ព័ត៌មានព័ត៌មានថ្មីៗពិធីសម្ពោធទីតាំងថ្មី សាខាខេត្តកោះកុង

ធនាគារអេស៊ីលីដា សម្ពោធទីតាំងថ្មី សាខាខេត្តកោះកុង

ថ្ងៃទី០៤ ខែកក្កដា ឆ្នាំ២០០៨

គណៈប្រតិភូ ថ្នាក់ដឹកនាំ និងបុគ្គលិក សាខាខេត្តកោះកុង

នៅថ្ងៃទី០៤ ខែកក្កដា ឆ្នាំ២០០៨ ធនាគារអេស៊ីលីដា សាខាខេត្តកោះកុង បានបើកសម្ពោធជាផ្លូវការ ក្រោមអធិបតីភាពឯកឧត្តម យុទ្ធ ភូថង អភិបាលខេត្តកោះកុង និងលោក អ៊ិន ចាន់នី ប្រធាននាយកប្រតិបត្តិធនាគារអេស៊ីលីដា ។

ឯកឧត្តម យុទ្ធ ភូថង អភិបាលខេត្តកោះកុង បានមានប្រសាសន៍ថា ទីតាំងថ្មីរបស់ធនាគារអេស៊ីលីដាសាខាខេត្តកោះកុងស្ថិតក្នុងតំបន់ពាណិជ្ជកម្ម ហើយការិយាល័យថ្មីនេះបង្កើតឡើងស្របពេលដែលសេដ្ឋកិច្ចនៅខេត្តកោះកុងកំពុងតែមានការរីកចម្រើន ។ ឯកឧត្តមបានចូលរួមអបអរសាទរ និងកោតសរសើរចំពោះថ្នាក់ដឹកនាំរបស់ធនាគារអេស៊ីលីដា ដែលធ្វើឱ្យធនាគារមានការរីកចម្រើន ដែលទាំងនេះសុទ្ធសឹងតែផ្តល់នូវអត្ថប្រយោជន៍យ៉ាងច្រើនដល់ប្រជាជន និងអ្នកជំនួញខេត្តកោះកុងទទួលបាននូវប្រភពធនធានផ្នែកហិរញ្ញវត្ថុ ។

លោក ស៊ឹម កំសត់ នាយកធនាគារអេស៊ីលីដា សាខាខេត្តកោះកុង បានថ្លែងថា ដោយសារតែឧត្តមភាពទីផ្សារល្អ សាខាខេត្តកោះកុងបានកម្លាយខ្លួនយ៉ាងរហ័សពីការិយាល័យស្រុកដែលស្ថិតក្រោមការគ្រប់គ្រងរបស់សាខាក្រុងព្រះសីហនុ នៅខែធ្នូ ឆ្នាំ២០០៣ ទៅជាសាខាខេត្តនៅដើមខែមករា ឆ្នាំ២០០៦ ។ បច្ចុប្បន្ន សាខានេះកំពុងតែប្រតិបត្តិនៅក្នុងស្រុកចំនួន៤ គឺ ស្រុកស្មាច់មានជ័យ ស្រុកមណ្ឌលសីមា ស្រុកកោះកុង និងស្រុកគិរីសាគរ និងកំពុងបន្តត្រៀមប្រតិបត្តិការនៅក្នុងស្រុកថ្មបាំងនាពេលឆាប់ៗខាងមុខនេះ ។ គិតមកត្រឹមថ្ងៃទី៣០ ខែមិថុនា ឆ្នាំ២០០៨ ធនាគារអេស៊ីលីដាសាខាខេត្តកោះកុងមានបុគ្គលិកបម្រើការចំនួន ៤៦នាក់ ហើយទ្រព្យសកម្មមានចំនួន ៦.០០៧.៩៦៧ដុល្លារអាមេរិក សមតុល្យឥណទានក្នុងដៃអតិថិជន ១.១៨៧នាក់ មានទឹកប្រាក់ចំនួន ៥.០៤២.៤០៥ដុល្លារអាមេរិក និងមានអតិថិជនចំនួន ៣.៣២៩នាក់ ដាក់ប្រាក់បញ្ញើសន្សំ ដែលមានទឹកប្រាក់សរុបជិត ៦លានដុល្លារអាមេរិក ។

