ព័ត៌មានព័ត៌មានថ្មីៗពិធីប្រសិទ្ធពរឆ្នាំថ្មី-ឆ្នាំសកល ២០០៩

ធនាគារអេស៊ីលីដា ភីអិលស៊ី ប្រារព្ធពិធី "ប្រសិទ្ធពរឆ្នាំថ្មី-ឆ្នាំសកល"

ថ្ងៃទី៣១ ខែធ្នូ ឆ្នាំ២០០៨

ភ្នំពេញ ថ្ងៃទី៣១ ខែធ្នូ ឆ្នាំ២០០៨ ៖ ធនាគារអេស៊ីលីដា ភីអិលស៊ី ការិយាល័យកណ្តាល និងគ្រប់ការិយាល័យសាខា ទូទាំងព្រះរាជាណាចក្រកម្ពុជា បានរៀបចំប្រារព្ធពិធីប្រសិទ្ធពរឆ្នាំថ្មី-ឆ្នាំសកល ដើម្បីចូលរួមអបអរសាទរឆ្នាំថ្មី-ឆ្នាំសកល និងដើម្បីបង្កបរិយាកាសសប្បាយរីករាយជួបជុំគ្នា ពង្រឹងនូវទំនាក់ទំនងល្អ រឹតចំណងសាមគ្គីភាពរវាងកម្មករនិយោជិតធនាគារអេស៊ីលីដាឱ្យកាន់តែប្រសើរឡើង និងដើម្បីប្រសិទ្ធពរ ថ្លែងអំណរគុណ តបគុណបំណាច់ការងារចំពោះសហការីទាំងអស់ ។

អ្នកស្រី ឡុង សុធី តំណាងកម្មករនិយោជិតធនាគារអេស៊ីលីដា មានប្រសាសន៍ថា "នេះជាថ្ងៃដ៏វិសេសវិសាលដែលធនាគារអេស៊ីលីដាទូទាំងប្រទេស បានរៀបចំពិធីប្រសិទ្ធពរដំណាច់ឆ្នាំសកល ដើម្បីប្រសិទ្ធពរបវរប្រសើរ និងរឹតចំណងសាមគ្គីភាពរវាងកម្មករនិយោជិតកាន់តែល្អប្រសើរមួយកម្រិតទៀត ។

ក្នុងឱកាសនេះ លោកប្រធាននាយកប្រតិបត្តិបានផ្ញើសារលិខិតជូនពរចំពោះកម្មករ និយោជិត ធនាគារអេស៊ីលីដាគ្រប់ជាន់ថ្នាក់ ដែលមានអត្ថន័យទាំងស្រុងដូចខាងក្រោម ។

លោក អ៊ិន ចាន់នី ប្រធាននាយកប្រតិបត្តិធនាគារអេស៊ីលីដា

សារប្រសិទ្ធពរ ក្នុងឱកាសឆ្នាំថ្មី–ឆ្នាំសកល ២០០៩ របស់ ប្រធាននាយកប្រតិបត្តិ ជូនចំពោះ កម្មករនិយោជិត ធនាគារអេស៊ីលីដា ភីអិលស៊ី ទាំងអស់

ខ្ញុំសូមថ្លែងនូវអំណរគុណដ៏ស្មោះស្ម័គ្រ, ឧត្តុង្គឧត្តមបំផុត ជូនចំពោះសហការីទាំងអស់ ដែលបានចូលរួមអនុវត្តយុទ្ធសាស្ត្ររបស់ធនាគារអេស៊ីលីដា ភីអិលស៊ី និងធ្វើឱ្យសម្រេចជោគជ័យលើផែនការអាជីវកម្មឆ្នាំ២០០៨ លើស ១០០ភាគរយ ធៀបនឹងឆ្នាំកន្លងមក និងឈានមុខលើបណ្តាធនាគារទាំងអស់ក្នុងព្រះរាជាណាចក្រកម្ពុជា ទោះបីជាមានការប្រឈមនឹងព្រឹត្តិការណ៍សំខាន់ៗដូចជា មានការបង្កើនប្រាក់តម្កល់បម្រុងកាតព្វកិច្ចលើប្រាក់បញ្ញើ, ការកំណត់នូវពិដានឥណទានគេហដ្ឋាន... ។ល។ រួមជាមួយនឹងវិបត្តិស៊ូណាមិហិរញ្ញវត្ថុក្នុងពិភពលោកដែលធ្វើឱ្យធនធានហិរញ្ញវត្ថុក្លាយជាធនធានកម្រក៏ដោយ ។

