ព័ត៌មានព័ត៌មានថ្មីៗធនាគារអេស៊ីលីដា ប្រសិទ្ធពរឆ្នាំថ្មី-ឆ្នាំសកល ២០១៤

ធនាគារអេស៊ីលីដា ប្រសិទ្ធពរឆ្នាំថ្មី-ឆ្នាំសកល ២០១៤

ថ្ងៃទី៣១ ខែធ្នូ ឆ្នាំ២០១៣

នៅល្ងាចថ្ងៃទី៣១ ខែធ្នូ ឆ្នាំ២០១៣ ធនាគារអេស៊ីលីដា ការិយាល័យកណ្តាល និងគ្រប់សាខាទាំងអស់ទូទាំងប្រទេស បានប្រារព្ធពិធីប្រសិទ្ធពរឆ្នាំថ្មី-ឆ្នាំសកល ២០១៤ ដើម្បីបង្កបរិយាកាសសប្បាយរីករាយ និងថ្លែងនូវអំណរគុណ ចំពោះភាគហ៊ុនិក ក្រុមប្រឹក្សាភិបាល ទីប្រឹក្សា ថ្នាក់គ្រប់គ្រង និងបុគ្គលិកទាំងអស់ ដែលបានចូលរួមអនុវត្តការងារទទួលបានលទ្ធផលល្អតាមនាទីរៀងៗខ្លួន ប្រកបដោយគតិបណ្ឌិតស្ថិតក្នុងក្រមសីលធម៌ ទាំងចំណេះដឹង និងជំនាញ យ៉ាងមានប្រសិទ្ធភាព ដែលធ្វើឱ្យផែនការអាជីវកម្មធនាគារអេស៊ីលីដាទាំងមូល ទទួលបាននូវជោគជ័យជាកុសលយ៉ាងត្រចះត្រចង់ និងជាពិសេសសូមថ្លែងអំណរគុណចំពោះការគាំទ្ររបស់រាជរដ្ឋាភិបាល ដែលមានធនាគារជាតិនៃកម្ពុជា ជាអាណាព្យាបាលដ៏ល្អ ព្រមទាំងអតិថិជនដ៏វៃឆ្លាតទាំងអស់ ដែលតែងតែគាំទ្រធនាគារអេស៊ីលីដាតាំងពីដើមរៀងមក ។

ចាប់តាំងពីឆ្នាំ២០១៣ មកដល់បច្ចុប្បន្ន គឺជាឆ្នាំដែលធនាគារអេស៊ីលីដា ប្រើប្រាស់ហេដ្ឋារចនាសម្ព័ន្ធធនាគារអេឡិចត្រូនិក ដែលអាចទទួលបានអត្ថប្រយោជន៍ពីសេវាកម្មហិរញ្ញវត្ថុ កាន់តែងាយស្រួល និងធ្វើឱ្យកាន់តែប្រសើរឡើងចម្បងលើសគេ នូវគុណភាពបម្រើសេវាកម្ម ក្នុងព្រះរាជាណាចក្រកម្ពុជា ។

ធនាគារអេស៊ីលីដា ត្រូវបានមហាជនទទួលស្គាល់ថាជា "ប្រជាធនាគារដែលលោកអ្នកជឿទុកចិត្ត" តាមរយៈការផ្តល់ផលិតផល និងសេវាកម្មហិរញ្ញវត្ថុសម្បូរបែបគ្រប់ប្រភេទ ដល់គ្រប់មជ្ឈដ្ឋាន ទាំងវិស័យសាធារណៈ និងឯកជន ។

នៅក្នុងពិធីប្រសិទ្ធពរឆ្នាំថ្មីនេះ ធនាគារក៏បានប្រកាសពីផែនការយុទ្ធសាស្ត្រសម្រាប់ឆ្នាំ២០១៤ និងឆ្នាំបន្តបន្ទាប់ដល់បុគ្គលិក និងថ្នាក់គ្រប់គ្រងលំដាប់ថ្នាក់ទាំងអស់ ដើម្បីចូលរួមអនុវត្តឱ្យទទួលបានជោគជ័យដូចឆ្នាំមុនៗដែរ ។ ផែនការយុទ្ធសាស្ត្រទាំងនោះ មានដូចខាងក្រោម ៖

ប្រើប្រាស់បទពិសោធន៍ ដែលទទួលបានពីអាជីវកម្មស្នូលខ្នាតតូចបំផុត និងខ្នាតតូច ដើម្បីអភិវឌ្ឍ "វប្បធម៌លើការបម្រើសេវា" របស់យើង និងបង្កើតសេវាកម្មទំនើបទាន់សម័យតាមតម្រូវការ និងការរីកលូតលាស់នៃទីផ្សារ ។
សហប្រតិបត្តិការជាមួយដៃគូ ដែលមានឯកទេសសំខាន់ៗធ្វើឱ្យមានការរីកចម្រើនជាមួយគ្នាជាលំដាប់ តាមរយៈជម្រើសបណ្តល់ពហុហិរញ្ញប្បទាន ។

