USD
THB
EUR
AUD
VND
CAD
LAK
JPY
GBP
CNY
navigate_nextព័ត៌មានnavigate_nextព័ត៌មានថ្មីៗnavigate_nextពិធីសម្ពោធការិយាល័យសាខាខេត្តកណ្តាល
ពិធីសម្ពោធការិយាល័យធនាគារអេស៊ីលីដា ភីអិលស៊ី សាខាខេត្តកណ្តាល
ថ្ងៃទី២៧ ខែកុម្ភៈ ឆ្នាំ២០០៩
នៅថ្ងៃទី២៧ ខែកុម្ភៈ ឆ្នាំ២០០៩ ធនាគារអេស៊ីលីដា ភីអិលស៊ី សាខាខេត្តកណ្តាល មានទីតាំងស្ថិតនៅអគារលេខ១៥ ផ្លូវជាតិលេខ២ ភូមិតាខ្មៅ សង្កាត់តាខ្មៅ ក្រុងតាខ្មៅ ខេត្តកណ្តាល បានប្រារព្ធពិធីសម្ពោធជាផ្លូវការ ដោយមានការអញ្ជើញចូលរួមជាគណៈអធិបតីក្នុងឱកាសនោះមាន ៖ ឯកឧត្តមអភិបាលរងខេត្តកណ្តាល លោកប្រធាន អនុប្រធាន និងក្រុមប្រឹក្សាភិបាលធនាគារអេស៊ីលីដា លោកប្រធាននាយកប្រតិបត្តិធនាគារអេស៊ីលីដា អនុប្រធាននាយកប្រតិបត្តិនិងជាប្រធាននាយក-នាយិកាប្រតិបត្តិ នាយក-នាយិកាធនាគារអេស៊ីលីដា និងភ្ញៀវកិត្តិយសជាតិ-អន្តរជាតិជាច្រើន ។
លោក ស៊ិន ឈិន នាយកធនាគារអេស៊ីលីដា ភីអិលស៊ី សាខាខេត្តកណ្តាល មានប្រសាសន៍ថា "គិតត្រឹមថ្ងៃទី៣១ ខែមករា ឆ្នាំ២០០៩ ធនាគារ អេស៊ីលីដា ភីអិលស៊ី សាខាខេត្តកណ្តាល មានបុគ្គលិកចំនួន ១៤០នាក់ កំពុងបម្រើការងារ ។ ទ្រព្យសកម្មមានជិត ១២លានដុល្លារអាមេរិក សមតុល្យឥណទានមានចំនួនជាង ១១លានដុល្លារអាមេរិក ផ្តល់ជូនអតិថិជនជាង ៥.១៩៥នាក់ និងមានអតិថិជន ១០.៤២៦នាក់ បាននិងកំពុងដាក់ប្រាក់បញ្ញើ-សន្សំជាមួយធនាគារ ដែលមានទឹកប្រាក់សរុបចំនួនជិត ៥លានដុល្លារអាមេរិក និងអតិថិជនជាច្រើនទៀតបាននិងកំពុងប្រើប្រាស់សេវាផ្សេងៗទៀត ។"
លោកបានបន្តទៀតថា "ពេលនេះ ធនាគារ អេស៊ីលីដា ភីអិលស៊ី សាខាខេត្តកណ្តាល បានប្តូរទីតាំងមកអគារការិយាល័យថ្មី ស្ថិតនៅក្នុងតំបន់ពាណិជ្ជកម្ម និងបានសាងសង់ឡើងតាមស្តង់ដារអន្តរជាតិ ដោយយកចិត្តទុកដាក់ខ្លាំងលើការរក្សាសន្តិសុខ កំណារពារអគ្គិភ័យ ការបម្រុងថាមពល ផាសុកភាព និងសុវត្ថិភាពការងារ ។ អគារនេះមានកម្ពស់ ២ជាន់កន្លះ និងមានផ្ទៃក្រឡាសម្រាប់បំពេញការងារធំទូលាយ ។ គួររំលឹកផងដែរថា ធនាគារ អេស៊ីលីដា សាខាខេត្តកណ្តាល បានបង្កើតឡើងតាំងពីដើមឆ្នាំ២០០១ ក្នុងលក្ខណៈជាការិយាល័យស្រុក និងបានកម្លាយខ្លួនទៅជាសាខាពេញលេញនៅខែកុម្ភៈ ឆ្នាំ២០០៦ ។"