នៅក្នុងឱកាស ឆ្នាំថ្មី–ឆ្នាំសកល២០០៩ ក្នុងថ្ងៃស្អែកនេះ និងតទៅមុខ យើងនឹងអនុវត្តផែនការអាជីវកម្មថ្មីរបស់ធនាគារអេស៊ីលីដា ភីអិលស៊ី ដោយប្រើប្រាស់ទឡ្ហីកម្មរបស់ធនាគារអេស៊ីលីដា ភីអិលស៊ី ក្នុងការបម្រើអតិថិជននូវផលិតផល និងសេវាកម្មដែលមានកម្រិតចំណេញខ្ពស់ ធានាបាននិរន្តរភាពនៃការលូតលាស់យូរអង្វែង និងសម្រេចផែនការថ្មី ឆ្នាំ២០០៩ របស់ធនាគារអេស៊ីលីដា ភីអិលស៊ី ។

ខ្ញុំសូមថ្លែងអំណរគុណផងដែរ ចំពោះ ធនាគារជាតិនៃកម្ពុជា ជាអាណាព្យាបាលដ៏ល្អ និងអាជ្ញាធរសមត្ថកិច្ចមូលដ្ឋានគ្រប់លំដាប់, និងអតិថិជនទាំងអស់ ជានិច្ចកាល តែងតែចូលរួមឧបត្ថម្ភគាំទ្រយ៉ាងកក់ក្តៅបំផុតចំពោះធនាគារអេស៊ីលីដា ភីអិលស៊ី ។

សូមសហការីគ្រប់លំដាប់, គ្រប់តួនាទី និងក្រុមគ្រួសារទាំងអស់ ទទួលបាននូវពុទ្ធពរទាំងឡាយប្រាំប្រការគឺ ៖ អាយុ វណ្ណៈ សុខៈ ពលៈ និងបដិភាណៈ កុំបីឃ្លៀងឃ្លាតឡើយ ។

សម្រាប់ព័ត៌មានបន្ថែម សូមទាក់ទងតាមរយៈ ៖

លោកស្រី សូ ផនណារី អនុប្រធាននាយកប្រតិបត្តិ និងជាប្រធាននាយិកាប្រតិបត្តិប្រតិបត្តិការ
អ៊ីម៉ែល ៖

លោក ព្រំ វិសុទ្ធ នាយកប្រតិបត្តិនីតិកម្ម និងជាលេខាធិការក្រុមហ៊ុន
អ៊ីម៉ែល ៖

ថ្នាក់គ្រប់គ្រងនិងបុគ្គលិក ចូលរួមពិធីប្រសិទ្ធពរឆ្នាំថ្មី-ឆ្នាំសកល២០០៩ នៅការិយាល័យកណ្តាលធនាគារអេស៊ីលីដា

« ព័ត៌មានមុន
ធនាគារអេស៊ីលីដា ភីអិលស៊ី បានទទួលហិរញ្ញប្បទានឥតសំណង ព័ត៌មានបន្ទាប់ »
ពិធីសូត្រមន្តចំរើនសិរីមង្គល មជ្ឈមណ្ឌលបណ្ដុះបណ្ដាលមីក្រូហិរញ្ញវត្ថុ អេស៊ីលីដា-អាស៊ាន

ធនាគារអេស៊ីលីដា ភីអិលស៊ី ប្រារព្ធពិធី "ប្រសិទ្ធពរ​ឆ្នាំ​ថ្មី-ឆ្នាំសកល"

ធនាគារអេស៊ីលីដា ភីអិលស៊ី ប្រារព្ធពិធី "ប្រសិទ្ធពរឆ្នាំថ្មី-ឆ្នាំសកល"