ផ្តោតទៅលើការពង្រីកតម្លៃបន្ថែមថ្លៃសេវាកម្មមូលដ្ឋាន ដើម្បីឱ្យមានចរន្តចំណូលចម្រុះ និងកាត់បន្ថយមូលធនឯករាជ្យ និងរួមបញ្ចូលទាំងកម្រៃសេវាក្នុងការផ្តល់សេវាកម្មហិរញ្ញវត្ថុជូនវិស័យសាធារណៈ ។
យកចិត្តទុកដាក់ក្នុងការវិនិយោគលើការស្រាវជ្រាវ និងការអភិវឌ្ឍ ដើម្បីបង្កើតផលិតផលនិងសេវាកម្មធនាគារ និងហិរញ្ញវត្ថុស្នូលឱ្យមានលក្ខណៈជាសកល ដើម្បីបំពេញតម្រូវការរបស់អតិថិជន និងអភិវឌ្ឍប្រព័ន្ធបច្ចេកវិជ្ជាទាន់សម័យជានិរន្តរ៍ ប្រកបដោយសក្តានុពលភាពប្រកួតប្រជែងក្នុងលំដាប់ជាតិ និងអន្តរជាតិ ។
ដោយវិនិយោគលើប្រព័ន្ធបែងចែកចម្រុះគ្រប់បែបយ៉ាង ៖

ដើម្បីជំរុញប្រសិទ្ធភាពនៃប្រតិបត្តិការ បង្កើនភាពងាយស្រួល រក្សាសុវត្ថិភាពជូនអតិថិជន និងធនាគារ ព្រមទាំងទប់ស្កាត់នូវរាល់ហានិភ័យផ្សេងៗតាមរយៈគោលការណ៍ និងនីតិវិធី ។
ធ្វើឱ្យប្រសើរនូវប្រព័ន្ធបែងចែកសម្រាប់ផលិតផល និងសេវាកម្មនានា និងការបង្រួញចរន្តការងារ / ចរន្តដំណើរការដោយផ្តោតទៅលើការបែងចែកការងារ និងការទទួលខុសត្រូវ បន្ទាបសិទ្ធិអំណាច ទៅថ្នាក់គ្រប់គ្រងខាងជួរមុខ និងបុគ្គលិក និងកាត់បន្ថយការបំពេញការងារដោយក្រដាស ដើម្បីធានានូវសេវាកម្មរហ័សជូនអតិថិជន ។
ធ្វើឱ្យមានអតិបរិមាណផលិតកម្ម ដោយអនុញ្ញាតឱ្យបុគ្គលិកផ្លាស់ប្តូរមុខងារតួនាទី ។

ស្វែងរក និងសហការជាមួយដៃគូដែលមានកិត្តិសព្ទ ដើម្បីលើកកម្ពស់អាជីវកម្មស្នូល ដែលជាយុទ្ធសាស្ត្ររបស់ធនាគារ ឱ្យទទួលបាននូវតម្លៃបន្ថែម សម្រាប់ជាឱកាសបន្ថែមដល់ការវិនិយោគ និងបន្តកិច្ចការយុទ្ធសាស្ត្រជាមួយភាគហ៊ុនិក ដើម្បីអភិវឌ្ឍសមត្ថភាពថ្មី និងសេវាកម្មហិរញ្ញវត្ថុផ្សេងៗទៀត ។
បន្តអភិវឌ្ឍក្រុមហ៊ុនបុត្រសម្ព័ន្ធទាំងអស់ ឱ្យមានជំហររឹងមាំជាមួយនឹងអត្ថប្រយោជន៍ប្រកួតប្រជែងនៅក្នុងទីផ្សាររបស់ពួកគេ ព្រមទាំងស្វែងរកឱកាសបង្កើតបុត្រសម្ព័ន្ធនៅក្នុងប្រទេសផ្សេងៗបន្ថែមទៀត ។
ផ្សារភ្ជាប់ឱកាសសេវាកម្មទូទាត់ ដល់ទីផ្សារមូលបត្រ សម្រាប់ចំណូលមូលដ្ឋានពីប្រតិបត្តិការមូលបត្រ និងត្រៀមបំពេញរាល់តម្រូវការ ដើម្បីចុះបញ្ជីក្នុងទីផ្សារមូលបត្រកម្ពុជាក្នុងពេលវេលាដែលសមរម្យ ។
បង្កើនកម្រិតជីវភាព និងសុខុមាលភាព ដើម្បីសុភមង្គលជូនកម្មករនិយោជិតគ្រប់លំដាប់ ឱ្យស្របតាមវឌ្ឍនាការទាន់សម័យរបស់ធនាគារ និងការរីកចម្រើនរបស់សង្គមជាតិ ។

ក្នុងឱកាស ឆ្នាំថ្មី-ឆ្នាំសកល ២០១៤ នេះ នឹងតទៅមុខ យើងខ្ញុំសូមជូនពរដល់លោកអ្នក ព្រមទាំងក្រុមគ្រួសារទាំងអស់ ទទួលបាននូវសេចក្តីសុខកាយ សប្បាយចិត្ត ចម្រើនរុងរឿងជោគជ័យ ព្រមទាំងទទួលបានជោគជ័យក្នុងនាទីការងារនិងមុខជំនួញ ប្រកបដោយគុណភាព និងប្រសិទ្ធភាពដ៏ឧត្តុង្គឧត្តម កុំបីឃ្លៀងឃ្លៀតឡើយ ៕

« ព័ត៌មានមុន
ធនាគារ អេស៊ីលីដា ឡាវ ទទួលបានប័ណ្ណសរសើរពីរដ្ឋាភិបាលប្រទេសឡាវ ព័ត៌មានបន្ទាប់ »
ពិធីអបអរសាទរខួបមួយឆ្នាំ ក្នុងការបង្កើតភាពជាដៃគូជាមួយក្រុមហ៊ុនព្រូដិនសលកម្ពុជា

ធនាគារ​អេស៊ីលីដា ​ប្រសិទ្ធពរ​ឆ្នាំ​ថ្មី-ឆ្នាំ​សកល ២០១៤

ធនាគារអេស៊ីលីដា ប្រសិទ្ធពរឆ្នាំថ្មី-ឆ្នាំសកល ២០១៤