USD
THB
EUR
AUD
VND
CAD
LAK
JPY
GBP
CNY
navigate_nextព័ត៌មានnavigate_nextព័ត៌មានថ្មីៗnavigate_nextORIX Corporation ទិញភាគហ៊ុនចំនួន ៦% នៅក្នុងធនាគារអេស៊ីលីដា
ORIX Corporation ទិញភាគហ៊ុនចំនួន ៦% នៅក្នុងធនាគារអេស៊ីលីដា
ថ្ងៃទី១៥ ខែវិច្ឆិកា ឆ្នាំ២០១៣
រាជធានីភ្នំពេញ ថ្ងៃទី១៥ ខែវិច្ឆិកា ឆ្នាំ២០១៣ ធនាគារ អេស៊ីលីដា ភីអិលស៊ី ជាធនាគារពាណិជ្ជនាំមុខគេក្នុងព្រះរាជាណាចក្រកម្ពុជាបានប្រកាសថ្ងៃនេះថា ក្រុមហ៊ុន ORIX Corporation (TSE: 8591; NYSE: IX) ជាសម្ព័ន្ធសេវាកម្មហិរញ្ញវត្ថុសមាហ័រណកម្មនាំមុខគេក្នុងប្រទេសជប៉ុន បានទិញភាគហ៊ុនចំនួន ៦% ពីភាគហ៊ុនិកមួយរបស់ធនាគារ អេស៊ីលីដា ភីអិលស៊ី បច្ចុប្បន្ន ។
លោក Makoto Inoue នាយកប្រតិបត្តិប្រតិបត្តិការ ក្រុមហ៊ុន ORIX Corporation បានមានប្រសាសន៍ថា ៖ យើងមានជំនឿថាធនាគារអេស៊ីលីដា បានបង្កើតឱ្យមានសក្តានុពលរីកចម្រើនដ៏ខ្លាំងក្លានៅក្នុងប្រទេសមួយ ដែលមានភាពភ្លឺថ្លានាពេលអនាគត ។ ការវិនិយោគរបស់ក្រុមហ៊ុន ORIX Corporation នៅក្នុងធនាគារអេស៊ីលីដា នឹងគាំទ្រដល់ការអភិវឌ្ឍរបស់ធនាគារប្រកបដោយនិរន្តរភាព ហើយយើងពេញចិត្តយ៉ាងខ្លាំងដែលបានក្លាយជាភាគហ៊ុនិកមួយរបស់ធនាគារអេស៊ីលីដា ក្នុងដំណាក់កាលនៃការរីកចម្រើនរបស់ធនាគារនេះ ។
បណ្ឌិត អ៊ិន ចាន់នី ប្រធាននាយកប្រតិបត្តិ ធនាគារ អេស៊ីលីដា ភីអិលស៊ី បានមានប្រសាសន៍ថា ៖ ជាមួយនឹងបទពិសោធន៍ជាង២១ឆ្នាំ ធនាគារអេស៊ីលីដា មានការរីកចម្រើនយ៉ាងខ្លាំងជាមួយអតិថិជន និងដៃគូរបស់ខ្លួន ហើយធនាគារអេស៊ីលីដា តែងតែយកចិត្តទុកដាក់ស្តាប់អតិថិជនរបស់ខ្លួន ដើម្បីឆ្លើយតបទៅនឹងតម្រូវការផលិតផល-សេវាកម្មហិរញ្ញវត្ថុបន្ថែម ។
លោកបណ្ឌិតបានបន្ថែមទៀតថា ៖ ក្រុមហ៊ុន ORIX Corporation គឺជាដៃគូយុទ្ធសាស្ត្រមួយផ្សេងទៀតរបស់ធនាគារអេស៊ីលីដា ដែលស្ថាប័នដ៏ល្អទាំងពីរនេះអាចរួមផ្សំបទពិសោធន៍ជាមួយគ្នាជាង ៧០ឆ្នាំ ក្នុងវិស័យធនាគារ និងពាណិជ្ជកម្ម ដែលភាគច្រើនមានទីតាំងស្ថិតនៅតំបន់អាស៊ី សហរដ្ឋអាមេរិក និងអឺរ៉ុបផងដែរ និងរួមទាំងបណ្តាតំបន់ជាច្រើនទៀតនៅពាសពេញសកលលោក ។ ការរួមផ្សំនូវបទពិសោធន៍ជាមួយគ្នានេះ អាចជួយគ្នាទៅវិញទៅមក ក្នុងការនាំមកនូវជម្រើសផលិតផល-សេវាកម្មហិរញ្ញវត្ថុថ្មី ទៅក្នុងទីផ្សារកម្ពុជានៅពេលមានតម្រូវការ ។ ជាងនេះទៅទៀត យើងបានចែករំលែកនូវតម្លៃរួមគ្នាស្រដៀងគ្នា និងប្តេជ្ញារួមគ្នា ដើម្បីភាពជោគជ័យរបស់ធនាគារ និងដើរតួនាទីឈានមុខគេក្នុងការអភិវឌ្ឍសេដ្ឋកិច្ចកម្ពុជា ។
