USD
THB
EUR
AUD
VND
CAD
LAK
JPY
GBP
CNY
navigate_nextព័ត៌មានnavigate_nextព័ត៌មានថ្មីៗnavigate_nextពិធីសម្ពោធអគារថ្មី ការិយាល័យសាខាខេត្តព្រៃវែង
ពិធីសម្ពោធអគារថ្មី ការិយាល័យសាខាខេត្តព្រៃវែង
ថ្ងៃទី២២ ខែមករា ឆ្នាំ២០១០
នៅថ្ងៃទី២២ ខែមករា ឆ្នាំ២០១០ ធនាគារអេស៊ីលីដា ភីអិលស៊ី សាខាខេត្តព្រៃវែង ដែលមានទីតាំងស្ថិតនៅភូមិ៧ សង្កាត់កំពង់លាវ ក្រុងព្រៃវែង ខេត្តព្រៃវែង បានប្រារព្ធពិធីសម្ពោធជាផ្លូវការ ដោយមានការអញ្ជើញចូលរួមជាគណៈអធិបតីយ៉ាងខ្ពង់ខ្ពស់ពីសំណាក់ ឯកឧត្តមអភិបាលខេត្តនិងអភិបាលរងខេត្តព្រៃវែង គណៈប្រតិភូសមាគមពាណិជ្ជកម្មអន្តរជាតិ អាជ្ញាធរមូលដ្ឋានគ្រប់លំដាប់ថ្នាក់ លោកប្រធាន-អនុប្រធានក្រុមប្រឹក្សាភិបាលនិងក្រុមប្រឹក្សាភិបាលធនាគារអេស៊ីលីដា លោកប្រធាននាយកប្រតិបត្តិ លោកនាយក-នាយិកាធនាគារអេស៊ីលីដា ព្រមទាំងភ្ញៀវកិត្តិយសជាតិនិងអន្តរជាតិជាច្រើននាក់ទៀត ។
នៅក្នុងឱកាសដ៏ពិសេសនោះ លោក តូច បុណ្ណបូរ៉ាមី នាយកធនាគារ អេស៊ីលីដា ភីអិលស៊ី សាខាខេត្តព្រៃវែង បានថ្លែងថា ៖ គិតត្រឹមថ្ងៃទី៣១ ខែធ្នូ ឆ្នាំ២០០៩ សាខាខេត្តព្រៃវែង មានបណ្តាញប្រតិបត្តិការចំនួន ៧ការិយាល័យដែលមានបុគ្គលិកចំនួន ១៤៩នាក់ ម៉ាស៊ីនអេធីអឹមចំនួន ១គ្រឿង ទ្រព្យសកម្មសរុបមានចំនួនជិត ១៤លានដុល្លារអាមេរិក ដោយមានអតិថិជនចំនួន ១២.០៩០នាក់កំពុងប្រើប្រាស់សមតុល្យឥណទានជិត ១៣លានដុល្លារអាមេរិក និងអតិថិជនចំនួន ៨.៩៩០នាក់ កំពុងដាក់ប្រាក់បញ្ញើ-សន្សំចំនួនជាង ៤លានដុល្លារអាមេរិក ព្រមទាំងអតិថិជនជាច្រើននាក់ទៀត បាននិងកំពុងប្រើប្រាស់សេវាផ្សេងៗទៀត ។
លោក អ៊ិន ចាន់នី ប្រធាននាយកប្រតិបត្តិ ធនាគារអេស៊ីលីដា ភីអិលស៊ី បានមានប្រសាសន៍ថា ៖ និរន្តរភាព គឺជាទិសដៅដ៏ចម្បងរបស់ធនាគារអេស៊ីលីដា ។ ធនាគារអេស៊ីលីដា បានបង្កើតឱ្យមាននិរន្តរភាពសេវាកម្មហិរញ្ញវត្ថុបែបនេះ អស់រយៈពេល១៧ឆ្នាំមកហើយ ដើម្បីបម្រើសេវាកម្មហិរញ្ញវត្ថុជូនដល់អតិថិជន ទាំងវិស័យឯកជន និងវិស័យសាធារណៈ តាមរយៈសាខា និងការិយាល័យទាំង២៤៤ ទូទាំងព្រះរាជាណាចក្រកម្ពុជា និងប្រទេសឡាវ ។
