ព័ត៌មានព័ត៌មានថ្មីៗពិធីសម្ពោធអគារថ្មី ការិយាល័យសាខាខេត្តកំពង់ធំ

ពិធីសម្ពោធអគារថ្មី ការិយាល័យសាខាខេត្តកំពង់ធំ

លោក កុយ ដាវុន នាយកធនាគារអេស៊ីលីដា សាខាខេត្តកំពង់ធំ

ថ្ងៃទី២៣ ខែតុលា ឆ្នាំ២០០៩

នៅថ្ងៃទី២៣ ខែតុលា ឆ្នាំ២០០៩ ធនាគារអេស៊ីលីដា ភីអិលស៊ី សាខាខេត្តកំពង់ធំ ដែលមានទីតាំងស្ថិតនៅបណ្តោយផ្លូវជាតិលេខ៦ ក្រុមទី១ ភូមិបល្ល័ង្កលិច សង្កាត់ដំរីជាន់ខ្លា ក្រុងស្ទឹងសែន ខេត្តកំពង់ធំ បានប្រារព្ធពិធីសម្ពោធជាផ្លូវការ ដោយមានវត្តមានចូលរួមយ៉ាងខ្ពង់ខ្ពស់ពីសំណាក់ ឯកឧត្តមអភិបាលរងខេត្តកំពង់ធំ ឯកឧត្តមឯកអគ្គរាជទូតនៃចក្រភពអង់គ្លេស លោកប្រធានបេសកកម្មសេដ្ឋកិច្ចប្រចាំស្ថានទូតបារាំង គណៈប្រតិភូសមាគមពាណិជ្ជកម្មអន្តរជាតិ លោកប្រធាន-អនុប្រធានក្រុមប្រឹក្សាភិបាលនិងក្រុមប្រឹក្សាភិបាលធនាគារអេស៊ីលីដា លោកប្រធាននាយកប្រតិបត្តិ លោកនាយក-នាយិកាធនាគារអេស៊ីលីដា និងភ្ញៀវកិត្តិយសជាតិនិងអន្តរជាតិជាច្រើននាក់ទៀត ។

នៅក្នុងឱកាសដ៏ពិសេសនោះ លោក កុយ ដាវុន ជានាយកធនាគារអេស៊ីលីដា ភីអិលស៊ី សាខាខេត្តកំពង់ធំ បានមានប្រសាសន៍ថា ៖ គិតត្រឹមថ្ងៃទី៣០ ខែកញ្ញា ឆ្នាំ២០០៩ ធនាគារអេស៊ីលីដា ភីអិលស៊ី សាខាខេត្តកំពង់ធំ មានបុគ្គលិកចំនួន ១៣៥នាក់ និងមានបណ្តាញប្រតិបត្តិការចំនួន ៨ការិយាល័យ ម៉ាស៊ីនអេធីអឹមចំនួន ២គ្រឿង និងម៉ាស៊ីនឆូតកាត ៥គ្រឿង ។ ទ្រព្យសកម្មសរុបមានចំនួនជាង ៧លានដុល្លារអាមេរិក សមតុល្យឥណទានជិត ៦លានដុល្លារអាមេរិក ដែលមានអតិថិជនចំនួន ៥.៤១២នាក់កំពុងប្រើប្រាស់ សមតុល្យប្រាក់បញ្ញើមានចំនួនជិត ៧,៥លានដុល្លារអាមេរិក និងមានអតិថិជនចំនួន ១៤.៣៣៣នាក់ កំពុងដាក់ប្រាក់បញ្ញើ-សន្សំ និងអតិថិជនជាច្រើនបាននិងកំពុងប្រើប្រាស់សេវាផ្សេងៗទៀត ។

លោក អ៊ិន ចាន់នី ប្រធាននាយកប្រតិបត្តិ ធនាគារ អេស៊ីលីដា ភីអិលស៊ី

លោក អ៊ិន ចាន់នី ប្រធាននាយកប្រតិបត្តិ ធនាគារ អេស៊ីលីដា ភីអិលស៊ី បានមានប្រសាសន៍ថា ៖ ធនាគារអេស៊ីលីដាបានបង្កើតឱ្យមាននិរន្តរភាពសេវាកម្មហិរញ្ញវត្ថុបែបនេះ មានរយៈពេល១៦ឆ្នាំមកហើយ ដើម្បីបម្រើសេវាកម្មហិរញ្ញវត្ថុជូនដល់អតិថិជន ទាំងវិស័យឯកជននិងវិស័យសាធារណៈ តាមរយៈការិយាល័យសាខាទាំង២៣៩ ទូទាំងប្រទេសកម្ពុជា និងឡាវ ។ បច្ចុប្បន្នធនាគារអេស៊ីលីដា មានអគារការិយាល័យស្តង់ដារបែបនេះចំនួន ៦១ និងកំពុងសាងសង់បន្ថែមជាបន្តបន្ទាប់ ដើម្បីទទួលបម្រើអតិថិជន និងបង្កឱ្យមានភាពងាយស្រួលដល់អតិថិជនធ្វើការទំនាក់ទំនង និងប្រើប្រាស់សេវាហិរញ្ញវត្ថុនានា ជាពិសេសដើម្បីការពារសុវត្ថិភាពទ្រព្យសម្បត្តិរបស់អតិថិជន ដែលបាន និងកំពុងប្រើប្រាស់សេវាធនាគារអេស៊ីលីដា ព្រមទាំងបង្កឱ្យមានផាសុកភាព និងសុវត្ថិភាពការងារដល់បុគ្គលិក ដែលបាន និងកំពុងបម្រើការងារជាមួយធនាគារអេស៊ីលីដា ។

