរាជការ សេវាប្រមូលពន្ធលើមធ្យោបាយដឹកជញ្ជូន និងយានជំនិះគ្រប់ប្រភេទ។ តម្រូវការប្រើប្រាស់សេវាបើកប្រាក់បៀវត្សបានកើនឡើងខ្លាំងនៅក្នុងឆ្នាំ២០២២ ដោយមានស្ថាប័នរដ្ឋាភិបាល ព្រមទាំងក្រុមហ៊ុនធំៗ ក្នុងស្រុក និងក្រៅប្រទេស រួមទាំងស្ថាប័ននានាបានចូលរួមប្រើប្រាស់ ដែលជាឱកាសដ៏ល្អសម្រាប់ការលក់ផលិតផលផ្សេងៗទៀត។

បន្ថែមលើនេះ ការផ្តល់ជូនសេវាកម្មដ៏ល្អបំផុតតាមរយៈបណ្តាញប្រតិបត្តិការទូទាំងប្រទេសរបស់ធនាគារ បានទាក់ទាញ និងជំរុញក្រុមហ៊ុនអាជីវកម្មខ្នាតមធ្យម និងសាជីវកម្មយ៉ាងខ្លាំង ក្នុងការជ្រើសរើសធនាគារជាអ្នកសម្របសម្រួលអាទិភាពទីមួយ សម្រាប់ការចាត់ចែង និងប្រភពហិរញ្ញវត្ថុ សម្រាប់គាំទ្រការទូទាត់ និងប្រតិបត្តិអាជីវកម្មរបស់ពួកគាត់។ សេវាកម្មចម្រុះសម្បូរបែបទាំងនេះបានផ្តល់ផលវិជ្ជមានដ៏សំខាន់លើលំហូរសាច់ប្រាក់ជារូបិយវត្ថុជាតិរបស់ធនាគារ និងបានធ្វើឱ្យធនាគារមានលទ្ធភាពប្រមូលនូវប្រភព ធនធានហិរញ្ញវត្ថុជារូបិយវត្ថុរៀលដើម្បីពង្រឹង និងពង្រីកការផ្តល់ឥណទានជាប្រាក់រៀលបានកាន់តែច្រើនផងដែរ។ ទន្ទឹមនឹងនេះ ឥណទានអាជីវកម្មខ្នាតមធ្យម និងសាជីវកម្ម បានកើនឡើង១៧,៨៧% បើធៀបនឹងឆ្នាំ២០២១ ដែលមានចំនួនស្មើនឹង៣៩,០៤% នៃសមតុល្យឥណទានសរុប។

លើសពីនេះទៅទៀត ធនាគារ និងក្រុមហ៊ុនបុត្រសម្ព័ន្ធរបស់ខ្លួន នៅតែបន្តកិច្ចសហប្រតិបត្តិការជាមួយនឹងដៃគូយុទ្ធសាស្រ្តរយៈពេលវែង ដែលមានបទពិសោធន៍ដ៏សម្បូរបែប ដែលអាចជួយដល់អតិថិជនក្នុងការគ្រប់គ្រងធនធានហិរញ្ញវត្ថុរបស់ពួកគាត់ប្រកបដោយប្រសិទ្ធភាព និងប្រសិទ្ធផល។ ទន្ទឹមនឹងនេះ ភាពជាដៃគូទាំងនេះបានរួមចំណែកយ៉ាងសំខាន់ក្នុងការផ្តល់ប្រភពមូលនិធិរយៈពេលវែងដល់ធនាគារ និងជាប្រភពនៃប្រាក់ចំណូលក្រៅតារាងតុល្យការ។ ម្យ៉ាងវិញទៀត ភាពជាដៃគូនេះក៏បានចែករំលែកនូវជំនាញ និងបទពិសោធន៍អន្តរជាតិជូនដល់ថ្នាក់គ្រប់គ្រង និងបុគ្គលិករបស់ធនាគារ។