អំពីធនាគារ អេស៊ីលីដា ភីអិលស៊ី
ធនាគារអេស៊ីលីដា មានបណ្តាញការិយាល័យប្រតិបត្តិការចំនួន ២៣៨ការិយាល័យ ទូទាំងព្រះរាជាណាចក្រកម្ពុជា, ៣៥ការិយាល័យ នៅប្រទេសឡាវ, និង០៣ការិយាល័យ នៅប្រទេសមីយ៉ាន់ម៉ា ជាមួយនឹងទ្រព្យសកម្មសរុបចំនួនជាង ២,២ពាន់លានដុល្លារអាមេរិក នៅដំណាច់ខែតុលា ឆ្នាំ២០១៣ ។ ធនាគារអេស៊ីលីដា មានក្រុមហ៊ុនបុត្រសម្ព័ន្ធចំនួនបួនគឺ ធនាគារ អេស៊ីលីដា ឡាវ, អេស៊ីលីដា ស៊ីឃ្យួរឹធី ភីអិលស៊ី, អេស៊ីលីដា ត្រេននីង សេនធ័រ, និងស្ថាប័នមីក្រូហិរញ្ញវត្ថុ អេស៊ីលីដា មីយ៉ាន់ម៉ា ។
អំពី ORIX Corporation
ក្រុមហ៊ុន ORIX Corporation បានបង្កើតឡើងនាថ្ងៃទី១៧ ខែមេសា ឆ្នាំ១៩៦៤ នៅក្នុងទីក្រុងអូសាកា នៃប្រទេសជប៉ុន ដោយមានឈ្មោះថា Orient Leasing Co., Ltd. ។ ក្រុមហ៊ុននេះ គឺជាក្រុមហ៊ុនសម្ព័ន្ធសេវាកម្មហិរញ្ញវត្ថុសមាហ័រណកម្មមួយ មានមូលដ្ឋាននៅក្នុងទីក្រុងតូក្យូ នៃប្រទេសជប៉ុន ក្នុងការបម្រើផលិតផល និងសេវាកម្មដែលមានតម្លៃបន្ថែមដល់អតិថិជនធំៗ និងអតិថិជនលក់រាយ ។ ជាមួយនឹងការធ្វើប្រតិបត្តិការនៅបណ្តាប្រទេសចំនួន ៣៤ និងនៅតាមតំបន់មួយចំនួនទូទាំងសកលលោក ប្រតិបត្តិការរបស់ក្រុមហ៊ុន ORIX Corporation រួមបញ្ចូលទាំងសេវាសាជីវកម្មហិរញ្ញវត្ថុ មានដូចជា ៖ ភតិសន្យាហិរញ្ញវត្ថុ និងការផ្តល់កម្ចី ក៏ដូចជាប្រតិបត្តិការយានយន្ត ប្រតិបត្តិការឈ្នួល អចលនវត្ថុ ធានារ៉ាប់រងអាយុជីវិត និងសេវាកម្មធនាគារ និងឥណទាន ។
សម្រាប់ព័ត៌មានបន្ថែម សូមទាក់ទងតាមរយៈ
ក្រុមហ៊ុន ORIX Corporation
នាយកដ្ឋានគម្រោងសាជីវកម្ម, មជ្ឈមណ្ឌលពាណិជ្ជកម្មពិភពលោក អគារលេខ 2-4-1, Hamamatsu-cho MINATO-KU TKY 105-6135 ប្រទេសជប៉ុន
ទូរស័ព្ទ: +81-3-3435-3121
ទូរសារ: +81-3-3435-3154
វេបសាយ: www.orix.co.jp/grp/en/
ធនាគារ អេស៊ីលីដា ភីអិលស៊ី
បណ្ឌិត សូ ផនណារី អនុប្រធាននាយកប្រតិបត្តិ និងជាគណៈប្រធាននាយិកាប្រតិបត្តិប្រតិបត្តិការ
អ៊ីម៉ែល:
លោក ព្រំ វិសុទ្ធ អនុប្រធាននាយកប្រតិបត្តិ និងជាគណៈប្រធាននាយកប្រតិបត្តិនីតិកម្ម និងលេខាធិការក្រុមហ៊ុន
អ៊ីម៉ែល:
