USD
THB
EUR
AUD
VND
CAD
LAK
JPY
GBP
CNY
navigate_nextព័ត៌មានnavigate_nextព័ត៌មានថ្មីៗnavigate_nextធនាគារជាតិឡាវស្វែងយល់ពីការអភិវឌ្ឍរបស់ធនាគារអេស៊ីលីដា
ធនាគារជាតិឡាវស្វែងយល់ពីការអភិវឌ្ឍរបស់ធនាគារអេស៊ីលីដា
ថ្ងៃទី៣០ ខែមករា ឆ្នាំ២០០៩
ក្នុងដំណើរបំពេញបេសកកម្មជាអន្តរជាតិនៅប្រទេសកម្ពុជា នាល្ងាចថ្ងៃទី៣០ ខែមករា ឆ្នាំ២០០៩ ប្រតិភូរបស់ធនាគារឡាវ ដឹកនាំដោយឯកឧត្តម Phouphet Khampounvong ទេសាភិបាលធនាគារសាធារណរដ្ឋប្រជាធិបតេយ្យប្រជាមានិតឡាវ បានអញ្ជើញធ្វើទស្សនកិច្ចស្វែងយល់ពីការអភិវឌ្ឍរបស់ធនាគារអេស៊ីលីដា ភីអិលស៊ីនៅការិយាល័យកណ្តាល ដែលមានទីតាំងនៅរាជធានីភ្នំពេញ ដោយមានការទទួលស្វាគមន៍យ៉ាងរាក់ទាក់ពីថ្នាក់គ្រប់គ្រង និងបុគ្គលិករបស់ធនាគារអេស៊ីលីដាយ៉ាងច្រើន ។
លោក ជា សុខ ប្រធានក្រុមប្រឹក្សាភិបាលធនាគារអេស៊ីលីដា បានថ្លែងអំណរគុណយ៉ាងជ្រាលជ្រៅចំពោះធនាគារជាតិឡាវ ដែលបានគាំទ្រនិងអនុញ្ញាតឱ្យធនាគារអេស៊ីលីដាបង្កើតសាខានៅប្រទេសឡាវ ដែលមានការិយាល័យនៅទីក្រុងវៀងចន្ទន៍ សាក់វណ្ណខេត និងចំប៉ាសាក់ ជាពិសេសប្រជាជនឡាវដែលមានជំនឿចិត្ត និងគាំទ្រដល់ធនាគារអេស៊ីលីដានៅប្រទេសឡាវ ។ នៅក្នុងឆ្នាំ២០០៩នេះ ធនាគារអេស៊ីលីដា ឡាវ នឹងបង្កើតសាខានិងការិយាល័យចំនួន៧កន្លែងបន្ថែមទៀត ក្នុងគោលបំណងជួយអភិវឌ្ឍសេដ្ឋកិច្ចនៅប្រទេសឡាវដូចជាកម្ពុជាដែរ ។
លោក អ៊ិន ចាន់នី ប្រធាននាយកប្រតិបត្តិធនាគារអេស៊ីលីដា ភីអិលស៊ី បានជម្រាបជូនគណៈប្រតិភូពីការរីកចម្រើនរបស់ធនាគារអេស៊ីលីដា នាឱកាសនោះថា នេះជាឆ្នាំទី១៦ហើយដែលធនាគារអេស៊ីលីដា បានបម្រើសេវាហិរញ្ញវត្ថុជូនដល់អតិថិជន និងសាធារណជននៅកម្ពុជាតាមរយៈសាខា និងការិយាល័យទាំង២២៦កន្លែងទូទាំង២៤ខេត្ត-រាជធានីនៃព្រះរាជាណាចក្រកម្ពុជា និង៣សាខាទៀតនៅប្រទេសឡាវ ដែលមានការគាំទ្រយ៉ាងពេញទំហឹងពីអតិថិជនជាង៨០ម៉ឺននាក់ ដែលធ្វើឱ្យទ្រព្យសកម្មកើនដល់ចំនួនជាង៦៩០លានដុល្លារអាមេរិកនៅដំណាច់ឆ្នាំ២០០៨នេះ ។
ឯកឧត្តម Phouphet Khampounvong បានជម្រាបជូនថា ក្នុងដំណើរបំពេញបេសកកម្មនៅកម្ពុជានេះ ឯកឧត្តមបានចុះហត្ថលេខាលើអនុស្សរណៈមួយស្តីពីកិច្ចសហប្រតិបត្តិការទ្វេភាគីជាមួយធនាគារជាតិនៃកម្ពុជា ហើយសម្រាប់ធនាគារអេស៊ីលីដាជាជម្រើសទីមួយសម្រាប់ធ្វើជាដៃគូអភិវឌ្ឍនៅប្រទេសឡាវ និងបង្កើនកិច្ចសហប្រតិបត្តិការឱ្យកាន់តែល្អទ្វេឡើងថែមទៀតជាមួយធនាគារអេស៊ីលីដានៅប្រទេសឡាវក៏ដូចជានៅកម្ពុជាផងដែរ ។