ក្នុងឱកាសនោះដែរ ឯកឧត្តម អ៊ូ សំអ៊ួន អភិបាលរងខេត្តកណ្តាល មានប្រសាសសន៍ថា "ថ្ងៃនេះជាថ្ងៃដ៏វិសេសវិសាល ដែលធនាគារ អេស៊ីលីដា សាខាខេត្តកណ្តាល បានបើកដំណើរការនូវការិយាល័យថ្មីរបស់ខ្លួន ដែលមានលក្ខណៈធំទូលាយជាងមុន ។ ទាំងនេះជាភស្តុតាងបង្ហាញឱ្យឃើញថា ធនាគារ អេស៊ីលីដា សាខាខេត្តកណ្តាល មានការកើនឡើង និងរីកចម្រើនយ៉ាងឆាប់រហ័ស ទាំងផ្នែកប្រតិបត្តិការ ហេដ្ឋារចនាសម្ព័ន្ធ និងផ្នែកប្រសិទ្ធភាពអាជីវកម្ម ។"
ឯកឧត្តមបានបន្តទៀតថា "ឆ្លៀតឱកាសនេះ ក្នុងនាមរូបខ្ញុំផ្ទាល់ តំណាងឱ្យអាជ្ញាធរខេត្តកណ្តាល ខ្ញុំសូមសំដែងការអបអរសាទរ និងកោតសរសើរចំពោះការខិតខំប្រឹងប្រែង របស់ថ្នាក់ដឹកនាំធនាគារអេស៊ីលីដា ជាពិសេសថ្នាក់ដឹកនាំធនាគារអេស៊ីលីដា សាខាខេត្តកណ្តាល និងសូមគាំទ្រយ៉ាងពេញទំហឹង និងស្វាគមន៍នូវដំណើរការវិវឌ្ឍរបស់ធនាគារអេស៊ីលីដា សាខាខេត្តកណ្តាលនេះ ។ ខ្ញុំគិតថា ការរីកចម្រើន និងការវិវឌ្ឍរបស់ធនាគារអេស៊ីលីដា សាខាខេត្តកណ្តាល ពិតជាផ្តល់អត្ថប្រយោជន៍យ៉ាងច្រើនចំពោះប្រជាពលរដ្ឋ និងអ្នកជំនួញនៅក្នុងស្រុកទាំងមូល ទទួលបាននូវប្រភពធនធានហិរញ្ញវត្ថុ និងសេវាកម្មហិរញ្ញវត្ថុផ្សេងៗទៀត ដែលជាកត្តាគន្លឹះ ក្នុងការចូលរួមបង្កើតឱ្យមានការងារនិងប្រភពចំណូល និងចូលរួមការអភិវឌ្ឍសេដ្ឋកិច្ច និងកម្រិតជីវភាពរបស់ប្រជាពលរដ្ឋ នៅក្នុងខេត្តកណ្តាលទាំងមូល ។"
ឯកឧត្តម អ៊ូ សំអ៊ួន បានលើកឡើងទៀតថា "ខ្ញុំជឿជាក់ថា ធនាគារ អេស៊ីលីដា ភីអិលស៊ី ជាពិសេសធនាគារ អេស៊ីលីដា សាខាខេត្តកណ្តាល នៅតែបន្តជាដៃគូអភិវឌ្ឍរបស់ខេត្ត និងស្រុក ជាប្រតិបត្តិករល្អជាមួយអាជ្ញាធរមូលដ្ឋានគ្រប់ជាន់ថ្នាក់ និងជាអ្នកផ្តល់សេវាកម្មហិរញ្ញវត្ថុដ៏ល្អដល់អតិថិជនទូទៅ ដើម្បីពង្រីកប្រតិបត្តិការរបស់ខ្លួនឱ្យមានប្រសិទ្ធភាព និងផលិតភាពថែមទៀត ។"
