ព័ត៌មានព័ត៌មានថ្មីៗធនាគារ អេស៊ីលីដា ភីអិលស៊ី បង្កើនដើមទុនរហូតដល់ ១១៣.១៦៩.៥៦០ដុល្លារអាមេរិក

ធនាគារ អេស៊ីលីដា ភីអិលស៊ី បង្កើនដើមទុនរហូតដល់ ១១៣.១៦៩.៥៦០ដុល្លារអាមេរិក

ថ្ងៃទី២៥ ខែឧសភា ឆ្នាំ២០១២

ភ្នំពេញ ថ្ងៃទី២៥ ខែឧសភា ឆ្នាំ២០១២ ៖ ធនាគារ អេស៊ីលីដា ភីអិលស៊ី ជាធនាគារពាណិជ្ជឈានមុខគេលើគ្រប់វិស័យ ដែលបានប្រារព្ធពិធីគម្រប់ខួបទី២០ឆ្នាំ នៃការធ្វើប្រតិបត្តិការរបស់ខ្លួននៅឆ្នាំនេះ បានប្រកាសបង្កើនដើមទុនរបស់ខ្លួនពី ៨៨.៣៧២.៥០០ដុល្លារអាមេរិក ទៅ ១១៣.១៦៩.៥៦០ដុល្លារអាមេរិក នៅថ្ងៃនេះ ។

លោក ជា សុខ ប្រធានក្រុមប្រឹក្សាភិបាលរបស់ធនាគារ អេស៊ីលីដា ភីអិលស៊ី

ធនាគារ អេស៊ីលីដា ភីអិលស៊ី មានដើមទុន ៥១% កាន់កាប់ដោយភាគហ៊ុនិកកម្ពុជា ក្នុងនោះរួមមានបុគ្គលិករបស់ខ្លួន និង ៤៩% ទៀតដែលនៅសល់ កាន់កាប់ដោយស្ថាប័នអន្តរជាតិឈានមុខគេ រួមមាន ៖ IFC, Stichting Triodos Doen, Triodos Custody BV (Triodos Fair Share Fund), Triodos SICAV II-Triodos Microfinance Fund, JSH Asia Holding Limited និង COFIBRED S.A ។ ការបន្ថែមដើមទុននេះ ត្រូវបានធ្វើឡើងតាមរយៈការបែងចែកភាគលាភប្រចាំឆ្នាំ២០១១ ជាភាគហ៊ុន ចំនួន ២៤.៧៩៧.០៦០ បន្ថែមទៀត ដែលមានតម្លៃ ១ដុល្លារក្នុងមួយហ៊ុន ។

នេះជាលើកទី៩ហើយ ដែលធនាគារ អេស៊ីលីដា ភីអិលស៊ី បានបង្កើនដើមទុនរបស់ខ្លួន ចាប់តាំងពីបានចុះបញ្ជីជាធនាគារមក ។ ការបង្កើនដើមទុនជាបន្តបន្ទាប់នេះ គឺដើម្បីគាំទ្រការពង្រីកសាខារបស់ខ្លួន ការសាងសង់បណ្តាញសេវាកម្មធនាគារតាមប្រព័ន្ធអេឡិចត្រូនិក និងការរីកលូតលាស់ ដើម្បីសម្រេចនូវគោលដៅយុទ្ធសាស្ត្ររបស់ធនាគារ ។ ធនាគារអេស៊ីលីដា មានបទពិសោធន៍ក្នុងការបង្កើនប្រាក់ចំណេញសុទ្ធក្រោយពេលបង់ពន្ធរួច ពី ៤៧៥.០០០ដុល្លារអាមេរិក ក្នុងឆ្នាំ២០០១ រហូតដល់ ៤៩.៣៥៣.៣៥៦ដុល្លារអាមេរិក នៅក្នុងឆ្នាំ២០១១ ។ បន្ថែមពីលើការបន្ថែមដើមទុនរបស់ភាគហ៊ុនិក ធនាគារបានបង្កើតទុនបម្រុងទូទៅរបស់ខ្លួន ដោយរក្សាទុកចន្លោះពី ៥០% ទៅ ៦០% នៃប្រាក់ចំណេញក្រោយបង់ពន្ធរួច ។ ធនាគារ ក៏បានរាយការណ៍បញ្ជាក់ផងដែរថា ដើមទុនបច្ចុប្បន្ន (Tier 1 និង Tier 2) មានរហូតដល់ទៅ ២៤៦.៧១០.៨២៦ដុល្លារអាមេរិក ។