លោកបានបន្តទៀតថា ៖ បច្ចុប្បន្នធនាគារអេស៊ីលីដា មានអគារការិយាល័យស្តង់ដារចំនួន ៧០ហើយ ដើម្បីទទួលបម្រើអតិថិជន និងបង្កឱ្យមានភាពងាយស្រួលដល់អតិថិជនទាក់ទង និងប្រើប្រាស់សេវាហិរញ្ញវត្ថុនានា ជាពិសេសដើម្បីការពារសុវត្ថិភាពទ្រព្យសម្បត្តិរបស់អតិថិជន ដែលបាន និងកំពុងប្រើប្រាស់សេវាធនាគារអេស៊ីលីដាស្របតាមយុទ្ធសាស្ត្រយូរអង្វែងរបស់យើង ។
លោកក៏បានថ្លែងអំណរគុណយ៉ាងជ្រាលជ្រៅផងដែរចំពោះរាជរដ្ឋាភិបាល ធនាគារជាតិនៃកម្ពុជា អាជ្ញាធរគ្រប់លំដាប់ថ្នាក់ ភាគហ៊ុនិក កម្មករនិយោជិតគ្រប់លំដាប់ថ្នាក់ទាំង ៧.២៥៩នាក់ និងអតិថិជនវៃឆ្លាតជាង៩០ម៉ឺននាក់ ដែលតែងតែជួយគាំទ្រធនាគារអេស៊ីលីដាតាំងពីដើមរៀងមក ធ្វើឱ្យទ្រព្យសកម្មរបស់ធនាគារអេស៊ីលីដា កើនពីចំនួន ២២,៣លានដុល្លារ ក្នុងខែធ្នូ ឆ្នាំ២០០០ រហូតដល់ចំនួន ៩២២លានដុល្លារ និងអតិថិជនប្រាក់បញ្ញើ-សន្សំ កើនដល់ចំនួនជាង ៦០ម៉ឺននាក់ ស្មើនឹង ៨៦% ធៀបជាមួយនឹងអតិថិជនប្រាក់បញ្ញើ-សន្សំទូទាំងវិស័យធនាគារ ដែលមានត្រឹមតែចំនួនជាង ៧០ម៉ឺននាក់ ហើយអតិថិជនទទួលឥណទាន កើនដល់ចំនួនជាង ២៤ម៉ឺននាក់ ស្មើនឹងចំនួន ៩៣% ធៀបនឹងអតិថិជនទទួលឥណទានទូទាំងវិស័យធនាគារ ដែលមានត្រឹមតែចំនួនជាង ២៦ម៉ឺននាក់ប៉ុណ្ណោះ នៅដំណាច់ខែធ្នូ ឆ្នាំ២០០៩ ។
ឯកឧត្តម អ៊ុង សាមី អភិបាលខេត្តព្រៃវែង បានកត់សម្គាល់ថា ៖ ការអភិវឌ្ឍរបស់ធនាគារ អេស៊ីលីដា ភីអិលស៊ី សាខាខេត្តព្រៃវែង ជាសក្ខីកម្មដែលបញ្ជាក់ពីការរីកចម្រើន ភាពរឹងមាំ និងថែមទាំងបានបង្ហាញពីការចូលរួមចំណែកក្នុងការអភិវឌ្ឍសេដ្ឋកិច្ច ក្នុងព្រះរាជាណាចក្រកម្ពុជា ជាពិសេសនៅក្នុងខេត្តព្រៃវែង ។ ឯកឧត្តម បានបន្ថែមយ៉ាងមានមោទនភាពថា ៖ អគារធំទូលាយ និងប្រណីតភាពជាងមុននេះ ជាភស្តុតាងដែលបង្ហាញឱ្យឃើញថា ធនាគារ អេស៊ីលីដា ភីអិលស៊ី សាខាខេត្តព្រៃវែង បានកើតឡើង និងរីកចម្រើនធំធាត់យ៉ាងឆាប់រហ័ស ទាំងផ្នែកប្រតិបត្តិការ ទាំងផ្នែកហេដ្ឋារចនាសម្ព័ន្ធ និងប្រសិទ្ធភាពអាជីវកម្ម ។
សាខាខេត្តព្រៃវែង បានប្តូរទីតាំងមកអគារការិយាល័យថ្មីដែលបានសាងសង់ឡើងតាមស្តង់ដារធនាគារពាណិជ្ជ មានកម្ពស់៤ជាន់ និងមានផ្ទៃក្រឡាសម្រាប់បំពេញការងារធំទូលាយ ប្រកបដោយផាសុកភាព សុវត្ថិភាព និងបានស្ថិតនៅជិតអតិថិជន ។