លោក អ៊ិន ចាន់នី ប្រធាននាយកប្រតិបត្តិ ធនាគារអេស៊ីលីដា មានប្រសាសន៍ថា "នេះជាឆ្នាំទី១៦ហើយ ដែលអេស៊ីលីដាបានបម្រើសេវាកម្មហិរញ្ញវត្ថុជូនដល់អតិថិជន និងសាធារណជនគ្រប់មជ្ឈដ្ឋាន តាមរយៈសាខានិងការិយាល័យទាំង២២៦ ទូទាំងព្រះរាជាណាចក្រកម្ពុជា និង សាខានិងការិយាល័យចំនួន៣ នៅក្នុងប្រទេសឡាវ ។ ក្នុងចំណោមអគារការិយាល័យទាំង២២៦ ធនាគារអេស៊ីលីដា មានអគារការិយាល័យស្តង់ដារបែបនេះចំនួន៩៤ និងកំពុងសាងសង់ចំនួន២២ បន្ថែមទៀត ។ ថ្ងៃនេះខ្ញុំបាទមានមោទនភាពយ៉ាងខ្លាំង ចំពោះសំណង់អគារការិយាល័យនេះ ដែលបានសាងសង់តាមស្តង់ដាររបស់ធនាគារ ស្របតាមយុទ្ធសាស្ត្រយូរអង្វែងរបស់យើង ។ ធនាគារអេស៊ីលីដា នឹងរៀបចំឱ្យមានអគារការិយាល័យស្តង់ដារបែបនេះទាំងអស់ ដើម្បីទទួលបម្រើអតិថិជន និងបង្កឱ្យមានភាពងាយស្រួលដល់អតិថិជនទាក់ទង និងប្រើប្រាស់សេវាហិរញ្ញវត្ថុនានា ជាពិសេសគឺការពារសុវត្ថិភាពទ្រព្យសម្បត្តិរបស់អតិថិជន ដែលបាននិងកំពុងប្រើប្រាស់សេវាធនាគារអេស៊ីលីដា ។"
លោក អ៊ិន ចាន់នី បានបន្តទៀតថា "ឆ្លៀតក្នុងឱកាសដ៏មានសារសំខាន់នេះ ខ្ញុំសូមសំដែងនូវអំណរគុណយ៉ាងខ្ពស់បំផុតចំពោះរាជរដ្ឋាភិបាល ធនាគារជាតិនៃកម្ពុជា អាជ្ញាធរគ្រប់លំដាប់ថ្នាក់ ភាគហ៊ុនិក កម្មករនិយោជិតគ្រប់លំដាប់ថ្នាក់ទាំង៦.២២៣នាក់ និងអតិថិជនវៃឆ្លាតទាំង ៩០ម៉ឺននាក់ ដែលតែងតែជួយគាំទ្រទាំងមធ្យោបាយ កំលាំងកាយ កំលាំងចិត្ត និងសហការយ៉ាងពេញទំហឹង ព្រមទាំងចូលរួមវិវឌ្ឍជាមួយធនាគារអេស៊ីលីដា តាំងពីដើមរៀងមក ធ្វើឱ្យទ្រព្យសកម្មរបស់ធនាគារអេស៊ីលីដា កើនដល់ចំនួន៧១៨លានដុល្លារអាមេរិក នៅបំណាច់ខែមករា ឆ្នាំ២០០៩ រួមទាំងសមិទ្ធផលរបស់សាខាខេត្តកណ្តាល ដូចដែលលោកនាយកសាខាបានជម្រាបជូនក្នុងរបាយការណ៍មុននេះ ហើយទ្រព្យសកម្មនេះនឹងកើនដល់ ១.០០០លានដុល្លារអាមេរិក នាពេលដ៏ខ្លីខាងមុខនេះ ។ នេះបង្ហាញឱ្យឃើញថា សម្ព័ន្ធភាពដ៏រឹងមាំរបស់យើងទាំងអស់គ្នា ជាឧបករណ៍និងជាកាតាលិករដ៏សំខាន់បំផុត និងជាមធ្យោបាយដ៏មុតថ្លា ដើម្បីអភិវឌ្ឍសង្គម និងសេដ្ឋកិច្ចរបស់ប្រទេសកម្ពុជា ។"