លោកក៏បានថ្លែងអំណរគុណយ៉ាងជ្រាលជ្រៅផងដែរចំពោះរាជរដ្ឋាភិបាល ធនាគារជាតិនៃកម្ពុជា អាជ្ញាធរគ្រប់លំដាប់ថ្នាក់ ភាគហ៊ុនិក រួមទាំងកម្មករនិយោជិតគ្រប់លំដាប់ថ្នាក់ទាំង ៧.១៣៧នាក់ និងអតិថិជនវៃឆ្លាតទាំង ៩០ម៉ឺននាក់ ដែលតែងតែជួយគាំទ្រតាំងពីដើមរៀងមក ធ្វើឱ្យទ្រព្យសកម្មរបស់ធនាគារអេស៊ីលីដា កើនពីចំនួន ២២,៣លានដុល្លារអាមេរិក ក្នុងខែធ្នូ ឆ្នាំ២០០០ រហូតដល់ចំនួន ៨៨០លានដុល្លារ នៅដំណាច់ខែកញ្ញា ឆ្នាំ២០០៩ ហើយទ្រព្យសកម្មនេះនឹងកើនដល់ ១.០០០លានដុល្លារ ក្នុងឆ្នាំ២០១០ ខាងមុខនេះ ។

ឯកឧត្តម សោម សុផាត អភិបាលរងខេត្តកំពង់ធំ បានកត់សម្គាល់ថា ៖ ការអភិវឌ្ឍរបស់ធនាគារ អេស៊ីលីដា ភីអិលស៊ី សាខាខេត្តកំពង់ធំ ជាសក្ខីកម្មដែលបញ្ជាក់ពីការរីកចម្រើន ភាពរឹងមាំ និងថែមទាំងបានបង្ហាញពីការចូលរួមចំណែកក្នុងសកម្មភាពសង្គម លើកកម្ពស់វិស័យសិល្បៈកីឡា និងការអភិវឌ្ឍសេដ្ឋកិច្ចក្នុងព្រះរាជាណាចក្រកម្ពុជា ជាពិសេសនៅក្នុងខេត្តកំពង់ធំ ។

ឯកឧត្តមក៏បានសំដែងនូវការអបអរសាទរ និងកោតសរសើរផងដែរចំពោះការខិតខំប្រឹងប្រែងរបស់ថ្នាក់ដឹកនាំធនាគារអេស៊ីលីដា ជាពិសេសសាខាខេត្តកំពង់ធំ និងសូមគាំទ្រយ៉ាងពេញទំហឹង និងស្វាគមន៍ដំណើរវិវឌ្ឍន៍របស់ធនាគារ ដែលក្នុងរយៈពេលកន្លងទៅ បានផ្តល់អត្ថប្រយោជន៍យ៉ាងច្រើន ចំពោះប្រជាពលរដ្ឋក្នុងខេត្តកំពង់ធំទាំងមូល ។

ជួរមុខ (ពីឆ្វេងទៅស្តាំ) ឯកឧត្តម សោម សុផាត អភិបាលរងខេត្តកំពង់ធំ និង លោក អ៊ិន ចាន់នី ប្រធាននាយកប្រតិបត្តិ ធនាគារអេស៊ីលីដា ភីអិលស៊ី

« ព័ត៌មានមុន
វិញ្ញាបនបត្រសរសើរពី MFTransparency សម្រាប់គំនិតផ្តួចផ្តើមកំណត់ថ្លៃប្រកបដោយតម្លាភាពនៅកម្ពុជា ព័ត៌មានបន្ទាប់ »
ធនាគារ អេស៊ីលីដា បើកសាខាថ្មីនៅផ្សារដើមថ្កូវ

ពិធី​សម្ពោធ​អគារ​ថ្មី ការិយាល័យ​សាខា​ខេត្ត​កំពង់ធំ

ពិធីសម្ពោធអគារថ្មី ការិយាល័យសាខាខេត្តកំពង់ធំ