រតនាភិបាល និងអន្តរជាតិ

ជាធនាគារឈានមុខក្នុងការផ្តល់សេវាប្តូរប្រាក់ជូនសាធារណជនគ្រប់វិស័យ ដែលចំណូលពីសេវាប្តូរប្រាក់នេះបានបន្តកើនឡើង និងចូលរួមបង្កើនចំណូលមិនមែនការប្រាក់របស់ធនាគារ។ ដោយយោងលើគោលការណ៍គ្រប់គ្រងហានិភ័យ ធនាគារមិនបានប្រើប្រាស់សេវាប្តូរប្រាក់ដើម្បីរំពឹងទុកផលចំណេញនាពេលអនាគតនោះទេ។ ធនាគារបម្រើសេវាប្តូរប្រាក់សម្រាប់តែកិច្ចគាំទ្រដល់អាជីវកម្មរបស់អតិថិជនប៉ុណ្ណោះ។ សេវានេះផ្តល់ប្រភពចំណូលដែលមានហានិភ័យទាប ដែលធនាគារអាចគ្រប់គ្រងចាត់ចែងស្ថានភាពរូបិយប័ណ្ណចំហសុទ្ធរបស់ខ្លួននៅកម្រិតអនុបាតប្រុងប្រយ័ត្នជាក់លាក់មួយអនុលោមតាមការកំណត់ផ្ទៃក្នុង និងបទប្បញ្ញត្តិពាក់ព័ន្ធ។ ចំណូលពីសេវានេះជាប្រភពចំណូលស្ថិរភាព ហើយមានកំណើនជាលំដាប់ និងរក្សាទំនាក់ទំនងយូរអង្វែងជាមួយអតិថិជន និងដៃគូរបស់ ធនាគារ។

តារាងតុល្យការរបស់ធនាគារត្រូវបានពង្រឹងនិងរួមចំណែកដោយប្រភពមូលនិធិដ៏រឹងមាំនៃប្រាក់បញ្ញើរបស់អតិថិជន និងប្រាក់កម្ចីរយៈពេលវែង ដែលផ្តល់នូវប្រភពហិរញ្ញវត្ថុដ៏រឹងមាំ ក្នុងការគាំទ្រដល់សម្ទុះនៃការរីកចម្រើននៃអាជីវកម្ម និងប្រតិបត្តិការរបស់ធនាគារ។

ធនាគារបានចូលរួមចំណែកលើកស្ទួយការប្រើប្រាស់ប្រាក់រៀល តាមរយៈការផ្តល់ឥណទានជាប្រាក់រៀលដល់អតិថិជន ដែលមានចំនួនច្រើនជាង១៤% នៃទំហំឥណទានសរុប ដែលលើសពីបញ្ញត្តិតម្រូវត្រឹមតែ១០%ប៉ុណ្ណោះ។

បន្ថែមពីនេះទៀត ធនាគារបានរក្សាទំនាក់ទំនងល្អជាមួយនឹងដៃគូយុទ្ធសាស្ត្រទូទាំងសកលលោក ជាពិសេស នៅអឺរ៉ុប សហរដ្ឋអាមេរិក និងអាស៊ី ដើម្បីគាំទ្រដល់ធនាគារ ក្នុងការធ្វើពិពិធកម្មមូលនិធិ និងផ្តល់ប្រភពមូលនិធិរយៈពេលវែង។

ធនាគារនៅតែបន្តពង្រឹងទំនាក់ទំនងជាមួយស្ថាប័នហិរញ្ញវត្ថុជាច្រើន និងបានបង្កើនធនាគារដៃគូក្រៅប្រទេសថ្មីៗជាច្រើនបន្ថែមទៀត ដើម្បីពង្រីកបណ្តាញប្រតិបត្តិការរបស់ខ្លួន។ នាដំណាច់ឆ្នាំ២០២២ ធនាគារមានធនាគារដៃគូចំនួន២៦២ នៅក្នុងចំណោម៤៥ប្រទេស។ លើសពីនេះទៀត ធនាគារមានចំណែកទីផ្សារលើសលុប ក្នុងការគ្រប់គ្រងគណនីរបស់ធនាគារ និងស្ថាប័នហិរញ្ញវត្ថុក្នុងស្រុក ព្រមទាំងផ្តល់សេវាផ្ទេរប្រាក់ដល់ស្ថាប័នទាំងនោះនៅទូទាំងប្រទេស។