ឆ្លៀតក្នុងឱកាសដ៏មានសារៈសំខាន់នេះ លោក អ៊ិន ចាន់នី ប្រធាននាយកប្រតិបត្តិធនាគារអេស៊ីលីដា បានបន្ថែមថា ធនាគារអេស៊ីលីដា បានបម្រើសេវាកម្មហិរញ្ញវត្ថុជូនដល់អតិថិជនជាង១៥ឆ្នាំមកហើយ តាមរយៈសាខា និងការិយាល័យទាំង ២១៤ គ្រប់ខេត្ត-រាជធានីទាំង ២៤ ព្រមទាំងសាខា និងការិយាល័យចំនួន ៣ទៀត នៅក្នុងប្រទេសឡាវ ។ លោកមានមោទនភាពយ៉ាងខ្លាំង ចំពោះសំណង់អគារការិយាល័យថ្មីនេះ ដែលបានសាងសង់តាមស្តង់ដាររបស់ធនាគារ ស្របតាមយុទ្ធសាស្ត្រយូរអង្វែង ដើម្បីបង្កលក្ខណៈងាយស្រួលក្នុងទំនាក់ទំនងជាមួយអតិថិជន ជាពិសេស គឺការពារសុវត្ថិភាពទ្រព្យសម្បត្តិរបស់អតិថិជន ដែលកំពុងប្រើប្រាស់សេវាធនាគារ ព្រមទាំងផ្តល់ផាសុកភាព និងសុវត្ថិភាពការងារដល់បុគ្គលិកដែលបាន និងកំពុងបម្រើការងារផងដែរ ។ នៅបំណាច់ខែឧសភា ឆ្នាំ២០០៨នេះ ទ្រព្យសកម្មសរុបរបស់ធនាគារអេស៊ីលីដាទាំងមូលកើនដល់ចំនួន ៦៣៤លានដុល្លារអាមេរិក រួមទាំងសមិទ្ធិផលរបស់សាខាខេត្តកោះកុង ហើយទ្រព្យសកម្មនេះ នឹងកើនដល់ ១.០០០លានដុល្លារអាមេរិក នាពេលដ៏ខ្លីខាងមុខ ដែលជាមធ្យោបាយដ៏មុតថ្លាដើម្បីអភិវឌ្ឍសង្គម និងសេដ្ឋកិច្ចរបស់ប្រទេសកម្ពុជា ។

ដើម្បីអបអរនៅក្នុងពិធីសម្ពោធនោះផងដែរ លោកប្រធាននាយកប្រតិបត្តិ បានប្រកាសឱ្យសាធារណជនបានដឹង នូវការដាក់ឱ្យប្រើប្រាស់ ប័ណ្ណឥណពន្ធវីសាអេស៊ីលីដាថ្នាក់អន្តរជាតិ ដើម្បីសម្រួលជូនអតិថិជន និងសាធារណជនអាចធ្វើការដកប្រាក់ និងទូទាត់ប្រាក់ដោយស្វ័យប្រវត្តិនៅតាមម៉ាស៊ីនអេធីអឹម និងម៉ាស៊ីនទូទាត់ប្រាក់ ដែលមានស្លាកសញ្ញា VISA ទូទាំងប្រទេស និងពាសពេញពិភពលោក ចេញពីគណនីដែលកំពុងតែមានជាមួយធនាគារអេស៊ីលីដាបាន ២៤ម៉ោងក្នុងមួយថ្ងៃ ៧ថ្ងៃក្នុងមួយសប្តាហ៍ និង ៣៦៥ថ្ងៃក្នុងមួយឆ្នាំ ។

« ព័ត៌មានមុន
ធនាគារអេស៊ីលីដា ដាក់ឱ្យដំណើរការប័ណ្ណឥណពន្ធវីសា ព័ត៌មានបន្ទាប់ »
ធនាគារអេស៊ីលីដា បើកសាខាថ្មីទីមួយនៅប្រទេសឡាវ

ធនាគារ​អេស៊ីលីដា សម្ពោធ​ទីតាំង​ថ្មី សាខា​ខេត្តកោះកុង

ធនាគារអេស៊ីលីដា សម្ពោធទីតាំងថ្មី សាខាខេត្តកោះកុង