លោកស្រី ភូរិ រតនា, អភិបាល

គណៈកម្មាធិការក្រុមប្រឹក្សាភិបាល ៖ គណៈកម្មាធិការសវនកម្ម (ប្រធាន)

ជនជាតិខ្មែរ (និងមានសញ្ជាតិបារាំង) កើតនៅឆ្នាំ១៩៧២ លោកស្រី ភូរិ រតនា បានចូលរួមក្នុងក្រុមប្រឹក្សាភិបាល នៅខែវិច្ឆិកា ឆ្នាំ២០២១ ហើយលោកស្រីក៏ជាប្រធានក្រុមប្រឹក្សាភិបាល នៃសាកលវិទ្យាល័យ ពាណិជ្ជសាស្រ្ត អេស៊ីលីដា ចាប់តាំងពីខែវិច្ឆិកា ឆ្នាំ២០២២។ លោកស្រីជា CFA Charterholder។ លើសពីនេះ លោកស្រីទទួលបានសញ្ញាបត្រថ្នាក់ក្រោយបរិញ្ញាបត្រ (DEA) និងជាបេក្ខជនបណ្ឌិត ជំនាញឧស្សាហកម្មសេដ្ឋកិច្ច បរិញ្ញាបត្រជាន់ខ្ពស់វិទ្យាសាស្ត្រ ជំនាញពាណិជ្ជកម្មបរទេស និងបរិញ្ញាបត្រជាន់ខ្ពស់សេដ្ឋកិច្ច និងហិរញ្ញវត្ថុ ពីសាកលវិទ្យាល័យប៉ារីស១ Panthéon-Sorbonne។ លោកស្រីក៏បានបញ្ចប់ការសិក្សាពីវិទ្យាស្ថានអូស្ត្រាលី សម្រាប់អភិបាលក្រុមហ៊ុន (GAICD)។

លោកស្រី រតនា មានបទពិសោធន៍២៥ឆ្នាំ ក្នុងវិស័យពាណិជ្ជកម្មអន្តរជាតិ ការវិនិយោគ ការអភិវឌ្ឍវិស័យឯកជន និងហិរញ្ញវត្ថុ។ លោកស្រីមានប្រវត្តិឆ្នើមជាទីប្រឹក្សា/អ្នកសេដ្ឋកិច្ច រួមទាំងមានបទពិសោធន៍ផ្ទាល់នៅក្នុងតួនាទីជាអ្នកគ្រប់គ្រងជាន់ខ្ពស់។ បច្ចុប្បន្ន លោកស្រីគឺជាទីប្រឹក្សាជាន់ខ្ពស់ សម្រាប់ការវិនិយោគ និង វិស័យឯកជនឱ្យអង្គការអន្តរជាតិផ្សេងៗ និងជាក្រុមប្រឹក្សាផ្តល់យោបល់ដល់សហគ្រាសខ្មែរ អ៊ីមផែកហាប់ និងស្មលវើល។ លោកស្រីគឺជាអភិបាលឯករាជ្យនៅធនាគារពាណិជ្ជមួយនៅកម្ពុជា ចាប់ពីឆ្នាំ២០១៤ ដល់២០២១។ លោកស្រីបានលាលែងតំណែងជា អភិបាលឯករាជ្យ នៅ I-Finance Leasing (ដោយក្រុមហ៊ុនបានលក់ទៅ គូកមីន នាចុងឆ្នាំ២០២២) ហើយលោកស្រីបានក្លាយជាប្រធានក្រុមប្រឹក្សាភិបាលនៃវិទ្យាស្ថាន ពាណិជ្ជសាស្រ្ត អេស៊ីលីដា។ បន្ថែមលើនេះ លោកស្រីគឺជាស្ថាបនិក និងជាប្រធានក្រុមប្រឹក្សាភិបាលនៅ Cambodia Community of Investment Professionals (សមាគមន៍ CFA នៅកម្ពុជា) ដើម្បីបណ្តុះបណ្តាលជំនាញក្នុងស្រុកផ្នែកហិរញ្ញវត្ថុ ដើម្បីលើកកម្ពស់កម្ពុជាឱ្យក្លាយជាគោលដៅវិនិយោគ។ តួនាទីកន្លងមកនៅកម្ពុជារបស់លោកស្រីមានជាអាទិ៍ អភិបាលប្រតិបត្តិ EuroCham Cambodia ពីឆ្នាំ២០១៤ ដល់២០១៨ ទីប្រឹក្សាធុរកិច្ចនៅ DFDL ដៃគូនៅ private equity firm Cambodia Emerald នៅឆ្នាំ២០០៨ និងអភិបាលនៅ CCFC (French Cambodian Chamber of Commerce)។ លោកស្រីធ្លាប់បម្រើការងារនៅប្រទេសស្វីស ក្នុងតួនាទីជាអ្នកគ្រប់គ្រងផលបត្រ នៅធនាគារឯកជនមួយ និងជាអ្នកសេដ្ឋកិច្ចនៅ UNCTAD។