ធនាគារបានរៀបចំ និងអនុវត្តបានទាំងស្រុងតាមគោលការណ៍គ្រប់គ្រងហានិភ័យផ្ទៃក្នុង តម្រូវការបទប្បញ្ញត្តិ និងកិច្ចព្រមព្រៀងជាមួយនឹងម្ចាស់បំណុលនានា។

យុទ្ធសាស្រ្តអាទិភាពសម្រាប់ឆ្នាំ២០២៣

អាទិភាពសេវាធនាគារតាមទូរស័ព្ទ និងធ្វើឱ្យប្រសើរឡើងនូវកម្មវិធីឌីជីថល រួមទាំងប្រព័ន្ធទូទាត់ជាតិ (NPH), ដៃគូ និងសមាហរណកម្មបណ្ដាញទូទាត់អាស៊ាន និងកិច្ចសហប្រតិបត្តិការជាសកល។
បរិវត្តកម្មឌីជីថលលើធនធានមនុស្ស និងសុខុមាលភាពកម្មករនិយោជិត សម្រាប់កំណើនប្រកបដោយនិរន្តរភាពយូរអង្វែង ជាមួយនឹងពហុជំនាញ និងកន្លែងធ្វើការបែបឌីជីថល។
កាត់បន្ថយលំហូរការងារដោយប្រើប្រាស់ឯកសារឌីជីថលតាមរយៈកម្មវិធីឌីជីថល សម្រាប់ផលិតផល និងសេវាកម្មហិរញ្ញវត្ថុទាំងអស់។
កែលម្អការិយាល័យសាខា និងយុទ្ធសាស្រ្តស្លាកសញ្ញា ដើម្បីបង្កើតសហគមន៍អេស៊ីលីដា។
ស្ថាបត្យកម្ម Data Lakehouse សម្រាប់ដំណើរការភ្លាមៗ នៃទិន្នន័យ Streaming, ការវិភាគក្បួនដោះស្រាយ និងការអភិវឌ្ឍម៉ាស៊ីនបញ្ញាសិប្បនិម្មិត ក្នុងគោលបំណងសម្រេចបាននូវទីផ្សារឆ្លាតវៃ, ការយល់ដឹងស៊ីជម្រៅ, ការអភិវឌ្ឍផលិតផលដោយជោគជ័យ, ការរកឃើញសកម្មភាពក្លែងបន្លំជាមុន និងសេវាកម្មអតិថិជនដ៏ប្រសើរ។
ពង្រឹងសេវាកម្មបច្ចេកវិទ្យាព័ត៌មានឱ្យទំនើបបំផុត ដើម្បីគាំទ្រដល់យុទ្ធសាស្ត្រអាជីវកម្មធនាគារ ខណៈពេលដែលទ្រព្យសកម្មព័ត៌មាន ត្រូវបានការពារដោយប្រើបច្ចេកវិទ្យាដ៏ល្អចុងក្រោយ។
ពង្រឹងជំហរជាក្រុមហ៊ុនចុះបញ្ជីនៅផ្សារមូលបត្រកម្ពុជា ទាំងមូលបត្របំណុល និងភាគហ៊ុន។
ធានាធ្វើឱ្យក្រុមហ៊ុនបុត្រសម្ព័ន្ធទាំងអស់របស់ធនាគារ អេស៊ីលីដា ភីអិលស៊ី បង្កើតជាផ្នែកសំខាន់មួយនៃធនាគារឌីជីថល និងសេវាកម្មរបស់ពួកគេ។
ភាពជាដៃគូបរិយាបន្នជាមួយស្ថាប័នសក្តានុពល ដើម្បីកំណើនអាជីវកម្ម។
ការវាយតម្លៃបរិស្ថាន សង្គម និងអភិបាលកិច្ច (ESG), ក្របខ័ណ្ឌនៃគោលការណ៍ណែនាំ និងការប្តេជ្ញាចិត្តចំពោះគោលគំនិតបីយ៉ាង (មនុស្ស ភពផែនដី ប្រាក់ចំណេញ)។