លោក ជា សុខ ប្រធានក្រុមប្រឹក្សាភិបាលរបស់ធនាគារអេស៊ីលីដា ភីអិលស៊ី ដែលជាអតីតធនាគារិកនៅធនាគារកណ្តាល និងជាអ្នកសេដ្ឋកិច្ច បានរៀបរាប់ពីមូលហេតុ ៣ សំខាន់ៗដែលធ្វើឱ្យធនាគារតែងតែបង្កើននូវដើមទុនរបស់ខ្លួន ។ លោកបានលើកឡើងថា មូលហេតុទី១ គឺដោយសារធនាគាររីកលូតលាស់យ៉ាងខ្លាំងជាបន្តបន្ទាប់នៅក្នុងអាជីវកម្មទាំងក្នុងស្រុក និងក្រៅប្រទេស តាមរយៈការផ្តល់ឥណទាន និងសេវាហិរញ្ញវត្ថុដទៃទៀត ហើយទ្រព្យសកម្មសរុបរបស់ធនាគារកំពុងតែកើនឡើងប្រចាំឆ្នាំប្រមាណ ៥០% ។ មូលហេតុ ទី២ គឺដើម្បីរក្សាមូលដ្ឋានដើមទុននៅក្នុងកម្រិតមួយខ្ពស់ជាងបញ្ញត្តិអនុបាតសំខាន់ៗ ។ ប៉ុន្តែមូលហេតុចម្បងដែលសំខាន់ជាងគេបំផុតនោះ គឺដោយសារធនាគារត្រូវការកសាងនូវទំនុកចិត្តពីសំណាក់សាធារណជន ។ យើងមានភាគហ៊ុនិកដ៏រឹងមាំ និងមានបំណងគាំទ្រធនាគារ ដូច្នេះយើងកំពុងបង្កើតនូវជំនឿទុកចិត្ត និងបង្កើនសមត្ថភាពការពារប្រាក់បញ្ញើ-សន្សំរបស់អតិថិជនរបស់យើង ។