បញ្ហាចម្បងក្នុងឆ្នាំ២០២៣

ធនាគារជាក្រុមហ៊ុនចុះបញ្ជីមួយ ដែលអនុលោមតាមបទប្បញ្ញត្តិរបស់ធនាគារជាតិ នៃ កម្ពុជា និង ន.ម.ក. ហើយនេះក៏ជាទំនួលខុសត្រូវរបស់ធនាគារចំពោះសាធារណជន និងវិនិយោគិនផងដែរ។ ក្នុងប្រវត្តិជាច្រើនឆ្នាំរបស់ខ្លួន ធនាគារបានបង្កើតទំនុកចិត្តដល់សាធារណជន តាមរយៈអភិបាលកិច្ចសាជីវកម្មល្អ គណៈគ្រប់គ្រងដែលមានបទពិសោធន៍យូរឆ្នាំ ព្រមទាំងមានវប្បធម៌ការងារប្រកបដោយតម្លាភាព។

ហេដ្ឋារចនាសម្ព័ន្ធឌីជីថល និងផលិតផលបច្ចេកវិទ្យាធ្វើឱ្យអតិថិជន និងសាធារណៈ កាន់តែងាយស្រួលក្នុងការប្រើប្រាស់សេវាកម្មហិរញ្ញវត្ថុ ដែលមានភាពសម្បូរបែប។ តាមរយៈនេះ វាបានជួយលុបបំបាត់គម្លាតរបស់អតិថិជនក្នុងទីផ្សារហិរញ្ញវត្ថុ ព្រមទាំងញ៉ាំងឱ្យអតិថិជនមានជម្រើសក្នុងចំណោមធនាគារ និងស្ថាប័នហិរញ្ញវត្ថុ ដោយលែងខ្វល់អំពីតំបន់រស់នៅរបស់ពួកគេទៀត។ សេវាបច្ចេកវិទ្យាក៏ជួយជំរុញដល់ការប្រកួតប្រជែងខ្លាំងក្លា ទាំងគុណភាព និងតម្លៃនៃសេវាកម្ម។ អេស៊ីលីដាម៉ូបាល បានបំពាក់បច្ចេកវិទ្យាជំនាន់ចុងក្រោយបំផុត ដែលមានរូបភាពទាន់សម័យគួរឱ្យទាក់ទាញ។ វាត្រូវបានបង្កើតឡើងជាមួយនឹងបទពិសោធន៍របស់អតិថិជន ដើម្បីឱ្យមានភាពងាយស្រួល និងសមស្របទៅនឹងមនុស្សគ្រប់វ័យ។ លើសពីនេះ វាមានសុវត្ថិភាពខ្ពស់ និងអាចទាញយកដោយខ្លួនឯងនៅកន្លែងណា ដែលមាន WiFi ឬអ៊ីនធើណែត ហើយវាក៏ជាដំណោះស្រាយមួយដែរ ដើម្បីជួយឱ្យធនាគារឈានមុខក្នុងការប្រកួតប្រជែង។

ឆ្នាំ២០២៣ នឹងនៅតែប្រឈមជាមួយឧបសគ្គមួយចំនួន ប៉ុន្តែកម្ពុជាស្ថិតនៅក្នុងទីតាំងដែលមានសេដ្ឋកិច្ចវិជ្ជមានល្អ ជាមួយនឹងការអភិវឌ្ឍហេដ្ឋារចនាសម្ព័ន្ធដែលកំពុងដំណើរការបន្ត និងទំនោរប្រសើរនៃវិស័យធំៗពាក់ព័ន្ធ ដែលបំពេញដោយភាពជាដៃគូសេដ្ឋកិច្ចគ្រប់ជ្រុងជ្រោយក្នុងតំបន់ (RCEP) កិច្ចព្រមព្រៀងពាណិជ្ជកម្មសេរី (FTA) និងការប្រកាសពីការបន្ធូរបន្ថយការរឹតបន្តឹងការធ្វើដំណើររបស់ប្រទេសចិន គួបផ្សំនឹងសាធារណជនមើលឃើញពីសារៈសំខាន់នៃស៊ីហ្គេមលើកទី១ និងអាស៊ានប៉ារ៉ាហ្គេមលើកទី១២ ដែលកម្ពុជាធ្វើជាម្ចាស់ផ្ទះក្នុងខែឧសភា និងមិថុនា ឆ្នាំ២០២៣ ខាងមុខតាមលំដាប់គ្នា។

ដោយសារតែការកើនឡើងនៃតម្រូវការសកល ទំនុកចិត្តរបស់អ្នកវិនិយោគបរទេស និងការបើកឡើងវិញពេញលេញនៃព្រំដែន ព្រះរាជាណាចក្រកម្ពុជា ត្រូវបានគេរំពឹងថានឹងមានកំណើនសេដ្ឋកិច្ចកើនឡើងនៅឆ្នាំ២០២៣។ ទោះជាយ៉ាងណាក៏ដោយ ការរីករាលដាលនៃជំងឺកូវីដ-១៩ នៅតែជះឥទ្ធិពលដល់ផ្នែកខ្លះនៃពិភពលោក ប៉ុន្តែមិនសូវមានការភ័យខ្លាចជាសាធារណៈនោះទេ។ ការធ្លាក់ចុះនៃសេដ្ឋកិច្ចរបស់ប្រទេសចិន បណ្តាលមកពីផលប៉ះពាល់នៃគោលនយោបាយគ្មានកូវីដ-១៩ (Zero-COVID-19) អាចមានភាពប្រសើរវិញ ក្រោយមានការប្រកាសថានឹងបន្ធូរបន្ថយការរឹតបន្តឹងការធ្វើដំណើរនៅដើមឆ្នាំ២០២៣ ដែលជាជំហានសេដ្ឋកិច្ចដ៏សំខាន់មួយសម្រាប់តំបន់។ អតិផរណានៅឆ្នាំ២០២៣ អាចប្រឈមនឹងភាពមិនច្បាស់លាស់ ដោយសារតែសង្គ្រាមរុស្ស៊ី-អ៊ុយក្រែន ដែលអូសបន្លាយ និងការប្រែប្រួលនៃសេដ្ឋកិច្ចសកល។ ដោយសារការថមថយនៃសេដ្ឋកិច្ចពិភពលោកជាមួយនឹងការថយចុះយឺតៗ នៃតម្លៃម្ហូបអាហារនោះ អតិផរណានៅកម្ពុជាត្រូវបានគេព្យាករថានឹងមាននិន្នាការធ្លាក់ចុះដែរ។

ខ្ញុំសូមថ្លែងអំណរគុណយ៉ាងជ្រាលជ្រៅ ចំពោះការគាំទ្ររបស់អតិថិជន ក្រុមប្រឹក្សាភិបាល ថ្នាក់គ្រប់គ្រង និងបុគ្គលិក ជាពិសេសរាជរដ្ឋាភិបាល ធនាគារជាតិ នៃ កម្ពុជា និង ន.ម.ក. ក្នុងឆ្នាំ២០២២ និងការចូលរួមប្រកបដោយសោមនស្ស និងឧត្តុង្គឧត្តមក្នុងឆ្នាំ២០២៣។

បណ្ឌិត អ៊ិន ចាន់នី
ប្រធាននាយកប្រតិបត្តិ ធនាគារ អេស៊ីលីដា ភីអិលស៊ី
ថ្ងៃទី២២ ខែមីនា ឆ្នាំ២០២៣

របាយការណ៍​ប្រធាន​នាយក​ប្រតិបត្តិ

សមិទ្ធិផលសម្រេចបានក្នុងឆ្នាំ២០២២

ស្ថានភាពប្រកួតប្រជែង

ចំណុច​សំខាន់ៗនៃ​ប្រតិបត្តិការ​ក្នុងឆ្នាំ២០២២

សេវាលក់រាយ និង​អាជីវកម្ម​ខ្នាតតូច