លោក អ៊ិន ចាន់នី ប្រធាននាយកប្រតិបត្តិ ធនាគារអេស៊ីលីដា ភីអិលស៊ី

លោក អ៊ិន ចាន់នី ប្រធាននាយកប្រតិបត្តិ ធនាគារអេស៊ីលីដា ភីអិលស៊ី បានបន្ថែមថា ដូចដែលយើងបានប្រកាសផ្សព្វផ្សាយកាលពីខែមុនថា ធនាគារអេស៊ីលីដា នឹងពង្រីកការវិនិយោគរបស់ខ្លួនទៅប្រទេសមីយ៉ាន់ម៉ា ដោយបង្កើតបុត្រសម្ព័ន្ធជាស្ថាប័នមីក្រូហិរញ្ញវត្ថុ ដែលមានឈ្មោះថា អេស៊ីលីដា អ៊ឹមអេហ្វអាយ មីយ៉ាន់ម៉ា អិលធីឌី "ACLEDA MFI Myanmar Ltd." នៅដើមឆ្នាំ២០១៣ ខាងមុខនេះ បន្ទាប់ពីការបង្កើត និងប្រតិបត្តិការជោគជ័យនៅប្រទេសឡាវ ។ កាលពីថ្ងៃទី០១ ខែឧសភា នេះ ធនាគារ បានបង្កើតនិងដំណើរការប្រតិបត្តិការសាខាមួយបន្ថែមទៀត ឈ្មោះ "វិមានចតុមុខ" ដែលមានទីតាំងតាមបណ្តោយមហាវិថីព្រះនរោត្តម ខាងត្បូងវិមានឯករាជ្យ ចម្ងាយប្រហែល ៥០ម៉ែត្រ ដែលចំនួនសាខា និងការិយាល័យប្រតិបត្តិការសរុបរបស់ធនាគារបានកើនដល់ ២៣៥ ការិយាល័យ ទូទាំងព្រះរាជាណាចក្រកម្ពុជា និង ២៣ការិយាល័យ នៅប្រទេសឡាវ ជាមួយនឹងទ្រព្យសកម្មសរុប ចំនួនជាង ១,៧១ ពាន់លានដុល្លារអាមេរិក នៅដំណាច់ខែមេសា ឆ្នាំ២០១២ ។ នៅដំណាច់ឆ្នាំ២០១២ នៅក្នុងប្រទេសកម្ពុជា ធនាគារអេស៊ីលីដា នឹងបង្កើននូវបណ្តាញសេវាកម្មដកប្រាក់ និងដាក់ប្រាក់ស្វ័យប្រវត្តិ អេធីអឹម (ATMs) រហូតដល់ទៅ ១៧០ និងដាក់ពង្រាយ ម៉ាស៊ីនឆូតកាត (POS) ចំនួន ៧០០គ្រឿង ។ បន្ថែមទៀតនោះ លោកក៏បានលើកឡើងផងដែរថា យើងមានគម្រោងបើក ១៧សាខា និងការិយាល័យថ្មីបន្ថែមនៅក្នុងឆ្នាំនេះ ដែលធ្វើឱ្យបណ្តាញប្រតិបត្តិការរបស់យើងកើនឡើងរហូតដល់ ២៥២សាខា និងការិយាល័យ ដែលអាចផ្តល់ការងារឱ្យកម្មករនិយោជិតលើសពី ៧.៨០០នាក់ ។ យើងក៏នាំមកនូវប្រព័ន្ធគ្រប់គ្រងបច្ចេកវិជ្ជាព័ត៌មានបែបទំនើបទាន់សម័យ ដើម្បីបំពេញទៅតាមការរីកចម្រើន និងគាំទ្រចំពោះការពង្រីកប្រតិបត្តិការនៅក្នុងតំបន់ផងដែរ ។

ធនាគារ អេស៊ីលីដា ភីអិលស៊ី មានក្រុមហ៊ុនបុត្រសម្ព័ន្ធចំនួន បី គឺ ធនាគារ អេស៊ីលីដា ឡាវ, អេស៊ីលីដា ស៊ីឃ្យួរឹធី ភីអិលស៊ី និង អេស៊ីលីដា ត្រេននីង សេនធ័រ ។

សម្រាប់ព័ត៌មានបន្ថែម សូមទាក់ទងតាមរយៈ

លោកស្រី សូ ផនណារី អនុប្រធាននាយកប្រតិបត្តិ និងជាប្រធាននាយិកាប្រតិបត្តិប្រតិបត្តិការ
អ៊ីម៉ែល :

លោក ព្រំ វិសុទ្ធ អនុប្រធាននាយកប្រតិបត្តិ និងជាប្រធាននាយកប្រតិបត្តិនីតិកម្ម
អ៊ីម៉ែល :

« ព័ត៌មានមុន
ធនាគារ អេស៊ីលីដា ភីអិលស៊ី ចុះកិច្ចព្រមព្រៀងជាមួយបេឡាជាតិអតីតយុទ្ធជន ព័ត៌មានបន្ទាប់ »
ពិធីចម្រើនមង្គលអគារការិយាល័យថ្មី សាខាវិមានចតុមុខ

ធនាគារ ​អេស៊ីលីដា ភីអិលស៊ី បង្កើន​​ដើម​ទុន​រហូត​ដល់ ១១៣.១៦៩.៥៦០​ដុល្លារ​អាមេរិក

ធនាគារ អេស៊ីលីដា ភីអិលស៊ី បង្កើនដើមទុនរហូតដល់ ១១៣.១៦៩.៥៦០ដុល្លារអាមេរិក